Tagged: 咖啡

0

【錦田自駕遊玩咖啡工作坊 必到壁畫村打卡談心】Local自駕遊

拍拖又係行街睇戲食飯就out喇,依家梗係去啲打卡位,上吓workshop,或者去郊外地方玩吓,最後先食餐好啦。今次等小編帶大家去錦田遊一圈啦! 文青之選 CoHee可以話開喺村屋入面,感覺好似去咗日本小區咁。 除咗喺度歎杯咖啡或者買相關用品,都有啲輕食俾你醫肚。五款吐司及雜業沙律(HKD78起)可以配農村包或法式拖鞋包, 如果你都想深入啲學沖杯靚咖啡,呢度仲有唔同嘅咖啡烘焙、咖啡沖泡workshop(HKD380/起一位)。   CoHee 地址:元朗錦田市街152號地舖 電話:6344 5575 營業時間:星期二至日:11:00-19:00(星期一休息)   親親大自然 有機薈低碳農莊以菠蘿為主題,可以參觀菠蘿園(HKD60/位,平日四人成團)之外,都可以即場買唔同嘅菠蘿食品,或者參加workshop自製㗎。 新鮮菠蘿、雪糕菠蘿包、菠蘿雪糕等等都有得食,部分可以單買,有啲就跟工作坊包埋。 如果想帶埋寵物去就睇清楚注意事項喇: 1. 攜帶寵物進入農莊請做好自主管理並協助維護清潔即可。 2. 狗隻必須領有牌照,並需同時為狗隻進行防疫注射及植入微型晶片。 3. 為方便識認,請為寵物準備名牌(註明寵物名稱及主人電話號碼)。 4. 請注意自己的寵物盡量在自己的視線範圍內,大型狗隻必須帶上口罩及牽引繩子。 5. 請隨即清理其寵物的排洩物,以免妨害公共衛生。 6. 農莊沒有提供任何寵物糧食售賣,請自備所需。 7. 若因你所攜帶的寵物構成人身安全、公共衛生、破壞公共秩序或足以危害其他客人安寧時,如經職員勸阻無效,本農莊會保留請您與寵物離開的權利。   有機薈低碳農莊 地址:錦田錦河路四排石村 電話:5579...

0

【阿Sa都撐中藥行活化café 招牌牛肉漢堡食出心思】大和堂咖啡店

早排阿Sa都去嘅九龍城百年中藥行活化café大和堂,最近精減menu款式,開咗冇耐就cut食物?原來係想將水準再keep好啲同穩定啲,因為大廚對質素同感覺都好堅持,由食材選料到設計菜式都想俾到大家特別嘅感覺。咁小編覺得有冇特別?睇落去揭曉啦! 門口都可以坐兩個人,睇埋咖啡師沖咖啡,感覺好療癒。 cafe保留唔少中藥行嘅牌匾,仲搵到插畫師將翻新前嘅樣畫低留念添。呢度半自助式服務,入到去自己攞水同落單,但唔使自己攞食物,亦冇加一收費。 先嚟個light啲嘅沙律,蟹肉牛油果沙律配檸檬油醋汁(HKD108)好足料,但賣相點解唔整靚啲俾人打卡呃like呢?原來大廚想幫你撈好晒所以食材同醬汁,方便你一攞到就食得,唔使自己撈又要顧儀態,都幾細心喎。珍寶蟹肉幾甜,感覺好fresh。意外地竟然有楊桃粒,可以解牛油果嘅飽滯感,不過用咩水果會按季節轉換嘅。成碟最特別嘅係沙律菜!大廚特別揀本地牛油生菜,食落真係似搽咗牛油咁滑嘟嘟㗎! 招牌“大和堂”牛肉漢堡(HKD138)睇落細細個,其實幾厚身,都會食飽人喎。最驚喜嘅唔係有冇肉汁、件肉有幾厚,而係入面夾住嘅自家製醃青瓜!成個包有煙肉、草飼牛肉漢堡扒、車打芝士呢啲易膩嘅食物,但就靠醃青瓜平衡返晒,唔會好酸,仲食到清甜味。 甜品之中,奶茶慕斯蛋糕(HKD68)呢個配搭好切合港人口味,不過要食咗配襯嘅蛋白糖先,因為放得耐會溶。慕斯有奶茶嘅甜,但有少少搶咗海綿蛋糕嘅茶味。試咖啡就要試特別啲嘅,小編推介大和堂鮮奶咖啡(HKD48)特別加咗伯爵茶茶底,再喺面灑少少伯爵茶。雖然咖啡味唔濃,但淡淡嘅茶香令味道更加豐富。 食咁多怕肥?飲養生系列嘅袪濕降脂茶(HKD68)就搞掂啦。茶色唔濃但味道好出,入口有種回甘嘅感覺。一壺都沖到接近3杯,飲晒可以再加水添,勁抵飲喎。   大和堂咖啡店  地址:九龍城衙前塱道24號地舖 電話:2623 2006 營業時間:星期二至五:08:00-18:00,星期六、日:09:00-18:00

