Tagged: 多國小食

0

【中環新開打卡粉紅Bar 超抵$88午餐送水果杯】Blush

喺中環食lunch想搵啲高質又抵食嘅選擇,呢間新開嘅酒吧就滿足到你喇!Blush全店以粉紅色做主題,有勁多打卡位。除咗個場夠靚之外,呢度主打一系列特色多國菜同特調飲品。試業期間有唔同優惠俾大家,好似聽日開始供應嘅高質Lunch Set 唔止用優惠價HKD88就食到,依家預先訂座,每份Lunch Set仲送生果杯添。想知成個套餐有幾正?快啲睇埋落去啦! 成間酒吧嘅裝潢都係粉紅色,但每個角落嘅打卡位都唔同feel㗎!喺大型手繪壁畫、粉紅廂座,霓虹燈牆等角落,想影出少女、型格或時尚嘅感覺都得啫。場內仲有特製Beer Pong枱同Slap Cup枱,由Happy Hour開始就有得玩添。 Lunch Set(優惠價HKD88)四款主菜之中,小編試咗兩款。呢個Spaghetti Prawns(原價118)就有三隻肉質爽嫩嘅香煎大蝦!意粉用香蒜橄欖油炒香再加少少辣椒,蒜香之中帶微辣嘅味道好開胃;面頭再灑啲紅椒絲同香草點綴,賣相幾精緻㗎。 另一款Main Course試咗Wagyu Beef Bolognese(原價HKD118),肉醬用和牛煮成,牛味比平時食開嘅肉醬意粉濃好多!而且意粉分量好足,lunch食絕對夠飽。 Lunch Set可以自選配餐湯或沙律,唔好以為跟餐就好hea,呢度嘅出品都好高質㗎。當日嘅是日餐湯係蕃茄濃湯,質地好濃稠,食到有蕃茄蓉添,味道酸酸甜甜夠晒醒胃。而沙律唔止擺盤靚,仲有蘿蔔、車厘茄同沙律菜咁多款蔬菜,啱晒著重健康嘅上班族。套餐本身配咗汽水,但呢度係特色酒吧嘛,想轉餐飲(加HKD6)除咗有凍檸茶,仲可以揀柚子梳打特飲。 平時喺中環買個生果杯起碼要廿蚊,依家只要預先訂座,每個Lunch Set都會送一杯咁豐富嘅水果杯。有埋飯後果食,成個lunch就夠晒圓滿啦! 呢度其實仲有多款開胃小食,呢款Eggplant Parma Ham Roll(HKD78/3件;HKD138/6件)唔止賣相精緻,味道仲好得添!巴馬火腿捲住軟腍嘅茄子,再以食用花伴碟,食落鹹香味十足。 Tacos with Crab and Mentaiko(HKD88/3件;HKD158/6件)一上枱,小編即刻心心眼爆發!脆卜卜嘅墨西哥薄餅夾住以蟹肉同明太子整成嘅餡料,驟眼睇都見到一絲絲嘅蟹肉,分量十足又鮮甜。面頭仲放咗好多魚子醬,精緻得嚟又矜貴呀!   Blush 地址:中環砵甸乍街45號The Steps ‧ H...

