Tagged: 外賣

0

【京都風居酒屋新裝重開 空運食材炮製全新定食】Kyoto Joe

去唔到日本唔緊要,去蘭桂坊嘅Kyoto Joe都可以食到由日本空運食材製成嘅正宗和食。最近佢哋以京都千本鳥居風格新裝重開,除咗環境大變身,亦新增多款單點美食、素菜、爐端燒及天婦羅吧。依家嘅Lunch精選定食好豐盛添,希望快啲全日解放堂食,可以試埋晚市套餐啦!點都好,依家睇吓佢哋有咩Lunch精選先。 入到餐廳真係好似寺咗京都嘅食店咁,以紅色為主調打造成千本鳥居嘅感覺。牆畫有充滿日本文化嘅鯉魚,掛埋特色嘅日本燈籠,環境一流。 佢哋嘅精選午市定食都選擇多多,刺身熟食任君選擇。仲有為素食者而設嘅定食,迎合到唔同人嘅飲食需求。 Executive Lunch御便當(HKD398)係最豐盛嘅午市套餐。裝住花蟹沙律、蒜汁油甘魚刺身、和牛壽司同星鰻魚天婦羅嘅盛盒俾你試勻由清甜到惹味嘅涼伴、刺身、壽司同炸物之外,仲有入口嫩滑嘅月見牛肉冰見湯烏冬,篤穿隻蛋撈埋蛋汁一齊食就更香甜喇。 水波蛋牛肉定食(HKD238)食落啖啖肉,加埋滑蛋令口感更嫩滑,啱晒鍾意食肉嘅人。另外配有鱈埸蟹沙律,清新口味平衡返食太多肉嘅飽滯感覺。 仲有啱晒素食人士嘅Veggie Box素菜定食(HKD180),有菠菜沙律、牛油果素卷、紫蘇炸素蝦同天婦羅味噌醬福岡茄子。連素食都滿足到唔同口感,食落一啲都唔齋呀! 其實晚市套餐都好豐富,雖然有Deliveroo同埋蘭桂芳Delivery Direct為餐廳提供外賣服務,但都好想堂食呢款八道菜嘅Toretore Menu(HKD780/位)囉,有齊紫蘇雞沙律、佐賀和牛塔撻、刺身盛合、秋葵卷、紫蘇炸蝦、精選爐端燒燒物、自家製鰻魚炒飯同焦糖布甸做甜品,分量同質素絕對對得住價錢,依家唯有睇住品質先,再對比外賣餐單有冇得嗌啦! 刺身盛合相當有睇頭,2人分量有8款刺身,超豐盛呀!刺身喺日本空運到港,所以款款都鮮甜肥美。除咗入口即溶嘅大拖羅同三文魚,亦有鮮甜爽口嘅牡丹蝦。 佐賀和牛塔撻賣相同味道一樣咁正!佐賀A4和牛經大廚輕燒後逼出油脂同肉香,配上中間嘅日本太陽蛋蛋汁一齊食,口感會更幼滑。 秋葵卷同Kyoto Joe嘅招牌自家製鰻魚炒飯都好有水準!前者用燒過嘅腐皮代替紫菜做卷物外層,口感幾煙韌;後者以自家醃製嘅酸瓜加入日本米炒成醬油飯底,恰到好處中和鰻魚嘅油膩感。而且鰻魚厚肉嫩滑,配埋飽滿嘅炒飯一齊食口感好豐富㗎。   Kyoto Joe 地址:中環蘭桂坊德己立街30-36號加州大廈23樓 電話:2804 6800 營業時間:星期一至六:12:00-14:30,18:30-23:00,星期日:18:30-23:00

