Tagged: 大閘蟹

0

【2019精選中西式大閘蟹宴 鮮味蟹粉融入各地菜系】十里洋場、東海薈、京饌、奧卑利、品

正所謂「不時不食」,近排就梗係食大閘蟹啦!今年同樣有好多唔同菜系嘅餐廳都推出期間限定嘅大閘蟹菜式,要傳統嘅有,要創新嘅都有。大閘蟹迷要把握機會去歎返場蟹宴喇。   1.十里洋場「金秋蟹宴」 最盡興嘅一定係食大閘蟹套餐,十里洋場嘅「金秋蟹宴」(HKD738/位)就有一系列大閘蟹菜式等緊你。成個套餐有八道菜,除咗有原汁原味嘅清蒸大閘蟹之外,仲有蟹皇翅、生拆蟹粉、淮揚蟹粉桂魚絲,變化夠晒多呀。 必試套餐入面嘅鮮蟹粉鍋巴,沾滿蟹粉嘅鍋巴脆卜卜,上面再放上新鮮大閘蟹蟹膏,充滿油香。唔食套餐都可以單點㗎,呢啲大閘蟹菜式會供應到11月尾,推廣期內嗌任何大閘蟹菜式配埋會稽山花雕酒 (五年)(HKD188)仲有買一送一優惠添。   十里洋場 地址:銅鑼灣恩平道28號利園二期101號舖 電話:2338 5500 營業時間:星期一至四:11:30-15:30、18:00-23:30,星期五:11:30-15:30、18:00-00:30,星期六:11:30-16:30、18:00-00:30,星期日:11:30-16:30、18:00-23:30   2.東海滋味蟹粉蒜蓉包 東海飲食集團嘅大閘蟹套餐就俾你平有平食,貴有貴食。想淺嚐嘅可以試吓每位嘅大閘蟹套餐(HKD368/兩位起),有三款特色嘅大閘蟹菜式俾你歎。但如果一家人想食得豐富啲,就要點四位套餐(HKD1,488)喇。 呢款生拆蟹粉蒜蓉包就突破傳統,客人可以自己將熱辣辣嘅大閘蟹粉搽落蒜蓉包,特別香口㗎!   東海薈 地址:尖沙咀北京道1號11樓 電話:2877 2938 營業時間:星期一至五:11:00-23:00,星期六、日:10:30-23:00   3.京饌大閘蟹融入京菜 傳統京菜Crossover大閘蟹又係點嘅呢?京饌就推出期間限定嘅蟹粉菜式,其中呢道石鍋蟹粉寧波水磨年糕就軟腍惹味喇!選用寧波特產嘅水磨年糕,米香十足,再沾上大量蟹粉真係色重享受。 呢道蟹粉白玉相映入面就以順滑嘅蛋白配上鮮甜嘅蟹粉,睇見都想食!   京饌 地址:觀塘觀塘道418號創紀之城五期(apm)3樓1號舖 電話:3580 1882 營業時間:星期一至日:11:30-00:00   4.奧卑利14道大閘蟹特色菜...

