Tagged: 小店

0

【人氣流心牛角包$88套餐 冬季新推松露VS肉桂蘋果】Fast Gourmet

中環嘅Fast Gourmet以流心牛角包做賣點,吸引咗好多人去呃like,不過食埋其他食物計埋條數都唔平㗎!依家小店推出貼心優惠價,可以一次過食到牛角包、甜品同飲品,平日套餐價只係HKD88。咪以為只係一間輕食咖啡店,仲有慢煮黑毛豬腩食㗎!店內牆上掛咗個寫住“SOUSVIDE”嘅黑板,意思係「真空低溫烹調法」,因為老闆娘想以呢個烹調方法,提供健康飲食俾大家。 咪睇門口細細,入面一啲都唔迫,行木色簡約風,感覺幾悠閒。 想一次試多啲招牌菜可以揀All day fun menu(平日:HKD88,週末:HKD138),套餐入面有齊牛角包、甜品同特色飲品。小編今次試咗兩set,第一set係松露牛角包、白松露雪糕配凍乾草莓(需另加HKD25)配雜莓芝味特飲。 松露牛角包入面用松露汁整成嘅流心餡,未食已經聞到松露香氣,同脆口牛角好夾;雜莓芝味特飲好清新,奶蓋係偏淡口味,過吓口癮都ok。 白松露雪糕配凍乾草莓都一樣有香濃嘅松露味,衝擊嗅覺同味覺;旁邊嘅honeycomb同乾果令口感好加分,成個口感同味道夾到令小編一食就愛上,鍾意松露嘅朋友唔可以錯過呀! 第二個套餐係肉桂蘋果流心牛角包、慢煮法式焦糖燉蛋配富士山下。肉桂蘋果流心牛角包嘅肉桂味比蘋果味突出,外脆內爆汁嘅效果吸引好多食客嚟打卡㗎! 慢煮法式焦糖燉蛋(左)比平時食嘅焦糖燉蛋滑,蛋味都更香濃。富士山下(右)用咗活性炭著色,底層係 Double Shot Espresso,中間係幼滑牛奶,面層就用純奶打成嘅奶泡。想一次過感受三層唔同口感?大大啖飲啦!由綿密到實在,由微甜到甘苦,層次感突出。 除咗包都有肉食,4安士真空慢煮西班牙黑毛豬腩(HKD148)慢煮48個鐘之後,沾上藜麥同麵包糠一齊焗,肉質鬆軟彈牙,好腍易咬。配埋南瓜蓉同白酒燉蘋果醬,一齊食會有陣果香味添!面頭白色一條條嘅炸芋絲好香口,成個菜式口感層次好豐富。   Fast Gourmet 地址:中環善慶街9號地舖 電話:2725 6000 營業時間:星期一至五:11:00-21:30,星期六至日及公眾假期:09:30-21:30,公眾假期前夕:11:00-21:00

