Tagged: 套餐

0

【深水埗「素」街食好西 榴槤飛餅+新豬肉咖喱小籠包】素學堂

唔使去淘寶,今次要去深水埗!事關小編要帶各位素人去食小籠包呀!喺深水埗有兩間有得食素嘅小籠包店都大受好評,分別係誠記小籠包拉麵同上海生煎皇,唔講咁多,梗係試咗小籠包有幾素先啦! 首先去到喺西九對面嘅誠記小籠包拉麵,小店由父子檔拍住上,鎮店小籠包、生煎包同芋圓等等,都用新鮮食材全人手製作㗎,難怪深受街坊歡迎啦!兩個月前仲推出咗素食小籠包,啱晒素人胃口呀! 素食小籠包(HKD57/六隻)即叫即蒸熱辣辣,小籠包嘅皮都算薄,蒸嘅時間啱啱好,唔會太腍又唔會一夾就拮穿。有成8種餡料咁豐富㗎,有素雞、木耳、椰菜、冬菇、烤麩、松茸菇、紅蘿蔔同粟米,食落口感豐富同好清甜,雖然冇乜爆汁效果,不過清清哋都好滿足呀! 另外小編仲試咗榴槤飛餅(HKD48)同芋圓鮮椰露(HKD27),如果你係榴槤控就唔好錯過喇!榴槤夠香甜、飛餅亦煎到脆卜卜,不過榴槤餡就唔算厚,但都好夠味;芋圓鮮椰露就有芋圓、南瓜圓、地瓜圓、小丸子同西米,啖啖椰香廿七蚊碗都唔錯㗎! 誠記小籠包拉麵 地址:深水埗欽洲街58號米蘭軒地下 電話:2388 3538 營業時間:星期日至四:11:00 – 23:30,星期五至六:11:00-00:30   食完誠記,之後去到大家應該都唔陌生嘅正宗上海生煎皇啦!喺香港總共有4間分店,老闆係娛圈中人,大家叫佢做生煎包王子、亦係江若琳老公Oscar蕭潤邦啦!半個月前舖頭推出日式咖喱薯仔新豬肉小籠包,唔係唔試呀? 日式咖喱薯仔新豬肉小籠包(HKD40/四隻),金黃色外皮都夠薄,第一啖已經食到咖喱味,由於用咗新豬肉(Omnipork)嘅關係,食落口感同一般小籠包好似,而汁就比誠記多啲。小編覺得咖喱味幾過癮又新奇,就算唔係素人都啱食㗎! 店內都有提供新豬肉素食套餐(HKD72),有一份主食、小食同飲品,素人可以直接揀啦! 小編今次就試咗四季豆新豬肉碎飯同芥末柚子粉皮,四季豆同新豬肉都幾夠鑊氣,小編冇諗過咁好味喎;芥末柚子粉皮就偏甜,芥末味唔算好出,不過勝在粉皮夠滑亦唔厚,一條條滑溜溜食落口好特別!   正宗上海生煎皇 地址:深水埗福榮街100號地下 電話:2723 7723 營業時間:星期一至日:11:30 – 23:30

0

【三大平靚正素食店推介 $29抵食三餸打工仔恩物】素學堂

平嘢一樣有好嘢,尤其係食齋呀!今集素學堂就介紹3間平靚正素食店俾大家,除咗價廉物美,食物冇落味精,仲有好多家常菜俾大家選擇,難怪街坊同打工仔都咁buy佢哋啦!   打工仔大愛 HKD30喺中環可以食到飽並唔係傳說,呢間福祿壽健康素食仲找返1蚊俾你添!好多OL同西裝友都嚟幫襯,Lunch必定大排長龍㗎! 外賣飯盒三餸配湯(HKD29),堂食雖然係任選兩款餸(HKD35),但米粉、炒麵、飯同湯都任食㗎!呢度選擇幾多,每日有13款餸自由配搭,今次小編就試咗鮮茄炒蛋焗豆、三菇肉鬆滑豆腐同梅子汁素鴨。好鮮甜嘅蕃茄幾乎有成個咁多,令人好滿足!豆腐唔鹹好健康,有住家味。梅子汁酸酸甜甜,啱晒夏天好開胃。外賣嘅炒麵分量都多,又唔會好油。 跟套餐嘅三色雜豆煲南瓜湯冇味精,清甜足料。   福祿壽健康素食 地址:中環鐵行里8號 電話:2543 9843 營業時間:星期一至六:07:00-15:30   舊式住宅商場小店 舊式住宅商場成日都搵到好嘢,荃灣嘅素食新一代就係其中之一喇。 五餸飯包豆漿或湯(HKD38),款式仲日日唔同。芙蓉煎蛋好香好厚實,調味唔會好濃啱啱好。素蠔油節瓜炆到好腍,如果愛用汁撈飯嘅朋友一定鍾意。鮮茄薯仔嘅薯仔炸過,好香口!漢堡扒用冬菇椗做,好彈牙。薑炒時菜都幾新鮮。除咗白飯可選配粟米粥,免費添加㗎。 跟餐嘅木瓜湯煲到木瓜溶晒,夏天好解渴。 小編推介炸雲吞 (HKD4/粒),外皮香脆可口;仲有好大條嘅腐皮卷(HKD4/條),包住大量粉絲、冬菇絲同木耳絲。   素食新一代 地址:荃灣西樓角路荃昌中心昌安商場1樓52&55號 電話:2411 2407 營業時間:星期一至日:10:00-22:00   街坊老店 講咗咁耐又點少得甜酸齋呢!元朗嘅齋之寶齋菜館已經開業28年,好多老街坊支持㗎! 門口已經有好多甜酸齋俾你揀。 日式素食便當外形嘅四餸套餐跟湯(HKD43),可以配飯、麵或米粉,餸菜款式日日唔同㗎。甜酸齋係懷舊嘅味道,咬落去啲汁爆晒出嚟!翠肉瓜唔會煮到爛晒,炒得好爽脆。炒菜略嫌有啲油,不過都可接受。蕃茄炆雜豆就好有媽媽嘅味道。炒麵分量都幾大,麵質都彈牙。 冬瓜湯足料又解暑,呢日成35度,小編飲得好爽之際,店員仲好窩心咁問要唔要多碗,好有人情味呀! 食埋小食係必須嘅,上面紫菜餅、左邊南瓜餅同右邊素鰻魚仔(各HKD6/件)。小編最推介紫菜餅,好多人都指定食㗎。紫菜拉到一絲絲,有少少海水嘅鹹味;南瓜切絲炸成餅,非常香甜可口;素鰻魚用腐皮卷成,像真度極高呀!   齋之寶齋菜館...

