Tagged: 大坑

0

【大坑烈女開懷舊麵檔 秘方酸辣粉醒神開胃】前座飯堂

大坑曾經一度係美食地帶,大小餐廳食店林立好熱鬧,但近年慢慢變色,有唔少食店都捱唔住貴租……不過有出有入, 一樣有食店大無畏地立足大坑,小編最近就發現新開咗間幾有feel嘅麵檔喇! 你可能會話,麵檔咋喎?可以有幾好feel?嗱!呢個就係重點喇!由於老闆之一嘅Kaka好鍾意懷舊嘢,尤其係六、七年代嗰種老香港style,所以舖頭嘅格調真係十足《花樣年華》咁,用最經典嘅紅綠配色做餐牌主調,仲特登走去訂造盞霓虹燈,落足本! 當日兩位老闆娘Kaka同Sugar一齊現身,兩位都係烈女性格,清楚自己做緊乜同想要啲乜。通常後生女開舖都係西餐、咖啡店呢啲比較小清新嘅選擇,點解會揀賣酸辣粉呢?Kaka諗都冇諗就話:「因為我鍾意食酸辣粉!」夠晒直接。一句我鍾意然後就向前衝,創業就係要呢股衝勁啦! 「其實最初冇諗住話咩創業嘅,咁我住呢度樓上,有日突然間見到樓下呢個舖位招租,咁同個業主都識嘅,佢又問我做唔做。咁大家都係大坑人,佢又俾到個好好嘅offer,諗諗吓就不如試吓做啦。」落街就開工,上返樓就休息,十足舊時前舖後居嘅生活喎!兩位老闆娘原來仲有正職在身,要兼顧正職同時又要顧住間新舖,不得不令小編佩服! 最招牌嘅酸辣粉(HKD40)!Sugar話呢碗酸辣粉湯底嘅秘方來自一位老師傅,湯底味濃,酸菜分量剛剛好,辣得嚟唔會搶喉,酸辣粉係幼身嘅,質感有少少煙韌,不過如果大家鍾意食超煙韌嘅薯粉就可以加5蚊試吓超寬薯粉。一路食一路忍唔住飲埋啲湯,有種愈食愈開胃嘅感覺呀! 另外阿金紅燒牛肉麵(HKD78)亦相當唔錯,麵有啲似刀削麵,軟韌程度適中,小編超鍾意!牛肉超級腍身,完全唔會食到黐住晒啲牙,唔知以為自己食緊和牛呀,可以話係小編食過最好嘅牛肉麵喎!湯底濃郁,幾有台灣風味。 小食方面,小編推薦麻辣手撕雞(HKD48)。雞絲滑溜,麻辣超香口,做送酒小菜一流!青瓜絲同雞絲分量啱啱好,食落幾fresh幾開胃! 最後呢塊大過我塊面嘅椒麻炸雞扒(HKD38),原塊超大炸雞扒40蚊有找,抵呀!咬落唔會「皮肉分離」,炸雞皮連埋嫩滑嘅雞肉咬落爆晒汁,即叫即炸,鍾意食香口嘢嘅朋友仔咪錯過喇! 小編覺得一間餐廳除咗食物好食,人情味亦係留住食客嘅主因之一。今次嚟到前座飯堂食麵,小編覺得成個環境好舒服,氛圍就同兩位老闆一樣咁free style咁率性,食物又好食。鍾意食酸辣粉嘅朋友不妨一戰呀! 前座飯堂 地址:大坑新村街39號地下 電話:5118 1869 營業時間:12:00-22:00

