Tagged: #小炒

0

【泰式半自助午餐任食沙律吧 主菜首選$88足料船麵】象屋泰國餐廳

要食得抵又多選擇?旺角象屋泰國餐廳嘅泰式半自助午餐一定啱你,自選泰式主菜(HKD88起)有9款,船麵、燒豬頸肉飯、肉眼扒等等都好受歡迎;仲包埋任食嘅鹹甜點泰式沙律吧,即刻睇吓有幾正啦! 餐廳環境都充滿泰式感覺,12:30左右就開始有食客嚟喇。 如果食半自助午餐,可以喺9款主菜之中揀1款,仲可以任食沙律吧長枱上約15款食物,有泰式木瓜大蝦沙律、椰汁糕、春卷、咖喱角等等。如果淨食沙律吧(HKD79)都可以,同半自助午餐一樣會跟杯茶或咖啡。 食得泰國菜梗係有牛肉船麵(HKD88),亦係9款主菜之中最抵嘅。牛腩同牛丸分量幾多,煮得好入味。湯底香濃唔會太鹹,麵仲好似粉絲咁嗦晒湯汁添。 如果想食炒麵,泰式雞肉金邊炒(HKD93)唔會炒到乾晒,幾香口惹味,唧埋青檸汁就更加濕潤易入口。雞肉大大粒但依然嫩滑,肉量都唔少添。 如果你鍾意食牛扒,不妨試吓少有嘅美國肉眼扒配薯菜及羅望子汁(HKD148)。肉眼扒烤焗後淋上酸甜惹味嘅羅望子汁,食晒都唔覺膩。加上炒到啱啱熟嘅椰菜仔,爽口得嚟幾fresh㗎。 如果食唔到午餐,呢度嘅晚市小炒、甜品同下午茶都一樣吸引。好似呢款辣椒膏炒大蜆(HKD148),肉質嫩滑彈牙冇咩沙,辣度適中惹味唔會蓋過蜆嘅鮮味。 不過香芒黑白糯米飯(HKD88)始終係泰式甜品首選,餐廳特別用透明外殼裝起大量椰絲同香甜多汁嘅芒果肉,打開外殼就會灑落黑白配嘅糯米飯,味道同打卡都係一流呀! 而星期六、日15:30-17:30新推嘅周末二人專享下午茶餐(HKD158)都同樣抵食。 兩碗椰香十足嘅青咖喱雞飯配上脆炸櫻花蝦、素春卷、蝦餅、一口芒果糯米飯、香甜嘅斑蘭撻同榴蓮味濃郁嘅榴蓮撻6款鹹甜小食;加上兩杯咖啡或茶,啱晒鍾意香口食物嘅你,食晒都飽肚㗎。   象屋泰國餐廳 地址:旺角太子道西193號MOKO新世紀廣場4樓453號舖 電話:2386 6882 營業時間:星期一至日:11:00-22:00