0

【90後創業涼茶舖x台飲店 茶葉蛋+芋圓豆花雙冠軍】津生堂

最近見到旺角金雞廣場隔離開咗間新嘢喎,睇招牌以為係中式涼茶舖,望真啲原來除咗賣涼茶之外,仲有賣芋圓豆花同台式飲品,連大熱嘅黑糖珍奶都有喎! 旺角涼茶舖來來去去嗰幾間,小編間唔中都會去飲返杯清吓熱氣嘅。點解揀喺旺角賣涼茶又賣埋台式飲品呢?老闆李先生話自己本身有做開涼茶,開頭諗住涼茶crossover台式飲品,後來覺得可以試吓做埋甜品,就膽粗粗試吓。 涼茶舖通常賣埋茶葉蛋,津生堂都唔例外!老闆仲話佢哋嘅茶葉蛋(HKD6/隻)非常受歡迎,唔少客人一買就買十粒八粒走,試過有客人一口氣買走40粒添!差啲清晒貨咁滯呀!咁受歡迎當然有理由啦,原來啲蛋係由老闆嘅媽媽每朝用足料嘅茶葉、醬油、花椒同八角等香料去烹煮,一煮就要煮足幾個鐘,但又唔可以一次過煲太耐喎,煲太耐蛋就會老,但煲太短時間又會唔夠入味,所以對於烹煮時間嘅控制非常重要㗎!每隻蛋都係十足心機、血汗,唔怪得街坊咁捧場啦! 一搣開就聞到花椒八角嘅香味,望落滑捋捋咁,咬落入味非常。蛋白入味得嚟一啲唔老,估唔到連蛋黃都入晒味,6蚊一隻值回票價。6蚊其實偏貴少少,但堪稱係我食過最好食嘅茶葉蛋之一,忍唔住俾10隻手指公呀! 除咗茶葉蛋每日新鮮製作,豆花亦係每日新鮮撞㗎!自家製豆花又香又滑,豆味十足!招牌豆花芋圓(HKD25)連球雪糕都係自家廠房製造,出面食唔到㗎!芋圓大大粒勁彈牙,QQ感十足。芋泥亦係自家手製,夾埋豆花一齊食香滑又鮮甜,連糖漿都唔使落呀!25蚊碗大大兜,食完覺得自己好似食咗成碗飯咁,每款材料都勁多,作為飯後甜品2個人share都得呀! 唔止賣涼茶,連台式飲品同甜品都撈埋,認真緊貼潮流喎。老闆話始終旺角地區係遊客集中地,唔似屋邨涼茶舖會有班人固定嚟飲涼茶,所以就一於提供埋年輕化啲選擇俾客人,傳統同創新並行,OK喎!黑糖珍珠奶茶(HKD19)用咗港式奶茶底,再加黑糖珍珠,飲落充滿港台風味。珍珠每日新鮮熬煮,味道幾香濃㗎! 身為90後嘅李先生本身有份正職,依家仲要兼顧埋舖頭,咁辛苦為咩呢?「個女啱啱出世,趁仲後生咪搏吓囉,依家唔搏唔通40、50歲先嚟搏咩?到時就唔敢㗎喇!」都係嘅,趁有能力跳出comfort zone當然要試吓啦!小編覺得佢哋嘅甜品喺旺角嚟講真係算超平,大家行過記住支持吓喇! 津生堂 地址:旺角洗衣街57-59號金雞廣場地下8號舖 電話:6774 2265 營業時間:不定    

0

【搲200隻雞翼甩底事件 科大生道完歉再惹風波】食焦

又發生大學生訂咗食物臨時取消事件喇,仲要呢單風波愈搞愈大添喎,幾日嚟喺網上都有新發展囉!今次出事嘅係科大生,搞迎新營想搵人贊助食物,於是搲咗一間西貢賣炸髀嘅小店,要人200百隻雞翼……事情嘅發展都係預咗衰嘢喇,一句sorry同cancel就冇晒影啦! 咁又係一如所料,小店老闆梗係放上網呻啦,老闆話明唔係為咗要公審班學生,而係想佢哋反省吓連對人嘅尊重都無,咁樣點得㗎!呢個po一出就群情洶湧,真心又好假意又好,班學生都即刻做嘢,又係去小店度當面謝罪耍冧啦! 咁呢個道歉,小店老闆都收晒貨,又開多個po出嚟話希望件事告一段落,佢話班學生真係好有誠意咁道歉,老闆希望大家唔好再追擊佢哋喇!以為暫時平息咗呢個風波啦,點知又有新發展,忽然喺網上瘋傳咗一大段留言,有人幫班學生出頭,反鬧間小店,最惹眾怒嘅一句,就係話「你贊助我就一定要」,再度搞返㷫件事,其他網民大鬧呢個留意者,仲話佢係班科大生嘅分身! 其實大學生嘥嘢不時有發生,(重溫相關新聞:https://goo.gl/HTvfbs ),不過通常情況係道歉了事就完咗,估唔到今次一波未平一波又起啫!呢次雞翼事件繼續發酵,科大仔見到有人咁樣留言鬧小店,亦都即刻劃清界線,涉事嘅學生會「冰川」就聲稱留言嘅人唔係佢哋學生會嘅人,與「冰川」冇關,不過就承認咗係另一個Hall嘅科大生!

