Tagged: 天后

0

【西九人氣Café走入天后 型格裝潢入夜變酒吧】Superhooman

西九文化區人氣度極高嘅Hooman by the Sea去咗天后開分店呀!今次打入型格TUVE酒店嘅新舖名為Superhooman,「鐵鏽」感門面俾人粗獷嘅感覺,但入到去又會呈現到細膩嘅氛圍。呢度朝早係Café,夜晚就會反轉做酒吧,食物方面都有唔少新品推出,清新、香甜邪惡、香脆惹味嘅都有,即刻睇吓邊款啱你啦!

0

【新派健康果飲杯杯靚色 自創極濃乳酪奶蓋零負擔】輕時光

慣咗飲台式飲品,又嫌佢唔多健康?依家有另一個健康又好飲嘅新選擇喇!呢間輕時光主打一系列健康鮮果飲品,強調低脂少糖亦堅持唔落糖漿,而用自家即日熬煮嘅桂花蜜,希望好飲得嚟,仲可以兼顧埋健康添。店主話有一次去泰國旅行見到當地好盛行呢種健康果飲,又發覺香港比較少同類型嘅飲品店,於是好想由自己做起,將呢種風氣帶嚟香港咁話。唔好睇啲飲品顏色咁豐富咁鮮艷以為加咗色素呀,其實全部來自水果嘅天然顏色,冇加任何香精同色素㗎!店主寧願製作成本高啲,都堅持用最新鮮嘅食材去保持飲品質素。咁健康,睇吓有咩咁特別先! 飲品店開喺天后,位置都幾容易搵,店面擺滿好多綠色植物,店內嘅裝修就以白色為主,用木牌做Menu掛喺牆上面,感覺好自然悠閒。舖位細細,一望就見到開放式水吧,可以睇住成個製作過程。轉角位仲有一張微型小長吧枱仔俾客人好chill咁坐低飲嘢,名副其實好似店嘅英文名咁”Take Your Time”! 介紹吓咁Colorful嘅鮮果特飲先,呢杯咁搶眼嘅紅火龍優格果昔(HKD32)用紅肉火龍果加雪白乳酪同鮮奶嚟打呢個果昔,咁有層次嘅紅白配搭,淨係賣相都加晒分啦!選用紅肉火龍果除咗顏色吸引,營養價值更高,成杯飲晒都輕鬆冇負擔啦! 超級水果茶(HKD32)概念來自水果杯,想做到成杯都充滿新鮮水果,再配上清茶,飲落更加fresh。叫得「超級」水果茶,原因係超級大杯呀,水果嘅種類同一般嘅水果茶差唔多,但就比較重熱情果味,好有果香,解渴一流! 平時飲奶蓋飲得多,未試過飲乳酪整嘅奶蓋。呢杯芒果優格蓋茶 (HKD34)嘅特別之處係面頭嘅「奶蓋」同坊間嘅奶蓋唔同,係舖頭自創嘅乳酪奶蓋,以低脂乳酪打成,有好濃嘅乳酪味道之外,仲有奶香,同咁清新嘅芒果味好夾,又冇平時啲奶蓋咁膩;茶嘅部分就將芒果肉打喺茶入面,所以成杯茶嘅芒果味都好出,仲會食到啲果肉添。 紅火龍乳酸(HKD26)一到手有兩層,上面有好鮮艷嘅桃紅色係攪拌咗嘅火龍果肉,下面就係乳酸。本來以為火龍果同乳酸嘅味應該唔多夾,點知攪勻咗嚟飲又幾Match噃,仲好有新鮮感。 除咗鮮果系列,仲有啱晒抹茶控嘅抹茶Oreo。時光(HKD28),先調好非常濃郁嘅抹茶再撞入鮮奶,營造漸層嘅效果,望住杯飲品都夠晒療癒;面頭仲放咗好多Oreo餅碎,咬落會有啲咬口。幾時都話,抹茶加鮮奶呢個組合真係冇得輸,依家咁嘅天氣仲可以揀暖笠笠嘅熱飲,一樣咁好飲㗎!   輕時光 地址:天后電氣道83號利景閣地下1號舖 電話:5116 6865 營業時間:星期一至日:11:00-21:00

