Tagged: 四川菜

0

【麻迷必試5間麻辣專門店 平食麻辣燙+串串香放題】辣妹來了、湯火功夫麻辣燙、麻辣妹、爆汗串串、Chilli Fagara

麻辣控一見到麻辣菜就流晒口水,尤其依家呢啲涼涼哋嘅天氣更加令麻辣癮發作。今次小編搵咗5間專賣麻辣菜式嘅專門店,要平嘅有,要精緻嘅有,要任食都一樣有!   1. 速食麻辣燙 喺葵涌廣場嘅辣妹來了HKD25起就有一大碗麻辣燙,辣度有四級,仲好似車仔麵咁自選配料。配料有HKD4、HKD6、HKD8同HKD10四個價,有成52款食物,嗌一碗當餸買返屋企食都得喎。   辣妹來了 地址:葵芳葵涌廣場1樓1183號舖 電話:3622 1353 營業時間:星期一至日:11:00-22:00   2. 麻辣燙變拌麵 喺銅鑼灣嘅湯火功夫麻辣燙有招牌麻辣燙、蕃茄湯底、泰式冬陰功湯底同經典麻辣拌(劃一HKD37)四款兩素一葷麻辣燙,唔夠可以另外加配料,不過一碗嘅麵量其實都幾多。每張枱仲有麻椒油、辣椒油同醋俾你任加,咁樣你想要幾麻幾辣都得啦!如果覺得太辣,可以加啲醋中和吓。   湯火功夫麻辣燙 地址:銅鑼灣謝斐道482號兆安廣場地下4-6號舖 電話:2148 6788 營業時間:星期一至日:11:00-23:00   3. 麻辣菜館 旺角嘅麻辣妹有四款麵食,其中重慶小鍋(HKD25)可以揀米線、薯仔粉、紅薯粉或水晶粉,而辣度就有五級。配料價錢分HKD6、HKD8同HKD9三個類別。不過想食飽啲仲可以嗌麻辣小食(HKD15-68),例如配特製辣椒粉嘅潮州魚蛋、可以自選麻辣度嘅口水雞、豬大腸、海帶等。   麻辣妹 地址:旺角通菜街27號 電話:9309 5990 營業時間:星期一至日:12:00-23:00   4. 串串香放題...