0

【大閘蟹宴後食麥片降膽固醇?營養師幫你破解迷思】懶健康貼士

一到大閘蟹季節,俾人問得最多嘅飲食問題離唔開減肥期間可唔可以食大閘蟹呢?大閘蟹係咪好高脂㗎?不過都有比較得意嘅問題,好似「食完大閘蟹放題,係咪之後一個星期食麥片早餐降膽固醇可以補數呢?」,今次就同大家破解呢個迷思啦! 睇效果之前,梗係睇睇每100克大閘蟹有咩營養先啦! 效果成疑…… 食麥片係可以降低壞膽固醇,其中一個原因係麥片含有水溶性纖維,佢會同食物中嘅膽固醇結合,阻止膽固醇喺腸道被吸收去降低膽固醇。但事實上,我哋每日要攝取超過3克水溶性纖維,先真正有效降低膽固醇㗎!如果用燕麥嘅分量計算,即係大約70克(大約1/2杯)燕麥片,淨係食二至三湯匙係絕對唔足夠㗎! 而且麥片屬穀物類,同時都有熱量(約260卡路里),如果冇減平時嘅食量再加上麥片,反而可能引致體重上升添。喺臨床實驗中,研究發現降低膽固醇嘅效果要大約4個星期左右先見到,如果只食一個星期麥片,效果真係唔太高。 其實單單食麥片並唔會解決高膽固醇問題,仲要改善整體飲食模式。因為水溶性纖維大概可以幫助降低平均5%嘅總膽固醇同壞膽固醇,所以還要配合低飽和脂肪同低膽固醇飲食、控制體重喺健康水平、攝取好嘅脂肪同足夠運動,咁先真正有效幫助降低壞膽固醇囉。 即係唔食得大閘蟹? 咁又唔係喎!美國心臟病學會同美國心臟協會(2013)嘅報告指出,膳食膽固醇並唔係引致壞膽固醇上升嘅主因,其實食太多高反式脂肪同飽和脂肪嘅食物,先係導致壞膽固醇增加嘅真正原因!雖然大閘蟹含有相當高嘅膽固醇,但其實佢屬於脂肪較低嘅食物,所以健康人士可以適量進食大閘蟹嘅。 點食大閘蟹會健康啲? 俾啲貼士大家啦: 1. 建議「一隻起,兩隻止!」,每次最多食一隻,一星期最多食兩次。 2. 食大閘蟹嘅時候可以配搭高水溶性纖維食物,特別係燕麥飯、豆類、水果同蔬菜,例如扁豆、西蘭花、茄子同蘋果等等。咁會有助帶走體內過多嘅膽固醇同增加飽肚感。 3. 以蒸或烚方法烹調。 食幾多燕麥先降膽回醇? 麥片其實係健康穀物早餐,要有效降低膽固醇而唔引致增磅,可以用每日食70克燕麥取代高熱量同高糖份嘅早餐,或者以燕麥飯取代部分白飯,咁就可以攝取超過3克嘅水溶性纖維,有效幫助降低膽回醇㗎! Moses Lee 現為“My Fitness”註冊營養師、澳洲營養及飲食治療碩士同澳洲營養師協會會員,擅長體重管理同運動營養。曾於醫院、社區中心、教會同非牟利機構等地方提供營養服務、舉辦營養講座同烹飪示範。現在為有需要控制體重嘅人士同運動員提供營養治療,制定飲食方案。

