Tagged: 大埔

0

【週末揸車玩轉大埔 滑草打卡歎老字號蟹粥】Local自駕遊

放假唔一定要去外地嘅,留喺香港都有大把好玩好食嘅選擇,週末短短哋嚟個本地一日遊都夠晒充實㗎。今次就喺大埔瘋狂打卡食嘢,再殺入沙頭角滑草,保證大家玩到唔捨得走,即刻出發! 活化打卡熱點 綠匯學苑前身係舊大埔警署,呢個一級歷史建築物活化之後成為文化保育中心,亦還原咗唔少舊警署昔日嘅面貌。報案室、羈留室、槍房等唔止可以參觀,有啲位仲可以打卡添,鍾意懷舊風嘅一定要嚟喇。呢度間中會舉辦導賞團或工作坊,有興趣就留意佢哋官網啦。 綠匯學苑 地址:大埔運頭角里11號 電話:2996 2800 開放時間:星期一至日:10:00-17:00 [最後登記入場時間:16:30](星期二休館) 費用:全免   午逅星馬菜 都算區內新店嘅果子Life Café主打新加坡同馬來西亞菜,有得食經典嘅海鮮喇沙(HKD66)同埋肉骨茶(HKD88),味道突出之餘分量都幾多㗎。 果子Life Café 地址:太和汀角路11-13號啟昌樓地下13號舖 電話:2812 6038 營業時間:星期一至日:11:30-22:00   四驅滑草 食完晏可以揸大約30分鐘去禾田喜山種植園,入面有70米滑草道俾你風馳草道嘅滋味,大人細路都玩得㗎! 呢度仲有得餵羊仔、玩高卡車、泡泡足球等等添,買全日(HKD120/位)或半日套票(HKD90/位)就可以任玩園區設施。不過呢度冇得wallk in,想去就要預約喇。 禾田喜山種植園 地址:沙頭角塘肚村 電話:6010 5978 / 5118 1740 營業時間:星期五至日:10:30-16:30,星期一至四休息 停車場:HKD80/日泊(園區內)...

0

【80年代車仔檔東山再起開舖 傳承秘製清湯腩街坊撐】基哥一品清湯腩

如果問起邊度食清湯腩正,好多人都會推介大埔群記,不過最近就有間聲稱自己係老字號嘅基哥一品清湯腩,同樣開喺大埔挑機喎!其實老闆基哥本身係大尾篤出名嘅忠誠盤菜館主廚兼老闆,佢話自己喺80年代尾嘅時候喺太和擺車仔檔相當受歡迎,今次東山再起開舖賣清湯腩,只係為咗想將呢門手藝傳俾囝囝,所以招牌上面嘅「1992」唔係代表喺1992年起家喎,而係囝囝嘅出生年份呀!小編聽完呢個小故事覺得都幾warm喎! 基哥對於自己嘅秘製清湯腩非常有信心,「又唔係話踩場(對大埔群記)嘅,都係做好自己,唔怕人哋嚟比較……我開喺呢個位雖然唔旺,但你睇吓平日下晝都咁多街坊過嚟幫襯,呢啲就係證明喇!」 最招牌當然係清湯腩河(HKD35)啦,湯底望落似清湯,但飲落清甜唔膩,係清燉牛肉湯嘅味道。牛腩唔算厚切,不過咬落好有嚼勁,偏爽口嘅質感令人食唔停呀!每款牛腩都肥瘦分明,油脂偏佈好均勻,牛味十足。 另外清湯豬手上海麵(HKD35)亦係基哥得意之作,豬手一碗有三大嚿,每嚿滿滿嘅骨膠原,肉質鮮味咬落超腍。35蚊抵啦! 除咗普通麵食,晚市仲有做火鍋(HKD240/2位用),分別有清湯牛腩湯底同清湯豬腩什湯底。牛丸係自己搵工場做嘅,包保牛味十足! 基哥話遲啲可能會做埋火鍋到會,大家安坐家中都可以打到佢哋出品嘅邊爐,正喎! 最後不得不提佢哋自家製嘅三款秘製醬料,暫時推出咗三款:左起:XO醬、辣椒油、鹹蛋黃醬(未定價)。小編試咗辣椒油真係超惹味,夾埋清湯腩嘅鮮甜真係冇得輸!大家有興趣可以買返罐,平時煮麵加落去不得了呀!   基哥一品清湯腩 地址:大埔富善街6-14號永祥大廈地下 電話:2513 6828 營業時間:星期一至日:09:00-21:00