0

【客人掃光免費飲品吧 店主停服務:貪念更恐怖!】食焦

大嘥鬼有、自私鬼有、貪心鬼都有唔少喺左近㗎!一講到免費梗係吸引啦,但係貪到掃光晒人哋舖頭啲嘢,同偷有咩分別呢?最近銅鑼灣嘅日式生活百貨店SECRET CORNER,喺專頁度貼咗張黑白相,仲寫住「GOODBYE……香港不配有你存在」,搞到差啲以為佢哋要結業添! 嗰張黑白相其實係舖頭入面嘅drink bar角落,搞到店主要急停呢個drink bar服務,就係因為有客人將吧枱上面嘅嘢幾乎全部掃光,嗰啲仲係店主從日本帶返嚟嘅紅茶包、咖啡、砂糖,連盒裝紙巾都唔放過,新加嘅蘑菇湯都擸埋!成個過程俾店內嘅閉路電視全程拍低,店主睇到呢啲畫面真係慘不忍睹啦! 心痛又激心嘅店主,隨即喺專頁宣布停止drink bar服務,仲將「最後一位享用人」嘅打格低清片放埋上專頁,條片入面見到一位貌似上了年紀嘅女士,喺drink bar位置雙手向茶包位進發,跟住又放落自己個黑色大袋咁樣!網民同熟客見到都紛紛留言,叫店主要報警處理,絕對唔可以容忍呢啲咁貪心嘅「偷嘢」行為! 店主忍痛停止服務,仲話原先一心諗住將日本盛行嘅drink bar免費飲品吧服務引入香港,點知落得如此下場,可見香港地真係不配有drink bar嘅存在!而其實小店唔係第一次發生同類事件喇,舊年12月drink bar有三個籃入面嘅飲品,每星期總會全數「失蹤」,甚至連瓷杯碟餐具都俾人偷埋。難怪店主心痛話「雖然d飲品、蘑菇湯、砂糖、紙巾唔值錢,正正因為唔值錢,映襯人嘅貪念更加恐怖……」唔好咁貪得唔得!

