Tagged: 啤酒

0

【日本金賞天丼過江葵芳插旗 招牌天婦羅25cm穴子魚】金子半之助

喺日本連續五屆攞到日本全國天丼金賞嘅金子半之助有幾好食?唔使去日本試嘅,因為佢喺葵涌新都會商場開業喇。暫時香港店會供應三款親民價招牌丼飯,其中一款仲有25cm超長穴子魚天婦羅添,即刻帶大家睇吓呢間帶江戶傳統味道嘅名店有幾正啦! 店內用上傳統日式裝潢,望向開放式廚房仲可以睇住師傅即製天婦羅,未食都已經聞到陣陣香氣。 炸天婦羅用上高純度芝麻油,喺炸嘅時候已經令食物「上味」。製成後淋上由江戶時代開始傳承三代,以純天然大豆製成嘅秘製醬汁,味道鹹甜適中,如果唔係重口味人士都唔使另加醬汁。而為咗令食客品嚐到熱辣辣嘅丼飯,丼碗以江戶時代嘅佐賀有田燒陶瓷工藝製作成空心底部,仲放入保溫櫃令丼碗保持暖笠笠添。 所有丼飯都有六款天婦羅,每碗會有2隻鳳尾蝦、以墨魚粒同干貝製成嘅雜錦海鮮餅、溫泉蛋、海苔同小青龍(荷蘭豆),最後一款先會唔同,所以簡單選擇想食嘅天婦羅「主角」就知邊碗啱你喇。呢碗超人氣江戶前天丼(HKD138)就以25cm超長穴子魚天婦羅,一上枱就帶嚟視覺震撼。為咗保持品質,未炸嘅穴子魚要達到指定長度同克重先會選用;不過上枱後放耐咗會變得稍硬同縮水,所以相機食先嘅朋友唔好影咁耐喇。 上天丼(HKD118)就用上鱚魚,肉身比穴子魚薄啲,細食啲嘅朋友會覺得冇咁頂肚。不過咪以為咁就唔啖啖肉,因為雜錦海鮮餅嘅墨魚粒同干貝都幾大粒,炸完仲好濕潤彈牙。 天丼(HKD98)就用上厚用嘅舞菇,兩大件咬落幾juicy兼爽口喎。如果食到咁上下覺得膩,可以食每個丼飯都跟嘅清甜漬牛蒡同海帶伴薑解膩。 雖然見到溫泉蛋好想篤爆佢,但店員教食到一半先撈蛋汁就可姒以試兩到種風味嘅飯底喇。 臨尾飲杯麥味超重嘅Suntory Beer The Premium MALT’s(HKD28/350ml)就爽晒,呢款比平時嘅日本啤酒濃味好多㗎!   金子半之助 地址:葵涌興芳路223號新都會商場1樓107-108號舖 電話:2661 8212 營業時間:星期一至日:11:30-22:30

