Tagged: 大圍

0

【大圍新開石燒牛扒買一送一 熟成肉眼扒軟滑味濃】Grill’er

大圍最近新開嘅石燒牛扒Grill’er除咗啲扒夠靚,仲可以自由加配鵝肝、虎蝦、北海道帶子等高質食材喎,比平時嘅選擇多啲。呢度嘅石燒牛扒最平HKD78就食到,而少有嘅熟成牛扒都唔係好貴,即刻睇吓有幾正啦! 由依家起至3月13號都有買一送一試業優惠,每晚9點後嗌HKD78以上嘅扒餐都會免費送一客Grill’er精選(HKD78)。 呢度嘅重量級牛扒係超值之選嚟㗎!呢款美國28日風乾熟成帶骨肉眼扒(HKD298/300g)大到同塊石板差唔多size,肉質軟腍仲比一般肉眼扒濃味,蘸埋岩鹽就會更多提點添。 西班牙黑毛豬鞍(HKD108/200g)加配匈牙利鵝肝(HKD29)都係唔錯嘅選擇。豬鞍非常厚身,但入口有油香又幾爽口彈牙喎,想解膩的話可以點柚子汁。 開頭都怕加鵝肝會更油膩,但出奇地煎到少少焦香後入口係惹味而唔肥喎。 鍾意多啲配搭嘅就有牛舌拼海鮮套餐(HKD148),6片厚切牛舌、兩粒大size北海道刺身帶子同埋兩隻越南虎蝦,夠晒豐富呀!呢個組合light啲又鮮味,不過同樣啖啖肉㗎。 呢度嘅抵食之最就係Grill’er精選(HKD78/180g),而且餐廳會因應來貨轉換唔同地區或部位嘅牛扒,確保品質之餘又有新鮮感。 店內一角設置自助沙律吧,因為套餐仲配咗其他食物。 每份套餐都可以任飲任食用牛骨熬煮9個鐘嘅羅宋湯、雜菜沙律同白飯,一定可以食到飽呀!   Grill’er 地址:大圍積信街77-83A號積善樓地下B號舖 電話:從缺 營業時間:星期一至五:17:00-22:30,星期六、日:13:00-22:30  

0

【肉餅哥潮推「新豬肉」素菜 蒸完再煎糖醋麻辣任揀】素學堂

大圍嘅肉餅哥小炒料理出名花款多多嘅肉餅,過往有有芝士肉餅、金沙蛋黃肉餅呢啲重口味款式。依家咁多人食素,肉餅哥都要跟上潮流步伐啦!今次肉餅哥小炒料理同Green Monday合作,選用年中引入香港嘅*新豬肉Omnipork,推出全新素肉餅,配合唔同嘅素小食,令素食者都可以大擦一餐。 肉餅可以配白飯、南瓜粥或米粉,如果加HKD2可以轉菜飯。小編就比較鍾意南瓜粥,清甜又潤喉啲。不過跟餐嘅是日餐湯有肉,所以素食者要小心喇。 幾款肉餅之中,蓮藕蒸新豬肉肉餅(HKD59)口感同真嘅最相似!新豬肉豆香味濃郁,因為用豌豆整成,口感有啲似麵筋,幾結實;混入大量蓮藕粒,非常清新爽口。 平時食中式肉餅通常都係蒸,不過先蒸後煎你又試過未呢?糖醋煎新豬肉肉餅(HKD59)先蒸6分鐘,然後再煎3分鐘左右至金黃色,外脆內滑。跟住淋糖醋汁,味道同口感似素咕嚕肉。質感有啲厚實,糖醋汁酸酸甜甜開胃,絕對會令你想食多幾碗飯。 麻辣香菇煎新豬肉肉餅(HKD59)主要用辣椒、香菇、甘荀絲同菜脯增加口感同提味。唔食得辣嘅朋友考慮清楚先好試,小編試完承受唔起,因為好易咬爆啲辣椒㗎!呢款肉餅冇醬汁,建議配南瓜粥或米粉會易入口啲。 另外都有小菜俾大家加料,芝士炸薯波(HKD28/6粒)將薯餅搓成波形包住芝士,香口又濃味,過足口癮。 前面嘅涼拌青瓜(HKD22)清爽多汁,最好係幫到解辣。 中間嘅芥香木耳(HKD22)好新鮮爽口。味道鹹中帶酸,再加埋芥末味慢慢滲出嚟都幾開胃。 後面嘅芥末四季豆(HKD20)嘅芥末味比芥香木耳強好多,完全滲晒入豆,非常攻鼻呀! *每100克“Omnipork新豬肉(純植物肉碎)”含1.5克飽和脂肪,與一般未經烹調的豬肉碎(瘦肉佔84%)#相比,“ Omnipork新豬肉”的熱量和飽和脂肪分別低65%和70%。(#參考資料:美國農業部營養資料庫)   肉餅哥小炒料理 地址:大圍美田路30號美林邨熟食亭5-8號 電話:9885 6225 營業時間:星期一至日:11:30 – 22:30