0

【以為去咗意大利? 天后小店夠晒鮮氣】Oggi

「Oggi」係意大利文,意思係「今日」咁解。如果有餐廳用咗嚟做店名,有冇一種活在當下嘅感覺呢?位於天后嘅Oggi就好鬼有意大利嘅異國情調,主打Fusion菜式仲會試唔同國家嘅食材,成日轉吓menu保持新鮮感!雖然啱啱完咗99蚊波士頓龍蝦Risotto嘅優惠,不過其他筍嘢當然接住嚟啦! 朋友聚會未必一定要叫一大堆小食,Oggi以暗黃燈光為食客打造hea hea哋氣氛,啱晒三五知己傾偈食飯又唔會有好大壓迫感,牆身嘅復古風設計,更令Oggi有氣氛。 以為海水味係食生蠔先有?藍青口白酒忌廉汁扁意粉 (HKD148)一入口即刻感受到陣陣海水味,天然鹽味亦令到扁意粉食落有唔同層次,加埋個忌廉汁一流呀! 泰菜西煮,用蝦湯熬煮嘅喇沙大蝦闊條麵 (HKD158),加埋越南虎蝦令鮮味更加強烈,闊條麵吸汁能力同喇沙湯又好夾! 啱晒女士嘅紅棗杞子雪耳寒天(HKD52),睇上去好似啫喱,其實係用咗低卡又高纖嘅寒天,再加蜜糖去帶出甜味,令客人更加貼近大自然嘅感覺。 拿破崙配雪糕(HKD68),酥皮充滿薄荷香味,食落透心涼;酥皮口感鬆化得嚟仲好有層次。  Oggi 地址:天后水星街9號地下B舖 電話:3954 5381 營業時間:星期一至日: 11:30-15:00;18:00-22:00

0

【大隻港男餐廳乜都大 重量級Menu啱晒大胃王】A la maison XXL Seafood & Grill

大隻港男黃長興轉戰餐飲業,喺天后開咗法國餐廳好幾年,成績非常唔錯,下午時份好多時仲爆場添!5歲移民法國嘅佢,對法國菜自然有心得啦!餐廳早前就改名變身A la maison XXL Seafood & Grill,唔好以為只係法國菜咁普通,原來碟碟都重量級份量,貴少少都值得,啱晒大胃王之餘細食之人都照顧到㗎,因為有Regular同XXL兩款Menu俾你揀,唔使擔心食唔晒喇! 門口見到XXL呢三個字,已經知佢哋份量夠大。餐廳內有多張長枱,啱晒成班朋友又坐又食圍威喂。 集齊七款時令海鮮,睇上去就知係份量十足嘅特式海鮮拼盤 (HKD648),海鮮由法國空運到港,保證新鮮! 由長興媽媽自家設計食譜嘅祖傳古法砂鍋藍青口 (HKD238),用泰式煮法,每隻藍青口都肥嘟嘟啖啖肉,香茅同椰奶嘅配搭更令到呢款祖傳古法砂鍋藍青口非常惹味。 有成隻手咁長嘅18″特長串燒牛柳 (HKD475),用咗M5澳洲和牛,大件夾抵食之餘,配菜都完全唔執輸,食完大啖肉再咬啖香甜嘅燒粟米同燒菠蘿,又有特調燒汁,絕對唔會令你失望。 香草牛油焗法式田螺 (HKD185),田螺配上香草加薯蓉,味道更加濃,薯蓉又充滿牛油香濃味,入口好creamy,配搭啱啱好。 A la maison XXL Seafood & Grill 地址:天后木星街18號F-G鋪 電話:25100123 營業時間:星期一至日:12:00 – 15:00;18:00 – 23:00

0

【五星級廚師坐陣 天后輕鬆熊bearbear cafe】 JL Cafe.Kitchen

去到cafe想尋找溫馨窩心嘅感覺,親切嘅店員係其中一個好重要嘅因素。位於天后嘅JL Cafe.Kitchen,店員非常親切,食物同咖啡都好有水準,而且仲不時有新菜式推出。原來cafe老闆同員工關係非常好,給予店員非常高嘅自由度創作菜式,亦給予一個好好地方廚師學好一門手藝,希望餐廳同員工一齊共同成長。返工返得咁開心,唔怪得個個店員咁friendly! 餐廳門口擺住一隻特大熊bearbear,坐定定喺度、得正正喺度同你say Hello! 餐廳裝潢想帶出一種「家」嘅感覺,傢俱帶少少Vintage味道再加上大大小小嘅熊bearbear做裝飾,窩心又有質感。 香煎美國有骨豬鞍(HKD245) 慢煮出嚟嘅豬鞍,早一晚以秘製醬汁先醃製一晚,再以慢火煎香兩邊,食落鬆化唔會韌。所用嘅燒汁都經過悉心烹調,要預先熬製一星期先會使用,醬汁味道食落香甜惹味,果然用心。 BBQ汁烤焗豬肋骨配洋蔥圈(HKD220)豬肋骨配上自家調配BBQ醬,再放入焗爐快烤大約5分鐘,令表面近乎有焦糖嘅感覺,非常惹味香甜!洋蔥圈使用2種啤酒混和蛋漿再炸,食落極之脆身,每啖都脆卜卜又鮮甜,仲會食到淡淡酒香添! 法式檸檬撻(HKD34)檸檬撻用咗法國曲奇餅皮,食落唔會好似酥皮咁油膩,口感較結實而不失鬆化。檸檬味道清香,甜味唔會好濃,味道屬於比較清甜易入口。 綠茶心太軟(HKD50)使用京都綠茶製作,茶味香濃,再配合自家烹調紅豆,味道香甜中和綠茶微微澀味。心太軟外脆而流心,將心太軟、紅豆同雪糕混和一齊食,味道更香甜。 JL Cafe.Kitchen 電話:3106 0949 地址:天后清風街1A-1B號地舖 營業時間:星期一至日:11:00-23:00

