Tagged: 奶蓋

0

【懷舊冰室南豐紗廠試業 地道茶餐+手搖茶飲1折起】王牌冰室、王牌冰茶

作為打卡聖地之一嘅荃灣南豐紗廠,入面啲餐廳都極具特色。啱啱由大圍殺過嚟,喺南豐紗廠開新店嘅王牌冰室同王牌冰茶都有唔少打卡位,店外有特色百子櫃,店內有懷舊霓虹燈牌配「是是旦旦叉燒蛋飯」搞笑句子等等。試業期仲有唔少激筍優惠,5月20日開始一連九日嘅平日,堂食指定套餐同桂花系列手搖茶飲首日一折,第2日二折,第3日三折,如此類推至第9日就九折。講咁耐,即刻睇吓有咩人氣菜式先! 熱門麵食 王牌特濃沙爹牛肉麵(HKD36/早餐;HKD44/常餐)之所以做到王牌推介,係因為佢唔同一般茶餐廳只係喺雞湯底上面淋少少沙嗲汁,而係直接將沙嗲汁加入湯底煮成「沙嗲湯」!成碗麵味道超濃厚,仲慢慢滲出花生醬味,食過一定返唔到轉頭!牛肉煮得入味同夠滑,分量仲幾多添。個餐跟埋牛乳炒蛋、牛油多士同熱飲,亦可以轉蒜蓉多士(加HKD2),咩時段嚟食都夠飽啦。 爆香蔥油煎豬扒撈公仔麵(HKD49)嘅豬扒大塊到要摺埋上碟,食晒其實幾飽肚。撈勻啲麵仲聞到蔥油香,色香味齊全喎。 王牌鑊氣推介 招牌之一嘅特濃牛乳炒滑蛋叉燒蝦仁雙拼飯(HKD58/午餐;HKD64/晚餐)俾滑嘟嘟嘅蛋皮包住,見到juicy嘅蛋汁同秘製甜豉油已經流口水囉。加上大大件又軟腍嘅叉燒,配埋爽口大蝦,啖啖肉勁滿足! 餐廳專登搵懷舊嘅圓形麵餅整成脆炸肉絲炒麵(HKD52/午餐;HKD58/晚餐),幼身麵條炸得好鬆脆,仲夾得好方便添。而且餸料另上,唔會浸腍麵餅。 另一款特色菜係咖喱吉列豬扒飯(HKD54),同樣有超大大塊豬扒,炸過依然肉嫩多汁。吉列脆漿夠薄又唔會油淋淋,加埋香濃嘅咖喱汁撈飯一流! 邪惡下午茶 好多人出街食飯都想喺邪惡同家庭味之間攞個平衡,香煎肉餅飯限定下午茶(HKD30)就啱晒喇。煎到微微焦香嘅肉餅撈埋蛋汁一齊食,係加分嘅配搭呀! 沙爹牛肉潛艇(HKD32)夾滿牛肉,麵包吸埋沙爹湯汁,可以將所有精華食晒。 經典常餐 瑞士汁雞翼撈麵(HKD46)係冰室不可或缺嘅菜式之一,雞翼煮得超入味,肉質軟腍嫩滑。想濕口啲可以揀湯麵,跟埋牛乳炒蛋、牛油多士同熱飲都幾滿足。 三款爆餡三文治之中,芝士鹹牛肉炒蛋(HKD36)係最受歡迎。想食到滑溜嘅口感就唔好掛住影相喇,趁熱食呀!   9日「瘋狂折扣」低至一折 堂食指定套餐就有優惠喇。 健康手搖茶飲 王牌冰茶主打健康手搖中國茶飲,所以用咗冰糖控制甜度,即使正常甜度都有清潤嘅感覺。特別之處仲有品牌自製健康配料,手工桂花珍珠(HKD4)、清香桂花凍(HKD5[右])同蜂蜜洛神花凍(HKD5[上])都好有咬口㗎。 5月20至30日期間嘅平日,桂花系列四杯飲品同樣有「瘋狂折扣」優惠,每人每日限購一杯。如果想要香濃茶味有桂花珍珠 • 觀音王(HKD27[左]),鍾情台式風味又有桂花珍珠奶茶 • 龍井(HKD27[右])。 5月31日至6月30日又有「追加優惠」,只要點豐乳奶蓋(HKD29)或黃金奶蓋 • 觀音王(HKD35[左])就可以按對應日子,用優惠價追加同款奶蓋一杯,星期一加HKD1,星期二加HKD2,如此類推。 呢度嘅奶蓋質地幾綿滑,又唔會過濃而掩蓋茶香。焦脆奶蓋 • 觀音王(HKD35)薄薄嘅焦糖脆片令奶蓋鹹中帶甜。介紹咗咁多款,說好的健康手搖中國茶飲出場喇,選擇多到不能盡錄囉: 佛檸馬蹄 • 龍井(HKD26[左])清甜爽口;王牌鮮果茶(HKD38[中])有多款足料水果;冰燉雙柚觀音王(HKD30[右])就幾解滯。 女士恩物桑寄生赤棗普洱(HKD26[左])同赤棗桂圓茶(HKD23[右])都有size大粒嘅赤棗,齋睇已經feel到滋補,飲完食埋啲料更加不得了!...