0

【足料小店必點爆餡手工餃子 惹味首選脆皮雞扒撈麵】平霸

平霸又捐窿捐罅搵好嘢食喇!今次俾小編搵到喺油麻地一個小角落嘅竹地小館,無論係餃子定麵食都大大份又好食,符合晒小編成日話「夠抵食都要夠好食」嘅理念。即刻睇吓究竟有幾正啦! 呢間小店喺轉角位,堂食座位大約有十個,不過疫情關係佢哋暫時只做外賣,拎返屋企食更安全呀。 佢哋究竟有幾抵食?成個餐牌最貴都唔過HKD40,撈麵都只係HKD20起。鍾意落廚嘅朋友可以買生餃(HKD35/12隻)返去煮,平均唔使3蚊一隻,超抵呀! 咁啱小編去到嘅時候師傅包緊餃子,佢哋話每日朝早開始包餃子,隻隻都係人手當日即製。餃子落足料,好有分量㗎!呢款韮菜豬肉餃真係超多韮菜㗎,鍾意食韮菜嘅朋友要試吓喇。 煎、湯餃(HKD35/10隻)同價,小編就試咗煎餃。熱辣辣即叫即煎,外皮香脆,食落夠多汁。 粟米豬肉餃(左)同招牌菜肉餃(右)粒粒都賬卜卜,皮薄爆餡,多菜少肉夠晒健康。呢兩款味道唔會重,都新鮮好食,但小編推介粟米豬肉餃多啲啲,食落比較有咬口。如果係正常食量嘅女仔,8粒餃子(HKD30)已經夠晒飽。 試埋大大碗嘅蔥油撈雞扒麵(HKD30)先,會配一碗白蘿蔔清湯㗎。厚肉嘅雞扒煎到皮脆肉嫩,撈麵嘅蔥油味唔算濃,反而醬油味比較突出,似醬油撈麵多啲,不過勝在食落唔油膩;嗜辣嘅朋友加少少佢哋自製嘅蒜蓉辣椒醬會更惹味。   竹地小館 地址: 油麻地廣東道838號金冠樓地下 電話: 3614 5672 營業時間:星期一至日:11:30-21:15

0

【尖沙咀嫩滑海南雞飯 東南亞菜式推外賣88折】亞參雞飯

海南雞飯係香港人鍾意嘅菜式之一,亞參雞飯唔止有飯餐,仲可以成隻海南雞買走㗎。尖沙咀店仲有馬來咖喱系列,喺三間分店之中菜式選擇最多。依家除咗下午茶,外賣自取有88折優惠,順便斬料返屋企都得喎。 亞參去骨海南雞飯(HKD88)肉質好軟滑,肉味幾香甜。配上大大碗雞油飯同鮮甜嘅冬瓜雞湯,成個飯餐都幾豐富。你亦可以趁依家有外賣自取有88折優惠,淨買外賣海南雞(HKD120/半隻,HKD220/全隻)返屋企加餸喎。 亞參豬手(HKD88/例,HKD140/全隻)全隻夠3-4人食,入味唔會過鹹,最驚喜係有滿滿嘅膠質呀! 新加坡喇沙米線(HKD80)湯底有椰香味,甜中帶辣。配料有雞蛋、蝦、豆卜、魚片條、菜同芽菜,食晒都幾飽㗎。 尖沙咀店限定嘅馬來咖喱系列合共有6款飯麵菜式,呢份馬來咖喱牛腩飯(HKD78)聞到陣陣香料味,辣得嚟好啱撈飯食!牛腩大大嚿但幾腍身,分量都唔少添。 呢度仲有啲馬來小菜,馬來班蘭咖央多士(HKD22)、馬拉盞怡保芽菜(HKD30)同香煎蝦餅(HKD42/3件)都好惹味㗎。 飲品方面有馬來拉茶、薏米水、香茅薄荷特飲(各HKD25)等款式,清爽或重口味都有得俾你揀。   亞參雞飯 地址:尖沙咀廣東道新太陽廣場地庫一樓 電話:2698 7600 營業時間:星期一至日:11:00-20:00