0

【海鮮大咖合體酒吧推新菜 刁鑽麻辣串燒爽口彈牙】辣吧

鍾意返大陸食四川菜嘅朋友都可能食過海鮮大咖,呢種用一個大平底盤放滿唔同種類海鮮,再倒入麻辣湯嘅打邊爐食法近年好流行。上年第一間引入呢種食法嚟香港嘅麻辣派,早前由旺角搬咗去尖沙咀諾士佛臺,由20個位增加到有90個,仲改名為辣吧添。新舖除咗有海鮮大咖,仲有多款刁鑽部位嘅麻辣串燒、麻辣烤海鮮同四川冒菜等菜式;另外仲有中式cocktail同啤酒,將麻辣同酒吧合體。不過大家放心,都有極少數食物係唔辣嘅! 新店座位好闊落,亦有吧枱可以俾你飲酒吹水。嚟到新店,小編梗係試新菜先啦! 小編好想試嘅網紅海星(HKD128)真係要問店員點食先啱。廚師烤熟後用海鹽墊底上碟,反轉剪開底部挖綠色嘅內臟出嚟,就咁食幾似食緊蟹膏,濕濕哋有少少汁;正宗啲點芥末豉油亦得,不過會蓋過佢本身嘅鮮甜味,所以小編鍾意點海鹽,因為鹽可以提升鮮味呀!店長話有啲人都因為海星慕名而嚟,不過有人會覺得腥,但小編又唔覺喎,可能因為小編勁鍾意食蟹膏啦。 跟住到麻辣串燒喇,肉類同素菜加埋成四十款,老闆之一Sonic話四川嘅串燒食材比較爽口,有啲部位仲好刁鑽,所以餐廳用料多喺國內運嚟,香港其他地方未必有㗎。上菜嘅時候,會用火一路熱住鐵盤,不過建議大家趁熱食,擺得耐會乾。小編試嘅4款由左至右分別係: 鴨郡把(HKD26/串)係鴨腸同鴨賢之間嘅血管,口感比鴨腸爽口同厚啲,都易咬開。 豬鼻樑筋(HKD26/串)真係估唔到有得食,係呢幾款之中最彈牙,亦係小編最鍾意嘅,因為冇咁肥。 豬天梯(HKD26/串)係豬喉嚨,雖然都爽口,但質感會相對硬少少。 手打牛肉餅(HKD26/串)就係將手打牛丸壓扁整成餅,同煮湯麵嘅手打牛丸比會乾啲,但一樣彈牙。 食完呢幾款串燒,個咀都有啲麻,辣度似譚仔3小辣同2小辣之間,都容易接受。 魚喺燒烤菜式之中,最常見係多春魚,呢度反而烤耗兒魚(HKD32/條),Sonic話鍾意佢嘅肉質夠結實同鮮甜。小編平時好怕食魚要挑骨,但佢好易起肉,細骨亦唔多。 折耳根烤大茄(HKD48/條)面頭唔係蒜蓉,而係落咗折耳根,即係平時煲綠豆沙用嘅魚腥草(臭草),順便清熱一吓又幾好喎。味道就係平時燒茄子咁,微辣但非常多汁,好似右圖咁一壓落去就睇得出幾咁juicy呀! 熱鍋串串(HKD128/揀10款,每款3串)啱晒想輕食又想有食火鍋feel嘅朋友,餐廳煮好就一大碗咁上菜,拎起真係熱到冒煙㗎!葷素加埋有42款選擇咁多,小編揀咗素菜多啲同唔辣嘅蒜蓉汁。其中右邊嘅海帶薄薄哋幾軟滑,左邊嘅麻吉燒喺魚蛋裡面加年糕,煙韌唔覺膩喎! Sonic話好多鍾意食辣嘅人會追辣,因為愈食愈過癮,所以佢哋都有爆菊花系列滿足同好。不過小編仲想有命落樓,只係挑戰5隻辣椒。 湖南小米椒干爆雞軟骨(HKD88)雖然係當日食嘅嘢之中最辣,大約接近譚仔小辣。食嘅時候記住吞晒先好講嘢,否則啲辣粉好易嗆喉㗎。雞軟骨嘅炸漿唔算厚,都幾脆,係好正嘅下酒菜呀! 嚟到當然要試埋辣吧嘅招牌海鮮大咖(HKD288/一人份)啦!呢個大盤裝咗8人分量,但唔需要按人頭落order,如果4-5人可以叫2人分量,可以留肚試埋其他小菜吖嘛。餐廳每日提供6-8款海鮮,會按時節調整款式;仲有配菜俾你揀添,豆卜、芽菜、薯條、冬瓜、生菜、白蘿蔔、土豆粉可以揀四樣,食落都咪話唔飽。湯底有唔辣嘅蒜蓉汁同分大、中、小辣嘅麻辣汁,小編揀咗小辣,惹味又品嚐到海鮮嘅鮮味,依家近距離睇吓質素點先! 膏蟹係深得小編歡心嘅,微微炸過令膏同肉冇咁易散,啖啖甘香嘅蟹膏食到流晒口流㗎! 貴妃蚌同鮑魚仔平排,明顯睇到貴妃蚌堅好肉地,一咬就嗦嗦聲。 蟶子王同魷魚筒都同樣出色,尤其係魷魚筒,好少有咁大隻,一路煮都唔會韌。 酒類可以試吓cocktail,呢兩杯係兩位老闆嘅最愛,所以用返老闆個名命名。左邊SONIC(HKD118)用檸檬草浸嘅龍舌蘭酒、蘋果汁、蘋果花茶、百香果糖水等用料調製,果香中帶甜,不過唔會甜死人。右邊YU(HKD118)用咗廣東米酒、桂花陳酒、Rum酒、菊花茶同菊花糖水調製,真係好似飲菊花茶咁清新下火喎。兩款cocktail嘅酒精濃度唔算高,唔嗆喉,喺食濃味嘢同時可以refresh吓都幾好㗎。   辣吧 地址:尖沙咀諾士佛臺1號1樓 電話:6433 3362(WhatsApp) / 2363 0313 / 2363 7288 營業時間:星期一至日:17:00-03:00

