Tagged: 墨西哥菜

0

【東涌街市歎墨西哥外賣 超抵$34雞髀飯+爆脆Tacos】街霸

今日街霸踩入東涌街市搵食,估唔到港鐵站對面嘅富東商場嘅富東街市有一間墨西哥外賣店,幾少見喎! 估唔到呢個街市都幾多外國人行喎,唔知係咪因為呢頭都算近機場呢? 唔知大家知唔知Olé Olé Olé點解呢?其實睇世界盃成日都會聽到㗎,Olé係西班牙文,通常喺歡呼、慶祝嘅時候就會用到,相傳最早期係為鬥牛勇士吶喊助威嘅口號。 呢間Olé Olé Olé老闆係外籍人士,雖然餐牌中英對照,但老闆廣東話唔係咁叻,所以大家落單時為求快捷方便都係用英文講好啲喇!Menu都算幾多嘢揀,價錢幾親民,30零蚊就有個飯、20蚊就可以食埋Tacos喎,好,等我試吓先! 首先試咗雞肉墨西哥玉米餅(HKD20)。其實墨西哥玉米餅分好多種,我哋成日食嘅多數都係Nachos或者今次食嘅Tacos,Tacos特色係將玉米餅油炸,然後捲成半月開口定形,包裹住餡料、配料同酸奶油等等。 呢個Tacos咬落超級脆,街霸咬咗一啖就成塊粟米餅皮都裂晒,真係食得有啲論盡呀!表面白色嘅醬汁唔係沙律醬,而係酸奶油,嗰種酸甜味本身已經好開胃,再加埋新鮮嘅蕃茄粒粒同黑橄欖超fresh,用嚟做下午茶分量同味道都啱啱好! 呢幾年通脹通到嘭嘭聲 ,40蚊樓下嘅外賣幾乎買少見少,高唔高質都仲要睇彩數。呢度嘅雞髀配墨西哥飯(HKD34)超靚仔,雞髀大大隻,皮烤得脆卜卜,望見都流口水呀!34蚊仲隨機包一盒紙包飲品,抵喎。 呢個飯係蒜蓉汁底,用嘅係西班牙料理常用嘅黃薑飯,啖啖滋味。隻雞髀有成個飯盒咁大隻,咬開依然肉嫩多汁,街坊們必試呀。   街霸最愛:今集最愛就係Tacos喇!因為香港街市有得食正宗Tacos嘅真係5隻手指數得晒,呢度整得超脆卜卜,成個配搭好fresh,如果街霸住附近應該會成日幫襯!未試過嘅東涌街坊要試吓喇! Olé Olé Olé 地址:東涌富東街6號富東廣場地下富東街市M22號舖 電話:2154 1688 營業時間:從缺