0

【$23嫩滑手撕雞撈麵 親民小店回頭率高】平霸

平霸線眼夠多,好多時都有唔少餓底介紹啲平靚正美食。好似聚興樓咁,就係餓底線人報料俾平霸喇! 呢間街坊小店係手撕雞專門店,最受歡迎就係手撕雞飯/撈麵,價錢貼地又親民,仲係唔少街坊嘅加餸飯堂嚟㗎! 手撕雞撈麵(HKD23),有原味同麻辣汁兩種口味,店員會先問你要唔要點麻辣汁,今次小編就叫咗原味喇!見店員當場喺手撕雞面灑上芝麻,食落除咗有雞味,仲好有芝麻香喎! 個人覺得如果齋食手撕雞料嘅話,感覺會偏鹹咗少少,不過勝在雞皮夠爽、雞肉又嫩滑,配埋撈麵食就鹹度啱啱好,可以中和返! 瑞士汁雞髀飯(HKD23),浸到入晒味嘅瑞士汁雞髀,咬開肉汁爆發,雞肉醃得都非常入味,瑞士汁入口甜而不苦,撈汁送飯真係超級開胃!除咗雞髀大大隻,飯嘅分量一樣勁,男士食都夠飽呀!瑞士汁仲好多,唔會食到最後得返白飯乾爭爭呢,抵讚! 平霸小評:小店雖然以外賣為主,不過生意一樣咁好!好多食客都會外賣份手撕雞返屋企加餸,諗唔到食咩嗰陣,落街買個手撕雞撈麵又平又方便,小編呢次好滿意呀! 聚興樓 地址:藍田安田街23號平田商場地下G04號舖 營業時間:星期一至星期日:10:00-20:00 《平霸》平食四方,歡迎各界報料。

0

【叫32杯外賣臨送到先叫停 政府合署員工玩殘小店】食焦

叫咗外賣再取消已經唔多好,仲要唔係自己打去交代,要人哋差唔多送到嗰陣先話唔要喎,麻煩到人之餘仲做埋大嘥鬼,玩食物呀!叫杯檸茶仔就話啫,叫咗成32杯嘢飲喎,條數點計?有網友喺盡在元朗專頁度出po,直指政府合署8樓嘅職員X先生,寫埋佢電話號碼出嚟(頭4個字啫),「多謝你柯打!你的一句要收工無人啦!浪費了小店32杯飲品!」。 係咁嘅,茶飲小店收到呢位政府合署8樓(估計係元朗政府合署8樓地政署啦)阿X先生嘅外賣電話,點咗32杯飲品,嗰陣係三點九(正確係15:41),32杯嘢飲入面有15杯係要攪拌機整嘅,「以最快速度4點7、8到(度)我已經出發去截的士!16:48的士在途中打俾佢,佢話要收工啦,冇人飲吾(唔)要啦!」 網友仲出示埋水蛇春咁長嘅單,32杯嘢飲俾人以趕收工為由忽然話唔要,除咗浪費咗32杯飲品之餘,亦令到小店冇咗呢張成七百幾蚊嘅外賣單囉!出咗po,其他網友嘅反應都好兩極,有人話要投訴嗰位政府合署職員,整好晒先嚟話唔要order都要佢俾返一半錢啦起碼;有人就話由落order時間直到送去要成個鐘梗係唔等啦,有冇講清楚要整幾耐、幾點先送到呢?重點係,政府員工真係好趕收工喎! 雖然呢個po好快已經刪咗,但已經俾唔少網友轉載到唔同群組喇,而出po嘅事主就答覆咗傳媒,話多謝大家關心,仲話公道自在人心,都係唔講咁多咁話喇!而有網友就憑杯認店,話認得出係元朗嘅鼎鼎茶喎,仲話平時真係得1、2個員工喺舖頭,要整32杯嘢飲真係需要時間,又話要去幫襯返支持吓喎!