0

【留定肚呀!大閘蟹嚟喇! 一蟹幾味中西日式任你揀】富臨薈、十里洋場、壽司芳

秋風起,除咗三蛇肥,更加係「蟹腳肥」!又到咗最啱食蟹嘅季節喇!小編今次為大家精選三間中日式食大閘靚蟹嘅好選擇。提提大家,雖然依家各種蟹都當造,但係食嘅時候都要適可而止呀,切忌食壞身子! 太湖大閘蟹 富臨薈  首先介紹嘅就係有得食太湖大閘蟹(HKD88/4兩)嘅富臨薈!「太湖大閘蟹」咁出名,除咗蟹黃靚之外,肉質亦非常細緻嫩滑,令人回味無窮呀!一隻靚嘅大閘蟹其實並唔需要過多嘅調味或者花巧嘅烹調,富臨薈嘅主廚就選擇咗用紫蘇葉清蒸,靚嘅蟹清蒸可以充份保留蟹嘅原汁原味,包保食到啖啖蟹汁豐腴嘅蟹黃蟹膏呀! 小編大力推介嘅係呢個西班牙膏蟹飯(HKD680)!雖然呢個飯唔係用大閘蟹做,以西餐常見到嘅意大利燴飯作為藍本,用海鮮上湯煮白米,令每粒飯都鮮味十足;另外再加兩隻超大碼嘅西班牙膏蟹同飯一齊焗,蟹香同飯嘅鮮味融為一體。食法亦非常講究,食嘅時候將蟹肉另放碟上,將蟹蓋上嘅蟹膏倒入白飯中攪勻,啖啖都係蟹膏嘅油香,超奢侈呀真係!   富臨薈 地址:沙田正街11-17號偉華中心2樓9A-9B舖 電話:2570 0168 營業時間:星期一至日:10:00-23:00   泰韓蟹宴  十里洋場 中西式有富臨薈,想帶點點泰韓味就可以試吓十里洋場啦!呢個椰香蟹粉盅(HKD120/位)用咗最上乘嘅泰國椰子,先將蛋白加入椰青內蒸熟,然後再把露筍、蝦仁等配料放入蟹粉炒香,再倒入原個椰子入面。大家記住趁熱食呀,食法係將蛋白與蟹粉拌勻,濃郁嘅蟹香配以椰子清香真係冇得彈呀。 蟹粉水晶蝦球(HKD388)亦非常精緻,大廚將蟹粉造成醬汁,彈牙嘅大虎蝦肉點落蟹粉醬入面,每一滴都係精華,令蝦球鮮味即時升倍,忍唔住要飲埋個汁添呀! 蟹粉鍋巴(HKD160/2件)係近年流行嘅經典大閘蟹菜式,相傳「鍋巴」呢種料理方式係來自韓國,有少少似飯焦嘅質感。大廚會將鍋巴炸好,再用鹹蛋黃炒香,放上鮮拆蟹粉,令到蟹香滲入鍋巴入面,索晒蟹味嘅鍋巴濃郁香口,冇得頂。   十里洋場 地址:香港銅鑼灣恩平道28號利園二期101號舖 電話:2338 5500 營業時間:星期一至五:11:30-15:30;18:00-23:30;星期六及日:11:30-16:30;18:00-00:30   超豪大閘蟹宴  壽司芳 講到蟹,又點少得出名精緻嘅日式料理呢!北海道長腳蟹就食得多喇,唔知日式嘅大閘蟹料理大家又食過未呢?大阪米芝蓮二星過江龍壽司芳推出咗香港限定Omakase(HKD2980/每位),總共有17-21道料理,當中有唔少都用咗大閘蟹作為原材料製作,菜式充滿創意得嚟又非常貼近港人口味。 小編覺得呢個大閘蟹膏軍艦值得一試,壽司大家平時就食得多,但大閘蟹壽司應該都幾新穎。以傳統壽司作為基調並將大閘蟹融入其中,蟹膏入口即溶,甘香嘅味道同加咗壽司赤酢嘅壽司飯配合,絕妙口感。 另外大閘蟹北海道毛蟹黑魚子飯亦相當精緻,用北海道毛蟹、大閘蟹粉,仲有白海膽同埋法國亞基坦鱘魚子,款款食材都相當矜貴,連伴碟嘅啫喱都係用陳年花雕玫瑰露加陳年黃酒製作,散發住淡淡酒香呀。 黃金大閘蟹大福。大福係日本常見小食,餡料多數都係甜嘅,而呢個特別版本嘅大閘蟹大福就以煙韌嘅皮包住鹹蛋黃、大閘蟹蟹肉加埋蟹黃製成嘅餡料,啖啖都係大閘蟹嘅精華。想試勻晒成個Omakase嘅Menu就要Book定位喇,手快有手慢冇啊!   壽司芳 地址:九龍尖沙咀金馬倫道8號The Otto酒店1樓 電話:2657...

