Tagged: 太子

0

【本地蠔民二代開麵店 鮮蠔湯米線配香煎金蠔】第一蠔粉麵

唔使去流浮山都食到本地蠔?!太子最近新開粉麵小店第一蠔粉麵以蠔做主題,仲係由本地蠔民第二代主理,用大大隻嘅鮮蠔同金蠔打造一系列價錢親民嘅主題菜,各位蠔迷出動啦! 餐廳所用嘅本地蠔每日由流浮山新鮮運出嚟,全部即叫即煮,保持蠔嘅新鮮度。而且呢度嘅出品冇加味精,希望以簡單嘅煮法同調味,帶出本地蠔嘅原汁原味! 呢啲鮮蠔喺煮之前要好好清洗,清走啲蠔殼碎等大家放心食用。細細個已經開始處理蠔嘅店主Joey會好細心咁逐隻蠔沖洗,憑手感去檢查每隻蠔。 招牌嘅鮮蠔湯米線(HKD58)梗係蠔迷必食啦!湯底用咗豬筒骨、雞肉等熬煮5個鐘以上,再加入鮮蠔湯調味,淡淡奶白色嘅湯頭非常鮮甜。面頭有6隻脹卜卜嘅鮮蠔,仲成隻匙羹咁大,分量十足又粒粒飽滿,入口好juicy! 呢度嘅鮮蠔粥(HKD58)同平時啲蠔仔粥唔同㗎,加入比較大隻嘅鮮蠔好幾揼本喎!綿滑嘅粥底本身以蠔煮成,就咁食粥已經好夠味,仲要有啖啖肉嘅鮮蠔夠晒滿足,撈埋菜脯就更加鹹香添。 香煎金蠔(HKD98/3隻)係小編大愛呀!平時啲金蠔整好後都會比較細隻,但係呢道菜選用養咗5-7年嘅蠔整成,經生曬、煎香後嘅金蠔依然大大隻!上碟時灑啲砂糖提鮮,令金蠔嘅鮮甜度更突出,食落甘香濃郁。 同樣唔可以錯過香口惹味嘅香脆蠔餅(HKD58),蠔餅即叫即炸,加埋芫荽、香蔥炸到金黃酥脆;入面嘅鮮蠔炸過後依然鮮甜肥美㗎,蘸埋泰式酸甜醬一齊食就夾晒喇!   第一蠔粉麵 地址:旺角西洋菜南街258-260號長寧大廈地下C及D號舖 電話:2628 3937 營業時間:星期一至日:12:00-22:00  