0

【大坑高質小店夠貼地 住家肉餅飯家鄉肉骨茶】兩草

最近大坑有間人氣小店,好多時都大排長龍,有咩咁巴閉先?咪就係因為價錢夠晒貼地囉,同店名「兩草」一樣,廿蚊搞掂!店內小食20蚊就食到,確係好大眾化,唔怪得咁多食客幫襯啦! 雖然小店生意好,但老闆為咗保持質素,堅持貴精不貴多,一切以客為先! 蛋炒豬腸粉(HKD20),腸粉非常軟熟,入口仲好滑溜,加埋蛋一齊食,味道好match又香口呢! 香煎魚餅(HKD20),本身想試招牌小食班蘭咖央多士,可惜下午時段已經好快賣晒,所以提提大家,如果想食就要早啲去啦,唔係賣完就冇㗎喇!冇得食多士,老闆推介咗煎魚餅,用新鮮嘅純鯪魚肉製造,入口已經非常夠味,唔使點豉油都得喎!     香煎脆邊蛋肉餅飯(HKD30),日賣200碗冇誇張!其實材料好簡單,不過就煮得一啲都唔馬虎。好似米飯用上金鳳米,粒粒分明重米香;肉餅唔用冰鮮肉,手剁豬肉整肉餅先最好味嘅!加上肥瘦豬肉比例適中,好有住家飯嘅感覺呀! 胡椒肉骨茶(HKD35),估唔到咁港式貼地嘅小店會有星馬風味嘅肉骨茶喎!原來係因為老闆喺馬來西亞出世,梗係要整返味家鄉招牌肉骨茶啦!第一口感覺有少少微辣,之後嘅胡椒香味先慢慢滲出嚟,而且仲有3條骨俾你慢慢食,可以話係超足料,夠晒水準呀! 兩草 地址:銅鑼灣銅鑼灣道126號 電話:2796 6868 營業時間:星期一至四:12:00-15:30;17:30-20:00;星期六至日:12:00-15:30;17:30-20:00(星期五休息)

0

【牛油果百變食得又飲得 3大輕食店吸睛首選】素學堂

「好脂肪」唔怕食,1個牛油果熱量大約有230千卡、21克總脂肪(大約4茶匙油),不過近7成係不飽和脂肪,就係「好脂肪」喇!佢幫助增加好嘅膽固醇,同時降低壞膽固醇同預防心血管疾病。牛油果仲含有鉀、葉酸同葉黃素,幫助降低體內嘅鈉水平同降低血壓。咁正嘅食物當然有餐廳將佢收入menu啦,今次小編走訪3間餐廳,介紹佢哋嘅牛油果素食俾大家。 以花會友 :jrink 喺大坑嘅:jrink以售賣特色茶飲爲主,仲有其他輕食(沙律、多士等等),食物會以花做點綴,好嘗心悅目。 牛油果吐司沙律(HKD80)以歐式麵包做底,口感偏乾同麥味重啲,上面搽咗牛油果蓉,有微微檸檬嘅酸味,幾fresh。沙律菜上再灑上食用鮮花,配埋嫩滑流心蛋,篤爆佢撈落沙律菜食,味道會更香濃。   :jrink 地址:大坑安庶庇街21號地舖 電話:2284 4203 營業時間:星期二至六:12:00-20:00;星期日:12:00-18:00(星期一休息)   咖啡×水果 Athletic Juice & Espresso Bar 咖啡小店Athletic Juice & Espresso Bar隱身喺灣仔星街,仲有健康果汁同用蔬果打出嚟嘅冰沙,夏天飲唔到熱咖啡都可以歎杯透心涼嘅飲品解渴啦。 Avolatte(HKD48)將牛油果刮空倒入Latte取代咖啡杯,仲可以食埋墊底嘅牛油果蓉㗎。果香蓋過咗Latte嘅咖啡味,但奶香味夠,味道都幾match。   Athletic Juice & Espresso Bar 地址:灣仔星街2E號地下 電話:2385 1013 營業時間:星期一至五:07:00-19:00;星期六、日:07:30-19:30...