0

【外賣中西日美食Stay Home 精選主食+甜品著數優惠】2020外賣抗疫

第三波疫情來勢洶洶,唔想去買餸減少同人群接觸就當然要叫外賣啦。小編精選中西日式嘅主菜同甜品,包保你嘅外賣一啲都唔hea,有啲仲低至6折添! 甜品 波仔×台灣超人氣Touched塔吉特 今次唔係想講波仔嘅叮叮飯,而係佢引入呧台灣最紅嘅千層蛋糕Touched塔吉特!一個8吋千層蛋糕可以分到12件,一家人週末做下午茶或飯後甜品就啱晒喇。期間限定推出三款口味之中,芒果多千層(HKD218[原價HKD240])以新鮮愛文芒果肉整成;芒果奶凍千層(HKD180 [原價$210])配搭焦香蛋皮入口酸甜開胃;仲有夾住煙韌珍珠、餅皮都充滿濃郁黑糖口味嘅黑糖珍珠千層(HKD198[原價D240]),總有一款啱你口味嘅。   波仔 專門店位置:https://www.eateasthk.com/retail   HABITŪ HABITŪ嘅Rosemantic Summer「瑰麗仲夏」,喺8間指定分店返嚟喇!雖然指定店舖會佈置成玫瑰花主題俾大家打卡,但主題餐飲買返屋企食會安全啲嘅。其中瑰麗草莓意大利芝士杯(HKD78)用上意大利芝士、以玫瑰蜜糖浸泡過嘅手指餅加入自家製玫瑰士多啤梨果醬,層次同味道都好豐富㗎;玫瑰水晶寒天(HKD68)喺微甜嘅水晶寒天注入了玫瑰花嘅幽香,可食用玫瑰花瓣配埋士多啤梨、葡萄、無花果、蘋果等新鮮水果,素食友都可以一齊食。仲有一系列玫瑰主題夏日飲品(HKD52起),冰搖玫瑰泡沫大麥葉茶、巴西莓玫瑰豆奶碎冰等等都好吸引人。   HABITŪ table 地址:銅鑼灣軒尼詩道500號希慎廣場8樓L804號舖 電話:3543 1313 營業時間:星期一至日:12:00-21:30   中式 楚撚記大排檔 唔去得大排檔,不如外賣返屋企啦!楚撚記大排檔西環同土瓜灣店開設外賣專線,西楚霸王雞、地道港式煎蠔餅、楚撚記黑栢葉爆炒雞腎花等等係佢哋熱點菜式之一,依家仲有加推優惠
,每消費HKD100即送老薑蕃薯糖水或清保涼糖水一碗添。想試嘅朋友留意佢哋嘅抗疫限時優惠
喇: – 外賣消費滿HKD600免一半運費 – 外賣消費滿HKD1,000運費全免 優惠細則: 1. 優惠期由即日至31/8/2020 2. 不得與其他優惠同時使用 3. 送貨地點不包括離島、馬灣、愉景灣、禁區及偏遠地區...

0

【南區吹海風遊赤柱Kitty打卡點 數碼港野餐歎酒店外賣】Local自駕遊

最近疫情回穩,但大家都要繼續小心啲,想出遊玩吓都係去空曠啲嘅地方啦。依家開始至7月尾,赤柱廣場同美利樓舉行「Hello Kitty 與Dear Daniel的浪漫之夜」,有8大打卡位俾你哋影靚相。前後時間又可以去數碼港公園野餐,想方便啲可以喺數碼港艾美酒店買外賣搞掂,咁就保證新鮮地辣添。 赤柱廣場、美利樓、天幕廣場同卜公碼頭附近都會有Hello Kitty同Dear Daniel嘅浪漫場照可以影相。如果7日內喺赤柱廣場或美利樓以電子貨幣累積淨消費滿HKD1,800或以上,仲可以免費換領限量550 套嘅「浪漫滿杯」紅酒杯禮盒1 套(共2個酒杯),將呢份浪漫氣氛帶埋返屋企。不過換領日期由即日起至7月31日,先到先得,換完即止。 換領時間:10:00-22:00 換領地點:赤柱廣場一樓客戶服務台   「Stanley Plaza Hello Kitty.Dear Daniel Love by the Sea」Hello Kitty 與Dear Daniel的浪漫之夜 日期:即日至7月31日(LED燈海於2020年6月上旬開始,每日17:00-22:00亮燈) 地點:赤柱佳美道23號赤柱廣場及美利樓   喺南區野餐的話,數碼港公園都係熱門地點,而旁邊嘅數碼港艾美酒店有3間酒店餐廳推出外賣餐飲優惠,方便之餘又可以食平啲添。 外帶美食七折優惠(優惠有效期:即日至2020年6月30日) Prompt最新推出堂食或外攜薄餅服務,除咗有用蕃茄醬、水牛芝士、鮮羅勒同特級初榨橄欖油整成嘅傳統意式薄餅,或以蕃茄醬、水牛芝士、辣蝦、蘑菇、火箭菜同特級初榨橄欖油整成嘅香辣蝦薄餅,仲有每周限定款式㗎。(Prompt 餐廳菜單)   Prompt Bistro...