0

【太子小店專賣台式炸蛋蔥油餅 招牌肉鬆鹹蛋黃香脆爆漿】炸老闆

依家唔使飛台灣都食到正宗嘅台式炸蛋蔥油餅喇!喺太子新開嘅炸老闆主打一系列爆漿台式蔥油餅,佢哋嘅師傅專程去台灣宜蘭學師,務求將最地道嘅口味帶到香港。呢度嘅台式蔥油餅除咗原味外,仲有6款口味俾你揀,其中招牌嘅肉鬆鹹蛋黃、台灣經典嘅大蒜香腸同九層塔、充滿港式風味嘅餐肉炸蛋都係熱賣之選嚟㗎!呢度嘅蔥油餅好食仲充滿視覺效果,皆因入面嘅炸蛋真係好似「炸彈」咁一咬即爆,食嘅時候記得要小心喇。 每日人手新鮮即製嘅蔥油餅食落特別鬆脆,麵糰落鑊炸嘅時候會打一隻雞蛋喺上面,令兩者結合變成炸蛋蔥油餅! 呢款招牌嘅肉鬆鹹蛋黃炸蛋蔥油餅(HKD38/套餐連茶飲)喺炸到香脆嘅蔥油餅搽上特製嘅鹹蛋黃醬,再加入大量肉鬆!入口鬆脆之餘仲充滿鹹蛋黃嘅鹹香,係一款比較大眾化嘅口味。 台式九層塔炸蛋蔥油餅(HKD32/套餐連茶飲)就最有台式風味喇!新鮮嘅九層塔略略油炸後放喺搽上醬油膏嘅蔥油餅皮上,食落有啲脆身嘅九層塔味道清新,入口會散發九層塔獨有嘅香味添。 另一款經典嘅台式口味就係大蒜香腸炸蛋蔥油餅(HKD37/套餐連茶飲),不過唔係咁多香港人食到生蒜片,所以舖頭都貼心咁改用香蒜蓉。喺炸好嘅炸蛋蔥油餅上面加一大羹蒜蓉再鋪上台式香腸片,惹味到暈呀! 平時鍾意食港式餐蛋麵嘅朋友仔,今次就可以試吓餐肉炸蛋蔥油餅(HKD37/套餐連茶飲)。將厚切嘅午餐肉微微炸香,夾入餅中再搽上醬油膏。食落又估唔到午餐肉會同台式蔥油餅咁夾喎,亦食到午餐肉獨有嘅鹹香。 除咗蔥油餅之外,呢度嘅波霸滷肉飯(HKD35/套餐連茶飲)都幾與別不同㗎;佢個包裝好似杯麵咁有封口,唔怕倒瀉又衛生,方便客人外賣拎走。一揭開封口就見到滷肉同大大隻流心蛋,賣相幾吸引喎。撈埋一齊食,飯同滷肉嘅比例啱啱好,而且滷肉唔算太肥。唔好睇佢杯麵咁嘅size就好細碗,食落分量都唔少㗎,一人獨享都夠食。 呢度仲有小食賣,切成一片片嘅台式炸饅頭(HKD25)炸到金黃酥脆,唧上煉奶、灑滿花生粉啱晒鐘意甜食嘅你。一份約有十件,都幾抵食。 茶飲(HKD17/單買;跟餐免費)方面選擇都算多,5款都係自家沖製再入樽。其中人氣之選有清甜唔膩嘅冬瓜茶,同埋加入牛蒡、甘草,入口甘香又有淡淡牛蒡味嘅養生茶,夠晒健康呀!   炸老闆 地址:旺角弼街60號地舖 電話:5401 5749 營業時間:星期一至日:12:30-22:00

0

【太子老字號燒味名過於實 叉燒乾過柴味道死鹹】伏務台

小編最近留意到網上指一間喺太子嘅老字號燒味店永合隆飯店有勁多伏評,大多數網民都話啲叉燒乾到好似柴咁,仲瘦過瘦叉添。不過燒味又唔可以齋睇叉燒質素嘅,所以小編試埋佢哋其他燒味,睇吓係咪樣樣都咁伏。 永合隆飯店已經開業大約50年,但近幾年就多咗人話佢名過於實,淪為遊客打卡店。今次小編試咗兩款雙拼飯同一碗例湯,一共四款燒味嚟。 先試叉燒燒肉雙拼飯(HKD63), 就咁睇色澤模樣都幾正常 ,點知入口就出事喇……有陣似燒焦咗嘅燶味,食多兩嚿都有啲難入口;明明個樣唔似瘦叉,但口感仲乾過瘦叉。小編都向員工求證係咪特登用瘦叉嚟整叉燒?點知佢哋否認之餘,仲話係用最好嘅貨嚟整,小編都有啲愕然囉。 至於燒肉味道真係好鹹,而且冇揸勻啲鹽,局部位置極鹹添,食一嚿就要飲啖水嚟中和陣鹹味。而燒肉皮就好睇食客運氣,小編呢碟就有脆有唔脆。 乳豬切雞雙拼飯(HKD63)嘅乳豬同燒肉一樣都係死鹹。而且有一點令小編覺得佢幾冇heart,就係堂食都俾一包包嘅外賣乳豬醬,作為一間老字號燒味店,仲自稱專做燒乳豬,唔係連自家製乳豬醬都冇掛?!切雞雖然味道唔錯都算滑,但小編呢碟就瘦到得幾両肉咁,唔係好夠餸飯囉。 最後唯一唔伏竟然係佢個例湯(HKD10),有料得嚟又清甜,轉行賣湯仲好喎。其實以呢度嘅價錢,可以去酒樓食個質素好啲,出品又穩定啲嘅燒味飯呀。   小編伏氣:3星(5星滿分) 入伏點:永合隆飯店 入伏價:叉燒燒肉雙拼飯(HKD63)、乳豬切雞雙拼飯(HKD63)、例湯(HKD10) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【太子街坊價車仔麵店 11餸大碗麵$30勁足料】平霸