0

【元朗韓食店列三不准 阿朱媽老闆霸氣得個樣】食焦

國有國法、家有家規,咁食店又如何?有時一樣規矩多多㗎!最近就有網民喺食在元朗群組度po咗張「三不准」嘅相,寫明不准玩電話、不准食剩同埋不准未齊人入座。原来係出自元朗一間韓食小店嘅告示!其實呢間韓食店一向規矩多多,「阿朱媽」老闆娘仲成日俾人話惡聲惡氣添,不過知佢性格嘅街坊都話,其實「阿朱媽」得個樣! 所謂old news is so exciting,耐唔時就有網友開心大發現呢間名叫韓之美食嘅霸氣規矩,呢次出帖,依然引嚟好大迴響!有人認為唔准未齊人入座好合理吖,唔俾食剩都啱喎,但講到話唔准玩電話咯喎,對依家個個都要相機食先嘅香港人,真係好難接受到喇! 不過咁,被樓主稱爲「可能係全元朗最有性格嘅食店」嘅呢間韓之美食,原来都有唔少粉絲㗎!有網友話「阿朱媽」呢啲規矩已經好多年,最主要係唔想食客浪費食物,同埋真係可以好好咁享受一餐韓食,唔好淨係掛住玩電話啫!仲搞笑咁話有時試過俾「阿朱媽」作狀咁樣一嘢打落嚟個頭度添! 其實幾年前「阿朱媽」老闆娘已經因為呢條「三不准」喺網上爆紅,當時仲有傳媒去採訪過添!老闆娘話好多小朋友都已經冇嘢食,所以佢最唔主張食剩飯餸嘅,加上佢間舖啲韓食嘅分量唔算多,如果咁都要食剩就真係浪費食物咁話!睇嚟「阿朱媽」真係得個樣靠嚇,好似網友咁講係「唔識佢就嚇死、識佢就笑死!」 規矩多多會唔會少咗客?唔敢講!但係有網友就發現食店嘅價錢係呢幾年間都加咗唔少喎,就喺「三不准」告示下面就見到,炸醬麵要60蚊一碗囉!所以網友就話未必係規矩咁多搞到唔敢去,反而係個價錢囉!一日都係舖租累事呀!

0

【大學學會訂咗嘢食「失蹤」 小店老闆:要有交帶!】食焦

不要浪費食物!做人仲要有交帶同責任心㗎!話說公開大學學會同一間喺何文田嘅小店訂咗盒130蚊嘅煎炸嘢食,有炸餃子、春卷同咖喱角嘅大拼盤,約好晒會五點半去攞,結果到八點收舖都唔見人,小店老闆又電話又WhatsApp都冇回音!於是老闆只好將盒嘢食放咗喺舖頭旁邊嘅小枱度喇! 小店老闆將呢件事po咗上網,話「到8:00收舖都唔來?連一個電話也沒有?第三世界上真係有好多人是正在饑荒……你哋都130蚊都俾左啦!點解你唔來?對你無著數,真係講多次非常浪費……」 第二朝學生會先WhatsApp老闆道歉,話原来係因為尋晚有就職典禮好忙,又冇帶到電話,所以先完全冇回音囉!到咗凌晨兩點先醒起唔記得叫人去拎嘢食喎!「我們已立即到貴餐廳領回食物……避免浪費食物……亦不想浪費貴餐廳心血……」仲話已經將盒嘢食食晒咁話! 網友點睇?有人話學生唔啱又話埋依家啲九十後梗係唔掂、有人就覺得既然都俾咗錢唔記得去拎啫,咁樣公審唔係咁好囉!老闆點睇?有來有往,人哋都道咗謙,老闆都公開咁話「我只係要有交帶!該學會已有回覆,亦講凌晨兩點找人來拎去食晒,我由始至終主要係有交帶!人要有承擔!責任!不浪費!」 文字上道咗謙都未夠,原来為表誠意仲當面賠罪添!老闆再po文講返「今日整個學生會主要成員一起來道歉,這種共同進退!共同承擔責任!呢點真係唔係人人做到……」老闆啖氣落晒,班學生又唔使俾網友再話廢青冇責任心,總算大和解,應該食返多盤炸嘢慶祝吓啦!