0

【北歐素人大尾篤開麵包舖 炮製家鄉無添加純素酸種包】素學堂

對加工食物敏感真係好煩,Alex就係其中一個。來自拉脫維亞嘅佢,家鄉以麵包做主食,10年前因工作關係遷居香港,每逢Alex喺超級市場買麵包,次次一食就皮膚敏感,出好多紅斑勁辛苦。因為佢對麵包入面嘅添加劑同人工酵母過敏,於是決定自己用復古食譜整傳統嘅拉脫維亞工匠麵包,只用自家酵母製作酸種麵包,冇添加劑同化學物。不過裸麥欠缺筋性,要發酵足足再30個鐘以上,即使過程繁複都無阻佢整麵包嘅決心,上年年底仲喺大尾篤開咗Mayse Artisan Bakery。店內所有麵包都係純素,有啲仲係無麩質,Alex太太同囡囡都會幫手㗎。佢哋星期六、日仲會供應pizza同三文治呢類輕食,仲有素奶咖啡。如果想試佢哋嘅麵包,又嫌路程太遠,可以去佢哋網頁訂貨,之後去上環嘅合作café *Confusion Plant Based Kitchen拎貨。有時Alex都會去糖廠街市集呢類市集擺擋,或者同素食餐廳crossover,佢哋都會喺Facebook專頁更新參與咩活動。究竟拉脫維亞傳統麵包係咩樣?由最好賣嘅麵包開始睇啦! 拉脫維亞傳統麵包會加入香料,賣相一般但味道好,質感結實,分量亦十足,同港式麵包截然不同。天然酵母運用環境中嘅菌種發酵麵包,所以天氣會影響有冇過度膨脹,或者要用更多時間。上圖呢三款啡色嘅Rye Sourdough系列(HKD90起/條),每款每日最多只造兩條,因為製作時間超過7個鐘呀! Rye Sourdough麵包以健康嘅裸麥製作,所以麥香味好濃郁,密度好高,拎上手真係幾重吓。口感比較乾身,比法國麵包更硬淨。三款之中有啲會加香料,好似Caraway Seeds(葛縷子,又名藏茴香籽),味道堅似茴香,仲有微微薄荷嘅清新感覺;亦有一款會加入果乾,好似紅莓同核桃,都係香港人比較鍾意嘅口味。 第二款暢銷麵包係Ciabatta系列(HKD25/條),硬度似法國麵包。口感比Rye Sourdough系列濕潤啲,麥味輕少少,但都好有麥香。有橄欖同蕃茄兩款味,都幾特別㗎。 Tofu Cake(HKD40/件)係低糖純素款式,要先烘焗餅底再烘蛋糕,手工都唔少,一件比Starbucks大啲。Alex每朝去街市買新鮮豆腐做蛋糕餡,口感有啲似布甸,外皮就焗到脆脆哋,幾香口。因為加咗檸檬汁,有少少酸味味;仲有杏仁奶油同木薯粉,都會有啲飽肚感。不過蛋糕款式日日唔同,數量超有限添,想買原個蛋糕就要預訂喇。 呢日嘅Muffin(HKD10/個)係香蕉Muffin(左)同甘荀肉桂Muffin(中及右),比平時食嘅冇咗油嘅Heavy感。香蕉Muffin味道清香,但香蕉味唔重;甘荀肉桂Muffin嘅甘荀同肉桂好出亦好match,小編就私心推介呢款多啲。   Mayse Artisan Bakery 地址:大埔大尾督路64號地舖 電話:6409 1966 營業時間:星期一、二及四:12:00-20:00,星期三、五至日:10:00-20:00 *合作café(取貨點) Confusion Plant Based Kitchen 地址:上環上環蘇杭街103號地舖 電話:6409 1966 營業時間:星期一、二及四:12:00-20:00,星期三、五至日:10:00-20:00

