Tagged: 咖喱

0

【Super Girl Yanny新開打小人餐廳 滑嘟嘟海南雞配香口油飯】圍威喂

唔去鵝頸橋都有得打小人?冇錯呀,因為Super Girl Yanny同朋友一齊喺荔枝角新開嘅東南亞菜餐廳圍威喂,逢星期六14:00-16:00都請嚟喺鵝頸橋專業打小人嘅姐姐駐場,只要點嘢食就可以享用呢個服務發洩吓!如果夾唔到星期六嚟,都可以寫低字句掛上牆。大家發洩完一定有心情食餐勁啦,即刻睇吓呢度嘅惹味人氣菜式先。 呢套就係打小人姐姐嘅專用工具喇。 店內嘅牆畫都同餐廳名一樣,提忙碌嘅香港人要輕鬆啲。 都真係有人將返工嘅怨氣寫低喺度喎。 如果晚市嚟食招牌嘅海南雞(HKD138/2-3人份),半隻雞分量啱啱好可以人人試啲。雞肉滑嘟嘟仲幾多肉添,皮同肉之間亦有層「啫喱」,口感一流。如果想配香口又粒粒分明嘅油飯(HKD18/碗),一碗都幾多,如果兩個女仔可以share食㗎。 檳城炒粿條(HKD98)係惹味啲嘅炒河粉,有爽口嘅蝦肉、油香十足嘅臘腸、嗦晒味嘅芽菜,鹹香得嚟唔會太重口味。 呢度既然主打東南亞菜,梗係要試咖喱啦!呢道黃咖喱軟殼蟹(HKD148)嘅咖喱唔太辣,椰香味會慢慢滲出嚟,絕對要撈飯囉。兩隻軟殼蟹肉質飽滿,沾滿咖喱汁都幾惹味。 鍾意食串燒的話可以點串燒拼盤(HKD188),有齊厚切牛舌、大蝦、沙嗲豬肉同沙嗲雞肉各2串,肉量十足,其實兩個人食都幾飽。 鍾意小食嘅又可以點圍威喂拼盤(HKD128),脆卜卜春卷、彈彈牙魚餅、扎扎跳蝦餅同泰式香葉包雞四款小食之中,後面兩款啖啖肉得嚟,泰式香料味道相對比較重,而雞肉仲幾滑添。 想refresh吓味蕾可以點杯新鮮果昔木瓜奶奶(HKD34/右),果味好重,奶味就偏輕淡;或者好多人鍾意嘅金桔話梅蘇打(HKD22)都一樣出色,杯底有唔少金桔肉,令成杯味道好濃郁,但唔會有甜膩感喎。   圍威喂 地址:荔枝角青山道495號誠信中心地下1號舖 電話:2350 6268 營業時間:星期一至六:07:30-22:00(星期日休息)

0

【咖喱飯盒驚現不明生物頭? 網友全家嚇到嘔急報食環】食焦

真係睇見張相都嘩嘩聲呀!加料唔係加到咁吓嘛?有網友喺連登開po「[求救] 飯盒入面有不知明生物」,有埋大大張相,嗰盒咖喱牛腩外賣飯盒,入面真係有隻不明生物頭嘅物體喎,擺明唔會係牛腩啦!樓主話「有冇人知係咩嚟 睇落個皮似爬行動物 仲要錫左佢一啖先見到」! 睇到張咁鬼恐怖嘅相,成班高登仔即刻起哄啦,除咗講核突核突核突之外,個個都發揮靠估精神,有人話係蜥蜴,亦有唔少人話係蛤蚧,即係大壁虎喎,網友仲熱心到專家上身一樣,列舉埋蛤蚧嘅功效,係乜呢?原來可以「治療陽痿。主治腎陽不足、精血虧虛而致的陽萎……」哦! 又有唔少網友貼埋好多蛤蚧相出嚟,講晒藥用功效,有啲仲話會用喺滷水度喎,真係唔講唔知喎!至於苦主就話自己屋企人都嚇到嘔,網友叫佢要報食環,苦主都話已經報咗喇!當然亦都有人叫佢留言開名係邊間舖頭,不過佢就冇開名喇,苦主只係話呢盒恐怖外賣係來自屯門工業區嘅茶記喎! 其實就咁睇張相,的確係一個疑似不明生物嘅頭出現嘅,似爬行類動物,你話係蜥蜴又得、蛤蚧又得,反正一日冇攞去化驗,一日都唔會知真相喇!之後亦有網民追問事情發展,不過樓主就好似潛咗水咁冇晒反應喎!驗咗咩未知,但肯定以後對任何咖喱類食物都有陰影喇!

