Tagged: 宇治抹茶

0

【獨創日本海藻烏冬】宏 Hiroshi

好多香港人都好鍾意日本,鍾意佢嘅講究同純粹,即使係微不足道嘅一件小事,處處都包含住佢地嘅用心。喺尖沙咀The One 5樓嘅宏 Hiroshi係一間非常講究嘅日本食店,細至一隻雞蛋,喺日本邊一度入貨都十分用心,務求味道完美,客人食得開心滿足之餘,仲食得健康。講究細節,堅持用心,值得欣賞。 日本野菜天婦羅冷烏冬(HKD89),野菜天婦羅係由一條條蕃薯沾上脆漿炸成一舊,食落除咗可以食得出一條一條脆卜卜嘅豐富口感之外,蕃薯好甜好新鮮!雖然係即炸,但係完全唔會感覺到熱氣。蘸上醬油,仲可以保持到脆感,味道仲更加清爽! 烏冬為日本海藻烏冬,佢嘅奧妙之處係100%由日本國內小麥粉製成,含有非常豐富食物纖維、維生素同多種營養,仲獲獎無數!食落好彈牙,海藻粒粒令麵條口感非常豐富,質感煙韌,感覺極之獨特!一定要試試! 用嚟蘸冷麵嘅醬汁係鏗魚上湯加日本醬汁,清新淡雅而富有魚香。 日本溫泉蛋(HKD20)。 嚟自日本福岡農場嘅雞蛋,蛋白比較厚實,蛋黃較為紅潤,食落完全唔腥,味道純厚。順帶一提,宏出品嘅所有甜品都係用呢一種雞蛋,質素來自細節。 嚟到宏,梗係要食甜品!各位抹茶控一定要試試抹茶窩夫(HKD68),香濃嘅抹茶味食落每一啖都好似飲緊清香嘅抹茶咁,唔會太甜亦唔會覺得苦澀。窩夫唔係厚粉漿一舊舊,反而有種輕柔,做到外脆內軟嘅效果。配上日本抹茶雪糕、栗子蓉同抹茶曲奇,更加可以試到多種滋味,任你配搭! 宏 Hiroshi 地址:尖沙咀彌敦道100號The ONE 5樓502室 電話:2737 2665 營業時間:星期一至六:12:00-23:00 星期日:12:00-22:30

0

【宇治抹茶控 必掃!】如水亭

早前已經詳細介紹過K11 Market Place by Jasons超市入面嘅如水亭,仲搞過一輪抽獎活動俾大家試食,反應超級熱烈!想重溫或者未睇過可以去返呢條link http://wp.me/p7r3va-vx今次再返去如水亭,因為收到風有新野出。一於同各位抹茶控講下必掃產品!大部份都係日本京都直送用100%宇治丸久小山園抹茶粉製成。 必試1. 新出宇治抹茶忌廉卷店員同我講一推出就賣得非常好,要急急腳返貨去滿足大家需求!蛋糕鬆軟,忌廉滑身,配合埋個紅豆蓉甜甜地,下午茶嘆返個一流呀!(HKD28) 必試2. 宇治抹茶芝士蛋糕呢個就係上次TFFF玩抽獎,大家都為佢瘋狂嘅雙層芝士蛋糕!口感軟綿滑溜,有料到嫁。(HKD28) 必試3. 宇治抹茶心型大判燒抹茶味一直都有,但最近改良左新餡漿,抹茶味更出更好食!不得不提新出咖啡味都記住要試啊,好濃味。(HKD38/10粒) 必試4. 宇治抹茶厥餅 怕肥首選!由海藻糖製成嘅厥餅,卡路里好低,煙煙韌韌過下抹茶癮真西唔錯。(HKD49) 必試5. 宇治抹茶豆蓉薄餅卷 薄餅皮有濃郁抹茶味,中間個餡係豆蓉,唔係好甜。自己一個自私食都幾飽,建議同人一齊分享!(HKD29) 如水亭 河內道18號K11購物藝術館B1層B111-B121號舖 星期一至星期日:10:00-20:00

1

【日本新鮮直送】如水亭

本來一心去K11個Market Place買D野,無意之中發現超市中間有個專櫃叫「如水亭」,有多款日本甜點樣樣都鬼咁吸引。一問之下發現所有產品包括大福,芝士蛋糕,同埋近期大熱嘅厥餅都係日本新鮮直送。又有迷你心心大判燒即場整,熱熱辣辣出爐,包保好食! 大福四款不同口味,想食大大粒或者一串三粒開心share又得! 日式傳統厥餅近年開始喺香港興起,上網查下先知原來厥餅做法必須將厥菜嘅根挖出黎曬乾再磨成蕨粉,之後再加水同糖做成。因爲做法好繁複,所以日本古代淨係皇室同富貴人家先有得食!如水亭厥餅由海藻糖製成,更加健康,食多D都唔怕肥啦! 厥餅有三種味道,抹茶,黑糖同黃豆粉,$49一大盒,口感煙煙韌韌,食落毫無罪惡感,唔經唔覺就食晒成盒! 心心形一口大判燒$38/10粒,男士買黎氹女朋友氹媽媽開心簡直一流啦!店員仲好細心提點,返到屋企放入微波爐叮10秒更加好食。5款味道:芝士,焦糖,抹茶,奶黃,士多啤梨。 如水亭所有抹茶甜品點都係採用100%宇治丸久小山園抹茶粉,真材實料,絕對無苦澀味。 如果想試下先決定買唔買都得架,店員好熱心推介,成粒送俾你試,好難抗拒誘惑! 另外凍櫃入面有3款芝士蛋糕,全部都係急凍,拎到返屋企開出黎食就啱啱好喇!依家市面閒閒地都三四十蚊件餅,$28食到件好味又質素高嘅芝士蛋糕,非常不錯。 解凍之後食,口感軟綿滑溜,分量剛剛好,唔會好膩! 如水亭 河內道18號K11購物藝術館B1層B111-B121號舖 星期一至星期日:10:00-20:00