0

【復活節在家歎多國料理 外賣送上門抵食精選】復活節2020

復活節假期放咁多日,未必一定要出街先食到好嘢嘅,其實人少少留喺屋企慶祝都幾warm呀。好多餐廳近期都推出限定外賣套餐同優惠,唔使出門都可以九折食到天吉屋嘅三款限定天婦羅丼;買AMMO嘅意菜材料包返屋企簡單煮出高級西餐嘅滋味;仲可以訂616牛肉火鍋專門店嘅外賣專屬套餐安心在家打邊爐,所以話喺屋企食都有好多選擇,快啲睇埋落去,揀定Book咩食啦!   天婦羅丼復活節及外賣優惠 留喺屋企都食到天吉屋嘅天婦羅丼!4月開始,天吉屋嘅天吉丼、All Star丼同埋香港限定嘅軟殼蟹丼都有得外賣喇,到店外賣自取或喺外賣平台下單都有9折優惠添。 另外喺復活節(10-13/4)期間,只要出示有效身分証明文件,而姓名一欄集有指定「EASTER」英文字母,更可享有低至9折優惠添。   天吉屋 地址:旺角朗豪坊11樓25-29號舖 電話:3105 0986 營業時間:星期日至四:12:30-22:00,星期五、六:12:30-22:30   616新推外賣專屬套餐 火鍋癮起又唔敢出街食?616牛肉火鍋專門店就推出咗外賣專屬套餐俾你喺屋企安心慢慢打邊爐喇。如果想自私食一人鍋,就可以用優惠價HKD128點一人套餐(價值HKD225),包埋一人份牛肉拼盤(內含牛橫隔肌、五花趾同牛駝峰)、鮮蔬、小食、麵食同飲品各一份。而想同另一半撐枱腳,就可以點HKD288嘅二人抵食套餐(價值HKD400)喇!除咗食材打孖上之外,兩人牛肉拼盤更帶有牛橫隔肌、五花趾、牛駝峰同匙柄各一碟㗎。   616牛肉火鍋專門店 外賣下單:可按此處   牛角外賣自取精選美食低至5折 喺屋企食好啲,牛角都有好多選擇㗎!咖喱豚肉飯、咖喱牛肉飯、蒲燒鰻魚飯同牛角燒肉4人前燒肉套餐E呢4款精選美食做緊半價優惠呀,有興趣可以睇吓推廣餐目詳情。如果想要埋德國寶光波燒烤爐KQB300(價值$1800)一部,就可以訂呢個「帶回家」燒肉券套裝(HKD3500),期間限定至4月13日咋,要買趁早喇!   牛角日本燒肉專門店 網上訂餐:可按此處   意菜材料包送上門 為咗俾大家喺屋企都食到高級意菜,由米芝蓮星級大廚主理嘅意菜餐廳AMMO最近都推出外賣材料包。材料包入面有齊已經處理好嘅食材同醬汁,只要簡簡單單將佢哋翻熱,咁就食到製法複雜如燉牛肋骨、紅蝦明太子意粉、鱸魚檸檬意大利飯等等嘅精緻意菜㗎喇!而且外賣仲有分2人同4人餐,除咗包含前菜、主菜同飲品之外,4人餐更有一枝紅酒或白酒添。只要訂滿HKD300就可享外送服務,港島同九龍區都送㗎。   AMMO 地址:金鐘正義道9號亞洲協會香港中心低層 電話:2537 9888 (預訂及查詢) 營業時間:星期日至四:12:00-21:00、星期五、六:12:00-22:00...