0

【鵝頸街市地踎首選 完美咖喱+脆皮爆汁燒鴨】街霸

銅鑼灣多嘢食係人都知,基本上中西日韓泰乜菜都有,幾乎噏得出都有得食咁滯,又有唔同國家嘅過江龍餐廳,真係多到數唔晒!中高檔餐廳選擇多,咁銅記嘅地踎菜有冇正嘢呢?今次街霸就帶你去時代廣場……後面嘅鵝頸街市熟食中心! 一入到熟食中心就見到九記車仔麵排晒長龍,不過今日街霸要介紹嘅唔係佢,係行過少少嘅清真惠記!雖然場面冇九記咁墟冚,但一樣坐滿晒人㗎,而且流動性超大,好多附近返工嘅朋友坐低埋頭扒兩扒食完就走,完全係打工仔飯堂格局! 最出名係咖喱羊腩同牛腩,咖喱汁仲被譽為「完美咖喱」同「白飯剋星」添!好多朋友仔都話因為個咖喱汁太好味所以要嗌多碗飯。今次街霸去到嘅時候,羊腩已經一早賣晒喇,真係超受歡迎喎!冇晒羊腩,惟有叫咖喱牛腩飯(HKD48),落單唔使5分鐘牛腩飯已經送上枱面。店員姐姐全程笑晒口,感覺好親切! 咖喱汁顏色望落相當濃郁,唔係港式咖喱feel,聞落帶有印尼咖喱嘅香料味!牛腩完全索晒啲汁好入味,不過入口略嫌有少少韌!咖喱汁名不虛傳,辣辣哋好過癮,味濃但不over,真係白飯最佳拍檔!街霸見到同枱嘅食客都清晒碟,一滴汁都冇剩呀! 燒鴨咁出名唔係唔食呀?馳名掛爐燒鴨(HKD125/HKD74/HKD44)有三個分量可以選擇,街霸叫咗細嘅例牌試試。係鴨髀呀!喺冇特別要求嘅情況下,竟然獲得鴨髀一隻,太surprise喇!咬落肉厚又juicy,肉質完全唔嚡,夾埋鴨皮上嘅油脂頂級滋味!好耐冇食過令人驚歎嘅燒鴨了!難怪咁多人讚口不絕啦! 另外古法蝦子柚皮(HKD15)亦好出名,不過咁啱嗰日又係已經賣晒!其實依家都冇乜地方仲做緊柚皮㗎喇,如果大家想食,記住要早啲去呀! 街霸最愛:燒鴨同咖喱……街霸覺得燒鴨真係非食不可!皮脆肉嫩多汁嘅燒鴨唔係度度食到,兼夾價錢又相宜!不過如果大家貪心想食咖喱又想食燒鴨,其實有個隱藏叫法嘅!食開嘅熟客都會叫燒鴨飯加咖喱汁,咁就兩樣都食到喇! 清真惠記 地址:灣仔寶靈頓道21號鵝頸街市1樓鵝頸熟食中心5號舖 電話:2574 7731 營業時間:11:00-18:00

0

【愛秩序灣街市正宗印度菜 咖喱雞肉絕配芝士烤餅】街霸

今集街霸向港島出發!喺筲箕灣嘅愛秩序灣街市最出名可能係冬天限定嘅飯焦煲仔飯,小編等凍啲再同大家介紹。今次介紹呢間Little Curry House,食返餐正宗印度菜!   同好多熟食中心一樣,呢度幾間食肆嘅食客係要share一個大嘅area,好似food court咁,不過大家各自嘅「地盤」唔多唔少都有分別嘅!呢間印度菜餐廳嘅老闆同員工全部都係印籍人,但係唔使驚難溝通喎,當日店員一見我坐低即刻話:「今日想食啲咩呀?」超流利廣東話,勁呀!即刻有返晒親切感啦!   食得咖喱就梗係要配薄餅,小編首先叫咗呢個咖喱雞肉(HKD62)同埋芝士烤餅(HKD25)。可能你會話70幾蚊街市價都幾貴喎,但其實佢都真係幾大兜吓,滿到瀉,而且真係有好多雞!幾個人一齊食share可以嗌多兩、三個餸其實都抵㗎!咖喱係有少少辣嘅,好惹味,配烤餅一流喇!芝士烤餅咬落有啲啲芝士餡喺入面,雖然做唔到牽絲嘅效果,但口感唔錯,外皮有少少煙韌,幾有咬口,正呀! 另外老闆娘極力推薦呢個印度香燒雞肉(HKD78),一場嚟到即管試吓啦!用鐵板上嘅,上碟時候「咋咋聲」,香味四溢。食落口有微微辣味,伴碟嘅洋蔥爆得超香,老闆娘果然冇介紹錯呀! 通常食印度菜永遠只會見到橙色、紅色、黃色甚至青色嘅咖喱,真係好少見到綠色㗎喎!原來係菠菜燴牛肉(HKD72)呀!菠菜汁食落唔辣,但香料味就好足,不過菠菜味就唔係好食得到喇!對於唔食辣嘅朋友嚟講係一個好選擇,因為呢個菠菜汁配埋薄餅食真係一絕㗎!   街霸最愛:如果我話我最鍾意佢個芝士烤餅……哈哈,唔好話我冇志氣住!薄餅喺印度人眼中係好重要嘅主食,同我哋廣東人嘅白飯一樣!個個都識煮,但真正煮得好味真係冇乜邊個㗎咋!我鍾意佢呢度嘅薄餅有少少厚度,點落咖喱汁度會有少少「索」咗啲汁入去,咬落去時超有咬口,令人忍唔住係咁搣、係咁點醬、係咁食唔停口呀!你話喇,成餐飯薄餅係咪先係靈魂呢? Little Curry house 地址:筲箕灣愛秩序灣道15號愛秩序灣街市熟食中心CF4號舖 電話:6901 3406 營業時間:星期一至日:11:00-23:00