Tagged: 大角咀

0

【家上海佛跳牆宴買一送一 新推客飯餐外賣75折】家上海

家上海推出全新奧海城限定嘅佛跳牆海皇宴,兩位起仲買一送一,計埋茶芥同加一都係百幾蚊位就試到一系列招牌菜同新鮮海產炮製嘅淮揚菜,啱晒鍾意養生同中菜嘅朋友喎。 店內環境寬敞,亦有少量戶外坐位。 佛跳牆海皇宴(HKD298/位)以淮安四小碟(右)打頭陣,前菜有花雕醉轉彎、鎮江冰官肴蹄、四喜烤麩同埋涼拌陳醋紅蜇頭。呢幾款冷盤開胃得嚟唔會好濃味,而且係必食嘅經典淮安菜。 跟住當然係每日新鮮原盅燉製嘅鮑魚花膠佛跳牆!以老雞、雞腳、金華火腿同豬肉做上湯嘅主要材料,加埋花膠、鮑魚、干貝同海參呢啲名貴食材一齊燉,湯色清澈但味道濃郁,而且滋養氣血,補而不燥㗎。 薺菜年糕燴桂花魚片將大大塊桂花魚片油泡再湯煮,魚肉鮮嫩冇骨,加埋軟糯嘅年糕一齊食就有唔同口感添。 你仲可以揀鮑汁撈飯或濃湯魚翅撈飯,矜貴之餘仲好鹹香惹味添。 仲有用韓國米餅整成嘅乾燒蝦球配鍋巴,爽口彈牙嘅蝦球大隻到要分幾啖先食晒,甜辣醬嘅醬汁令人食得更滋味。最後食埋酒釀湯丸啦!清甜嘅酒釀配芝麻湯丸唔會好甜膩。 餐廳依家仲特別推出外賣自取75折優惠,連新出嘅一至二人客飯餐(原價HKD138-398)都一樣有折㗎。兩餸一湯嘅一人客飯餐C都幾豐富,麻香嘅雞絲粉皮配鑊氣嘅海派回鍋肉好夾,加埋上海酸辣湯、絲苗白飯同豆漿都幾飽㗎。想知仲有咩套餐同小菜可以外賣就睇下面嘅餐牌啦!   家上海 地址:大角咀海泓道1號奧海城三期地下G19-21號舖 電話:2869 2228 營業時間:星期一至五:11:45-16:30, 18:00-22:30,星期六、日及公眾假期:11:30-16:30,18:00-22:30 限聚令下營業時間:星期一至日:11:30-18:00(堂食)|11:30-20:30(外賣)

0

【大角咀平價包店抗通脹 $3爆餡糯米糍軟熟煙韌】平霸

行經大角咀,突然聞到好大陣麵包出爐嘅香味,唔係誇張,陣麵包香仲愈聞愈濃烈,傳出香味嘅源頭就係呢間香麥屋。入面啲麵包唔止香仲夠晒平,吸引咗唔少街坊入去幫襯。平霸梗係唔執輸,即刻入去睇睇啦! 全部麵包都係新鮮即製,舖頭後面有自家麵包工場,師傅會間唔中出舖面睇吓邊款麵包就嚟賣晒就即刻補貨起勢整喇。平霸短短逗留幾分鐘,已經見到有兩、三款麵包陸續出爐上架,唔怪得成條街都充滿麵包香啦。 以麵包店嚟講,舖面算幾闊落,一入去就有成列麵包櫃,驟眼睇都有三、四十款俾客人揀,選擇多;而且大部分麵包只係賣5、6蚊,相比出面好多麵包店都平一大截啦,款款都咁平唔知點樣揀好呀!另外仲有賣一啲平價西餅蛋糕,不過通常下午先會出,想食嘅朋友仔就要留意吓喇。 玻璃櫃入面見到糯米糍賣3蚊一大粒,仲分別有芒果、紅豆同奶黃三隻味揀,點可以唔試吓呢? 成粒咁鮮黃嘅芒果糯米糍(HKD3),面頭佈滿椰絲,個皮夠軟熟又煙韌,搣開入面真係有新鮮芒果㗎,芒果分量唔算多,有一、兩粒果肉咁,但係都食得出新鮮芒果嘅鮮甜,又冇酸味,正喎!加上啲椰絲都幾多吓,食落椰子味幾出,同芒果味match得到,但因為有好多椰絲喺粒糯米糍面頭,會食得有少少麻煩。 就咁睇外表唔會估到佢就係奶黃糯米糍(HKD3),呢粒糯米糍拎上手都幾「聚手」,個皮一樣咁腍,一咬開入面原來都包咗幾多餡。入面啲餡就係淡黃色嘅,食落幾creamy,啲奶黃又夠滑,比芒果嗰款更重椰奶味。 呢粒紫色就係紅豆糯米糍(HKD3)喇!啲紅豆蓉真係多到成口都係,幾濃紅豆味,仲食到紅豆粒添。其實三款口味都冇得輸,但平霸最鍾意食紅豆味,因為紅豆同椰奶味又係好夾,連埋個皮食唔會覺得好甜,食到好香嘅豆沙味。值得一讚個糯米糍皮真係好軟熟,唔會有好似雪咗好耐嗰種硬身。除咗本身夠大粒,入面個餡都好足料,兩者比例啱啱好,3蚊真係物超所值! 除咗糯米糍,平霸仲俾佢個朱古力流心包吸引到。 只係賣$5.5係咪真係有流心呢? 朱古力流心包(HKD5.5)可以話係旁邊個墨西哥包嘅朱古力版,面頭有塊薄薄哋嘅啡色脆皮,仲有啲朱古力粒喺上面。買嘅時候呢個包有啲微溫,應該出咗爐一段時間,搣開個包竟然仲見到少少流心,冇凝固晒,但略嫌朱古力漿唔夠多,令到流心效果唔夠明顯。一啖咬落去,軟綿綿嘅包夾住朱古力漿,仲有脆皮口感,味道唔錯喎,朱古力味唔係話好濃,但都對得住呢個價錢啦!   平霸小評:依家啲麵包店嘅麵包好多都係喺其他地方整好再運過嚟,愈來愈少食到新鮮出爐嘅麵包。呢間香麥屋係大角咀嘅恩物,麵包每日新鮮即整,價錢仲咁大眾化,真係好難得㗎。除咗麵包,3蚊一大粒嘅糯米糍亦係舖頭師傅每日自己搓粉整嘅,個皮軟熟又煙韌,啲餡又多,試晒三隻味都唔使10蚊! 香麥屋麵包西餅地址:大角咀大角咀道115號地下4號舖電話:2333 2383營業時間:06:00-20:30  