車仔麵喺香港成街都係,呢間日昇車仔麵有咩咁特別?可以吸引到平霸注意嘅梗係因為夠平啦!呢間車仔麵喺太子已經做咗好多年,係好多街坊同學生嘅平價食堂,廿幾蚊食到三餸麵,30蚊仲食到11餸麵添,邊度搵呀? 麵店舖面比較細,擺咗一個車仔檔同飲品櫃,行到入去就見到有一排細枱俾食客坐,成間舖大概有6-7張雙人枱同埋兩張四人枱,右邊就係開放式廚房。環境唔算好寬敞,但以麵店嚟講都幾乾淨企理。舖頭啲店員阿姐態度幾好,見到有客人唔識劃點餐紙,仲好有耐性咁講解添。 最低消費係三餸一麵,定價只係6-7蚊一樣餸,加埋最平25蚊就可以食到捧住個肚走。平霸留意到一個抵食之選,呢款有11個餸嘅一品麵都只係30蚊。相比起坊間嘅車仔麵,嗌兩、三個餸都唔止呢個價啦。如果鍾意試多啲唔同嘅餸,點呢個一品麵就最啱喇!呢度啲車仔麵有得自選辣度同加腩汁,都係唔使額外加錢嘅。 咩都想試嘅平霸就揀咗呢碗一品麵 (HKD30)小辣加腩汁。熱辣辣嘅麵一送到嚟,聞到好香嘅辣味同少少嘅麻油香已經食慾大增喇,見到鋪喺面啲餸幾乎遮晒個麵底,感覺好豐富,比較特別嘅餸係豬皮、豬紅、雞翼尖同鳳爪,都係舖頭自製嘅。麵面頭有啲比較稠嘅就係佢哋秘製嘅辣汁,呢個辣汁唔會淨係得死辣,仲食到唔同嘅香料味,不過都真係幾辣,唔太食到辣嘅朋友仔記得提佢哋唔好加咁多喇。如果食唔到辣嘅,都可以加腩汁,個湯頭就香濃啲,唔會咁清。 個麵冇加底,分量都好夠。值得一提嘅係,好多茶記、麵店轉烏冬係要加錢嘅,但呢度係唔使㗎!呢啲細節位都令平霸加咗唔少分。呢個烏冬偏軟身,但唔會一夾就斷,口感尚算彈牙。 成碗一品麵有兩隻雞翼尖,啲雞翼尖應該用咗佢哋嘅咖喱汁去煮,入口比想像中辣,但個咖喱味幾濃,好入味,鍾意食辣嘅朋友仔就要試試佢喇! 呢隻鳳爪就炆得夠入味,有陣八角香味,都有少少辣,但就冇雞翼尖咁辣,幾啱平霸口味。雖然成碗得一隻唔係好夠喉,但勝在有其他餸搭夠,幾有新鮮感呢。 其實除咗頭先介紹嗰兩樣餸之外,成碗麵整體上真係唔錯,魷魚好爽口、豬皮好香麻油味、牛腩夠腍身,菜嘅分量亦算多,有3-4條左右,唔似其他車仔麵咁得嗰一、兩條伴碟。至於其他餸都不過不失,以咁嘅價錢真係超值喇!   平霸小評:依家喺香港連車仔麵都愈食愈貴,吓吓要四、五十蚊先埋到單,搞到有時想嗌多個餸都唔敢。好在呢間車仔麵店逆市做緊30蚊11個餸嘅大碗車仔麵,而且唔係得個平字,仲夠晒足料,食物質素認真唔差㗎,豬皮、雞翼尖同鳳爪呢啲餸入味之餘,款款都唔同煮法,平霸一定要俾Like佢吖! 日昇車仔麵 地址:太子荔枝角道82號地下 電話:2380 1068 營業時間:從缺