0

【連包裝都食得!食住玩盞鬼紙藝雪糕】Loooop

小編都幾鍾意食雪糕,但係食完雪糕成日都要周街搵垃圾桶去掉包裝紙,又浪費又麻煩。大坑嘅雪糕店Loooop就係雪糕包裝紙嘅救星!事關雪糕店主打食得落肚嘅包裝紙,甚至連雪糕杯都食得,啲包裝紙仲要好靚添呀!呢種技術其實係店主喺美國搵返嚟,可以將公仔圖案印上可食用米紙上面,除咗可以應用佢嚟做包裝,仲可以整好多公仔出嚟擺喺雪糕上面玩。每款雪糕都有唔同主題,實有一款啱你口味又啱玩! XOXO(HKD53)以北海道3.6牛乳製成,配上西班牙入口嘅士多啤梨脆脆、凍乾草莓粒同朱古力碎,最後再喺個頂上面加上一粒新鮮士多啤梨拉糖,真係夠晒尖添!米紙加上印有鑽石戒指、心心同車厘子等等,以甜美感覺為主。外形咁少女,食落亦唔係得個甜字,先食到甜味後帶有少少酸,唔會好膩,酸酸甜甜外形又討好,女士應該會好鍾意! 如果好似小編一樣,鍾意星空嘅朋友可以試下MOON(HKD50)。雪糕杯係黑曲奇杯,雪糕配以朱古力脆皮醬同估你唔到嘅朱古力爆炸糖,食落非常驚喜!除咗食到有一粒粒爆炸糖大爆炸之外,星星係朱古力脆米,食落脆卜卜,口感好過癮!加埋雪糕主題係太空,火箭、太空人、UFO等等元素,仲唔有排玩?太空人A:「等等先!我要帶埋粒星星上UFO……呀,唔係,係上火箭!」 POOL(HKD50)呢個雪糕杯係手工烘焙嘅牛油曲奇杯嚟㗎!白色粒粒係西班牙搭飛機過嚟嘅乳酪脆脆嚟,酸酸地夠晒清新,再加埋一塊大大舊軟綿綿又香甜嘅烤棉花糖擺喺上面,夠晒搶眼!仲有一班海洋動物,企鵝、鯨魚、海獅同北極熊齊齊走晒出嚟玩返轉,未食已經透心涼啦! 鍾情科幻主題,仲有一個以外星人為主題嘅雪糕好啱你!UFO(HKD58),雪糕杯係榛子曲奇餅味,配上朱古力榛子雪糕,雙重濃香滋味。再喺上面插上一個益力多甜筒,配上榛子同爆谷,造型出位又趣怪。再附上外星人、人造衛星、UFO等等造型米紙,做出登陸星球嘅效果。你仲可以隨意將米紙擺嚟擺去,擺出自己嘅外星小故事。外星人:「呢個星球已經被佔領,你地都係退下啦,我要自己慢慢食!」 Loooop 地址:大坑浣紗街2A地下 電話:8192 8815 營業時間:星期一至日: 12:00-00:00

0

【相機必食!美顏雜莓奶凍】The Pudding Nouveau

大坑就好似銅鑼灣嘅後花園咁,當你行到攰一攰或者想嘆返餐特色悠閒美食,去大坑就最好不過。小編最近發現法式小店The Pudding Nouveau,除咗食物靚又有水準,食物款式仲好特別,大家入開大坑覓食一定要去埋睇下! 見到呢款法式油浸鴨腿配窩夫(HKD158)配搭係咪好新穎呢?小編估唔到鴨腿會配埋窩夫一齊,仲幾夾添!一開始熱辣辣咁上檯已經好香噴噴,鴨脾刻意用咗先焗後炸嘅製法,先鎖住肉汁,再炸令鴨皮香脆金黃,每一啖都有脆卜卜嘅外皮之餘有嫩滑嘅肉入口,真係好高享受呀!窩夫質感鬆化,帶點香脆,如果想甜啲可以蘸上蜜糖。外脆內軟又多汁嘅鴨腿同窩夫真係意想不到嘅配合!點完蜜糖嘅窩夫,甜味剛剛好中和鴨腿嘅濃味,食完個口仲留有陣陣甜香。 鴨腿上面嘅太陽蛋固然可以分開食,但係混和鴨腿食先係更高層次嘅享受!太陽蛋嘅蛋汁混和嫩滑鴨肉,口感更柔滑,味道更融和。而且蛋白部分都好白淨嫩滑,食落去嘅時候喺脆皮鴨香嫩肉之中更添一分滑溜。 甜品都一樣好出色㗎!原本小編點咗個雜莓奶凍(HKD62),睇個名以為平平無奇,原來賣相好精美。上面除咗有一條朱古力卷卷之外仲有一球雪糕,雪糕溶咗會無咁靚㗎,記得一嚟到就要把握時間相機食先!味道方面,士多啤梨非常新鮮實肉又爽甜,同酸酸甜甜雪糕配埋真係好夾。底層嘅奶凍十分嫩滑,唔算好甜,入口好滑,鍾意食奶凍嘅朋友唔好錯過呀! 芒果流心炸飯波(HKD108)炸飯波外層脆卜卜,原來係由牛奶煮過嘅意大利飯製成,內裡係新鮮芒果製成嘅流心餡,仲有好多果蓉!食落外層好脆,但係又帶點煙韌,有少少似食緊燸米飯咁,配埋酸甜芒果味完全唔會覺得滯。另外仲配有雲呢拿汁,仲有自家製椰子雪糕添呀! The Pudding Nouveau 地址:大坑京街17A地下 電話:3585 7325 營業時間:星期一至五:15:00-23:30 星期六至日及公眾假期:12:00-23:30

