Tagged: 地中海菜

0

【罕有希臘菜自助餐登陸旺角 希臘芝士焗龍蝦鹹香鮮味】The Place

提起地中海菜系,要數花款多又有惹味烤焗菜式?點少得希臘菜呀!旺角香港康得思酒店嘅餐廳The Place,最近推出以希臘菜為主題嘅「味遊希臘」自助餐,亮點除咗有大受歡迎嘅即開生蠔、香煎鵝肝之外,梗係歎勻多款精緻希臘菜式啦。自助晚餐比午餐多啲款,一於睇吓晚餐有咩特別菜式先。 餐廳空間感幾重,坐得夠舒服。Buffet bar又夠晒大,拎嘢食都唔使同人逼。 先嚟前菜開開胃!呢款檸檬油醋漬章魚,一塊塊章魚嗦晒檸檬香味,酸尾尾好醒神。 熱盤小食必試希臘烤肉串,夠香口又啖啖肉。 仲有各式希臘經典沾醬,俾大家試真啲希臘風味。 菲達芝士焗龍蝦係今次自助餐主打嘅海鮮熱盤之一,用咗希臘原產嘅菲達芝士嚟焗龍蝦,提起龍蝦嘅鮮味,又有陣令人流口水嘅鹹香! 呢款鹽焗香草三文魚配青瓜乳酪醬最特別嘅係喺個醬身上,因為青瓜乳酪醬係希臘傳統醬汁,同三文魚肉特別夾㗎! 仲有傳統希臘菜必食嘅希臘特色烤羊腿,一眾羊肉迷咪錯過呀!臨尾記得食埋蜂蜜榛果千絲捲、鮮莓乳酪芭菲、希臘乳酪等等甜品先埋單。   「味遊希臘」自助餐 供應日期:即日起至6月30日 供應時間: 自助午餐供應時間:星期一至日:12:00-14:30 收費: 星期一至五:成人:HKD358/位,小童及長者:HKD278/位 星期六、日及公眾假期:成人:HKD428/位,小童及長者:HKD328/位 自助晚餐供應時間:星期一至日:18:30-21:45 收費: 星期一至四:成人:HKD638/位,小童及長者:HKD458/位 星期五、六及公眾假期前夕:成人:HKD698/位,小童及長者:HKD498/位 星期日及公眾假期:成人:HKD658/位,小童及長者:HKD478/位 (另收加一服務費)   The Place 地址:旺角上海街555號香港康得思酒店L樓層 電話:3552 3028 營業時間:星期一至日:06:30-00:30

0

【西班牙烤爐炭烤鎖肉汁 自家熟成牛扒肉味超濃】hEat

如果話主廚代表一間餐廳嘅精神,灣仔地中海燒烤餐廳hEat嘅封閉式西班牙炭烤爐就係佢哋嘅靈魂,連餐廳名都同佢有關呀!hEat係指”heat+eat”,因為烤食物嗰陣會湧出陣陣熱氣。呢個烤爐更加可以封住食物嘅水份,所以招牌牛扒同部份主菜都會用佢嚟烹調。呢度午餐有set,夜晚有一半空間會變身酒吧,食又得、飲杯酒亦得,等大家食到高質素食物之餘又感覺輕輕啲。 餐廳裝潢用咗工業風格調,窗邊仲有鞦韆位,感覺再chill啲。 餐廳將乾式熟成雪櫃放喺門口,將嚟自法國同日本嘅牛肉自家熟成。咁大個生招牌,嚟到當然必食牛扒,不過試咗好受歡迎嘅前菜先! Seasonal Clams(HKD124)好多人食,紐西蘭蜆肉質好爽甜,一咬就爆汁,有少少海水鹹味嗰種清爽感覺。呢個白汁比平時食到嘅杰少少,仲加咗香茅提味,令味道層次更豐富。 Salmon Mi-cuit(HKD168)嘅醬汁非常點睛!三文魚肉幾新鮮,唔易散。基本以鹽調味後,再點啡綠色嘅鮑魚醬或偏日式豉油味道嘅泡泡,鮮味指數瞬間super up!最後食埋粒粉紅色嘅醃菜,清清口腔就可以食下道菜喇。 Atlantic Cod(HKD177)成個菜式味道好清甜,鱈魚用西班牙炭烤爐烤焗完有陣炭烤味,肉質好軟滑。紅蘿蔔醬味道重到好似濃縮紅蘿蔔咁,清甜味非常突出。烤茴香本身冇咩味,但廚師灑咗少少黑胡椒調味。 到牛扒喇!西班牙炭烤爐預熱之後,先拉出烤架,將牛扒放喺上面燒兩邊,封住肉汁。然後轉上碟入爐再焗。 牛扒價錢按唔同部位嘅熟成日數而定,最少都會做30日。日數愈耐,肉質會鬆軟啲同濃味啲。落單以250克做起點,呢款Signature Limousine Ribeye Beef(HKD650[HKD260/100g])係法國牛肉肉眼扒,做咗60日熟成。大廚揀呢款做招牌,因為熟成後有種藍紋芝士嘅香味,肉味更濃厚,唔同韓牛嗰種帶甜嘅肉味。加上脂肪位烤焗到有少少香脆嘅感覺,未點醬已經引人一食再食。 喺西班牙或者歐洲食呢類烤焗菜式,多數都會配清甜啲嘅香蒜蛋黃醬(白色)。依家大廚改良後,再調配出濃味啲嘅黑蒜蛋黃醬(黑色),俾大家試到唔同嘅味道。 甜品以意式奶凍White Chocolate Panna Cotta(HKD98)結尾,質感好似布甸咁彈滑,但柔軟啲。食落有輕微薄荷味滲出嚟,感覺好fresh;配埋面頭嘅淡忌廉同蔓越莓,酸酸甜甜解滯好得喎。   hEat 地址:灣仔皇后大道東202號QRE Plaza 23樓 電話:2246 8805 營業時間:星期二至日:12:00-14:30,18:00-02:00(逢星期一休息)