0

【旺角樓上café充滿愛 貓奴必去等一隻貓咖啡】等一隻貓咖啡

旺角樓上café數之不盡,不過打正旗號做寵物咖啡室嘅就罕啲囉!今次呢間貓貓café更加特別少少,店主Ella開店目的係想令大家多啲關注流浪貓問題,好有愛㗎! 等一隻貓咖啡主力收留流浪貓,店內依家有8隻貓仔左右,大部分都係喺未開眼嘅時候就俾人棄養,所以店入面好多都只係得幾個月大嘅貓仔!為咗可以俾佢哋有一個家,Ella先會有呢個決心開舖,為貓貓建立一個家。 宣傳單張上的一句「你的每次來臨,流浪貓便會有一餐溫飽」,正正就係咖啡店嘅宗旨同理念。店舖扣除所有開支,會將每個月嘅部分收益捐俾「深水埗喵喵喵」呢個義工團體,希望幫到更多流浪貓!去餐廳食嘢之餘又幫到貓貓,真係好有意義! 入門口之前需要除鞋同消毒,店內充滿貓貓擺設同照片,完全係貓天堂!咖啡店帶有日系style,環境舒適,而且店內仲有書睇,好relax! 如果有愛貓之人想領養,呢度都有啲待領養貓貓嘅資訊,有興趣嘅可以問店員聯絡貓義工,帶俾貓貓一個 「家」。 啱啱開張一個月,所以店內暫時只有飲品同蛋糕提供,作為下午茶輕食之選都幾啱。入場費第一小時(HKD68)包一杯飲品、第二小時起(HKD38)同樣包一杯飲品。如果想要花茶系列/輕食系列就要額外加錢。小編叫咗玫瑰鮮奶咖啡(熱),面頭灑上玫瑰花瓣,少女心即刻爆發! 可愛貓貓杯,飲落特別滋味呀!奶味香濃,咖啡味突出又唔會話超苦澀,仲幾順喉添。 花茶系列-三花茶(加HKD20)只有熱飲。Ella話呢款多客人鍾意,三花係指玫瑰花、茉莉花同桂花。三花茶功效可以改善胃脹、美肌同舒緩情緒,女士們好啱飲!Ella落咗好多功夫喺花茶配搭之上,本身唔熟餐飲業嘅佢,每一款飲品都經無數次嘅調製先有依家嘅味道。好似花茶咁,要因應味道同功效,仲要迎合大眾口味呢! 三花茶嘅花香味撲鼻,小編覺得桂花味最突出,好清新!依家天氣開始轉涼,飲熱飲可以暖胃,飲到最後仲有玫瑰清香,小編推介呢款呀! 甜品有抹茶有口感千層蛋糕(HKD48),層層分明,食到抹茶味之餘仲有粒粒紅豆,唔怪得個名都要改做有口感啦!cream好幼滑,重點係甜而不膩,配上甘香抹茶秒殺呀! 清新檸檬藍莓芝士蛋糕(HKD28)細細件啱晒胃口細嘅朋友仔。芝士味好濃郁,口感綿密,仲食到藍莓粒㗎! 可能因為加咗檸檬,食起嚟更加fresh又唔會太甜膩,配埋杯花茶最啱feel啦! 貓貓可愛活潑,深得客人喜愛! 望咩呀你?可愛到咁犯晒規喎!貓奴們準備好未呀?   等一隻貓咖啡 地址:旺角彌敦道642-644號陶德大廈3樓642室 電話:9451 1543 營業時間:星期一至五:13:30-22:30;星期六至日:12:30-23:00

0

【牛油果百變食得又飲得 3大輕食店吸睛首選】素學堂

「好脂肪」唔怕食,1個牛油果熱量大約有230千卡、21克總脂肪(大約4茶匙油),不過近7成係不飽和脂肪,就係「好脂肪」喇!佢幫助增加好嘅膽固醇,同時降低壞膽固醇同預防心血管疾病。牛油果仲含有鉀、葉酸同葉黃素,幫助降低體內嘅鈉水平同降低血壓。咁正嘅食物當然有餐廳將佢收入menu啦,今次小編走訪3間餐廳,介紹佢哋嘅牛油果素食俾大家。 以花會友 :jrink 喺大坑嘅:jrink以售賣特色茶飲爲主,仲有其他輕食(沙律、多士等等),食物會以花做點綴,好嘗心悅目。 牛油果吐司沙律(HKD80)以歐式麵包做底,口感偏乾同麥味重啲,上面搽咗牛油果蓉,有微微檸檬嘅酸味,幾fresh。沙律菜上再灑上食用鮮花,配埋嫩滑流心蛋,篤爆佢撈落沙律菜食,味道會更香濃。   :jrink 地址:大坑安庶庇街21號地舖 電話:2284 4203 營業時間:星期二至六:12:00-20:00;星期日:12:00-18:00(星期一休息)   咖啡×水果 Athletic Juice & Espresso Bar 咖啡小店Athletic Juice & Espresso Bar隱身喺灣仔星街,仲有健康果汁同用蔬果打出嚟嘅冰沙,夏天飲唔到熱咖啡都可以歎杯透心涼嘅飲品解渴啦。 Avolatte(HKD48)將牛油果刮空倒入Latte取代咖啡杯,仲可以食埋墊底嘅牛油果蓉㗎。果香蓋過咗Latte嘅咖啡味,但奶香味夠,味道都幾match。   Athletic Juice & Espresso Bar 地址:灣仔星街2E號地下 電話:2385 1013 營業時間:星期一至五:07:00-19:00;星期六、日:07:30-19:30...