0

【動漫珍藏陪住食 天后特色爐端燒!】玩具屋

每個人有自己嘅專屬童年,感覺深刻而令人無法忘懷。小編作為90後,童年都係睇住數碼暴龍同比卡超長大,呢間店舖嘅擺設就以大家童年動漫回憶為主打,啱晒70後80後嘅朋友!門口飾櫃擺滿模型,包括:叮噹、小雲及龍珠等等,仲有星矢、黃金戰士、鐵甲萬能俠、巨靈神等等懷舊超合金同多種模型,令顧客彷如置身於玩具世界之中,回想起童年時嘅回憶。 店內食嘅係傳統爐端燒,格局以傳統酒屋為基礎。店內食物都由日本各地直送,保證新鮮。大家可以喺枱吧前慢慢揀自己鐘意嘅食物,揀完之後再交由廚師即場燒烤,原汁原味!而且呢度仲會按照爐端燒餐廳傳統,料理師傅會用木漿(掘返べら)將燒好咗菜式遞比客人,真係好有特色! 餐廳內仲有一個自成一角嘅小型個室(掘りごたつ),免卻咗其他人嘅騷擾。人客可以一邊食野,一邊飲酒傾計,度過一個開心嘅晚上。 粒貝壺焼(HKD190)內有日本粒貝,十分鮮甜。製造過程相當複雜,要先起肉去內臟,再放回貝殼內加湯燒。食嘅時候,建議先吃肉然後再飲湯,湯水吸收咗貝柱嘅味道,鮮味無窮。 甲羅焼(HKD138)先將松葉蟹肉放喺蟹蓋上面燒,再加上日本生蛋同蟹籽,最後配上法包。日本生蛋不但突出蟹嘅鮮味,而且令到整個口感更為嫩滑。法包經過烘焗,香脆可口,同蟹肉配搭的確天衣無縫。甜蕃薯配抹茶忌廉(HKD52)用料十分講究,選用日本紫心蕃薯配上自家製抹茶忌廉,係大熱之選!一凍一熱,衝擊味覺。甜度適中,食落唔膩,啱晒女仔! 玩具屋 地址:天后銀幕街16號地舖 電話:2348 7800 營業時間:星期一至日: 18:00-01:00

0

【謝霆峰最強秘傳配方 年輕得碰著黑蒜包】16 Shell

講到名人飯堂,你又點可以唔識店名簡單易記嘅16 Shell呢?炮台山蜆殼街16號,只要你知道店舖名,就會連佢喺邊都知!聽聞謝霆鋒同其他明星會經常都會嚟食飯,話唔定嚟到隔離個枱全部都係大明星!小編心郁郁即刻去碰碰運氣。 小編去到雖然見唔到謝霆鋒,但餐廳裝潢高雅古典,成功吸引到我留住係度!最令人估唔到係入面嘅菜式驚喜不斷。 店主對擺設特別用心,櫃上所有裝飾都整整齊齊一絲不苟,非常有格調。 黑炭黑蒜蓉包(HKD60)依款麵包係餐廳招牌菜,聽聞係謝霆鋒獨門秘方嚟!食落去的確係一個全新嘅體驗!平時嘅蒜蓉包,雖然香脆但蒜蓉太濃味。相反,依度用咗黑炭包,感覺比一般麵包健康同軟熟,而且黑蒜有一種獨特嘅甜味,令人一食上癮,送酒一流。 白酒橄欖牛油煮蜆(HKD90) 白酒煮蜆相信大家都食過,喺坊間西餐廳都係一道常見菜式。依道菜式特別加咗牛油,令到個汁更為濃郁,而且包住蜆肉,啖啖鮮甜。 香燒牛扒配白酒牛油蘑菇汁(HKD320) 牛扒由美國直送,質素非常高,所以唔需要落太多調味料。5成熟岩岩好鎖住肉汁,但同時帶出牛肉鮮嫩嘅肉質,再加埋白酒牛油蘑菇汁,齒甲留香。 Lemonade(HKD28) 食完咁多菜式,有杯野飲作為點綴絕對錦上添花。檸檬水酸酸地嘅味道感覺好清新,大大杯令整頓菜更為滿足。 16 Shell 地址:天后炮台山蜆殼街6-16號寶榮大廈地下B舖 電話:3954 5918 營業時間:星期一至四: 12:00-21:30  星期五至日: 12:00-22:00