Tagged: 大富翁

0

【大富翁主題館即將開幕 城市遊戲×無盡打卡位】大富翁主題館

即使你冇諗過做到大富翁,你都一定玩過大富翁呢個遊戲。依家咁講有冇回味買地起樓、抽機會同命運卡等瞬間致富嘅刺激感覺呢?嚟緊10月26日,全球首個大富翁主題館大富翁夢想世界™喺山頂就會開幕,有一公斤999.9足金巨獎遊戲、大富翁歷史展、火車站 4DX 影院、無盡打卡位、限量版大富翁、特色大富翁主題小食等豐富環節。想知多啲就跟實小編率先睇啦! 一嚟到門口就見到兩個寶箱,大家玩完成個展館會抽一張兌換卷,如果抽到寶箱就可以嚟呢度碰運氣喇! 兩個寶箱分別係一公斤999.9足金棋子同三星Galaxy S10手機,只要撞啱打開寶箱嘅六位數字密碼就可以贏巨獎喇!每人有兩次機會,預祝大家好運,依家帶你進入「大富翁先生專屬電梯」,去佢嘅「大宅」參觀啦。 入場會有管家同你講解大富翁歷史,你會見到唔少絕版同世界各地特色大富翁棋盤等珍藏品。 仲有集齊大富翁棋子款式嘅展覽,其中呢部「大富翁私家車」仲係全球最大嘅大富翁棋子添。 場內有唔少以大富翁故事為題嘅投影技術,俾你睇吓大富翁先生點樣歎世界㗎。 穿過咁靚嘅霓虹燈牆,就會走入以實體大富翁棋盤為概念嘅「大富翁市鎮」,入面有唔少打卡位同遊戲添。 想感受吓錢紙滿天飛嘅感覺可以玩「ULTIMATE BANKKING」,限時內捉到腰以上飛舞嘅銀紙,可以喺精品店同小食亭按兌換率當真錢使用㗎。 延續動感嘅感覺又唔想咁攰?去火車站4DX 影院,陪大富翁一齊捉賊啦!透露少少,前排座位會噴水同果味煙霧㗎。 仲有水務局、買地同監獄等遊戲同打卡場景俾你慢慢玩。 離開大富翁市鎮之前,去埋大富翁先生嘅金庫影相啦,場館預備咗唔同嘅背景俾你做底圖㗎。 然後去埋抽獎,睇吓你嘅運氣可唔可以攞到寶箱兌換卷啦! 玩完個拎鐘覺得有啲餓,可以買啲特色大富翁主題小食醫肚。 自選套餐(HKD120)包一款小食、三文治或刈包同咖啡,仲有少見嘅氮氣咖啡添。 如果就咁買小食,推介你試黑松露沙律醬薯條(HKD50),沙律醬唔會太濃味,薯條內裡有啲似薯蓉嘅質感添。 想豪氣啲有花膠碗仔翅(HKD50),有一塊花膠伴隨滿料嘅碗仔翅㗎。 臨走買埋精品返屋企啦,有唔同版本嘅大富翁遊戲㗎!   大富翁主題館 地址:香港山頂道118號山頂廣場3樓 電話:從缺 正式開業日期:2019年10月26日 營業時間:星期一至日:10:00-22:00 票價:HKD260/成人,HKD220/小童及長者(套票優惠請留意官網)

0

【大富翁自助晚餐歎各「地皮」美食 抽「機會」卡贏獎品返屋企】花月庭

全球首次官方授權嘅「大富翁自助晚餐」喺旺角花月庭有得食喇,棋盤遊戲上嘅「地皮」、「機會卡」、「棋子」等重點都化身成各款美食同甜品。而且有一連串遊戲,有「機會」贏取美食、唔同版本嘅大富翁遊戲或即將喺山頂開幕嘅全球首間大富翁夢想世界™主題館入場門票,即刻睇吓點樣又食又拎啦! 想玩遊戲贏獎品嘅朋友就要留意活動1同活動2喇: 活動1 凡惠顧自助晚餐,即可獲「機會」卡乙張,換取指定矜貴美食。 推廣期:8月至11月 活動2 讚好及追蹤Royal Plaza Hotel Facebook專頁或Instagram 帳戶參加遊戲,即有機會贏取唔同版本嘅大富翁遊戲、即將喺山頂開幕嘅全球首間大富翁夢想世界™主題館入場門票、自助餐券等豐富獎品。 推廣期:8月至10月 活動3 「大富翁先生」喺餐廳門口嘅拍照區準備就緒同大家合照。 推廣期:8月至11月 今次嘅美食都以香港各區「地皮」為主題,即刻睇吓有咩正嘢啦!代表蘇豪區嘅蠔吧除咗有生蠔之外,仲有松葉蟹腳、太平洋熟海蝦、龍蝦鉗等鮮甜嘅凍海鮮。 而比鄰嘅中環可以話係歐美美食集中地,所以挑選燒羊鞍(左)、燒美國肉眼(中)同德國鹹豬手(右) 為食客帶嚟異國風味。肉嫩多汁嘅肉眼同羊鞍外層帶焦香,而德國鹹豬手外皮香脆鬆化,鹹香味道令人想一食再食。 而代表香港「地王」太平山嘅就有青胡椒牛油忌廉火炙龍蝦(上),將青胡椒切碎加入忌廉煮成醬汁,味道香而不辣,火炙後嘅焦香令龍蝦肉更加惹味。而尖沙咀代表係香煎鴨肝伴多士香檳葡萄果醋汁(下),味道香濃但有果醋汁解膩,入口更加甘香。 以香港做主題,當然要有啲港式風味菜式。好似代表香港仔嘅避風塘豉椒花甲(右上)、豉椒蟶子仔(下)同豉油皇魷桶仔(左上) 等小炒會輪流供應,口感爽滑彈牙又惹味。另外,仲有九龍城區嘅泰式海南雞飯、銅鑼灣嘅日式刺身壽司同深水埗嘅即煮粉麵等都係唔可以錯過㗎! 最後梗係食代表旺角東站同旺角嘅甜品區啦!香橙松露朱古力蛋糕將大富翁先生匿藏喺棋盤裝飾嘅藍色寶盒內夠晒心思;仲有奶黃包(下)、楓葉夏威夷果仁花生醬慕絲蛋糕(中)同菠蘿紙杯蛋糕(上) 通通以大富翁頭像、棋盤、房子、旅館作造型裝飾,不過以上幾款只限星期五至日輪流供應。不過唔使失望,仲有下面咁多款甜品俾你慢慢歎!   花月庭×大富翁自助晚餐 供應時間及收費:星期五、六及公眾假期前夕供應日期:即日起至11月30日 供應時間及收費:星期日至四及公眾假期 – 全時段(18:00-22:00):HKD628/成人,HKD418/小童,HKD488/長者 – 第一優惠時段(17:45-19:45):HKD528/成人,HKD348/小童 – 第二優惠時段(20:00-22:00):HKD528/成人,HKD348/小童 –...