0

【清邁拜師學藝煮泰菜 開店賣地道船麵$12食到】珍泰In泰式車仔麵

愈來愈多餐廳做泰式船麵,細細碗又惹味,唔少客人唔覺唔覺又一碗。連大角咀嘅珍泰In泰式車仔麵老闆娘Maggie,都因為喺泰國一試愛上船麵嘅味道,放棄高薪厚職嘅物流工作,去清邁拜師學藝,返嚟就同屋企一齊經營泰菜餐廳。 雖然係香港人開,但店內都充滿泰式裝潢。由牆紙到掛飾嘅大象圖案,都好有泰國風土氣息㗎! Maggie專登去清邁學呢碗泰式豬肉丸迷你船河(HKD12),用唔同香料製成正宗嘅滷水湯底。雖然係迷你,但材料都唔少㗎,有豬肉丸(或牛肉丸二揀一)、豬紅、豬膶同蘿蔔。每日14:30-18:00以HKD12優惠價限量供應,賣完即止,食兩、三碗做下午茶都抵呀! 湯麵嚟講,椰汁雞湯鮮墨魚粉麵(HKD48)都幾吸引。爽口彈牙嘅鮮墨魚唔多地方有用呢款餸,加埋椰香十足嘅湯底,再咬啖嫩滑雞肉同大冬菇,口感同味道層次都好豐富。 金牌雙髀飯(HKD48/下午茶)有齊嫩滑嘅招牌海南雞同泰式滷水豬髀,配埋黃油飯好香口。如果晚市食就HKD65,會送飲品同椰汁燉桃膠,幫你潤埋喉先走呀! 泰國菜中仲有必食嘅香葉肉碎煎蛋飯(HKD50),先篤爆太陽蛋嘅蛋黃同飯撈勻,口感會滑啲。加埋用辣椒炒香嘅豆角同肉碎,簡單得嚟勁惹味。 泰式咖喱之中,黃咖喱嘅辣最多人接受到。呢款黃咖哩牛肋條飯(HKD65)煮到牛肋好香軟,咖哩汁撈飯真係好正。如果想辣啲可以試紅咖喱,都係貴少少HKD68啫。 大家食泰國菜成日叫生蝦同蝦餅當小食,但唔好忘記仲有咖喱蟹呀!呢款咖喱炒軟殼蟹(HKD98)必須趁熱食,因為軟殼蟹炸完再用咖喱汁炒會易變腍,想保留到多啲脆口感覺就要食快啲喇。   珍泰In泰式車仔麵 地址:大角咀大全街26號地下 電話:2696 9928 營業時間:星期一至日:11:00-22:30