0

【元朗熱爆船麵日賣三百幾碗 足料牛骨湯底香到暈】阿叔泰麵

最近喺元朗人氣急升,牛骨湯船麵紅到賣斷市,要休店三日調整供應量嘅阿叔泰麵依家專注於船麵款,慢慢先再推出其他麵類。點解揀做船麵?負責人之一倫哥就話:「大廚阿揚去泰國學廚半年,加上太太係泰國人,識整家庭船麵,設計menu嘅時候俾咗好多意見我哋。所以九成食材都搵到泰國當地嘅靚貨源。」。不過點解唔揀元朗市中心啲嘅位置開舖呢?「我哋都想吸引其他區嘅客入嚟試,冇咁近市中心反而方便啲人泊車。其實冇諗到咁多人支持,重開之後試過一日賣三百幾碗,係之前嘅double。」連泊車位都考慮埋,咁裝修同食物更加以客為先啦! 呢度冇收加一,幾抵食。不過想抵食又抵飲可以Like & Share阿叔泰麵嘅Facebook,攞埋杯贈飲。 既然船麵係牛骨湯底,咁就先試牛肉船麵(HKD58)。湯底除咗用大量牛骨煲12個鐘之外,仲加入八角同冰糖等材料,唔怪得未食已經聞到陣香氣,味道層次仲幾豐富添。有3件厚切牛腩粒、3粒牛丸、炸豬皮同通菜,都幾多料。牛腩粒真係好正,炆得腍又仍然有咬口,仲幾有肉香添。夾埋濃味得嚟又唔會過鹹嘅湯底,係perfect match呀!麵就有四款,米粉、金邊粉、泰式河粉同粉絲,全部都係泰國當地食材嚟㗎!呢款粗河粉好滑嘟嘟,厚度係港式炒河粉同幼河粉之間,都唔錯,而且夾咗幾次影相都唔會爛到碎濕濕。碗麵做返港人正常食一碗嘅分量,女仔食可能會飽啲啲添。 有牛就有豬,豬肉船麵(HKD52)都幾多人食,同牛肉船麵嘅分別就係轉用豬肉片同豬肉丸。豬肉片都幾大片,不過肉丸質感就冇牛丸咁彈牙,不過呢個麵冇肥肉,感覺冇咁滯。泰式米粉好幼身,而且唔會浸到發脹,由開始食到尾口感都唔會點變㗎。 泰式牛扒沙律(HKD52)雖然係凍食,但牛扒依然嫩滑有肉汁喎,仲有啲爽口筋腱位,質感唔錯。呢款喺餐牌上有2隻辣椒,如果食到譚仔三少辣嘅朋友會覺得呢份都有啲辣,不過接受到嘅。 抵食推介要數3式雞翼拼盤(HKD58),有齊酸辣凍雞翼、香茅魚露雞翼、紅咖喱雞翼一共9隻。Size正常,唔係特別細嗰啲喎。雖然呢三款個名好似重口味咁,但其實調味都算啱啱好。 想飲嘢不妨試吓香茅斑蘭特飲(HKD24),飲完感覺喉嚨好fresh,香茅同斑蘭味道又融合到。想啤一啤亦得,有象啤(HKD22)、勝獅啤(HKD25)同豹王啤(HKD22)。   阿叔泰麵地址:元朗西菁街20號益輝大廈地下3號舖電話:2887 3269營業時間:星期一至五:11:30-15:30,17:30-22:00;星期六、日公假假期:11:30-22:00