0

【大埔隱世冰室名不虛傳 $28一口花生奶醬多超值】平霸

唔講唔知,喺大埔嘅寶湖道街市有間隱世冰室好受街坊歡迎,雖然位置有少少隱蔽,但人氣依然不減,仲有好多客仔山長水遠專登去幫襯添! 今次平霸介紹大家去珞桐冰室,最出名係一口多士,28蚊食到「小山丘」多士,仲要包埋飲品,抵到爛!價錢夠親民,味道又點呢? 一口粒粒花生奶醬多士(HKD28)套餐送埋咖啡/茶,轉凍飲就要加3蚊。提提大家,多士要11:30之後先開始供應,想食記住睇啱時間喇!平霸呢日閒日下晝去到,人流唔算好多,落咗單唔使等好耐已經有得食喇。上到枱,賣相係吸引嘅,估唔到呢個價錢仲有「小山丘」分量,即刻心心眼! 一口多士滿佈香濃花生醬同煉奶,多士仲要烘到脆卜卜,細細粒size就咁放入口啱啱好。花生醬加埋煉奶一齊真係好邪惡呢!面頭仲要灑咗少少白砂糖,食落好好味,難怪個個一坐低已經爭住order佢啦! 最鍾意花生醬有粒粒,唔單止多士夠脆,加埋粒粒花生一齊食更有口感!不愧為珞桐冰室嘅名物,有料到㗎! 另一款滋味蝦多士(HKD28)都好多人叫,價錢一樣,仲有埋薯條同飲品,咁抵,點可以唔試埋佢?可以配薯條/沙律,平霸今次就揀咗薯條,仲有茄汁同沙律醬兩款醬俾你點呢!鍾意點食都得啦! 蝦多士有兩嚿,切開一半蝦肉分量都算多,唔會話得嗰少少,而且外層嘅炸粉一啲都唔厚,炸到脆卜卜,蝦肉又夠彈牙,食落幾香口,點埋沙律醬就一流! 薯條算厚切,食落都幾重薯味,仲帶有些少微辣喎!   平霸小評:好多時街市入面嘅食肆先係臥虎藏龍,處處出名物呀!今次專程去珞桐冰室食一口花生多士,真係好有驚喜,仲要價錢咁抵添!幾遠水路都值喎! 珞桐冰室 地址:大埔寶湖道3號寶湖道街市P2舖 電話:2653 8846 營業時間:星期二至日:06:30 – 17:30(星期一休息) 《平霸》平食四方,歡迎各界報料。

0

【大埔傳統老店街坊捧場 $7鬆軟馬拉糕新鮮出籠】平霸

講到大埔區抵食又好評嘅糕點,平霸即刻就諗起喺大埔墟街市熟食中心,有間傳統茶果店非常出名,次次一到出爐時間都大排長龍,邊間咁把炮?就係有記茶果喇! 缽仔糕最受歡迎,個個食完都大讚軟熟得嚟,甜度又剛剛好。每日供應數量有限,賣完就冇,想食記得要早啲去呀! 店內牆上嘅手寫餐牌都好有特色,字體夠晒特別,傳統味道出晒嚟呀! 雖然缽仔糕好出名,但係其他食物都好值得一試㗎!好似狗仔粉(HKD13),以呢個價錢食到咁大件嘅分量,真係買少見少!食狗仔粉最重要就係要加辣菜脯,啖啖香辣惹味嘅菜脯配上軟腍嘅狗仔粉,口感滋味一流呀!狗仔粉只有簡單嘅蝦米同肉碎做配料,如果冇埋辣菜脯,味道就會比較淡喇! 除咗狗仔粉,當然要試吓主打嘅茶果啦!今次小編試咗板糕(HKD6),雖然就咁睇賣相好似唔多討好,其實板糕係傳統客家糕點,只用糯米粉同沾米粉做,入面一啲餡料都冇,不過食落口就煙煙韌韌,仲帶有淡淡嘅黃糖味道。 話晒都係糕點,食晒一個都會覺得有少少滯,如果可以配返杯茶歎吓就perfect喇! 嫌未夠喉?不妨試埋馬拉糕(HKD7),簡直係重量級呀,見店員新鮮熱辣喺蒸籠攞出嚟嗰刻,已經流緊口水啦!入口第一啖已感受到濃濃蛋香味,加上口感極鬆軟,又唔會太甜,不愧為傳統老店嘅出品,的確有料到!   平霸小評:傳統老店自然有返咁上下水準,能夠深受咁多街坊熟客歡迎實有原因嘅!今次平霸食咗三款食物都咁高質,尤其係馬拉糕,一試難忘超水準呀! 有記茶果 地址:大埔鄉事會街8號大埔墟街市及熟食中心2樓 電話:6151 0810 營業時間:星期一至星期日:08:00-18:00(星期三休息) 《平霸》平食四方,歡迎各界報料。