0

【惡魔芝士意粉】BOND

香港既後花園係西貢相信就聽得多,但係銅鑼灣都有一個後花園,大家又知唔知道呢?無錯啦,就係大坑啦!大坑最出名既就係每年中秋節既舞火龍環節,這頂活動中外聞名,都令大坑依個地方出名起來,但除左舞火龍,大坑最出名既梗係食店林立,款式各樣,而小編今日去既地方,就係以意、法菜為主打既BOND。  一入到去,裝潢設計走工業風,既時尚又突顯氣派,落地玻璃令內裡充滿自然光,令人有種悠閒既感覺。可惜係,因為午餐時間,人流比較多,如果係歡樂時光,人流比較少既時間前來,相信係三五知己聚腳既好地方。 室外更設有藤製梳化位,加上BOND係二樓既餐廳,自成一角,讓人不經意地放鬆心情,忘卻煩惱。 環境好當然係重要啦,但食物既質素先係一間餐廳好壞最主要既原因。今次小編就係食佢個brunch午市套餐 (HKD248) ,前菜任食,另包餐湯和7選1主菜,價錢合理之餘,質素當然有返咁上下啦!  既然去得咁高貴既餐廳,小編一於收起平時粗魯既舉止,逐樣逐樣慢慢食,首先食左前菜先,有蕃茄芝士,芝士濃郁既味道配上蕃茄既清新,有一種開胃既感覺,此外還有其他沙律任君選擇,真係要忍得住口先唔會食前菜就食飽。 之後仲有幾款凍肉同辣肉腸選擇,配上哈蜜瓜,肉既油香同生果爽甜既結合,絕對係前菜既必食之選。 食完前菜,都飽左一半啦,因為真係太好食,都令到小編更加期待主角既來臨 – 24個月巴馬臣芝士意大利麵 (HKD198)。材料有24個月巴馬臣芝士,Barcadi冧酒同埋黑松露意粉,首先將冧酒淋係巴馬臣芝士內,之後用火槍高溫燒芝士表層,令其芝士溶化。 之後將溶化既芝士刮下,立即將黑松露意粉翻倒在芝士內,然後不斷搞混,務求令到每一條意粉都融入係芝士內。完成之後就重新上鐵鍋,再煮令其味道更加入味,然後就上碟啦! 上碟後再加上巴馬火腿,一碟完美的意大利麵就正式可以食得,一啖食落去,意粉依樣有彈性,入口便感受芝士既濃郁同巴馬火腿一絲絲既細滑,最後黑松露既香味先慢慢從喉嚨散發出黎,但所以食材都互相平衡,一試愛上。食緊既時候的確有無限的罪惡感,不過見到眼前既美食,真係豁出去! 此外,依度既頂級肉眼扒都係從美國直送入口,平時晚餐16安士都需要HKD438,依家brunch午餐用一個相宜既價錢就可以有尊貴既享受。一咬入口,多汁而鮮嫩,除了意粉外都係一個唔錯既選擇作為主菜。 最後,嫌主菜都唔夠喉既話,仲可以有其他餐酒比大家去選擇。 BOND 地址:大坑銅鑼灣98號2 樓 星期一至日: 12:00-15:00; 18:00-22:30