0

【太子小店有包食有衫賣 招牌手工漢堡陀地西多】包販子

最近小編喺太子行街周圍逛,發現「太子酒吧街」附近有間Logo設計得幾Cute嘅包販子,望吓門口嘅Menu,係間專賣Burger嘅Café喎,望落都幾闊落。 上次經過嘅時候發現人客幾多,於是小編今次揀平日下午先去,環境幾舒服。 見到牆上用粉筆畫嘅公仔同Menu都幾可愛,另外門口有個Corner係賣餐廳Logo嗰個公仔嘅周邊產品。好少見到餐廳會用自己Logo做Tote Bag呀、名信片咁,感覺幾新奇呀! 老闆阿鋒話,坐喺靠牆嗰張枱嘅係一位本地設計師,名叫嘉寶。成間舖頭嘅設計都係佢負責,阿鋒話嘉寶同餐廳嘅關係既係一部分,又係獨立嘅。有時候客人入嚟食嘢見到佢嘅作品會幫襯,又有客人專為嘉寶嘅作品慕名而來,順便坐低食個Tea。呢種似係合作又非常獨立嘅經營模式幾新鮮!一間有Designer坐鎮嘅餐廳,小編feel到唔止係一間for醫肚嘅地方,反而比較似一個放鬆自己嘅小場所,有種台灣文青咖啡店嘅悠閒感覺。 梗係要試吓Burger啦。小編今次叫咗青咖喱軟殼蟹包(HKD78)同北京填鴨包(HKD62)。呢兩款食物就食得多,夾入Burger入面都係第一次。軟殼蟹炸得非常酥脆,雖然夾咗落包仲落埋沙律醬,但都冇因此變腍,咬落依然脆卜卜,仲食到蟹膏嘅甘香味,食材質素滿分呀;另外填鴨包亦冇我想像中咁油膩,清爽嘅青瓜絲同鴨絲夾埋北京填鴨專用嘅甜麵醬,一啖過咬落去肉+醬+青瓜食晒,完全滿足到填鴨迷嘅口腹之慾呀! 阿鋒話:「專整Burger嘅小店,其實真係多到十隻手指都數唔晒。我希望帶啲新鮮感俾客人,同時又令自己嘅競爭力高啲咁!」。如果只係賣手打牛肉漢堡,要連鎖有連鎖、要小店有小店,要突圍而出唔係咁簡單。所以呢度嘅賣點除咗餡料比較古靈精怪,大部份都係Handmade嘅。「好多人為咗慳成本同慳時間,會買現成嘅嘢返嚟砌埋就算。不過我就覺得既然自己識,冇理由唔做啫!」。 阿鋒做廚師做咗十幾年,入廚經驗當然非常豐富啦!不過今次就係第一次做老闆,「係有啲唔慣㗎!身份唔同,諗嘢嘅角度都唔同。以前會覺得『點解明明有隻靚料貴少少唔用,死都要慳嗰少少用隻平但質素差一截嘅?』呢個就係廚師同老闆嘅分別,老闆係唔會明白貴嘅食材同平嘅分別,淨係知要用最低嘅成本賺最多錢咁囉,不過佢又冇錯喎,咁佢係老闆嘛!但依家我個角色又唔同,我既係廚師又係老闆,用料我可以自己話事,亦都易啲做到平衡……其實係辛苦過打工好多,搵錢又少啲,要顧慮嘅嘢好多,不過咁講啦,有種自由係打工嘅時候冇嘅。」。 除咗手工Burger,甜品亦係招牌。陀地西多(HKD66)好受歡迎,除咗賣相靚,食落都好特別!不過一個人食就有啲heavy喇,底層係自家製港式西多,老闆將佢做成圓形,西多外脆內軟,加埋頂層嘅花生醬雪糕,再淋上焦糖醬同灑上花生碎,超邪惡啊!  另外呢個用點心籠裝住嘅會溶嘅流沙包(HKD22/件)同樣係handmade嘅,口感有少少煙韌,食落竟然係鹹蛋黃嘅味道,好特別!雪糕上嘅流沙滿瀉,拎起食嘅時候要小心啊!   包販子 地址:太子通菜街254號地舖 電話:2656 5605 營業時間:星期二至日:12:00-22:00  