0

【北海道大閘蟹Tasting Menu 7道意菜邪惡組合】Involtini Italian Cuisine

食親大閘蟹都係中式多?其實都有西式㗎!2016年開業到依家,已經連續 2 次獲得港澳版米芝蓮指南推介嘅Involtini Italian Cuisine以精緻新派意菜做招牌,主打新鮮手造意大利麵,一直口碑唔錯㗎!今年嘅北海道石狩村大閘蟹 Tasting Menu(HKD788+10%服務費/位)有 7 道菜式,用咗最少兩隻大閘蟹。每道菜都好別緻,連菜名都好盞鬼添。供應期視乎大閘蟹來貨情況而調整,暫時預計可以做到11月尾。 餐前小點真係蕃茄?外形好似剝咗皮嘅蕃茄,其實係用鹹香嘅鹽漬鱈魚配上新鮮魚肉餡料,外層以蕃茄鯷魚汁做成蕃茄形狀,味道酸甜開胃。 頭盤沙灘上的貝類模仿沙灘上貝殼類動物遍佈嘅環境,左邊係脆脆嘅mini薄餅配上大閘蟹蟹膏同三文魚籽,濃郁鲜味互相補充。中間係脆口藜麥蟶子殼配彈牙嘅燒日本魷魚同軟腍焦糖洋蔥,味道酸甜,口感層次都好豐富。右邊係炸到勁脆嘅日本炸澤蟹,延續脆口感覺。 跟住係“燒賣”?,用小意麵卷扮燒賣外皮,餡料以鱸魚、鹹香嘅意大利風乾豬面肉配大閘蟹蟹膏,令鹹香味層次昇華。配埋中式蒸籠上菜,玩味十足。 然後到鮮香煎海蝦意大利飯配瑤柱香濃蟹湯,呢道菜式兩種食法。意大利飯先用濃郁海鮮湯同海蝦煮好,再將兩面低溫烘烤煲仔飯嘅鬆脆飯焦口感。試完飯焦後就加入用昆布、鰹魚、花蟹同大閘蟹熬成嘅極級鮮甜濃湯,吸引度令唔少客人要求加湯㗎。 Tasting Menu又點少得Involtini出名嘅pasta呢?手做墨汁意大利麵配大閘蟹蟹膏·鹹蛋黃海鮮汁係魔鬼組合,手造pasta用高級意大利墨魚汁整成,醬汁就用鹹蛋同自家製海鮮湯煮成,令大閘蟹蟹膏嘅香味大大提升;而意大利乾魚春配蟹膏除咗鮮味啲,亦增加口感。 Pizza餅底係將飯煎香整成,上面鋪滿香濃嘅大閘蟹蟹膏,再配上本地新鮮食用花,靚之餘亦加強味道層次。 最後配上清新嘅西西里檸檬紅酒梨撻配意式薑味雪糕同花蜜檸檬薑茶結尾,為大閘蟹宴驅寒解毒添。   Involtini Italian Cuisine 地址:銅鑼灣駱克道 銅鑼灣駱克道 459-461號 The L. Square 11 電話:2658 2128 營業時間:星期一至日:11:30-15:00;18:00-22:30

0

【野生北海道大閘蟹 HKD388食足料蟹宴】東海飲食集團

日本野生食材出口嘅規管一向勁嚴格,北海道石狩川係日本唯一嘅野生大閘蟹生長地,東海飲食集團今年就入咗呢度嘅大閘蟹貨喇。小編去金鐘分店食,仲係限量供應!俾個貼士大家,每個星期初或者去灣仔新鴻基分店都比較易訂位。 呢度好開揚,午時會多人啲,想靜少少可以嚟食晚市。 清蒸北海道野生大閘蟹有五両重,肉質清甜彈牙,蟹膏都算多,但同陽澄湖大閘蟹比係少啲啲。野生品種嘅殼比較硬同厚,都係用返剪刀拆蟹好啲,小編食到後尾手指表示攰。 生拆蟹粉蒜蓉包都幾新穎,熱辣辣嘅蟹粉搽喺微微蒜香嘅法包上面,令蟹嘅鮮甜味更濃郁。 鮮味蟹粉小籠包都係用石狩川大閘蟹整,裡面只有蟹肉同蟹粉(冇豬肉),兩粒小籠包已經用咗一隻蟹,真材實料,份量十足! 蟹宴餐唔止呢三款,俾個menu大家睇睇啦: 計吓數蟹宴餐本身唔貴,係考啲手力拆蟹啫,絕對食得過。   東海薈 地址:金鐘添美道1號中信大廈5樓 電話:2877 2211 營業時間:星期一至日:11:00-15:00,18:00-23:00