0

【飲飽食醉西式啤酒宴 沙律薄餅甜品加料手工啤】掌門精釀啤酒

掌門精釀啤酒係台灣幾出名嘅手工啤酒品牌,香港店嘅酒都由台灣運嚟以保持一致品質。繼尖沙咀店之後,上月喺西營盤開分店,用酒煮嘅菜式多咗,星期六、日仲有Brunch食添,等小編帶大家睇吓新店有咩好食啦! 餐廳位置喺西營盤高街小斜坡之上,餐廳環境就好開揚。 沙律都可以落酒?掌門四款沙律之中有兩款加咗酒,火箭菜意大利火腿無花果沙律(HKD108)仲係廚師推介添!廚師喺沙律汁落咗精釀啤酒「酸酸」,酒味比較薄,但味道酸啲,撈埋新鮮嘅無花果、火箭菜、Parma Ham好開胃又夠fresh!最鍾意佢加埋核桃,有咬口,感覺更加健康。 意式辣肉腸薄餅(HKD118)喺搓薄餅底嘅時候以招牌精釀啤酒「55%小麥」代替水,令薄餅口感煙韌啲,不過一樣焗得好香脆。餅底搓得算薄,意式辣肉腸同車打芝士海量式鋪滿喺面,食肉獸最愛呀! 海鮮意粉(HKD148),大廚喺炒意粉時,加入以大量美式啤酒花為風味特色的暢銷酒款「柒拾肆-加強版」,務求強調香氣,襯托海鮮鮮美。 安安檸檬芝士蛋糕(HKD58)用咗啤酒花能增加果香,質地好順滑同厚實。芝士味同檸檬味都好出,配埋雲尼拿果仁有多重享受添。 試完用酒煮嘅菜,輪到新店星期六、日嘅Brunch喇,一樣好足料囉!三杯雞多士盒(HKD78)外形有啲似台灣小食「棺材板」。嫩滑嘅雞髀肉用薑片、蒜頭、辣椒同葱爆香,惹味又有少少辣,再回鍋落埋「三杯」,即係黑麻油、生抽、老抽同冰糖一齊炒。收乾之後再加埋九層塔,肉有少少焦又好鬼香。不過最點睛係溫泉蛋喇!篤爆佢,將蛋汁同雞肉撈勻更香滑。加埋即烘脆口多士盒,真係飽到上心口。 仲有將蛋漿加入蘑菇、雞肉粒、薯仔粒、紅椒、青椒、菜同肉腸,煎成厚厚嘅香腸淡色艾爾意大利蛋餅(HKD68)。口感好豐富,因為落咗勁多料。蛋餅煎到啱啱好,仲有啲蛋汁添。 當然要飲杯酒落肚啦,新款Cocktail之中,小編幾鍾意狂野烏梅(左:HKD68/杯)。以味道辛辣嘅Tequila龍舌蘭酒同Cherry Brandy櫻桃白蘭地做基酒,加上重口味的烏梅汁同清新嘅青檸汁。入口即刻feel到酒精濃度高,酸中帶甜都啱夜晚飲。 仲有炭燒西柚(中:HKD68/杯),相比之下感覺好清爽,lunch飲都好舒服。以Gin酒做基酒,簡單配上西柚汁同炭燒烏龍茶,口感順滑,同時加入西柚粉紅色糖漿都唔會覺得甜,反而餘韻有種果茶嘅香氣添。 如果都係鍾意啤酒,大吉大利(右:HKD49/250ml)都唔錯,以科隆Kolsch啤酒加入大量新鮮金桔製成,因為「吉」同「桔」係同音字,所以攞個好意頭叫做「大吉大利」。味道清新但有啲酸甜果香,反而冇咩啤酒花嘅苦味。   掌門精釀啤酒 地址:西環西營盤高街53-65號地下富裕大廈地庫 電話:2650 0511 營業時間:星期一至日:12:00-23:00

0

【父親節訂位食咩好?老中青三級制任你選】名館、FEATHER & BONE、FRITES BELGIUM ON TAP

父親節好快到喇,大家諗到同爸爸食啲咩未呢?今次小編搵咗3間唔同類型嘅餐廳俾大家選擇,有中菜、西餐肉食同啤酒飲,總有一樣啱老中青唔同年代爸爸心水嘅! 長輩級中菜  名館 名館係一間新派中菜館,不論裝修環境定係碗碟擺設,都睇得出玩味十足,一啲都唔似傳統中菜館,好有特色。   宮廷點心盤(HKD188)造型係非常精緻,西式有得high tea,中式一樣都可以。點心盤入面有三款前菜,酸酸哋帶點微辣,非常開胃。食完前菜,就可以食埋個老鼠愛大米同天鵝酥,天鵝酥入面係滿滿嘅紫薯蓉,口感超正,綿密得嚟仲好甜。最後唔少得要食埋個甜品啦,有兩款味道選擇,呢個中式high tea夠晒特色! 厚切叉燒皇(HKD88),長輩級爸爸一定鍾意食燒味,叫呢道菜實冇死呀!重點係,超超超超好食!厚切不在話下,瘦肉同脂肪比例控制得啱啱好,就算有脂肪但一啲都唔會肥膩,反而仲好想食多兩嚿添!配埋個叉燒汁真係一流呀! 沸騰水煮滑魚片(HKD298)分量十足!就咁睇好似得魚肉,但其實入面仲有埋豬紅、午餐肉同薯粉等,好有內涵㗎。原来師傅仲專程返內地學廚,原汁原味咁將四川嘅水煮魚帶嚟香港,再改良成香港口味,唔會好辣但又食得好過癮。 和風櫻花蝦炒飯 (HKD118),最最最有驚喜就係呢個飯!加咗鰻魚汁去炒,再撈埋櫻花蝦,食到蝦嘅鹹香味,香脆可口,食多兩碗飯都仲得! 名館 地址:中環擺花街1-7號1號廣場1樓 電話:2180 0768 營業時間:星期一至日:11:30-23:00 大胃爸爸最愛   FEATHER & BONE FEATHER & BONE為咗慶祝父親節,斧頭扒每公斤(HKD399)咋!由六月頭開始供應,絕對物超所值,大啖肉啱晒活力爸爸啦! 除咗斧頭扒,最近FEATHER & BONE仲出埋日間餐牌,好似Smoked Brisket(HKD140),牛腩軟腍入味,加上有煙燻過,味道更加突出。 Galician Octopus(HKD190)見到都胃口倍增!八爪魚超大隻,啖啖都係肉,超級肥美呢! FEATHER & BONE 地址:西環西營盤德輔道西321號瑧璈地下1號舖 電話:3705...