0

【40年快餐店食包食飽 極邪惡$25流心芝士豬扒包】平霸

今次平霸去太子搵食,帶大家嚟到有四十年歷史嘅利口福快餐店,親民快餐店咩都有,有飯有麵有小食,不過最出名都係漢堡包,好多人都為咗珍寶沙嗲牛肉包同流心芝士豬扒包慕名而來,憑實力吸引到一班食客。平霸食完都忍唔住同老闆娘講咗句:「你哋啲包真係好好食呀!」 講到咁出名,第一個要試嘅梗係流心芝士豬扒包(HKD25),豬扒即叫即炸,就咁睇好似平平無奇,見唔到啲芝士,不過一切開,啲芝士即刻好澎湃咁流晒出嚟,食嗰陣記得小心唔好辣親呀! 芝士流出嚟個吓真係好鬼邪惡,入面啲足料沙律醬,酸酸甜甜,雖然加埋芝士一齊食確係邪惡,但食落一啲都唔覺得膩喎! 豬扒炸到鬆脆香口,但又唔會好乾,更加唔係紙咁薄啦,肉質仲保持到鮮嫩有肉汁,難得呀! 珍寶沙嗲牛肉包(HKD25),食第一啖就出事喇,好味到簡直覺得無包能及!豬扒包已經夠出色,估唔到珍寶沙嗲牛肉包味道更上一層樓,好味到想日日食返個呀! 沙嗲牛肉同包嘅比例係一比一,每一啖都可以食到牛肉,分量十足!加上爽甜嘅洋蔥同沙嗲汁,真係天下第一!沙嗲汁夠味得嚟唔會淡茂茂,入口偏甜帶少少微辣,食落好惹味! 仲要每塊牛肉都係大大塊,唔會煮到韌晒,果然出色! 一場嚟到,要試埋珍寶熱狗包(HKD20)先心息,廿蚊一份超巨型熱狗包,兩個人share都食得飽喇!包入面塗上一層牛油,仲有烘熱過,熱辣辣咁食個包都幾軟熟吓㗎。珍寶腸炸過,食落好爽脆又大條,醬汁可以選蕃茄醬/沙律醬,貪心啲好似小編叫混醬都冇問題,試完包你食過返尋味!   平霸小評:想食到高質漢堡包唔一定要捱貴價嘅,好似呢間平民街坊快餐店咁,一樣可以食到好高質嘅漢堡包,分分鐘好食過什麼什麼名店呀!仲未食過?真係要快啲去試吓喇! 利口福快餐店 地址:太子界限街43號恆富大廈地下1號舖 電話:2777 9006 《平霸》平食四方,歡迎各界報料。