0

【台中大閘蟹攻港 精選三間蟹宴逐間食】逸東軒、香宮、唐閣

今年冇晒內地大閘蟹供港,各大餐廳惟有向日本、台灣招手解蟹荒。今次同大家介紹3間餐廳,佢哋不約而同都點選台中嘅大閘蟹,大廚話呢區嘅蟹味最接近陽澄湖質素。睇睇今年蟹宴有咩菜式啦! 灣仔逸東軒有單點菜式同蟹宴揀,價錢都幾相宜。 清蒸大閘蟹(HKD328/隻)每隻足五両重,夠晒份量,肉質幾清甜,蟹膏好香濃。 傳統嘅生拆蟹粉小籠包(HKD45/隻)皮薄餡靚,咬開就爆出沾上蟹粉嘅黃色肉汁,記住要一口食唔好嘥每一滴汁。 蟹粉南瓜茸燴燕窩(HKD288/位)用日本小南瓜中和大閘蟹嘅寒氣,令菜式更加鮮味。燕窩增加口感層次,滋陰養顏。 逸東軒時令大閘蟹宴(HKD658/位)2位起,可以品嘗到8款菜式:前菜脆皮素鵝拼蒜泥青瓜海蜇、蟹粉南瓜茸燴燕窩、清蒸五両大閘蟹、碧綠蟹粉蝦球、蟹粉煎琵琶豆腐、魚湯浸菜薳、生拆蟹粉小籠包1隻同薑茶湯圓。比起單點抵幾倍!   逸東軒 地址:灣仔港灣道23號鷹君中心二樓 電話:2878 1212 營業時間:星期一至六:11:00-23:00;星期日及公眾假期:10:00-23:00   想豪啲啲可以揀尖沙咀嘅香宮,酒店出品嘅款式的確特別啲。 同樣都有單點菜式,清蒸大閘蟹(HKD698/隻)五至六両隻,比逸東軒貴一倍多少少。 蟹粉豆腐蔥油餅(HKD498/6件)成碗豆腐都充滿蟹粉嘅香味,豆腐又可以減輕蔥油餅嘅油膩感。 松露炒蛋見得多,白松露蟹粉炒鮮奶(HKD698)就更加鮮甜味美。 大家放心,都有平民價啲嘅菜式,蟹粉蟹油伴稻庭麵(HKD188/位)足料蟹粉鋪面,好抵食呀! 大閘蟹宴(HKD1,588/位)有6款菜式:石榴珍珠片皮鴨蔥油餅、竹絲雞花膠燴五蛇、清蒸大閘蟹配十年紹興酒、芹香荷豆油鴨片炒斑球、籠仔蒜香臘味糯米飯同燕窩薑汁奶凍伴奶皇紫薯粿,感覺食完暖笠笠。   九龍香格里拉大酒店 —香宮 地址:尖沙咀東麼地道64號地下一層 電話:2733 8754 營業時間: 午餐:星期一至五:12:00-14:30;星期六、日及公眾假期:10:30-15:00 晚餐:星期一至日:18:30-22:30(最後點餐時間為22:00) 最豪華嘅就係尖沙咀唐閣喇,都係酒店出品但只有單點款式,喺3間餐廳中用料亦係最高級。 清蒸大閘蟹(HKD880/隻)六至七両隻、蟹粉花膠扒津胆(HKD680)、芙蓉蟹粉竹笙官燕卷(HKD480)、蟹粉鮮蝦滑豆腐(HKD480)、蟹粉帶子琵琶豆腐(HKD360)、蟹粉鮮斑粒魚肚羹(HKD220),單睇菜名已經覺得食完人都貴氣啲。 呢度環境好優雅,食品質之餘亦可以欣賞中國當代藝術品。   香港朗廷酒店 —唐閣...

0

【日日過百客電話追問 老三陽:冇蟹賣做乜生意?】食焦

依家已經十月尾,往年通街大閘蟹情景消失咗!今年因為內地大閘蟹批文遲遲未出,想食太湖、陽澄湖大閘蟹已經冇機會,有食店就轉為入口日本北海道大閘蟹同台灣貨,衰在上星期又驗出台灣桃園大閘蟹樣本二噁英水平超標,要即時暫停進口。總之今年想食隻靚嘅大閘蟹真係難上加難! 蟹痴冇蟹食梗係慘,不過可以當慳返筆同忍吓口,點都唔夠食店同蟹舖頭痕。小編去咗賣蟹老字號「老三陽」睇睇,一直以賣正宗陽澄湖出產嘅「老三陽」,以往呢個時候實擺到成間舖都係大閘蟹,但係今年呢?放大閘蟹嘅凍櫃,變咗擺晒紅豆粽呀鹽水鴨呀咁,一隻大閘蟹都冇啦!見到店長陳先生忙住接電話,聽見佢話:「大閘蟹?冇呀!冇呀!唔知幾時!」問佢係咪好多客都想知幾時先有大閘蟹?佢就話:「日日百幾個電話打嚟啦,個個都問幾時有?我都答唔到㗎!」 問佢係咪因為咁搞到生意差咗好多?店長冇晒心機:「好慘呀!冇蟹賣做乜生意?唔係話差咗幾多,係直頭冇!你睇到成間舖一隻蟹都冇,點有生意呀?」有食店同蟹商就轉為入貨北海道大閘蟹頂住檔先,但係「老三陽」就寧願冇蟹賣,點解都唔入吓北海道或者台灣貨呢?佢話:「日本嗰啲唔好食㗎!完全唔係嗰回事,根本地方唔同水質又唔同,好難同大陸啲大閘蟹比,有啲客食過嘅都話唔好食,話冇味嘅!」 咁批文有冇轉機,會唔會仲有得食內地大閘蟹?店長都話唔多寄望,「冇人知(幾時有)、亦都冇乜解決辦法啦,就算話嚟緊會有,其實都已經過咗最啱食嘅時候啦!」今次大閘蟹荒,搞到好多蟹舖都好愁,「老三陽」堅持唔入其他地方蟹,「今次損失慘重梗係慘!」