0

【觀塘台式小店多負評 小編試伏老闆娘解話】伏務台

近日小編喺ig同一啲食評網站度,都見到有間觀塘新開嘅台式小店團團圓圓嘅負評,大致上都係話肉燥飯啲味道淡到冇調味咁、拌麵選材不當等等。一間開咗冇耐嘅食店,竟然俾唔少食客咁樣批評,呢陣伏味睇嚟唔少喎!小編當然要親身試伏,睇吓啲負評係真唔係先? 食店位置絕對唔算就腳,應該都係做附近街坊同學生生意多。服務方面小編覺得OK嘅,閒日中午時間人流唔算多,一坐低就有人招呼,仲幾有禮貌添。點完菜之後小編環顧舖頭,空間唔算大,但坐得尚算舒服。人手唔算多,只有老闆娘同埋似啱啱放學嘅囡囡幫手落吓單上吓菜咁。首先上枱嘅係肉燥拌麵(HKD30),小編叫咗碗細嘅。望落分量同台灣食嘅細碗滷肉飯差唔多size,賣相係唔錯嘅。將麵拌開之後小編發現原來呢度用嘅係刀削麵,不過啲麵就淋到夾唔起,麵質亦的確如網上食評所言-完全唔彈牙甚至太淋坺坺,的確伏。不過對於肉燥太淡味呢樣嘢,小編嘅感受完全相反,係好,鹹,呀!唔通鹹淡係睇廚師心情? 另外小編仲嗌咗香港好少餐廳有嘅煎蛋餅(HKD25),去台灣好多時都會早起身去早餐店食㗎,咁到底嚟到香港嘅蛋餅又變成點呢?蛋餅賣相唔錯,影兩幅相交差之後小編就開動喇!皮有少少乾同硬,不過有饀料嘅部分都算正常,不過比真正台灣蛋餅厚身同咬落實淨啲,唔可以話難食,只係唔算正宗,係港式蛋餅囉。 食完正餐係時候食甜品喇!叫得團團圓圓,芋圓都有啲水準啩?不過有劣評可鑑,小編唔敢抱咁大期望,戰戰兢兢咁點咗個黑糖薑母茶圓圓(HKD18)。隔咗一陣熱辣辣嘅芋圓就送上喇,分量就真係好小,只有大概一碗燉奶嘅size,不過就真係好「夠薑」,飲咗兩啖已經感覺到好暖胃,略嫌有啲太辣,唔係個個啱胃口。再試吓成為「眾矢之的」嘅芋圓喇,的確佢呢度嘅芋圓係冇出面一般好QQ好彈牙好煙韌嘅口感,佢嘅質感比較軟糯。如果想食到QQ芋圓嘅心情的確係會覺得中伏嘅,不過平心而論,佢嘅芋圓都食得出一種手工味。 食完之後小編同老闆娘吹咗幾句水,唔肯出鏡嘅老闆就娘,原来話佢都有睇到網上嘅劣評,見到好多人話啲肉燥淡,所以就加返重啲個味道……不過小編就話返俾佢知,依家反而變咗係太鹹囉!老闆娘就笑笑口話冇辦法啦,會一直再調整吓個味道,希望大家俾啲時間咁話喎!至於芋圓方面,老闆娘話將來會試吓用澳洲紫薯做,希望個口感同味道會更出。睇嚟老闆娘真係要俾啲心機改良吓喇,希望佢盡快可以一脫伏名啦! 小編伏氣:除咗個肉燥拌麵小編覺得味道真伏外,其餘就係個價錢都少少伏啦,身為街坊店30蚊一碗超細拌麵實在略嫌貴,仲要唔夠十啖就食晒喇;另外蛋餅收25蚊亦完全唔夠飽,正常大人應該起碼要叫一碗細飯/麵,再加個蛋餅先夠,55蚊食個唔夠飽肚嘅小食喎……貴呀! 肉燥拌麵 入伏點:團團圓圓 入伏價:HKD30 煎蛋餅 入伏點:團團圓圓 入伏價:HKD25 黑糖薑母茶圓圓 入伏點:團團圓圓 入伏價:HKD18 中伏by #肥仔文 美術by #cheeran 攝影by #肥仔文 《伏務台》星期一伏務大眾,歡迎各界報料。