0

【10蚊茶記下午茶邊度搵? 窮人恩物8款任揀】平霸

最近平霸收到風,話喺大埔有間茶記真係平到爆,下午茶十蚊雞搞掂!邊間咁抵食?就係廣東人小廚喇!不過小編嗰日去到就發現門口招牌用紅紙遮住咗! 以為咁平就得好少選擇?錯了,估唔到個下午茶餐牌有成8款選擇添,仲要有飯有麵都係呢個價! 今次小編就食足三款,三款都咁好食,窮人恩物呀! 沙嗲牛肉公仔麵(HKD10),賣得咁平都唔會偷工减料,分量好夠㗎!牛肉都有5大塊,沙嗲汁又夠多,雖然咁平十蚊下午茶就梗係唔包飲品喇,不過伙記都會斟杯水仔俾你嘅! 鹹魚雞粒炒飯(HKD10),炒飯會每日轉款式,食到邊款真係要睇彩數喇!今日呢款係鹹魚雞粒炒飯,分量就一定冇午市同晚市食嗰時咁大碟㗎喇,不過一樣炒得咁有鑊氣,雞粒、蛋同青瓜等配料都算多,十蚊飽肚之選! 各式多士(HIKD10),可以自選兩款口味,小編揀咗煉奶同花生醬。多士外脆內軟,鋪滿煉奶同花生醬,雖然好邪惡,不過又真係好好食,超級鬆脆呀!   平霸小評:真係估唔到仲有啲咁平嘅下午茶呀,仲要有質素添!小編食咗3款都咁好食!唔單止夠晒平喎,店員嘅服務態度仲好好,同食客有講有笑之餘,又會介紹邊款好食,呢次真係唔like唔得啦! 廣東人小廚 地址:大埔廣福道106號培錦樓地下4號舖 電話:2686 1778 營業時間:星期一至星期日:06:30-01:30 《平霸》平食四方,歡迎各界報料。

0

【連日互插 網友剝花生 虎蝦變海蝦羅生門奇案】食焦

又有海鮮偷龍轉鳳事件發生喇!今次更加曲折離奇,苦主同店主都企硬仲互相出招,搞到件事喺網上洗晒版愈嚟愈激,真係好睇過戲呀!有網友喺群組大投訴,話自己買咗虎蝦去食店加工,等咗成個鐘唔在講,上枱嗰碟仲要全部係海蝦仔!「我買二百幾蚊斤虎蝦俾佢蒸,佢竟然求其拎碟普通海蝦俾我……呢間黑店係大埔街市三樓熟食中心,大家千其唔好幫襯,極度無良商家」。 有圖有真相,虎蝦成隻手掌咁大,上枱嗰碟又的確係細咗幾倍嘅海蝦仔!呢間喺大埔墟街市嘅新樂園即刻俾網友圍插啦,仲俾人數埋佢之前有疑似偷龍轉鳳嘅前科,3隻蟹俾佢蒸,出到嚟變咗3蟹4蓋,又係唔同晒樣! 繼續鬧哄哄,苦主同店主都有接受傳媒追問,搞返清楚嘅係,苦主原来只係俾咗3隻虎蝦啫,唔係成碟分量咁誇,食店最後係有賠返$390蚊虎蝦費,但冇退返百二蚊加工費;而店主兩姊弟就同傳媒呼晒冤添,話嗰日只係見到一隻虎蝦咁大把喎,仲話開咗邊嚟蒸係一定會縮水,又話可以同海鮮檔證明,苦主的確只係喺檔口買咗一隻虎蝦!店主仲話唔想俾人冤枉,已經去埋警署備案添! 跟住又再有疑似店主嘅人喺網上po文,長篇大論反擊,「我地都希望當時人會返黎當面對質。因為你一個動作。令到我公司及我本人受到好多不公平及無理嘅評擊!」潛水幾日嘅蝦主終於又開聲喇,「夾埋樓下魚檔造假,希望警方到街市調查」。大家都似咬住大家唔放咁款!兩方都企硬各有版本,呢單奇案睇嚟仲有大把花生剝喎!