0

【必試芝士鰻魚滑蛋熱狗 人氣小店日賣過百隻】白羊.座

大圍有隻熱狗好出名,日賣過百隻㗎!等小編同你潛入白羊.座,搵出佢哋過人之處俾你睇啦! 簡約嘅設計都幾舒服,同朋友嚟聚一聚都唔錯。 火灸芝士鰻魚滑蛋熱狗(HKD58)麵包好鬆軟,喺厚身入味嘅肥美鰻魚上面,鋪足三層碎芝士都未夠邪惡,仲燒到佢好似熔岩芝士咁,香滑美味必食之選! 想清少少就可以試吓煙三文魚碎蛋牛角包(HKD45),可以改豬仔包都得,配薯角或沙律都好惹味。 即炸芝士松露蝦多士(HKD50)未切開已經散發淡淡嘅松露香氣,入面好足料,唔會令你覺得淨係食緊麵包,必點小食呀! 黑松露滑蛋雞扒意粉(HKD55)份量十足,雞扒大大塊,煎到好香脆,滑蛋口感仲超級嫩滑添。 特飲波斯貓(HKD40)幾清甜,飲完之後人都好似波斯貓咁懶洋洋。順便提埋你,呢度午市時間好長,由11:30-16:00㗎,食足4粒半鐘都得呀!   白羊.座 地址:大圍積信街積信樓地下59號舖 電話:5204 9249 營業時間:星期一至日:11:30-21:30

0

【暖意用心魅力甜品】夏雪

人總係對生活有無限追求,當理想未達到,日復日努力,間中都會感到疲憊。夏雪希望可以體貼大家,炎夏嘅時候用涼透心嘅雪糕同凍飲為大家降降溫;嚴冬嘅時候用熱騰騰嘅咖啡同窩夫為大家帶嚟絲絲暖意。隨時隨地為努力中嘅你打打氣,一齊為理想而戰。 店內裝潢簡單有型,空間充足,令人感到舒適。 先感受一下暖意盈盈嘅紫薯窩夫(HKD85),窩夫外層脆而內裡軟軟綿,食落有聞聞烘烤香味。另外紫薯餡料非常豐富,窩夫同紫薯粒粒非常搭配,配上柔滑香甜嘅絹豆腐雪糕,令窩夫食落更加融和甜蜜,蜜瓜亦非常新鮮,每一啖都甜入心。 想喺炎炎夏日仍然保持涼透心,可以試試白桃乳酸沙冰(HKD58)。冰沙除咗飲落柔滑,仲夠晒冰凍!冰沙白桃味非常香,配上新鮮士多啤梨更加突出酸甜果香味,女士們一定好鍾意! 如果想喺冰涼之中搵到暖流,不妨試試極尚香蕉朱古力芭菲(HKD62)。甜滑雪糕沾滿多到差啲流出嚟嘅濃香朱古力醬,兩者混和,冰涼幼滑味道香濃,夠晒誘惑!再加埋香蕉質感柔滑唔會過熟過硬,杏仁片口感香脆,真係隔住個mon都想食佢落肚呀! 一年四季,無論冷暖,熱茶都代表一份關愛。Harney & Sons薄荷茶(HKD40)飲落啖啖甘香,輕輕嘅薄荷味喺口腔縈繞不散,令人回味無窮。 夏雪 地址:西環堅尼地城厚和街6-18號滿發大廈地下D舖 電話:5541 0655 營業時間:星期二至日:14:00-18:00;19:00-23:00 星期一休息 地址:大圍積富街31號益富閣地下3號舖 電話:5698 7729 營業時間:星期一至日:14:00-00:00