0

【串炸都玩Fusion 日本師傅串出新口味】Jan Jan 串揚專門店

串燒?炸物?唔知點揀?一次過喺Jan Jan 串揚專門店食晒啦!總店係來自大阪有名嘅Jan Jan Kushikatsu,係當地人氣串揚連鎖專門店。香港唔係好多地方有得食地道日本風味嘅串揚,佢哋連整麵包糠嘅麵包都喺日本運嚟,唔怪得有唔少日本人嚟捧場啦。  呢度有吧檯同日式廂房揀,如果星期五、六嚟要早2-3星期book枱。佢哋月尾仲有新menu推出,約定朋友就差唔多有得食喇。 總店派咗有12年經驗嘅日籍大廚嚟香港坐鎮,佢知道要影相就好細心咁設計盤景介紹埋用咗咩材料添。 Minced Duck Breast(HKD31/串)將鴨胸肉人手切碎,炸過之後肉香噴噴,裡面溝咗少少洋蔥碎仲增加口感同甜味。雖然啲肉切到極幼細,但咬開之後都唔會散開㗎。面頭灑上少少紅蔥同芥末,但唔會覺得辣。 唔想淨食肉咁罪惡感?King Trumpet Mushroom(HKD32/串)裡面係用豬肉包住雞脾菇,好煙韌彈牙。上面係自家調製嘅蠔醬配有山上魚子之稱嘅地膚子,口感都真係幾似魚子㗎。可能因為蠔醬嘅關係,都幾鮮味。 海膽湯葉卷(HKD39/串)湯葉係日本腐皮,味道雖然比中國腐皮清新啲,但豆香味依然好濃郁。卷埋紫菜一齊炸,兩者嘅味道相輔相成,北海道海膽都非常鮮甜㗎。 黑松露芝士(HKD36/串)用黑松露、薯仔、芝士溝勻,口感煙韌得嚟有啲creamy,但又唔會係流心嗰種feel。黑松露香氣突出,就算面頭再配巴馬火腿再加少少黑松露都唔會好鹹同膩。 呢度食嘢唔怕熱氣,老闆會無限量提供椰菜俾食客清熱㗎。   Jan Jan 串揚專門店 地址:灣仔皇后大道東100號2樓 電話:2157 1408 營業時間:星期一至四: 12:00-15:00;18:00-23:00,星期五:12:00-15:00;18:00-00:00,星期六:13:00-15:30;18:00-00:00,星期日:13:00-15:30;18:00-23:00

0

【隊完啤再歎 $288至抵食超巨龍蝦海鮮拼盤】H.OURS Bar & Restaurant

去酒吧當然想盡情啤一啤,但又想歎埋有水準嘅美食喎,想同時滿足晒呢啲要求?H.OURS Bar & Restaurant肯定係呢期最好選擇啦! 位於太子嘅H.OURS Bar & Restaurant,全場高身酒吧櫈設計,都算坐得幾舒服。每邊都設有電視,360°C零死角唔使就住就住。 嚟到梗係飲咗先講,Paulaner Draught Beer(HKD78/Normal),一大班人嘅話就可以叫Tower(HKD308/2L、HKD448/3L),係拜仁慕尼黑足球隊至愛嘅啤酒,每次贏波都係飲呢款酒慶祝㗎!去唔到現場睇球賽,都可以飲啖慰藉吓心靈嘅。 另外都有唔同食物俾你揀,冷盤小食推介巴馬火腿配哈蜜瓜(HKD98)。巴馬火腿揀選14-21個月之間嘅火腿,哈蜜瓜唔會太大粒,一啖啱啱好咬到。 至於重頭戲就係連海鮮都有得食,海鮮拼盤(HKD288配波士頓龍蝦 或 HKD258配麵包蟹)好適合情侶拍拖孖住歎。仲有青口、帶子刺身同翡翠螺配埋,呢個價錢算大件夾抵食啦。 炸物配啤酒一定唔少得嘅,炸脆香雞(HKD38/1件、HKD98/3件、HKD168/6件)有咖喱味同辛辣味。炸粉用咗泰國入口嘅材料,香料味唔會好重,落埋檸檬汁就無咁滯。 另外,Happy Hour時段16:00-20:00可以優惠價HKD160飲2杯啤酒配一款小食。趕唔到Happy Hour唔緊要,任何時段飲紅酒、白酒或大酒都會送一款小食㗎。   H.OURS Bar & Restaurant 地址:太子通菜街230E地下 電話:2381 1178 營業時間:星期一至日: 16:00-04:00