0

【重慶風味有辣有唔辣 冷鍋酸菜魚香麻嫩滑】捌壹壹

新餐廳日日都有,但夏天開川菜店會唔會感覺又熱又辣呢?旺角捌壹壹嘅老闆Thomas就話唔怕,因為佢哋有4個辣度俾大家揀,如果唔想每道菜都辣,仲可以走辣添。8月頭開始試業到依家都幾多人,所以晚市都係book位穩陣啲。「捌壹壹」其實係舊時重慶嘅電話地區號碼,直接用嚟做餐廳名夠晒代表性啦!餐廳用嘅調味香料全部都由重慶運嚟香港,連大廚都係重慶人,確保煮出最正宗嘅川味。小編試嘅都係小辣程度,入口feel到陣香麻味先,之後就有啲辣滲出嚟,一般人都表受到。 除咗單點菜式之外,呢度仲可以打邊爐,枱櫈咁闊落一啲都唔逼呀。 呢度最最最一定要食,又令小編迷上嘅就係招牌必食冷鍋酸菜魚(HKD148)!話明係冷鍋,上枱後唔好加熱食咗先,因為再煮啲魚就會老。Thomas揀咗用3斤重嘅生魚,因為肉質好爽滑彈牙,連魚皮都好有厚度㗎!如果唔想食生魚,可以問店員當日有冇其他魚揀,價錢會按種類調整。湯底可以飲埋,微微酸、唔油又清潤嘅感覺異常開胃,小編都飲咗兩碗呀!頭先提過佢哋嘅香料由重慶運嚟香港,估唔到連酸菜都係,咬落仲有啲嫩嫩哋嘅口感。食完魚仲可以加水變打邊爐添。 什錦香鍋(HKD148)係邪惡美食,肥腸、大蝦、午餐肉、蓮藕、土豆條等材料都炸過,好脆口惹味。加埋多款辣椒、花椒一齊炒,香料味道出晒嚟呀!呢款菜有三種口味選擇,分別麻辣、泡椒同孜然,如果好鍾意辣嘅朋友可以揀泡椒。 乾煸肥腸(HKD88)將肥腸炸到好香脆,口感唔會好油膩,係勁惹味嘅下酒菜呀! 黑糖糍粑(HKD25)係四川街頭熱賣小食。糍粑用糯米做成,客人落單先即炸再灑上黃豆粉。趁熱食可以品嚐到外脆內煙韌嘅口感。當地人會點埋黑糖醬,質感會juicy啲。小編食吓食吓,一個人都KO咗半碟呀! 最後想解辣涼一涼又點少得冰粉呢?!Thomas將呢款甜品改良咗少少,用紅糖整成紅糖桂花冰粉(HKD23),再配口啲紅莓乾,清涼又解滯,好正呀! 冰粉以外可以選擇沙冰,藍莓沙冰(HKD32)大杯又清甜,順便護埋眼。   捌壹壹 地址:旺角奶路臣街33號地下F舖 電話:2481 3030 營業時間:星期一至四:11:30-00:00;星期五至日:11:30-01:00

