Tagged: 小籠包

0

【深水埗「素」街食好西 榴槤飛餅+新豬肉咖喱小籠包】素學堂

唔使去淘寶,今次要去深水埗!事關小編要帶各位素人去食小籠包呀!喺深水埗有兩間有得食素嘅小籠包店都大受好評,分別係誠記小籠包拉麵同上海生煎皇,唔講咁多,梗係試咗小籠包有幾素先啦! 首先去到喺西九對面嘅誠記小籠包拉麵,小店由父子檔拍住上,鎮店小籠包、生煎包同芋圓等等,都用新鮮食材全人手製作㗎,難怪深受街坊歡迎啦!兩個月前仲推出咗素食小籠包,啱晒素人胃口呀! 素食小籠包(HKD57/六隻)即叫即蒸熱辣辣,小籠包嘅皮都算薄,蒸嘅時間啱啱好,唔會太腍又唔會一夾就拮穿。有成8種餡料咁豐富㗎,有素雞、木耳、椰菜、冬菇、烤麩、松茸菇、紅蘿蔔同粟米,食落口感豐富同好清甜,雖然冇乜爆汁效果,不過清清哋都好滿足呀! 另外小編仲試咗榴槤飛餅(HKD48)同芋圓鮮椰露(HKD27),如果你係榴槤控就唔好錯過喇!榴槤夠香甜、飛餅亦煎到脆卜卜,不過榴槤餡就唔算厚,但都好夠味;芋圓鮮椰露就有芋圓、南瓜圓、地瓜圓、小丸子同西米,啖啖椰香廿七蚊碗都唔錯㗎! 誠記小籠包拉麵 地址:深水埗欽洲街58號米蘭軒地下 電話:2388 3538 營業時間:星期日至四:11:00 – 23:30,星期五至六:11:00-00:30   食完誠記,之後去到大家應該都唔陌生嘅正宗上海生煎皇啦!喺香港總共有4間分店,老闆係娛圈中人,大家叫佢做生煎包王子、亦係江若琳老公Oscar蕭潤邦啦!半個月前舖頭推出日式咖喱薯仔新豬肉小籠包,唔係唔試呀? 日式咖喱薯仔新豬肉小籠包(HKD40/四隻),金黃色外皮都夠薄,第一啖已經食到咖喱味,由於用咗新豬肉(Omnipork)嘅關係,食落口感同一般小籠包好似,而汁就比誠記多啲。小編覺得咖喱味幾過癮又新奇,就算唔係素人都啱食㗎! 店內都有提供新豬肉素食套餐(HKD72),有一份主食、小食同飲品,素人可以直接揀啦! 小編今次就試咗四季豆新豬肉碎飯同芥末柚子粉皮,四季豆同新豬肉都幾夠鑊氣,小編冇諗過咁好味喎;芥末柚子粉皮就偏甜,芥末味唔算好出,不過勝在粉皮夠滑亦唔厚,一條條滑溜溜食落口好特別!   正宗上海生煎皇 地址:深水埗福榮街100號地下 電話:2723 7723 營業時間:星期一至日:11:30 – 23:30