0

【榴槤鹹蛋黃重口味邊爐 髒髒抹茶火鍋掀起熱潮】食焦

原來珍珠奶茶pizza同珍珠拉麵都未夠激,依家真係愈玩愈過界,呢種mix&match嘅新境界去到火鍋界別又會變咗點呢?係令人完全估唔到嘅都可以溝埋一齊,仲要放埋入口添!好似喺上海一間叫香天下嘅連鎖火鍋店,推出咗好多個千奇百趣嘅重口味湯底同估佢唔到嘅配料,引咗好多網紅同唔少食客去挑戰!好味定難食?有noise最緊要呀! 宣傳聲稱係「可以喝的奶茶奶蓋火鍋」,咁有咩鍋底呢?登登登凳,有髒髒奶茶鍋、榴槤椰奶鍋、芋頭青稞鹹蛋黄肉鬆牛奶鍋、髒髒抹茶鍋,配料更加厲害,有OREO餅乾啦、鹹蛋黃啦、芋圓啦、珍珠啦同埋紫薯都有喎,總之喺茶飲店度見到嘅配料都可以加埋落去咁款! 見到一鍋鍋抹茶火鍋加埋呢啲配料,鹹甜鹹甜咩味都有呀真係,每鍋盛惠138蚊人仔、差唔多160蚊港銀,但係連埋成個榴槤殼放埋落鍋度滾嘅榴槤椰奶鍋就唔同價喇,要258蚊人仔,圍起要成三百蚊港銀一鍋㗎! 價錢嚟講唔算平,但喺強國都一樣掀起咗髒髒火鍋熱潮,成為微博熱搜同喺抖音度洗版,有唔少網民就話受不了呢個暗黑料理,連重慶人咁重口味都話受不了!有人就話寧願買杯奶蓋去食火鍋,為乜要飲奶蓋邊爐喎!講到咁hit,唔知有冇香港火鍋店想跟風呢?

0

【快過正版衝出國際 山寨喜茶攻東京㗎妹撐】食焦

山寨版開到成行成市,有時個勢仲誇張過正店咁喎!最近講得最勁嘅梗係「難辭其咎」嘅「蘭池」拉麵啦,呢間老翻一蘭喺杭州開店,像真度極高,真係難分真與假!有啲仲誇,好似喜茶,其實一直有唔少山寨版出現,誇到衝出國際嘅,就係呢間宣喜茶。 之前喜茶喺官方ig度登咗請人廣告,令到終於登陸香港嘅消息都曝埋光,將會喺沙田新城市開香港第一間海外店。正版都未正式攻港,山寨版宣喜茶就快人一步,上個月喺東京池袋開店,仲引咗好多日本人去打卡,有茶飲就唔理得你係正版定山寨,個個㗎妹手捧一杯杯芝士奶蓋,呢間山寨店輕易成為咗池袋熱點! 其實喜茶彈起之後,有樣學樣嘅山寨版層出不窮,又宣喜茶、囍茶、東喜茶、遇喜茶……多到數唔晒!至於衝出國際喎,池袋嘅宣喜茶都唔係第一單喇,舊年喺首爾江南區,就有網民發現喜茶蹤影,不過個名唔係叫「HEYTEA」,而係「HEEKCAA」,快過晒正版喺海外開店,勁呀!