0

【墨西哥菜食仙人掌扒 挑戰世界第二辣雞翼】Verde MAR

Verde MAR係一間主打墨西哥菜嘅餐廳,Verde喺西班牙文嘅意思指綠色、而MAR就係海。墨西哥嘅海,顏色靚到綠綠藍藍,餐廳負責人Vivian覺得好靚好治癒,加上餐廳路線都係以健康、清新為主,餐牌上大部分食物都係海鮮食材,順理成章Verde MAR就係「綠海」,餐廳內外都被綠油油植物包圍,襯到絕呀! 餐廳有濃厚嘅異國風情feel,店內播放住墨西哥音樂,牆上掛上形形色色嘅墨西哥裝飾擺設,感覺真係好似去咗墨西哥一樣,幾relax喎! 大家對墨西哥菜嘅印象係點?食物偏油膩、好多芝士?好多炸物?如果較偏向美式煮法就係咁喇!但係正宗嘅墨西哥菜係講求食物平衡,唔會好多肉/好多菜,兩者互相balance,顏色仲好色彩繽紛添!有唔少Verde MAR嘅客人都係第一次接觸墨西哥菜,而大部分食客都話估唔到原來墨西哥菜可以咁fresh咁健康! Chargrilled Cactus(HKD119),用墨西哥空運到港嘅新鮮仙人掌,廚師挑晒啲刺之後原塊奉上,咁樣食先夠原汁原味。仙人掌都食得?係,不過要留意唔係所有仙人掌都可以食,要呢種長形扁身嘅先食得㗎!口感爽爽哋,咬落去好似有啲蘆薈嘅黏液咁,其實係好有營養價值兼幫助排毒㗎,所以仙人掌喺墨西哥人眼中係超級健康食物,如果再加埋青檸汁,感覺就好似食緊酸瓜咁,真係非一般口感,原來仙人掌係咁嘅味! Mexican Chicken Wings-Habanero(HKD99/5pcs),呢味雞翼用咗全世界第二辣嘅「哈瓦那辣椒」炮製而成,嗜辣之人要挑戰吓啦!就咁睇見唔到有任何辣椒粒/辣椒籽,其實辣椒嘅精華已經融入晒係醬汁入面,輕輕靠近已經聞到一陣好攻鼻嘅辣味,真係好勁! 開頭食第一啖覺得冇乜嘢,點知hold多2-3秒就大鑊喇!啲辣好似火山爆發咁噴出嚟,由內到外攻陷味蕾,辣到小編口都合唔埋,係咁灌水飲都解唔到辣呀,暫時係小編食過最辣嘅食物,食完一啖即刻放棄,只能說,世界第二辣嘅「哈瓦那辣椒」,確係名不虛傳呀! Seafood Paella(HKD339)分量大,可供2-3人食。墨西哥嘅海鮮飯同西班牙海鮮飯好唔同,西班牙海鮮飯會比較濕潤,用雞湯熬煮,味道會鹹少少;而墨西哥海鮮飯反而較為乾身,米飯粒粒分明,啲飯都係用海鮮湯熬煮,之後再鋪滿新鮮海鮮,雖然味道偏淡,不過有另一返風味,幾好食㗎。 米飯做到粒粒分明,就算乾身都好易入口,加上仲有青椒粒配料,食落幾fresh! 蝦肉新鮮彈牙,仲食到輕微蝦膏,好滋味! 青口來自智利,粒粒肥美飽滿,一個飯有齊咁多款海鮮,真係夠晒飽呀! Avocado Ice Cream(HKD88)用真牛油果皮嚟裝住粒雪糕仔,睇落真係以為成嚿牛油果咁樣!其實粒「牛油果核」係芒果辣椒sorbet,口感刺激過癮;而「牛油果」就用牛油果肉、忌廉同牛奶而製成,重奶味之餘質感偏濃稠,牛油果味又香濃!通常一般雪糕嘅做法會加雞蛋,但係牛油果本身有油份,所以做呢個雪糕就唔使加蛋都得,咁唔食蛋嘅客人都可以食囉!另外,餐廳仲好貼心,有多一款係用杏仁奶製成嘅牛油果雪糕,食素朋友都可以大飽口福啦!   Verde MAR 地址:灣仔大王東街24號地下 電話:2810 0888 營業時間:星期一至四:12:00-15:00;17:30-22:30;星期五:12:00-15:00;17:30-23:30;星期六:12:00-23:30;星期日:12:00-22:30

0

【假日好去處 帶埋寵物潮嘆墨西哥菜】Cali-mex

相信好多人對主打美國加州墨西哥菜嘅Cali-Mex都唔會太陌生,原來佢喺呢3年間已經開達12間分店!由自助快餐形式做到最近開埋幾間餐廳,食物款色多左,又有得坐低慢慢嘆。今次專訪係比較新嘅餐廳分店,位於西灣河「蘇豪東」,係一班狗主好鍾意去嘅地方,該因附近多間餐廳門口位置都歡迎狗狗一齊坐低食。 店長非常雀躍介紹呢杯墨西哥辣椒cocktail (HKD88) ,絕對係Cali-Mex精選飲品之一!入口有一陣陣辣味,再混合青檸、龍舌蘭糖漿同tequila,嗜辣嘅您一定要試下。 有部份飲品由餐廳直接從墨西哥訂返黎,好似呢個Mandarin Jarritos,味道有啲似芬達。調酒師加入埋vodka,gin,rum,tequila等等,酒量要夠好先試啊! (HKD108) 想咩都試下可以叫個墨西哥拼盤(HKD168),有炸魚、墨西哥薄餅、辣肉腸等等。狗狗望到都即刻流晒口水好想食! 仲有抵食美國USDA肉眼扒 (HKD198),呢個價錢有塊高質10安士牛扒,仲要煎得咁完美,算係咁啦!唯一美中不足就覺得鹽粒比較大粒,如果點多左都幾鹹。 點少得墨西哥夾餅 Tacos (HKD78)呢?餐廳非常細心,連個皮都有得俾你自己選擇!包括有麵粉皮、粟米粉皮、脆口粟米粉皮。配料好多,仲可以加錢(HKD18)要埋牛油果醬,更有風味! 夾餅分別有大辣(紅)中辣(橙)小辣(綠),任均選擇。 食墨西哥野點少得Churros(HKD28 for 2/38 for 3/48 for 5)?細細條過下口癮都唔錯。 Cali-Mex Bar and Grill 地址:西灣河鯉景灣太康街45號