0

【Regen開飛機主題餐廳 親調cocktail辣椒啤有驚喜】The 747 Gallery

最近有唔少明星都開餐廳呀,好似最近重組嘅HotCha成員Regen(張惠雅)咁,最近就喺大角咀開咗間以飛機為主題嘅餐廳The 747 Gallery,小編覺得餐廳裝潢真係幾特別,總共分成兩個部分,一邊以飛機艙為主題,而另一邊則以辣椒為主題嘅「辣椒工房」,雖然裝修風格截然不同,不過唔好誤會佢哋係兩間餐廳呀! 除咗店內裝潢風格似足機艙,大家幫襯時仲會收到一張偽機票,上面會印埋你嘅名添!(今次小編就得到公司名機票一張)!像真度其實都有8-9成㗎,如果大家未有時間飛返轉又想發吓「旅行夢」嘅話啱晒喇!望住張假機票止吓去旅行嘅慾望都好吖……(打工仔的悲哀)! 既然其中一部分叫得做辣椒工房,咁當然就有辣椒為主題嘅特別菜色啦!其中小編覺得值得一試嘅No.1就有佢哋獨家調配嘅辣椒啤(HKD72),開頭小編以為辣椒啤應該都係gimmick嘢嚟㗎啫,又點會真係好辣吖。小編自問都係一個喺譚仔食到中辣(雖然都會食到成頭汗),諗住實冇死啦。懶豪氣咁飲咗一大啖之後,忍唔住講咗句「嘩,真係辣喎!」,Regen笑笑口咁話,「本身仲辣㗎,不過好多人俾comment嘅時候都話真係太辣喇,所以之後我哋再有調過個辣度!」。食得辣嘅朋友要試吓喇,真係有啲料到㗎! 除咗辣椒啤之外,如果嚟到嘅時候咁啱撞正Regen本人在場的話,仲有機會可以飲到Regen嘅特製手調嘅Cocktail Sunrise Sweet或者冇酒精嘅Mocktail Pussy foot。呢兩款飲品喺餐牌上面係唔會見到㗎,所以要飲就要睇吓彩數喇! 兩杯手調飲品無論賣相定色彩都中晒女士們嘅口味呀,Sunrise Sweet雖然有酒精喺入面,但選酒方面揀咗Aperol同埋Rum酒作基底,非常易入口,好啱女士們或者初接觸酒類飲品嘅朋友㗎!Regen坦言自己廿歲鬆啲就開始鍾意飲酒,不過由以前細個逢飲必醉到依家對調酒產生興趣,想試吓做Bartender。佢話自己學調酒雖然唔係學咗好耐,但師傅話佢好快就上手,似乎有啲慧根喎! 呢味西班牙燒乳豬(HKD248)簡直係小編嘅真愛呀!平時真係冇乜試過喺西餐廳見到燒乳豬,個皮脆得嚟啲肉超滑超Juicy呀!最特別就係佢個醬汁喇,分別有兩款。開頭小編以為有啲似中式燒味醬咁,一個甜一個鹹啦。點知蘸咗一大pat醬食落口嘅時候發現,原來係足料嘅辣椒醬嚟㗎!小編雖然話食得吓辣啫,但毫無心理準備之吓就辣到噴火,不過兩款辣醬都有中和乳豬油膩感嘅作用,食落都幾match㗎! 另外如果想食清淡少少呢,燒銀鱈魚柳配牛肝菌醬(HKD268)都幾吸引㗎,除咗擺盤精緻之外,銀鱈魚燒得皮脆肉嫩,點埋側邊嘅牛肝菌醬就Perfect喇! 如果喺tea time時間嚟嘅話,都可以試呢個比較清新嘅煙三文魚他他沙律塔(HKD88),雖然係沙律,但佢其實有3個texture,分別係最頂層嘅煙三文魚啦、中間嘅蕃茄粒粒同埋最底嘅雪梨粒粒嘅。蕃茄同雪梨中和咗煙三文魚嘅油膩感,幾開胃! Regen話今次同朋友開呢間餐廳其實都算係小試牛刀,佢希望借呢間餐廳令自己實戰吓,有多啲調酒嘅經驗,希望同客人交流多啲,大家有個地方飲杯酒傾吓偈,見到客人飲得開心佢就最開心喇!唔好見Regen平時斯斯文文咁,調起酒上嚟都有板有眼㗎,而且佢比較鍾意free-style咁調酒,分量同用酒都玩即興,咁先有多啲空間創作出唔同款式嘅好酒俾大家嘛!見到佢咁勇敢追求自己想做嘅嘢,小編覺得好型呀!佢仲話忙埋重組演唱會之後,仲會擺多啲時間喺舖頭,大家經過大角咀不妨去撞吓佢喇! The 747 Gallery 地址:大角咀嘉善街39號地舖 電話:3590 3787 營業時間:星期一至五:12:00-00:00;星期六至日:17:00-00:00