0

【榴槤控注意!新開café!必飲一嚿貓山王跌落奶】榴槤BB

夏天一到,代表食榴槤嘅季節又到喇!榴槤控快啲出嚟啦!依家喺觀塘有間新開嘅榴槤café,除咗有榴槤食,仲有唔少榴槤飲品,真係包你食到「榴槤」忘返呀! 榴槤全部都係泰國同馬來西亞嘅果園新鮮運送,嚿嚿都好好食㗎! 一嚿貓山王跌落奶(HKD48),基本上係必飲,最受客人歡迎嘅一款呢!簡單啲講即係榴槤奶昔,入面用咗榴槤蓉,40g貓山王果肉同牛奶造成,飲落非常之濃郁,仲可以食到一絲絲果肉添呀,超級滿足! 貓山王芝士雲頂炭燒烏龍茶(HKD38),面頭嘅奶蓋唔止芝士咁簡單,當中加咗榴槤蓉同貓山王果肉,用咗鳥龍茶做底,可能因為榴槤加埋啲奶蓋一齊,所以唔會搶晒鳥龍茶嘅味道,小編十分推薦啊!有時候唔想食晒成嚿榴槤咁膩,試吓飲呢個就啱晒,食到果肉之餘都唔怕膩啦! 貓山王焦糖脆奶荼(HKD38),用咗台灣紅茶,面層再用火槍燒成一層焦糖脆脆,飲落有少少焦香,又帶有淡淡嘅榴槤味,唔好諗住榴槤加入台式飲品度會好奇怪呀,其實相當有驚喜,出奇地夾呢!榴槤控真係唔好錯過喇! 榴槤品鑒盤(HKD148)入面有齊五款榴槤,由淺味食到濃味。第一嚿由名種食起,包你試晒唔同榴槤嘅味道,最後一嚿先食貓山王呀!小編最愛金包同貓山王,味道真係錦密得嚟仲好香濃呢,而且好creamy,貓山王仲帶有些少酒香,令人回味無窮呀! 榴槤BB 地址:觀塘敬業街65-67號敬運工業大廈2樓B號舖 電話:3708 8732 營業時間:星期一:12:00-19:00;星期三至日:12:00-19:00(星期二休息)