0

【認真!入到嚟最緊要Hea 家的感覺唔嚟過唔覺】Casa

香港人日做夜做,最大心願都係辛苦完一日有得舒舒服服咁抖返下。想無憂無慮咁hea返陣,去呢間位於西貢嘅Casa飲返杯,食返餐就一定啱晒你。”Casa”西班牙文解做「家」,佢地非常非常認真咁令你可以放輕鬆,出街去食餐飯都可以feel home! 餐廳用嘅檯凳都好講究舒適度,包保唔會坐到你周身唔舒服,大家仲可以喺入面行下、飲下、食下,總之你想點就點,開心舒服就得! 講到家,大家一定諗到家常菜,但係呢度嘅食物係包羅晒環球美食,不過用日式煮法送上,夠晒特別!呢個Tuna & Avocado (HKD100)就係日本墨西哥Fusion,吞拿魚用咗柚子醃製,配埋牛油果、蘿蔔同wasabi醬,入口清新口感又夠豐腴! 想食肉就一定要試Beef Tenderloin (HKD100)選用新西蘭牛肩脊,啖啖都彈牙又多肉汁,配埋wasabi辣辣地好惹味呀! 大阪燒小編就食得多,呢度嘅Okonomiyaki (HKD50)就好得意咁分開一件件咁上,入面有大量椰菜,蛋漿食落軟綿綿地唔油膩。上面再加埋蜜糖、燒汁、沙律醬同香蔥,味道香濃。 Casa 電話:5594 0007 地址:西貢海傍廣場1號兆日大廈地下1號舖 營業時間:星期一至日:10:00-00:00

0

【今晚啤一啤 長沙灣最好hea掟鏢聖地】Overtime

放工之後帶住輕鬆心情去同朋友飲返杯傾下計就最梳乎!Overtime位於長沙灣,係呢一帶比較少有嘅清吧,嚟到除咗有大電視之外,仲有6部鏢機任你掟、任你飛!想靜靜傾計又得,想點玩都得! 酒吧裝修以木同磚為主,希望有別於一般大家對酒吧「黑媽媽」嘅印象,營造出英倫風。 酒吧除咗要夠大地方傾下計之外,最緊要有埋大電視,嚟到可以睇下波、會下班花生友! 成日都有人講呢邊無乜野玩,唔講唔知呢度有6部鏢機,係附近地區之中最多鏢機玩嘅酒吧之一,都幾多人嚟呢度練鏢㗎! 店主推介Guinness Draught(HKD69/杯)(Happy Hour)苦得嚟帶甘,而且無咁多氣,唔想飲到成肚氣可以試下。 招牌炸魷魚鬚(HKD58)炸得好酥脆,唔會一舊舊粉團,用嚟佐酒一流。成班人你一句我一句,食下食下好快就無晒。 肚餓嚟到都唔怕無好野食!日式燒一口牛(HKD68)醬汁食落甜甜地好得女仔鍾意,加埋芝麻同蔥,口感更多層次,不過最緊要都係味道啱晒送酒,嚟到有得飲有得食有得玩! Overtime 電話:2866 2722 地址:長沙灣順寧道47號嘉寧閣地下B舖 營業時間:星期一至日:17:00-03:00