0

【佛誕遊大埔慈山寺 朝聖埋3大人氣食店】陳漢記、華輝餐廳、飲嘢

自從誠哥嘅慈山寺開咗之後,有宗教信仰嘅,當然趁機會去參拜吓啦,無宗教信仰嘅,一樣可以去打吓卡當小旅行都得!嚟緊佛誕,大家可以入去應吓景,不過慈山寺有四「不」,其中一個係不設齋堂,要出返大埔或向大美督方向先有嘢食㗎。唔想食齋咁齋?大埔都有好多正嘢選擇㗎,今次介紹呢3間餐廳,有正餐、下午茶同甜品,行完慈山寺嘅話,一次過食盡佢啦! 正餐 陳漢記雖然自稱係粉麵專家,但係佢嘅腸粉同粥都唔錯㗎。一睇見牛肉腸(HKD23)嘅皮咁薄,功架勁過酒樓已經令小編心心眼喇!入口嫩滑仲幾有肉地,仲有甜豉油提鮮,一碟真係有啲唔夠喉。 小編都幾鍾意蟹,所以就叫花蟹粥(HKD47)啦。本身上枱都冇咩感覺,但一夾起蟹蓋,見到啲鮮嫩嘅蟹膏精華滴返落粥度,真係流晒口水囉!粥底幾軟綿,加埋花蟹嘅鮮甜,小編勁勁勁愛呢碗呀!蟹嘅分量唔知係咪次次一樣,因為竟然有一隻半蟹咁多喎!有冇人食過可以話俾小編知呢? 麵點都要試吓嘅,牛坑腩河(HKD46)嘅肉好軟腍,肉味幾香口。可惜幼河粉碎咗啲,唔係就perfect喇。   陳漢記 地址: 大埔運頭街91B地下 電話:2658 2277 營業時間:星期一至日:11:00-04:00   下午茶 好多人都會去華輝餐廳,除咗因為佢係《那夜凌晨,我坐上了旺角開往大埔的紅VAN》片中嘅餐廳,仲因為佢嘅雞批(HKD14/件)好足料!味道唔會好濃,雞肉又大粒,皮都幾脆,真係唔錯。 蘋果批(HKD14/件)都唔可以睇少!蘋果肉超多又厚身,酸酸哋幾醒胃。 蛋球(HKD9/大)即係沙翁,皮幾脆,但厚咗少少,蛋味都香濃。   華輝餐廳  地址:大埔鄉事會坊17號地舖 電話:2656 6420 營業時間:星期一至日:24小時   甜品 天氣咁熱一定要整啲凍嘢涼一涼,嚟到飲嘢一定要試呢杯爆漿士多啤梨奶緹(HKD46)真係不計成本之作!鹹味奶緹好smooth,仲厚到令你一啖都未飲到士多啤梨,要第二啖先飲到士多啤梨,果蓉真係多到黐咗線!小編懷疑起碼用咗半盒士多啤梨,加埋茶底調製,令酸甜嘅感覺好清新,開胃度爆燈,小編都幾鍾意! 提提大家,奶緹唔係攪勻飲㗎,睇睇教學啦。 令一款大熱飲品黑糖珍珠可可奶(HKD38)都好驚喜,自家秘製將黑糖滲咗入珍珠,一入口就甜甜哋,第二度冇㗎!相對可可反而唔需要太甜,但又夠味唔會水汪汪,真係幾考功夫。 仲未消到暑?純對零度仙草冰(HKD74)一定搞得掂,分量多到2-3個人食都得。大大盤有9種料:珍珠、紅豆、椰果、椰汁糕、芋圓、地瓜圓、花生、紫薯圓同雪糕球2個,大部分仲係自家製,唔怪得好多人嚟食佢嘅芋圓糖水啦。   飲嘢 地址:大埔舊墟直街9號粵發大廈地下4-5號舖 電話:2813 7998 營業時間:星期一至四及日:12:00-00:00;星期五、六:12:00-00:30