0

【佛誕遊大埔慈山寺 朝聖埋3大人氣食店】陳漢記、華輝餐廳、飲嘢

自從誠哥嘅慈山寺開咗之後,有宗教信仰嘅,當然趁機會去參拜吓啦,無宗教信仰嘅,一樣可以去打吓卡當小旅行都得!嚟緊佛誕,大家可以入去應吓景,不過慈山寺有四「不」,其中一個係不設齋堂,要出返大埔或向大美督方向先有嘢食㗎。唔想食齋咁齋?大埔都有好多正嘢選擇㗎,今次介紹呢3間餐廳,有正餐、下午茶同甜品,行完慈山寺嘅話,一次過食盡佢啦! 正餐 陳漢記雖然自稱係粉麵專家,但係佢嘅腸粉同粥都唔錯㗎。一睇見牛肉腸(HKD23)嘅皮咁薄,功架勁過酒樓已經令小編心心眼喇!入口嫩滑仲幾有肉地,仲有甜豉油提鮮,一碟真係有啲唔夠喉。 小編都幾鍾意蟹,所以就叫花蟹粥(HKD47)啦。本身上枱都冇咩感覺,但一夾起蟹蓋,見到啲鮮嫩嘅蟹膏精華滴返落粥度,真係流晒口水囉!粥底幾軟綿,加埋花蟹嘅鮮甜,小編勁勁勁愛呢碗呀!蟹嘅分量唔知係咪次次一樣,因為竟然有一隻半蟹咁多喎!有冇人食過可以話俾小編知呢? 麵點都要試吓嘅,牛坑腩河(HKD46)嘅肉好軟腍,肉味幾香口。可惜幼河粉碎咗啲,唔係就perfect喇。   陳漢記 地址: 大埔運頭街91B地下 電話:2658 2277 營業時間:星期一至日:11:00-04:00   下午茶 好多人都會去華輝餐廳,除咗因為佢係《那夜凌晨,我坐上了旺角開往大埔的紅VAN》片中嘅餐廳,仲因為佢嘅雞批(HKD14/件)好足料!味道唔會好濃,雞肉又大粒,皮都幾脆,真係唔錯。 蘋果批(HKD14/件)都唔可以睇少!蘋果肉超多又厚身,酸酸哋幾醒胃。 蛋球(HKD9/大)即係沙翁,皮幾脆,但厚咗少少,蛋味都香濃。   華輝餐廳  地址:大埔鄉事會坊17號地舖 電話:2656 6420 營業時間:星期一至日:24小時   甜品 天氣咁熱一定要整啲凍嘢涼一涼,嚟到飲嘢一定要試呢杯爆漿士多啤梨奶緹(HKD46)真係不計成本之作!鹹味奶緹好smooth,仲厚到令你一啖都未飲到士多啤梨,要第二啖先飲到士多啤梨,果蓉真係多到黐咗線!小編懷疑起碼用咗半盒士多啤梨,加埋茶底調製,令酸甜嘅感覺好清新,開胃度爆燈,小編都幾鍾意! 提提大家,奶緹唔係攪勻飲㗎,睇睇教學啦。 令一款大熱飲品黑糖珍珠可可奶(HKD38)都好驚喜,自家秘製將黑糖滲咗入珍珠,一入口就甜甜哋,第二度冇㗎!相對可可反而唔需要太甜,但又夠味唔會水汪汪,真係幾考功夫。 仲未消到暑?純對零度仙草冰(HKD74)一定搞得掂,分量多到2-3個人食都得。大大盤有9種料:珍珠、紅豆、椰果、椰汁糕、芋圓、地瓜圓、花生、紫薯圓同雪糕球2個,大部分仲係自家製,唔怪得好多人嚟食佢嘅芋圓糖水啦。   飲嘢 地址:大埔舊墟直街9號粵發大廈地下4-5號舖 電話:2813 7998 營業時間:星期一至四及日:12:00-00:00;星期五、六:12:00-00:30

0

【新開café手沖靚咖啡 惹味燒春雞主菜驚喜】RINGS COFFEE

九龍城有唔少泰國菜就好多人都知,但原来都有啲咖啡小店新發現㗎!好似最近就有間新café殺入九龍城,真係少啲勇氣同實力都唔得呀!RINGS COFFEE主要走簡約路線,以白色同木系做主調,俾人嘅感覺好舒服,簡簡單單。至於點解叫呢個名?係因為老闆想將所有關於咖啡嘅嘢都連埋一齊,好似戒指咁,等鍾意咖啡嘅朋友仔有個地方圍埋一齊,交流吓咖啡經咁喎! 牛油果蛋多士(HKD88)一上碟真係令人忍唔住手機食先,超靚!個牛油果雕晒花,少啲刀功都唔得;底下嘅多士塗上一層滿滿嘅牛油果蓉,好有誠意!配埋太陽蛋啲蛋汁一齊食仲正呀!小編本身對牛油果冇乜好感,估唔到咁簡單嘅材料已經可以好好味,完全加晒分! 烤春雞仔配薯菜(HKD98)呢個不得了!上到枱已經香味四溢,春雞仔外皮烤到外脆內軟,啖啖都充滿住肉汁,雞肉嫩滑,好驚喜呀!可能同平時食開嗰啲差太遠,所以一食就愛上!一定要試呀,小編推介必點之選。 嚟到呢度又點會唔叫返杯coffee飲呢?鮮奶咖啡(HKD38)奶味突出,仲打到好滑,拉花又靚,不愧係出自得獎咖啡師嘅手勢。冬天飲返杯真係暖笠笠又窩心㗎! 另外,佢哋仲有手沖咖啡,用咗虹吸式咖啡壺,好考功夫同技巧,煮出嚟嘅咖啡更香更濃。 除咗咖啡,呢度嘅奶蓋都好出名。小編就覺得Tonci Coffee Cover(HKD46)好特別,未攪勻之前飲係苦苦哋,攪勻之後反而有點甜甜酸酸感,係從來未飲過嘅口感,真係估佢唔到,好得意喎! RINGS COFFEE 地址:九龍城衙前塱道8號地下 電話:9798 3510 營業時間:星期二至五:12:30-21:00;星期六、日及公眾假期:09:00-21:00(星期一休息)