Tagged: 和牛刺身

0

【全港首間立食燒肉店 超抵價食日本A5靚和牛】阿久根和牛立燒店

喺日本搵食,相信大家都試過立食乜乜乜,壽司食得多甚至立食燒肉都開始興起! 依家連香港都有首間立食燒肉店喇,就係旺角新開嘅阿久根和牛立燒店,主打食日本和牛,店內環境闊落舒適,就算企喺度食都唔會覺得擠逼,而且油煙味唔重,唔怕食到成身燒烤味喇! 唔好以為食和牛價錢一定好貴喎,呢度最平12蚊就可以食到一塊日本和牛,抵到爆!靚和牛其實唔使燒好耐就食得,真係啱晒企喺度食,加上香港人生活節奏咁快,立食燒肉就快靚正啦! 除咗單點,當然仲有定食選擇啦! 和牛胸腹肉定食(HKD98/5pcs)包前菜、麵豉湯同米飯,牛肉由廚師發辦,會喺上下前中後胸腹肉中取其中一款。 當日小編食嘅後胸腹肉,雪花睇落非常均勻。太多選擇唔知揀咩牛食?師傅建議可以由胸腹肉食起,口感偏腍身,牛味仲好濃郁!食完胸腹肉,下一款就可以食埋唔同部位。 上至下:前胸部(HKD22),後腿肌(HKD18),三角肋肉(HKD20)同肩胛(HKD20)。食完先知牛可以有咁多變化,唔同部位都會有唔同嘅層次同口感,下次食牛唔使淨係叫西冷同肉眼啦,其他部位一樣咁好食㗎! 呢四款入面,小編覺得肩胛肉最特別,因為肩胛位平時郁動得最多,肌肉發達,夠好肉又有韌勁。 和牛款式多之餘,連調味料都有好多選擇,除咗有一般嘅柚子鹽或者白松岩鹽,仲有唔同嘅辣粉挑戰:左起:海鮮味辣粉,蒜蓉味辣粉同十萬度辣粉。小編試咗少少十萬度辣粉,開頭食落去冇咩感覺,點知隔咗3、4秒就開始嚟料,後勁超強,真係唔嘢少呀!唔怕辣仲可以挑戰埋一百萬度辣椒油(右),小編唔敢挑戰喇,等你哋報告啦! A5和牛刺身(HKD38/推廣價),勁抵呀,唔係講笑,三十零蚊就食到A5和牛刺身! 師傅即時手切新鮮和牛刺身,淋上柚子豉油、洋蔥絲、蔥絲同薑絲等,一啖放晒落口,口感極之軟滑,牛味又濃,真係食過返尋味呀! 除咗可以立食平價靚貨燒肉,餐廳喺星期五、六有時仲會有突擊進行嘅和牛拍賣,以100蚊起跳,拍賣一塊250-300g嘅和牛,價高者得。想食又想玩,記得去體驗吓啦!   阿久根和牛立燒店 地址:旺角白布街2-24號藝興大廈8號舖 電話:2697 6988 營業時間:星期一至四及星期日:18:00-01:00;星期五至六:17:30-02:00

0

【港版深夜食堂新蒲點 日廚坐鎮關東煮料理】和家

有睇開《深夜食堂》嘅,心底裡都總有問過自己,唔知幾時香港先真係有間深夜食堂呢呵?機會嚟喇,最近真係有間名副其實嘅深夜食堂開咗啦! 和家 Nagomiya開喺銅鑼灣,由日籍主廚親自烹調關東煮,夜晚先開始營業,做到凌晨四點喎,啱晒夜貓子啦! 重點係,唔好以為關東煮好似好簡單咁,餐廳嘅每一款食材都經過嚴格挑選,有啲喺日本都好少見添㗎! 高湯蛋卷(HKD60),用咗關東煮高湯加入蛋漿煎成嘅厚蛋卷,每一啖都散發住高湯嘅清甜鮮味,而且鬆軟得嚟仲帶點綿密嘅口感,真係好好食㗎!唔好以為易煮呀,有時愈簡單嘅食物反而愈難整得好食,呢個蛋卷係非常考心思同功夫呢,睇到已經流晒口水喇! 左:大阪名物牛筋土手燒(HKD40),土手燒係當地非常有名嘅美食,同關東煮嘅風味唔同,牛筋土手燒味道濃郁又帶甘甜,而且牛筋軟嫩多汁,每一啖都食到滿滿嘅膠質同牛肉嘅香濃滋味。右:大阪名物牛腸土手燒(HKD40),食落口一啲都冇內臟味,切成圈狀再熬煮嘅牛小腸唔止吸收晒湯汁嘅精華,口感仲非常爽脆添! 關東煮:赤蒟蒻、油豆腐、炸牛蒡魚餅、炸魚餅(各HKD35);北海道馬鈴薯、和風雜菜魚腐(各HKD25),個人覺得炸牛蒡魚餅非常有驚喜,外軟內脆,係從來未食過嘅口感;赤蒟蒻係喺日本比較罕見嘅食材,用咗獨創嘅方法加入紅色嘅氧化鐵,可以作為補充鐵質嘅人氣健康食品!北海道馬鈴薯都好正㗎,食落去差啲以為係蕃薯,因為實在太甜喇,加上皮薄肉嫩,煮完之後甜味更加出,係非常高質嘅食材嚟㗎! 和牛刺身(HKD150)選用鹿兒島出產嘅A5和牛,切片做成刺身,等客人可以品嚐到和牛最原始嘅美味,加上特製嘅柚子胡椒,簡單嘅調味令牛肉鮮味更上一層樓。 高湯炊飯(HKD80),小編極力推薦呀!將關東煮高湯加入砂鍋,再配合火喉,加上白蘿蔔絲、昆布、柴魚同雞皮等配料,口感十足,一定要試呀! 滑蛋雞肉(HKD80),雞肉濃郁得嚟又唔油膩,香氣四溢,肉質嫩滑,飲埋啖湯,啖啖都係精華。 和家 地址:銅鑼灣軒尼詩道499號永光商業大廈10樓 電話:2369 8281 營業時間:星期一至日:19:00-04:00;(星期日休息)