0

【陽澄湖大閘蟹禁供港 霸氣鼎爺爆粗:理佢把X吖!】食焦

堅持自己調味輕重,理得你覺得太鹹定太淡,鼎爺話唔會為食客同網友嘅負皮而改變喎!(前文:【唔怕私房菜有負皮 鼎爺:一啲話鹹一啲又話淡】) 咁講到價錢問題,鼎爺話一樣唔會變(暫時啫!):「價錢唔變喇,都係888,1288同1888!」依家呢三個menu,賣點係鼎爺嘅真功夫同材料,拿手好菜就有鼎爺乞兒雞,生炒骨同荷葉飯,而VIP房收HKD1888就有得直擊鼎爺喺廚房煮埋俾你睇,大家認為值唔值呢又? 私房菜依家仲係試業階段,要到十月中先正式開業。既然講到不時不食係賣點,更要原汁原味,咁menu會唔會因應唔同時節而變化吓呢 ? 好似食大閘蟹嘅時候好快嚟,唔知鼎爺會唔會喺menu度加返啲新口味轉吓個menu?鼎爺就話 :「依家未知,我要同我個partner商量吓,睇吓個menu要點樣轉先得!」                                 大閘蟹殺到嚟,不過最近就有報道指今年太湖同陽澄湖嘅大閘蟹禁供港,咁如果嚟緊私房菜有大閘蟹menu, 鼎爺會搵乜靚蟹入貨呢 ? 霸氣鼎爺就爆粗話:「乜話?禁供港? 綽頭嚟啫!理佢把X吖! 」嘩,鼎爺似乎真係乜都未驚過咁款喎!大閘蟹未有得食,鼎爺先整咗味花雕雞油花蟹陳村粉,仲將個拆蟹過程拍片放咗上網俾大家睇,呢次唔使俾HKD1888都睇到囉!

0

【親民價爆膏大閘蟹】海記

黎到十月十一月,大家周街都會見到啲咩?無錯,就係大閘蟹啦!近年不少報道都話太湖大閘蟹已經跑贏陽澄湖蟹,成爲大閘蟹最佳出產地。大閘蟹,通常蟹季通有3個月,可以記得記得10月中至11月係食蟹既最好時機,而好多人都會問雄蟹好食定雌蟹好食啲,以蟹黃來,雄蟹係比較多同顏色比較黃,質地黏黏的,而雌蟹相對上蟹黃較少,但蟹膏比較多,質感相對結實,但蟹肉較為鮮味,所以睇你鐘意大閘蟹既邊個部位,但坊間咁多大閘蟹選擇,成日捐窿捐罅既小編搵到一間價錢合理之餘又高質既海記大閘蟹。 海記招牌其實好易認,一隻金蟹既金漆招牌,都令好多人慕名而來,專門食遠近馳名既太湖大閘蟹。 周街都係蟹,老闆話其實出面會有無良商人賣假蟹,一般人都唔識分辨真假。但海記當然真金不怕洪爐火,show埋張證書出黎,證明所有海記入貨既太湖蟹都由協會經過審批,可以俾到客人信心保證! 海記太湖大閘蟹 正宗太湖爆膏黃毛金爪大閘蟹乸 (約 3 両 至 3 両 5 重) • 正宗太湖爆膏黃毛金爪大閘蟹乸 (約 3 両 6 至 4 両 2 重) • 正宗太湖爆膏黃毛金爪大閘蟹公 (約 4 両 至 4 両 5 重)...