0

【11個人茶水計14萬9 翠園食飯埋單天價16萬】食焦

有冇諗過去間普通酒樓食餐飯,埋單食咗成16萬?唔係講笑喎,有圖有真相,呢幾日網上流傳一張驚人單據,睇到個個都O晒嘴!話說有網友喺「TAI PO大埔」群組度,po咗一張翠園酒家嘅晚飯單據,埋單銀碼係HKD167,565.2!係咪嚇死人?睇返只得11個人嘅晚餐,但係茶錢竟然係計咗9999人,淨係茶水錢都要HKD149,985,全張單嘅價錢盛惠16萬7千幾囉! 呢位網友只係po咗句「要開8百幾圍先坐得晒喎」再加張單據相,就冇再交待任何嘢喇!識睇梗係睇留言啦,「去咗紅磡香港體育館飲茶,成萬人啊」、「我比較想知佢地(哋)係咪真係有9千幾隻杯多D」、「咁都夠膽比(俾)張單個客嗰下型喎」…… 張單就好明顯係翠園張單,但係咪出自大埔太和嗰間呢,就真係唔知喇!不過翠園所屬嘅美心集團,就有回應到呢件事喎!有發言人答咗傳媒,確認咗係真有其事,但係酒家已經即時修正有關單據嘅資料,同埋已經向員工重申正確程序咁話喎!出錯單搞出張「天價」收據,其實check單呢樣嘢,唔止食客要睇真啲,出單嗰位都要留心吓,唔好搞出大笑話啦! 呢單嘢似乎確係手民之誤成份居多嘅,咁擺到明有心劏客又係點呢?呢排咁啱都有黑店上榜喎!話說有4個喺意大利留學嘅日本留學生,去咗威尼斯嘅Osteria da Luca餐廳食飯,只係點咗3份牛扒、1份炸魚同幾杯清水,埋單就要過千歐元,圍起過萬港銀,4位㗎仔梗係唔會做傻仔啦,當場報警!而呢間餐廳一直喺網上臭朵,俾網民一早數到成地負皮㗎喇! 威尼斯遠咗啲,但係港人旅遊熱點嘅泰國曼谷都一樣中招,好似最近就有位泰國網民因為被店主誤認為係中國人,又被劏喇!佢喺夜市食餐飯啫,叫咗碗羅勒脆皮豬肉飯同隻荷包蛋,雖然埋單只係四十蚊,但已經比平時食貴咗一倍喇,可想而知係點樣劏遊客啦!所以都係嗰句啦,check單check單check單啦!

0

【晚晚爆場厚切刺身 舌戰板半千層海膽】鮨一

依家食咩都好,「勁量」永遠都係最吸引人。如果食日本菜,厚切刺身同大大份嘅海膽都必定令人群情洶湧,所以去尖沙咀鮨一食嘢要早早早好多訂位,因為都幾爆場㗎! 老闆會挑選一啲特別嘅食材做刺身,認真不時不食。 海葡萄沙律(HKD128)主要用咗沖繩海葡萄同長崎蕃茄,超爆新鮮同清甜。原來新鮮嘅海葡萄放耐咗會縮水,所以撈好醬汁就要食咗先。醬汁少少酸尾尾,都幾開胃。 重頭戲之一嘅特上錦繡刺身 (HKD468)有8款海鮮,每款各兩份——噴火灣帶子肉、三陸海岸真鯖、四國油甘魚腩、韓國紫海膽、北海道連子鯛、北海道目張魚同噴火灣牡丹蝦。厚切刺身充滿魚油嘅滑、甘香同鮮甜味。加多HKD100就可以好似上圖咁,有埋日振島吞拿魚,佢嘅特別之處係喺魚鮫位切出嚟,唔係時時有得食㗎。注意:其他海鮮都有機會因應時節轉換款式。 千層海膽飯(HKD298/大)有成板半韓國馬糞海膽,仲灑咗金箔喺面,好豪氣呀!連埋拖羅蓉同加咗赤醋嘅壽司飯,用紫菜包住一齊食唔會好膩,因為酸酸哋嘅赤醋可以中和到油膩嘅感覺。 靚嘅天婦羅會無咩油印到落紙度,呢份炸蝦天婦羅(HKD78)就做到呢個效果喇,食多幾件都無咁罪惡。 鮨一 地址:尖沙咀厚福街12號藍馬商業大廈18樓 電話:3705 9227 營業時間:星期一至日: 12:00-14:30;18:00-23:00   地址:大埔翠怡街3號翠怡花園 16 號舖 電話:2656 6634 營業時間:星期一至日: 12:00-15:00;18:00-23:00