0

【天瑞街市有條小食街 掃盡泰川台美食話咁易】街霸

上星期街霸同你去完大埔墟街市尋寶,今次去邊呢?「天水圍好似冇啖好食㗎喎!」,呢句嘢講真街霸成日都聽到,話晒天水圍咁多個商場輪住翻新,翻新完之後開晒啲連鎖貴餐廳,街坊真係冇咩選擇㗎!不過咁,街霸覺得大家可以試吓去天瑞街市出面嘅小食街度搵食,除咗有港式格仔餅、燒賣魚蛋之外,仲有四川嘢、泰國嘢同埋台灣手抓餅添!今次一於一個街市食勻幾國菜啦! 呢條小食街由晏晝2-3點開到凌晨1-2點㗎,取代咗以前不定期會喺天瑞輕鐵站隔離出現嘅小販檔咁喎!一字排開嘅小食店感覺都幾乾淨企理,不過大多數係小店經營,人手唔會太多,宵夜時段要排吓隊喇! 呢間泰好味顧名思義就係食泰國嘢,街霸見佢個餐牌都有幾多選擇嘅,除咗比較輕食嘅炸春卷、扎肉沙律之外,仲有炒金邊粉、冬蔭功套餐(包白飯)呀、椰汁糕呀咁,幾多選擇㗎。 街霸試咗呢個豬頸肉沙律(HKD40)喇,沙律嚟講好似有少少貴,但係你睇吓,勁足料呀!佢啲豬頸肉有種蜜糖烤過嘅微炭燒味,夠晒惹味。沙律除咗生菜之外仲配有蕃茄、紅蘿蔔絲同大蔥,味道帶酸甜,清新得嚟又中和到豬頸肉嘅油膩感,正呀!呢盒嘢兩個人些牙啱啱好,食完唔會太飽,又可以再掃過! 如果你同街霸一樣鍾意食辣嘢,四川嘢啱晒啦!川味軒上至涼拌豬耳下至麻辣燙都一應俱全,今次街霸就叫咗重慶酸辣粉(HKD22)同埋拍青瓜(HKD25),唔好睇少呢兩樣嘢,俗語都有話,最簡單嘅嘢往往係最考工夫嘅,係咪先? 街霸叫咗小辣,望落去唔算滿江紅咁樣,不過都清楚見到粒粒辣椒碎(定花椒?),粉係粗身嘅紅薯粉,同傷心酸辣粉嗰種一樣。飲落個湯唔會好重口味,但辣味都夠嘅!不過我諗如果平時食譚仔十小辣嘅朋友仔就可能要叫姨姨再輕手啲喇,因為佢個小辣都有啲啲分量嘅,你當5小辣咁上下啦。22蚊嚟講算幾大碗,女仔實夠飽!仲可以加餸添! 拍青瓜其實都算幾驚喜,因為街霸曾經喺啲連鎖舖頭食過,一係太油一係就冇乜味,但呢個拍青瓜配料都好多,面頭嘅黃金豆同蔥花多到睇唔到青瓜咁滯。將青瓜同底下嘅秘製辣油撈好之後嗰種酸辣味道真係好刺激嗅覺呀,正!青瓜超級爽口,辣味有層次,吞落肚嘅時候嗰種麻辣先慢慢滲出嚟,好過癮!鍾意食辣嘅朋友唔好錯過!同酸辣粉一樣,呢個拍青瓜嘅小辣都唔嘢少,大家因應自己食辣嘅程度執生喇! 如果想食啲冇咁heavy嘅嘢,可以選擇呢間賣台灣手抓餅嘅日日店,黃金餅底(HKD10)另外再加配料上去,分別有基本嘅芝士(HKD5)、煙肉(HKD5)、火腿(HKD5)、煙鴨胸(HKD5),另外仲有啲fusion選擇,例如煉奶肉鬆(HKD10),不過街霸今日就唔試啲咁「新奇」嘢喇,留返你哋試完話俾我知啦! 街霸試咗黃金手抓餅,加咗芝士同火腿。有少少蔥油味幾香口,仲夾住啲芝士醬,問返老闆先知,原來「黃金」就係指啲芝士醬。哎吔,早知就唔加芝士加過第二樣啦!不過唔緊要,試啖先。咦,芝士味果然好濃,咬落口都有啲拉絲嘅感覺,不過雙重芝士感覺有啲啲膩喇! 除咗以上三間,隔離仲有間賣港式魚蛋燒賣、印尼撈同埋糖水舖㗎,下次去開濕地公園記住喺天瑞站落車試吓喇! 街霸最愛:豬頸肉沙律毫無疑問係街霸心目中嘅no.1呀,料多又好食,食完想翻兜添呀!(不過真係有啲遠……) 泰好味 地址:天水圍天瑞邨街市T13號舖 電話:無 營業時間:不定 川味軒 地址:新界天水圍天瑞邨街市T64號 電話:無 營業時間:10:00-01:30 日日店 地址:新界天水圍天瑞邨街市T52號 電話:無 營業時間:不定