0

【情人節他條開餐外賣精選 燒肉至星級名菜都食到】情人節

仲係十五十六聽日情人節點過?不如索性外賣返屋企撐枱腳啦!今年唔少餐廳提拱外賣套餐,等大家唔使去街市同超級市場撲食物,喺屋企他他條條開餐!   1. 牛角 外賣自取日本燒肉 牛角日本燒肉專門店依定開始推出外賣自取餐目(HKD59起),有配搭豬或牛嘅牛角飯、炸物小食之外,仲有十幾款自選口味嘅和牛、豚肉同雞肉,選擇咁多都拍得住出街食喎。   牛角日本燒肉專門店 地址:九龍灣徳福廣場2 期4 樓425 號舗 電話:3101 0128 營業時間:星期一至日:11:30-22:30   2. Double Chefs Market BRUNO功能電熱鍋送燒肉拼盤 屋企冇燒烤爐又想食燒肉?主打鍋物同燒肉嘅Double Chefs Market有各式和牛拼盤,最近仲聯乘BRUNO推出情人節超值優惠(即日起至3月14日)!只要買BRUNO全新多功能電熱鍋(原價HKD998)就送一份特上燒肉拼盤(價值HKD358-668),有大約2-3人分量,啱晒兩小口情侶或小型家庭。如果用埋網站近期嘅優惠,用PayMe付款就額外享有1%折扣優惠,咁去完露營返屋企都有爐可以繼續燒啦!如果想就咁訂肉,佢都有鹿兒島黑毛和牛、鹿兒島A4黑毛和牛牛三角、澳洲M5和牛西冷等口味俾你揀㗎。   Double Chefs Market 地址 : 黃竹坑業勤街35號金來工業大廈第1座6樓Q室 電話:6772 6338 營業時間:星期一至六 10:00-19:00(星期日休息) 網店:www.doublechefsmarket.com.hk...

0

【屯門新開甜品店限量布甸燒 岩漿戚風蛋糕+濃滑奶凍】一糖

相信唔少新界友對天水圍呢間人氣甜品店一糖唔陌生,最近佢仲踩入屯門,喺新開嘅美食廣場Go Go Mall開咗間甜品外賣店添。入面賣嘅戚風蛋糕同奶凍都係外賣店限定,仲有新出嘅布甸燒都係每日限量發售㗎,記得去試吓呀! 新開咗一、兩個月嘅分店係外賣形式嘅,大部分甜品都喺天水圍本店自家製,每日整好運過嚟。如果想堂食,可以坐喺美食廣場提供嘅開放式座位度慢慢歎。 外賣店新開冇耐,有唔少新品陸續推出。最近公開發售嘅新品就有一糖布甸燒(HKD48),燙印咗一糖logo嘅布甸燒係每日自家新鮮製作,選用成本較高嘅北海道忌廉芝士整成,食落口感濃厚幼滑,夠晒creamy! 將布甸燒倒轉倒出嚟,啲焦糖均勻咁沾滿成個布甸,有淡淡焦糖香添。布甸分為布甸同芝士蛋糕兩層,比例大約7:3。布甸燒倒出嚟仍然好挺身,入口幾綿密,食到芝士同蛋香,又唔會太甜膩,值得一試。 而呢度最吸睛嘅就梗係招牌嘅戚風蛋糕(HKD48-50)啦! 平時大大個蛋糕想獨食都難,所以舖頭好貼心咁研發咗呢啲一人份嘅戚風蛋糕,等你哋可以獨食成個蛋糕,同朋友一齊食仲可以試多幾種口味添。呢款士多啤梨乳酪忌廉戚風蛋糕(HKD48)將乳酪忌廉淋上面,再放上新鮮嘅士多啤梨粒,賣相精緻。 另外,芒果乳酪忌廉戚風蛋糕(HKD48)面頭嘅乳酪忌廉都多到瀉,仲有鮮甜多汁嘅芒果肉,夠晒fresh呀! 呢款就係百利甜酒忌廉戚風蛋糕(HKD48),面頭嘅朱古力忌廉加咗少少百利甜酒調味,有微微嘅酒香但唔算突出。 各位抹茶控必食呢款宇治抹茶忌廉戚風蛋糕(HKD48)!唔止用咗抹茶忌廉,連蛋糕都係抹茶口味,面頭再灑上抹茶粉,抹茶味夠晒香濃呀! 外賣店限定嘅人氣甜品仲有各款奶凍(HKD25-30),每日隨機推出大約十種口味。期間限定嘅就有榴槤奶凍(HKD30/左)同紫薯奶凍(HKD30/右)。咪睇佢哋外表好似平平無奇,榴槤奶凍雖然冇榴槤肉喺入面,但一打開蓋就有濃郁嘅榴槤香散發出嚟;而淺紫色嘅紫薯奶凍就有淡淡嘅紫薯味。全部食落都滑嘟嘟,奶香十足。 特別推介呢款荔枝奶凍(HKD25/左),喺奶凍上層有荔枝啫喱封頂,入面仲有荔枝果肉添。另外,咁靚嘅三色宇治抹茶紅豆奶凍(HKD28/右)都係熱賣之選,底部係濃郁嘅抹茶,配埋粒粒紅豆一齊食就最夾喇。 舖頭仲有賣乾果冷泡茶(HKD28),入面有菠蘿、檸檬同蘋果三款乾果,味道酸酸甜甜咁幾醒胃。不過目前只有呢款口味,有興趣嘅朋友仔可以去試吓。   一糖 地址:屯門鄉事會路112-140號雅都商場Go Go Mall1樓S54號舖 電話:從缺 營業時間:星期一至日:12:00-22:00