0

【浪漫二人前 瀛爆日式火鍋套餐】勝手

火鍋係香港人最愛,通常一大班人想坐低傾下計,烚下烚下就啱晒。如果想人少少食火鍋,食得專門啲,可以去邊呢?銅鑼灣勝手就係一個好地方,人少少都可以好好享受日式火鍋,而且唔係放題形式,而係以套餐形式選擇,食物質素更有保證! 小編今次重點介紹Shabu Shabu二人套餐,套餐共包括七種食物。今次套餐嘅前菜係前菜九點,顧名思義,一共有九種前菜,非常豐盛。啱晒shabu shabu等緊野熟果陣,可以同朋友一路食一路慢慢傾計。 然後必須隆重介紹一下套餐可以揀選嘅北海道活毛蟹。北海道活毛蟹全身都有細小絨毛,毛色金啡,蟹殼比較薄,價格十分矜貴。相比其他蟹,北海道活毛蟹嘅肉纖維細密,會見到蟹肉一絲一絲好緊密,蟹肉亦都填滿蟹身蟹腳,甚少「虛位」。食落唔止啖啖肉,蟹肉又幼嫩又鮮甜,相比其他蟹,更清新鮮甜,味道更持久不散。再加上濃郁蟹膏散發淡淡海水味,食完整個口腔都會有陣陣蟹香鮮甜縈繞不散,十分高享受! 套餐價錢係根據主菜而定,小編揀咗鹿兒島西冷和牛A5(150g)套餐(HKD1680),A5和牛脂肪分佈十分平均,肉質鮮嫩帶有濃香牛肉味,油脂令入口感覺更油潤滑溜,食落有入口即溶嘅感覺。另外仲有一隻北海道活毛蟹添!  Shabu Shabu又點可以無蔬菜呢?放心,除咗主菜之外仲有新鮮什錦菜籃,無花無假,真係每樣食材都好新鮮!食落啖啖都有鮮甜蔬菜味道,一洗肉類嘅油膩感之餘, 鍾意食稻庭烏冬嘅朋友必定要試一試手打稻庭烏龍麵,質感煙煙韌韌,但係入口出奇順滑,仲有少少爽滑彈牙,值得一試! 至於甜品,小編今次跟餐嘅甜品係紅豆奶凍,甜香嘅味道留喺口裡面久久不散,為你整個套餐畫上一個完美句號。除咗食物之外,餐廳都有提供多款唔同類型嘅清酒可供選擇。大家一邊慢慢品嚐豐富美食嘅同時,可以飲返幾杯,享受寫意時光。 勝手 地址:銅鑼灣百德新街55號華納大廈地下E號舖 電話:2577 2628 營業時間:星期一至日:12:00-15:00,18:00-23:00

0

【至嘆綠色悠閒套餐】Urban Park

今個九月Urban Park將帶俾你無限驚喜,優惠仲陸續有黎!小編收到風Urban Park最近推出九月限定嘅優惠,逢星期三晚可以HKD99坐Bar檯享受滋味美式Dinner,有成4種食物任君選擇,仲免費送埋最新健康Green Cola。一個人靜靜地細味品嘗又得,帶埋朋友一齊品嘗美食佳餚都得。 Urban Park唔單止調製創意雞尾酒出色,食物都不時有驚喜架。Mexican Fish Taco(HKD179)饀料實淨足料,魚肉嫩滑可口,配埋墨西哥特色調醬,簡直一流! 講到美式食物,第一個就諗起Burger。Southern Fried Chicken Burger(HKD179)炸雞外脆内軟,加上新鮮蔬菜,多咗一份清新感覺!即叫即炸嘅Skinny Fries上到檯仲熱辣辣,沾埋特濃蜂蜜芥末醬一啖薯條一啖Green Cola,正到飛起啦! Deluxe Jumbo Dog(HKD179)香腸皮脆又好Juice,加上酸甜新鮮番茄同芥末醬,一啖咬落去滿足感爆燈!再配埋炒蛋同蔬菜沙律中和翻油膩感,味道恰到好處。 The Urban B.L.T Club Sandwich(HKD179)搭配非常豐富,唔單止有火雞火腿,仲有惹味培根,加埋生菜同幼身薯條,健康又多選擇! 對鍾意飲可樂嘅朋友,綠色可樂係你嘅健康之選。原來Green Cola採用全天然代糖甜葉菊,同用天然健康調味方法,糖份同卡路里只係一般可樂嘅1/3 ,味道仲好清新醒神。想飲Green Cola嘅朋友可以今晚去Urban Park試啦,現時香港唔係好多地方有得買架! *優惠期:整個九月逢星期三6:00p.m開始 Urban Park 地址:上環德輔道中173號德南豐大廈2樓3-5號店 電話:3708 8083 營業時間:星期一至日: 11:30-22:30