0

【聰嫂煮素菜一樣好手藝 鑊氣小炒惹味到流口水】素學堂

聰嫂最出名係糖水甜品,但原來聰嫂本人食咗廿幾年齋,直到兩年前搵到人睇實糖水舖,終於可以抽身喺北角開聰嫂.原素,一圓開齋舖嘅心願。餐廳走親民路線,平均幾十蚊一碟小菜。煮法方面忠於食材原味,啱晒追求健康嘅素客。最重要係聰嫂煮小菜嘅廚藝高超,未開糖水舖前已喺香港電台主理員工飯堂,一味「劉華雞翼」係廣播道名物。 小編食咗咁多年茄子,第一次食茄子發現新嘅口感喎!椒鹽脆茄子(HKD61)竟然做到外脆!內軟!茄子炸到金黃後灑上椒鹽,鹹鹹哋好香口。 椒鹽素鮮魷(HKD63)用菇同豆類仿製,造型好似平時食鮮魷咁?花,真係見微知著呀!口感同真嘅似到十足十,仲好Q彈添,有啲似魚蛋。雖然冇魷魚嘅鮮味,但陣陣菇香都好正。 蕃茄芝士素豬扒焗飯(HKD50)像真度幾高,不過只喺午市供應,蛋炒飯底好香,焗完都仲濕潤唔乾㗎!蕃茄切粒增加口感之餘,亦令味道更鮮甜。面頭濃郁嘅芝士好夠味,拉絲效果都好得!素豬扒係炸過嘅麵筋,質感幾厚實,仲有陣豆香,亦比真豬扒少咗種飽滯感。 芝士芥末素吉列豬扒漢堡配薯條(HKD45)係下午茶之選,特別在自家調製嘅芥末沙律醬,第一啖有少少攻鼻,跟住會散發出奶香,幼滑嘅口感好正;夾埋芝士同脆口素豬扒漢堡一啲都唔乾。 跟住要介紹嘅菜式新到連餐牌都印唔切㗎!聰嫂間唔中就設計新菜式,所以有時趕唔切更新menu,想食新嘢最好問清楚店員呀!呢兩個煲仔菜都係11:30後供應,黑松露九層塔什菌豆腐煲(HKD68)落咗金不換好夾,令成個餸香氣up up up!豆腐片完全吸晒超濃嘅黑松露醬汁,一咬成口充滿黑松露香氣,啱晒重口味朋友。 泰式香茅蕃茄草菇煲(HKD68)落重香茅同金不換,原來香茅有排毒、幫助消化同降低膽固醇功效,又幾健康喎!豆腐、甜椒、草菇同椰菜花等蔬菜令湯底更清甜。豆卜一咬就爆汁,完全係點睛嘅配菜呀!   聰嫂.原素 地址:北角英皇道康威大廈地下03號舖 電話:2877 9411 營業時間:星期一至日:09:00-22:00

0

【7大茶記小菜王 咕嚕肉鈉含量最低!】懶健康貼士

去茶記食小菜可以話係香港飲食文化之一,就算幾多新花款都好,總有啲菜色係必點系列,不過邊樣高鈉啲你又知唔知呢?平時坐Office又少運動的話又可以攝取幾多鈉呢?睇吓呢張圖啦: 小菜王鈉含量排行榜 第7位:菠蘿咕嚕肉 每100克鈉含量約240毫克,雖然未到低鈉水平,但係呢個菜色本身味道偏酸甜,反而要留意食太多會變咗食高糖食物。 第6位:中式牛柳 每100克鈉含量約340毫克,同樣都係味道偏酸甜,而呢款菜算多汁,小心沾咗太多醬汁撈飯,唔覺意就攝取得多鈉㗎喇。 第5位:魚香茄子煲 每100克鈉含量約370毫克,數字上好似同中式牛柳差唔多,但愈高排名嘅菜色,味道開始轉向重口味。有啲餐廳整魚香茄子煲真係幾鹹吓,加上茄子好吸油,都係少食多滋味。 第4位:蝦仁炒蛋 每100克鈉含量約440毫克,一直以為呢款菜色清淡啲,但蝦同蛋本身冇咩味,所以餐廳會落多啲調味料先令食客覺得滋味囉。 第3位:欖菜肉鬆四季豆 每100克鈉含量約450毫克,欖菜本身偏鹹,加上多油炒爆炒會令四季豆色水靚啲,口感爽啲,所以都會令鈉同油偏高。好彩四季豆熱量較低,可以平衡返啲。 第2位:粟米魚塊 每100克鈉含量約460毫克,雖然數字同欖菜肉鬆四季豆、蝦仁炒蛋差唔多,但超級多人都鍾意食粟米魚塊嘅時候用汁撈飯,近乎清晒汁,食得多真係堅出事。 第1位:鹹蛋蒸肉餅 每100克鈉含量約530毫克,非常接近高鈉水平。唔好話茶記,喺屋企煮都食唔少。100克鹹鴨蛋嘅鈉含量可以高達1632毫克,如果餐廳真係俾足料,呢個餸一定唔只530毫克喇。