0

【咖喱飯盒驚現不明生物頭? 網友全家嚇到嘔急報食環】食焦

真係睇見張相都嘩嘩聲呀!加料唔係加到咁吓嘛?有網友喺連登開po「[求救] 飯盒入面有不知明生物」,有埋大大張相,嗰盒咖喱牛腩外賣飯盒,入面真係有隻不明生物頭嘅物體喎,擺明唔會係牛腩啦!樓主話「有冇人知係咩嚟 睇落個皮似爬行動物 仲要錫左佢一啖先見到」! 睇到張咁鬼恐怖嘅相,成班高登仔即刻起哄啦,除咗講核突核突核突之外,個個都發揮靠估精神,有人話係蜥蜴,亦有唔少人話係蛤蚧,即係大壁虎喎,網友仲熱心到專家上身一樣,列舉埋蛤蚧嘅功效,係乜呢?原來可以「治療陽痿。主治腎陽不足、精血虧虛而致的陽萎……」哦! 又有唔少網友貼埋好多蛤蚧相出嚟,講晒藥用功效,有啲仲話會用喺滷水度喎,真係唔講唔知喎!至於苦主就話自己屋企人都嚇到嘔,網友叫佢要報食環,苦主都話已經報咗喇!當然亦都有人叫佢留言開名係邊間舖頭,不過佢就冇開名喇,苦主只係話呢盒恐怖外賣係來自屯門工業區嘅茶記喎! 其實就咁睇張相,的確係一個疑似不明生物嘅頭出現嘅,似爬行類動物,你話係蜥蜴又得、蛤蚧又得,反正一日冇攞去化驗,一日都唔會知真相喇!之後亦有網民追問事情發展,不過樓主就好似潛咗水咁冇晒反應喎!驗咗咩未知,但肯定以後對任何咖喱類食物都有陰影喇!

0

【叫32杯外賣臨送到先叫停 政府合署員工玩殘小店】食焦

叫咗外賣再取消已經唔多好,仲要唔係自己打去交代,要人哋差唔多送到嗰陣先話唔要喎,麻煩到人之餘仲做埋大嘥鬼,玩食物呀!叫杯檸茶仔就話啫,叫咗成32杯嘢飲喎,條數點計?有網友喺盡在元朗專頁度出po,直指政府合署8樓嘅職員X先生,寫埋佢電話號碼出嚟(頭4個字啫),「多謝你柯打!你的一句要收工無人啦!浪費了小店32杯飲品!」。 係咁嘅,茶飲小店收到呢位政府合署8樓(估計係元朗政府合署8樓地政署啦)阿X先生嘅外賣電話,點咗32杯飲品,嗰陣係三點九(正確係15:41),32杯嘢飲入面有15杯係要攪拌機整嘅,「以最快速度4點7、8到(度)我已經出發去截的士!16:48的士在途中打俾佢,佢話要收工啦,冇人飲吾(唔)要啦!」 網友仲出示埋水蛇春咁長嘅單,32杯嘢飲俾人以趕收工為由忽然話唔要,除咗浪費咗32杯飲品之餘,亦令到小店冇咗呢張成七百幾蚊嘅外賣單囉!出咗po,其他網友嘅反應都好兩極,有人話要投訴嗰位政府合署職員,整好晒先嚟話唔要order都要佢俾返一半錢啦起碼;有人就話由落order時間直到送去要成個鐘梗係唔等啦,有冇講清楚要整幾耐、幾點先送到呢?重點係,政府員工真係好趕收工喎! 雖然呢個po好快已經刪咗,但已經俾唔少網友轉載到唔同群組喇,而出po嘅事主就答覆咗傳媒,話多謝大家關心,仲話公道自在人心,都係唔講咁多咁話喇!而有網友就憑杯認店,話認得出係元朗嘅鼎鼎茶喎,仲話平時真係得1、2個員工喺舖頭,要整32杯嘢飲真係需要時間,又話要去幫襯返支持吓喎!