0

【果昔店衝出葵廣開地舖 獨創自家製椰糖珍珠】素學堂

葵涌廣場勁多小食、飲品舖,人多爭食競爭大,好多時啲舖頭好快就轉手第二間,眨眼冇咗!不過都有例外,好似主打鮮榨水果果昔、唔加防腐劑同人造糖嘅告白果屋就相反喇,可以衝出葵廣去太子開地舖呀,終於有個更加舒適嘅環境,可以俾客人坐低慢慢飲。老闆嘅家族做水果批發生意,所以對各種水果嘅味道同配搭有一定認識,而且保證新鮮!新舖大啲,飲品選擇都多咗,好似首創自家製椰糖珍珠鮮奶、北極企鵝等,可見老闆不斷求變呀! 店內以黑白色為主,加啲乾花點綴,簡潔中感覺幾寫意。 老闆為咗整自家珍珠,喺台灣買咗呢部珍珠機。由開粉到成品,每日新鮮製造,冇加防腐劑同人造色素㗎。椰糖係咁多款糖之中,升糖指數最低嘅一種。當粉糰變成珍珠粒,就放落鍋用椰糖糖水煮熟。告白果屋嘅「果昔」一定要試,因為水果比例高,質地似奶昔咁杰杰哋,所以叫「果昔」。 青出於藍(HKD28/杯,HKD46/2杯)用羽衣甘藍、蘋果、菠蘿同牛奶整成,再用士多啤梨點綴。被指有抗癌功效嘅羽衣甘藍本身味道唔重,冇乜草青味,反而因為有菠蘿,所以帶點微酸,咁多杯果昔之中佢算最唔甜嘅。 左邊嘅小確幸(HKD29/杯,HKD48/2杯)用雪梨、木瓜、蘋果同牛奶整成,味道有啲似平時飲嘅木瓜牛奶,但多咗雪梨嘅清甜味;右邊嘅恐龍遇上噴火龍(HKD28/杯,HKD46/2杯)用咗紅肉火龍果、蘋果同提子,再用香蕉點綴。呢杯顏色勁吸睛,亦係咁多款果昔中甜度最高,不過所有甜味都來自水果,冇添加人造糖,所以都算清新。小編就最鍾意呢杯,因為飲落有火龍果果籽可以咬吓。 龍珠爺爺(HKD29/杯)係新品之一,自家製嘅椰糖珍珠配鮮奶,撞出紋理。珍珠好煙韌,面頭仲有層芝士奶蓋添。牛奶味同椰糖嘅香甜加埋一齊又香又滑。 新品仲有北極企鵝(HKD29),烏龍茶係即叫即焗,唔係用一壺壺沖定嘅茶,大家要耐心等等喇。茶沖好會加入蜜糖調味,面頭有層奶蓋,清淡得嚟帶點奶香。   告白果屋 地址:太子彌敦道785-787A號利達大樓地下C鋪 營業時間:星期一至日:13:00-21:30

0

【太子小店賣花膠米響朵 新推嫩滑牛頸脊湯米】潮州人

店名叫潮州人唔一定要食潮州菜嘅!身為潮州人嘅老闆Atta都話好多人會以為佢做潮州菜,其實店名嘅由來只係Atta爸爸成日話做人要有潮州人刻苦打拼嘅精神咁解啫!Atta就話,佢只係想煮自己鍾意嘅住家菜同大家分享咋。 舖頭雖少,但心機同用料一啲都唔少!試過有段時間舖頭嘅鎮店花膠斷咗貨源,Atta並冇將價就貨用次級嘅花膠頂上,因為佢想大家都可以食到又平又靚嘅花膠,依家仲有新menu添。 蠔皇花賿撈米(HKD68)同湯麵款一樣,有原條肥厚花膠㗎!花膠炆得幾入味,好有肉地又軟熟彈牙;膠質都豐富,有少少漿口,男士食都爆心心眼呀!配上幼細嘅新竹米粉,吸湯吸汁都易啲,又唔會搶咗花膠嘅味道。米粉都隔得幾乾水,手勢唔錯呀。 本身嘅menu係海鮮食物多,不過遇上有靚食材都會變動吓。新鮮手切肥牛湯米(HKD53)加入menu冇耐,用肉味濃嘅本地新鮮手切牛頸脊肉,煮到啱啱熟即起,保存到佢彈滑嘅質感,所以你都唔好浸咁耐先食呀。湯底同花膠麵一樣,用大量雞精煮而成,仲有洋蔥等材料提味,好鮮甜㗎。 仲有兩款小食都係新出嘅,貴妃蚌(HKD56/2隻)聽落有啲貴,但上枱見佢大隻過湯匙即刻嘩咗聲!有肉爽口又鮮甜,食得出係靚海鮮,豉油都唔好點太多,食原味堅正! 酒釀溏心蛋(HKD18/隻)選用日本蛋,浸酒都要兩至三個鐘,酒香喺口腔慢慢散發都唔錯。 老闆仲會每日煲唔同嘅滋補靚湯,有成十幾款㗎!   潮州人 地址:太子界限街12號A地舖 電話:6536 6626 營業時間:星期二至日:15:00-00:00