0

【辣到飆眼淚!挑戰四川高原辣椒】麻辣派對 品味私房菜

係咪覺得「麻辣派對 品味私房菜」個名好熟口面呢?其實前身就係「傷心酸辣粉私房菜」!作為川菜館,辣椒當然好緊要!餐廳嚴選四川高原辣椒,比起一般辣椒睇落更加紅亮、味道更香辣!一齊跟住小編去挑戰下! 餐廳有唔少卡位,同三五知己一齊食飯夠晒私隱,可以開心暢談,辣到塊面紅晒都唔駛驚陌生人見到。餐廳一共有6種辣度可以選擇,包括:走辣、BB辣、小辣、中辣、大辣,同勁辣。就算唔食得辣都唔駛驚! 首先介紹招牌口水雞(例牌)(HKD88) 伴有花生、辣椒乾,麻香辣味非常平衡。雞肉滑嫩,比較少骨,而且唔會有厚厚脂肪,入口唔肥膩。雞肉吸收咗麻辣香味,入口除咗食得到雞肉嘅嫩滑口感,仲有麻辣嘅衝擊,越食越想食! 銅盤金椒脆魚鍋(HKD298)連埋Gas爐一齊上,慢慢加熱會越煮越辣,一開始上檯香辣嘅味道已經散發出嚟!配菜除咗有鯇魚之外,仲有豬紅、娃娃菜、黑木耳、大豆芽菜、海帶、鮮野菌、芫茜等等,當然亦唔少得葱、辣椒、蒜、芝麻等等。脆肉鯇魚新鮮彈牙爽脆,配埋辣味唔會被蓋過,反而覺得魚肉更加鮮香!魚肉非常有彈性爽口,亦非常鮮甜、即使翻滾到最後,魚肉仍然保持到彈性,值得一讚! 黃燜湯鮮椒煮桂花(HKD288)黃燜湯以多種辣椒製成,包括湖南椒、青湖南椒、指天椒、燒椒乾同埋新鮮花椒,味道辣辣地之中帶點清新感覺。桂花魚肉夠晒嫩滑,食落又滑又麻,「麻麻地」夠晒過癮! 翠雲水煮桂花魚(HKD288)鋪滿晒紅噹噹嘅辣椒,只會睇到魚嘅頭部同尾部凸出嚟。麻辣味道相當突出,食起嚟完全無魚腥味。魚肉口感滑溜,而且已經去骨,可以放心慢慢品嚐。 麻辣派對 品味私房菜 地址:銅鑼灣渣甸街50號渣甸中心10樓 電話:2567 9808 營業時間:星期一至日:12:00-23:00

0

【辣過返尋味】雲陽

連續兩年入選米芝蓮推介餐廳雲陽係香港數一數二好味川菜,亦係美麗華旗下餐廳之一!大家以前有無食過尖沙咀美麗華商場入面嘅雲陽閣?大大話話都有成21年歷史,原來就係雲陽前身。 餐廳位置方便,位於銅鑼灣時代廣場10樓,格局好寬躺,無論係少人或者一大班人約埋黎食都綽綽有餘! 未點菜之前,會先奉上秘製五香粉爆谷,必定唔好錯過!味道好特別,好好味,次次未上菜都已經清晒成碟。 Drink Menu入面有幾款smoothie,專門幫人解辣,非常貼心。最愛就係個豆腐藍莓smoothie(HKD38)! 首先黎個蒜泥白肉(HKD88)。五花腩每片都切得好薄,蒜泥同醬油夠多,辣椒油味唔係太重,連唔太食得辣嘅都食得好輕鬆。 乾煎雞(HKD168)真係好夠乾身夠酥脆,無加入任何醬料,全部由粉同辣椒調味,做得非常出色! 水煮魚片(HKD188)成鍋都係紅色,唔會淨係得個辣字,味道層次分明,既麻又辣!桂魚肉質煮得好嫩滑,配合入味芽菜一齊食夠晒滋味。 魚香鮮蝦球(HKD208)望落價錢偏貴,但當你將隻蝦放入口就覺得好值得。鮮蝦味十足,並無俾魚香汁蓋過,連埋啲汁撈飯食,正到暈! 四川辣腸炒飯(HKD128)夠乾身,加入辣腸同雞蛋炒出陣陣香味,食一大碗包你夠晒滿足。 雲陽 銅鑼灣勿地臣街1號時代廣場10樓1001B號舖 星期一至星期日:12:00 – 16:00, 18:00 – 22:30