0

【韓迷朝聖食買玩 GD cafe隊啤歎cupcake】食焦

上星期BIGBANG隊長G-DRAGON(GD)現身「濟州神話世界」,係佢當兵前最後一次出席公開活動,為佢自己嘅「親生仔」GD cafe「Untitled,2017」進行開幕儀式。咁重要日子梗係逼爆現場啦,GD同所屬嘅YG老闆楊賢碩進行打手印儀式,GD咖啡店正式開張,亦為「濟州神話世界」呢個娛樂城開咗個靚頭彩! 其實唔止V.I.P(BIGBANG粉絲)緊張,旅客同食客都一樣咁期待㗎,事關「濟州神話世界」除咗俾粉絲朝聖,仲有唔少食店,可以一次過滿足晒食買玩三個願望!當日有份去朝聖嘅V.I.P同小編講,雖然GD入咗cafe招呼完客人無耐就閃走咗,但係cafe入面一樣有唔少GD嘅精心傑作㗎! 為咗要趕喺GD入伍前開幕,依家cafe暫時只係得啤酒同咖啡呢啲飲品供應,開幕當日見到嗰啲靚靚cupcake其實要到3月中先真正有得賣。睇得唔食得,但係見到啲cupcake嘅賣相都靚過人,照估計正式開賣嗰日肯定好搶手!咁一支GD啤酒賣幾錢?圍起要成百蚊港銀一支,抵唔抵?唔問啦,去得嘅就覺抵俾㗎啦! 隊吓啤飲吓咖啡,仲有乜做?梗係要兜返個round先夠滿足啦!cafe入面有兩大朵郁得嘅巨型花,又紅又黃好大朵好壯觀,現場仲有唔少紀念品賣,開幕嗰日賣嘅紀念品好似襟章咁,就即刻賣斷晒喇! 食cupcake未夠飽肚點算?又唔怕啫,因為「濟州神話世界」除咗GD cafe之外,仲有YG社長楊生打骰嘅其他餐廳,又有西餐又有烤肉,咁當然最有話題梗係GD cafe啦!

0

【激罕土耳其特色小店 食羊肉烤餅玩咖啡占卜】我愛伊斯坦堡

喺香港好似比較少東歐餐廳,今次小編就搵到呢間我愛伊斯坦堡,主打土耳其特色菜,雖然環境唔大,不過就好舒服,多咗份溫馨。一入到去就好似去咗土耳其咁,每一樣擺設都好靚好精緻,而且仲有貓貓坐陣,上去chill返一日半日都唔錯㗎! 秘製招牌烤雞焗飯(HKD158/半隻)老闆Grace話呢隻雞最受歡迎,好多客人都好鍾意,入面係釀咗啲香草飯,再醃製隻雞,工序都好繁複,所以隻雞出到嚟先咁滑咁入味。 比較特別嘅係會有乳酪俾你點雞/配飯,嗰種口感從來未試過,好有驚喜㗎! 招牌羊肉配烤餅(HKD115)完全係小編最愛!本身好怕羊羶味嘅小編都食到唔停口,入面有好多羊肉粒、蕃茄同洋蔥,食落酸酸味味開胃又多汁,而且羊肉有咬口得嚟又唔會好似香口膠咁咬唔爛,絕對要試啦!係正宗嘅土耳其菜呀! 自家土耳其乳酪芝士炸物拼盤(HKD98)材料好簡單,只係加咗芝士同芫茜喺入面,但炸完之後嘅口感又會完全唔同,估唔到咁簡單嘅材料就整到咁好食又有風味嘅小食。 提子葉包飯(HKD58),呢個menu上面冇,係新產品嚟㗎!算係冷盤小食,又係一樣酸酸哋,不過可能就唔係好啱香港人口味喇。 土耳其咖啡(HKD35)一路整一路睇到小編心心眼。咖啡放喺沙爐上面煮,係土耳其傳統嘅煮咖啡方式。 Grace仲話,如果喺土耳其飲完杯咖啡,間唔中仲會有職員走埋嚟問你玩唔玩咖啡占卜,係一個好地道嘅特色文化嚟㗎! 小編嗰日都玩埋一份,想試吓嘅朋友就要提早預約!咖啡占卜(HKD250/一次),真係估唔到咖啡都可以占卜,好神奇呀! 仲有啲土耳其特色嘅糖果,好似土耳其龍鬚糖(HKD88)同土耳其雜錦軟糖(HKD102),包你一試難忘,喺香港絕對食唔到嘅口感呀! 我愛伊斯坦堡 地址:旺角通菜街9-15號1樓A室 電話:6800 7776 (Whatsapp) 營業時間:星期一至日:13:30-22:30;(不定期休息,一星期一天,敬請預約)