0

【遊中環大館歎江南菜 麻辣小籠包燻乳鴿特色宴】奧卑利

中環大館開放俾公眾參觀以來,基本上成為咗打卡熱點,你去咗未先?除咗有古蹟有靚景,仲有好多特色餐廳㗎,好似呢間奧卑利,以江南菜為主,食材經過嚴格挑選,超過八成嘅蔬菜都係有機種植,等客人食得放心又健康。 另外,餐廳亦有素菜提供,無論食唔食素嘅朋友都可以品嚐到地道江南風味。 餐廳裝潢俾人一種好舒適嘅感覺,環境開揚,有唔少木系元素同植物,令用餐環境更有生氣。因為江南人好鍾意喺屋企設宴請朋友食飯,餐廳為咗配合返呢個飲食文化,希望客人有一種喺屋企食飯嘅感覺,唔需要太過拘束。 小籠包離不開原味/蟹粉?呢款麻辣小籠包(HKD98)又如何?外皮用紅菜頭汁製造,一睇呢隻顏色嘅小籠包就知與別不同啦。 麻辣底用咗四川花椒去製造,主要都係食佢陣麻香味,而且仲可以帶返肉嘅鮮味出嚟,食完一嚿會上癮呀! 小籠包入面嘅豬肉都非常講究,選用日本黑豚肉,味道會再濃啲同更加鮮甜,一啖放晒入口,啲湯汁爆晒出嚟,色香味俱全啦! 龍井茶王燻乳鴿(HKD188),一上枱茶香味已經撲鼻而來,睇見都流晒口水!唔止賣相,連味道都no.1!用米、糖同茶葉一齊去燻呢隻乳鴿,江南味道十足,令人一試難忘。 唔好以為上面嘅茶葉只係裝飾,其實係食得落肚㗎!茶葉經過油炸,食落嘅口感好似紫菜咁,香脆可口,入口充滿住濃厚嘅茶香味,都幾特別㗎! 主角乳鴿更加唔使講,外皮極之香脆,但肉質依然可以保持到嫩滑有肉汁,一啲都唔乾,每一啖都帶有茶香,好好食呀! 有機時菜炒麵皮(HKD148),呢款係素菜,亦係總廚黃師傅嘅家鄉菜。雖然材料同製作過程都好簡單,但係一樣令人回味。將麵皮加少少鹽然後煎香,連同菜一齊炒,冇加太多調味,主要都係食返本身蔬菜嘅甜味。簡單又好食,連唔鍾意食菜嘅小編都忍唔住食清光! 煙燻素鵝(HKD78)係江南好出名嘅前菜,當冷盤食。用腐皮捲住啲香菇、蘿蔔同雜菜,食落脆脆哋又好爽口。 入口幾重煙燻味,不過又唔會搶到菜嘅味道,作為前菜幾開胃! 除咗有晚餐,當然有下午茶啦,下午時分嚟到一樣可以歎杯茶食個cake。安吉白茶(HKD90),餐廳同Plantation茶莊合作,由茶莊提供茶葉。安吉白茶其實係綠茶,出名程度僅次於龍井,喺江南地區好受歡迎。至於點解會叫白茶?原因係茶葉沖出嚟嘅顏色非常透白,飲落清香淡雅,所以就有白茶稱號。較為特別嘅係,每款茶上面都會附上一張卡片,上面寫齊茶嘅出產地、採茶日期、採茶嘅海拔高度同氧化程度,介紹晒成個茶嘅背景同味道,好detail喎! 靚茶就同Plantation茶莊合作,蛋糕又點?餐廳就揀咗太平山街嘅文青茶館茶。家合作。紅棗起司蛋糕(HKD60)由茶。家提供,喺奧卑利先可以食到㗎!特別加入紅棗,令口感綿密又香濃,紅棗味道甜而不膩,口感層次豐富,好味! 奧卑利 地址:中環荷李活道10號(舊中區警署)大館賽馬會藝方2樓 電話:2877 8711 營業時間:星期一至六:12:00-23:00(星期日休息)

0

【OK新出芝士小籠包 好難食完全唔OK】伏務台

作為便利店忠粉嘅小編,一知道佢哋出咗新嘢當然要第一時間幫大家試吓味啦!今次OK便利店新出芝士小籠包(HKD10.5),未推出啲反應已經好極端,網民仲留晒言話:「放芝士入去簡直不知所謂!小籠包係食佢入面啖上湯,唔係食嚟做乜?」等小編即刻試,睇吓佢有幾伏啦! 一見到個包裝,小編咀都O埋,包裝細到一個點,連衫袋都放得落,可想而知佢有幾細!不過打開個包裝味道都幾出,係幾香㗎喎。 一盒入面有四粒,跟佢個指示,家用微波爐叮40秒就食得喇。 叮完之後都見到有啲肉汁出咗嚟,不過就細粒咗啲囉,仲細過隻細湯匙呀! 就咁睇其實係搵唔到芝士嘅存在,食到落口,真係難食到一個點!完全係怪味囉!小編好艱難先吞到佢落肚,勁勁勁難食呀!俾埋同事食,佢哋都覺得皮太厚又乾爭爭,唔講係芝士小籠包都唔知原來入面有芝士,淨係食到啲酸酸甜甜嘅味道;同埋一啲汁都冇,咁樣都叫係小籠包? 小編伏氣:其實唔止一次喺便利店中過伏,不過今次真係離譜咗啲喎!有時唔係咩都加芝士都會好食㗎,難聽啲都要講返句,叮叮真係愈出愈垃圾了,不如下次唔好搞熟食啦!對小籠包有陰影,還我多汁小籠包呀! 入伏點:OK便利店 入伏價:HKD10.5 中伏by #愛吃的旅人 美術by #Mui Mui 攝影by #大食積 《伏務台》星期一伏務大眾,歡迎各界報料。