0

【26蚊任食全包宴 真.良心小店情味濃】平霸

今次平霸搵到呢間喺新蒲崗熟食中心入面嘅順豐良心飯店,有咩咁平咁吸引?就係26蚊有飯有餸有湯同埋甜品,重點係,任食呀!叫得做良心飯店,真係冇改錯名喎!老闆娘真係佛心來的!  話說小編當日一早去到,老闆娘啲菜式仲未出齊,不過已經好多選擇喇,全部都好新鮮!菜式有魚有肉又有菜,咁多款,實有一款啱你食。記住係要俾咗錢先,之後先可以自己拎碟去裝餸、拎碗去裝飯同湯,小編嗰日仲有埋甜品添!嗱嗱嗱,大家記住唔好因為任食就係咁攞呀,食得晒先好拎,唔好做大嘥鬼呀! 小編個日食咗唔少餸㗎,樣樣都試少少,好老實講冇一樣係難食喎,更難得係有種家嘅感覺,係媽媽嘅味道呀!小編食咗咕嚕肉、肉餅、炒時菜、豆腐同魚蛋等,26蚊任食抵到爛!佢啲湯仲要落足料,飲落又唔覺有味精,好好味。 除咗主食,嗰日咁啱老闆娘仲拎咗啲糕品出嚟,有芋頭糕同馬蹄糕,小編就鍾意食馬蹄糕多啲,好動L又好清甜。至於芋頭糕?可能一向都唔係小編杯茶,不過有埋甜品食已經好滿足喇! 平霸小評:食完呢間順豐良心飯店,小編感到好有愛呀!話說小編嗰日去拍嘢,每當有餸菜新鮮出爐,老闆娘都第一時間走過嚟夾俾我食,態度勁好,超好人!同老闆娘傾多幾句,原來佢逢星期三同星期五,都會派成百幾盒飯盒俾街坊,真係良心飯店。平霸小編喺度真係要多謝老闆娘夾餸俾我,呢一個舉動,真係夠晒warm!依家良心小店愈來愈少,大家多啲支持咁有愛嘅老闆娘呀! 順豐良心飯店 地址:新蒲崗雙喜街8號彩虹道街市及熟食市場1樓CF14號 營業時間:星期一至五10:30-14:00(星期六、日休息) 《平霸》平食四方,歡迎各界報料。

0

【團年飯局食台菜 鹹蛋黃蝦煲超惹味】蝦棧

團年飯唔一定食盤菜嘅,好似呢間台式小店蝦棧咁,都係唔錯選擇!主打以蝦做主題,食到唔同嘅台灣菜式,台迷可以頂住癮先啦!老闆Alex對煮食好有熱誠,一直有個小小心願,希望可以煮嘢食俾朋友同客人食,想佢哋食得開心,每一款菜式,都係Alex用心煮出嚟㗎。  鹹蛋黃蝦煲(HKD208)呢味餸煮嘅時候已經超香,起碼落咗四、五隻鹹蛋,幾重口味!Alex仲話,想知啲蛋黃點樣入晒味落隻蝦度,只要蝦頭變咗白色,就代表已經入晒味。就咁食,鹹香味超夠!好食到小編忍唔住連殼都食埋,一啲都唔誇張呀!而且蝦肉新鮮又彈牙,即叫即撈即煮,包你一試難忘! 黑麻油雞(HKD168)比較少見,不過為咗符合返香港人口味,已經減少咗米酒嘅分量。 台灣人通常都係連米粉食,飲完湯先再食雞。其實黑麻油就好似我哋香港嘅薑醋咁,飲完個湯會幫助到血氣運行,所以好啱女士飲,夠晒滋補吖嘛。 滋補四神湯(HKD128)台灣好多地方都會有呢個湯,出晒名好飲。 Alex見香港冇乜地方有,就將佢帶咗嚟香港喇。咁啱最近天氣又凍,飲完四神湯個身就會暖笠笠,而且藥材味好濃郁,最啱小編呢啲湯怪。入面嘅材料都好足,豬肚煲到淋晒超入味,正到爆呀! 火焰雪山焗鮮魚(HKD128) 個火焰除咗係視覺效果之餘,原來啲火仲可以令啲酒香滲入條魚度,令到香味散發,食落比平時食開嘅烤魚更香更鮮。 樹子冰菜(HKD98)又係比較少見嘅菜式,將冰菜熱炒,所以出到嚟個口感比較特別,菜葉好嫩、菜莖又爽,而且超夠味,唔鍾意食菜嘅小編都忍唔住食咗半碟咁滯! 醉雞卷(HKD88) 用咗慢煮方式,鎖住啲肉汁,啲雞浸到入晒味,而且切開入面仲好鮮嫩,一啲都唔嚡口㗎。 飲品方面,當然唔少得台式飲品啦!珍珠奶茶(HKD38)飲落唔會好死甜,同埋珍珠嘅質感好特別;而薄荷柚子梳打(HKD38)就好啱小編口味喇!梳打味好重,配埋柚子又有少少酸酸哋,飲落好爽喎! 蝦棧 地址:太子花園街233-235號偉雄大廈地下A舖 電話:2827 7728 營業時間:星期一至日:12:00-22:30