0

【超特別!伯爵茶窩夫】慕茶

提起中國茶,大家都會即刻聯想起同屋企人飲早茶,或者中國茶道茗茶。觀塘有間特色cafe叫做慕茶,由四個女仔合辦,將茶大玩特玩,製作出好多唔同嘅特式茶品。例如中國茶味雪糕、抹茶味意粉等等。鍾意茶嘅你,一定要去慕茶,得閒飲茶! 餐廳環境素雅,燈光柔和,寧願舒適。適合同三五知己享受寫意時光。 茶助抹茶卡邦尼大蝦意大利粉(HKD90)意粉茶味香濃,食落有茶味嘅甘甜,伴有芝士粉、香草同蛋黃,入口有少少鹹味,散發陣陣茶香。趁熬刺穿蛋黃混和,意粉會更顯滑溜。四粒蝦仁爽甜實肉,大蝦則更較為入味,味道相比之下較鹹香。 貴族伯爵茶窩夫繽紛樂園配2款雪糕(HKD80),伯爵茶窩夫好香好鬆軟,食完都散發出茶香,另外兩球雪糕分別係玄米白茶味同玫瑰花茶味。玄米白茶食落好多玄米粒粒,味道清香淡雅。而玫瑰花茶味,入口味道濃郁,玫瑰花味入口即刻散發出嚟! 紫薯湯Affogato配手工玄米茶雪糕(HKD48)暖暖嘅紫薯汁入面有粒粒紫薯,將紫薯汁倒入雪糕,雪糕外層輕輕融化。食嘅時候冷熱交融,體驗獨特。慕茶嘅雪糕根據意大利製法全手工製,口感比一般雪糕綿軟幼滑,較為黏身,而且空氣密度低,雪糕留於口腔時間較長,可以慢慢細味。 除咗茶之外,鮮奶咖啡(HKD36)亦非常香滑,而且每個咖啡杯都有可愛動物頭,飲飲下可能仲會有得意動物同你Say hello添! 慕茶 地址:觀塘開源道55號開聯工業中心A座726室 電話:6257 9982 營業時間:星期一:12:00-19:00 星期二至五:12:00-22:30 星期六:13:00-22:30 星期日:13:00-18:00

0

【秋楓蜜意新口味】Pacific Coffee

嚟到秋天,係咪即刻諗起滿山紅葉同甜蜜蜜嘅蜜糖呢?Pacific Coffee新出楓糖系列,就可以一次過滿足晒你兩個願望喇! 楓糖本身夠晒滋潤,啱晒秋天乾燥嘅天氣。去到飲返杯溫和嘅楓糖牛奶咖啡(HKD39),或者楓糖核桃牛奶咖啡(HKD39),真係幾乾燥都無有怕! 潤完喉仲想食多少少?配埋以爽脆蘋果青瓜餡、鮮甜雞肉、Mozzarella芝士同比高包製作而成嘅雞肉蘋果芝士包(HKD36)就啱晒你喇! 楓糖系列又點少得甜食呢?指定分店仲有楓糖核桃窩夫配士多啤梨雪糕(HKD48)同埋楓糖香蕉窩夫配朱古力雪糕 (HKD48)添呀!兩種口味都係以煙韌窩夫灑上糖漿同埋楓糖核桃作為基底,一種會配上新鮮士多啤梨、醬汁同Movenpick士多啤梨味雪糕;而另一種就會配新鮮香蕉同Movenpick朱古力味雪糕,真係引死人啦! 期間限定去到2016年11月8日咋,心動嘅你就要快啲行動喇! 楓糖牛奶咖啡及楓糖核桃牛奶咖啡 於全港Pacific Coffee 有售 (港鐵紅磡站分店及Pacific Coffee Monogram除外) 雞肉蘋果芝士包 於全港Pacific Coffee 有售 (愉景灣碼頭,梅窩碼頭,中環娛樂行,沙田新城市中央廣場,港鐵紅磡站,及Pacific Coffee Monogram 除外) 楓糖核桃窩夫配士多啤梨雪糕及楓糖香蕉窩夫配朱古力雪糕 於指定分店有售(包括:元朗錦繡花園、尖沙咀漢口道、深水埗曼克頓山、銅鑼灣希慎廣場、銅鑼灣Pacific Coffee Emporium、銅鑼灣登龍街Midtown、太古康怡廣場及紅磡黃埔花園)