0

【20年歷史冰室轉型成功 經典配創新交叉感染】永興冰室

相信去開太子,大家冇食過都一定有聽過永興冰室呢個名。舊名叫永興茶餐廳,喺1994年開業,因為業主大幅度加租,搞到老闆要忍痛結業,令到一班熟客都好唔捨得。好在,永興重開,仲成功轉型,轉型後推出咗唔少新食物添。採訪當日,老闆娘仲好熱情咁招呼,十分好客。小編真係感受到呢間冰室嘅成功,除咗食物出色,嗰種充滿人情味嘅氛圍都係要素囉! 抹茶撻(HKD7/1個),係老闆娘旅行嗰陣諗到嘅靈感,呢個抹茶撻開頭食第一啖好似冇乜味咁,不過當你食完成個之後又會有啲回甘,好神奇喎。開頭推出嗰陣都冇乜人接受,但係依家啲食客都追住嚟食,好搶手㗎!老闆娘話:「大不了唔得咪唔做囉,試咗先啦!」真係值得小編敬佩同學習! 焗鮮茄扒飯多士盒(HK68),豬扒多士盒都算係永興嘅必食清單之一,呢個靈感係來自於台灣嘅棺材板,老闆娘覺得幾得意,又試吓整咗佢出嚟。多士入面包住滿滿嘅鮮茄豬扒,加埋盒飯真係巨無霸,又邪惡又好食! 雪山疏乎厘(HKD88),可以話係永興冰室嘅signature,嚟到唔食佢點得呀! 送上枱嗰陣,連其他客人都嘩咗出聲,真係超級巨型呀!入口唔會好似食緊空氣咁,超級有質感,而且蛋白味勁香濃,果然係永興名物。 雪糕抹茶特飲(HKD28)嘅靈感又係老闆娘去日本旅行嗰陣諗到嘅,抹茶味道超濃郁仲會回甘添;而雪糕紅豆冰奶茶(HKD28),雪糕配奶茶原來都可以咁夾!好飲!   永興冰室 地址:太子彌敦道776-778號地舖 電話:2988 5566 營業時間:星期一至六:06:00 – 23:30

0

【22蚊12粒薯粉餃子 太子小店正宗潮汕味】平霸

平霸搵食,今次小編去咗太子嘅粿然好味,一直都知道呢間小店好出名好多人推介,主打正宗嘅潮汕美食,鍾意潮州菜嘅朋友仔可以嚟呢度搵食喇! 除咗有家鄉菜茶之外,仲有潮式腸粉、冬節餃、薯粉餃子、千層糕同草果等等,好多選擇㗎! 潮式腸粉(HKD22)同平時食開嘅腸粉有好大分別!呢個係超!級!之!滑!老闆每晚都會浸米,朝朝新鮮磨米漿整出嚟,再加埋雞蛋一齊落去蒸,唔怪得啲腸粉可以咁滑啦!而且仲要滑得嚟有米香㗎喎,抵讚呀!腸粉上面仲加咗啲雜菜、冬菇同雞蛋等配料,再配埋自家製香油,真係冇諗過腸粉都可以食到咁惹味,雖然食完確係有少少油膩感,不過絕對可以接受嘅! 薯粉餃子(HKD22/12粒),身為餃子控嘅小編見到已經心心眼都出晒嚟!佢嘅皮用番薯同大地魚粉整成,入面嘅餡料就用豬頸肉,食落又幾得意喎。最鍾意佢個皮煙煙韌韌,食落好QQ,再點埋醬汁,一口一粒,正呀! 草果(HKD12)另一個名又叫黑涼粉,食落質感係幾似涼粉嘅,但又冇涼粉嗰種苦味,可以配花奶或者糖漿一齊食,口感好Q彈,仲可以清熱解暑,夏天食返碗消暑都好喎! 平霸小評:小編不嬲都好鍾意呢啲小店,呢次去到咁啱得老闆自己一個,見佢事事親力親為,態度仲好親切,真係難得!而且對於未食過潮汕美食嘅我嚟講,估唔到係咁正!未食過潮汕美食嘅你,一定要嚟試吓啦! 粿然好味 地址:太子界限街41C號地舖 電話:2295 0959 營業時間:星期一至六:12:00-23:00;星期日:11:00-18:00 《平霸》平食四方,歡迎各界報料。