Tagged: 小食

0

【快速自製邪惡掃街小食 氣炸煎釀三寶啖啖肉】氣炸師

疫情越爆越犀利,出去人多嘅地方都怕中招呀,仲點去掃街喎。氣炸師忽然好想食煎釀三寶,又睇吓喺屋企會唔會整到出面嘅味道啦!   氣炸煎釀三寶 材料與分量: 紅腸 – 半條 豆卜 – 4-5粒 茄子 – 一條 鯪魚肉 – 300g 生粉 – 2-3茶匙 做法: 1. 清洗乾淨食材,將紅腸同茄子切件,豆卜開半。 2. 將鯪魚肉同胡椒粉混合調味。 3. 將鯪魚肉釀喺茄子片、紅腸片同豆卜表面。 4. 用篩將生粉均勻灑喺三寶表面。 5. 用掃輕輕掃上油後先以180度炸10分鐘,之後轉200度再炸5分鐘。

0

【旺中小食店大大盒炸物$15三款 脆口惹味任加30種醬料】平霸

旺中出名多平嘢,今次平霸就帶大家去到一樓嘅美食立食區度尋寶,聽聞呢間365炸雞嘅小食性價比夠晒高,$15三款大大盒炸物,仲有成30種調味醬料任加?!想知質素如何就睇埋落去啦! 呢間小食店舖面細細,門面貼滿餐牌,有咩賣都一眼睇晒。 $15就有三款小食似乎幾抵食喎,梗係要試試佢啦!一睇個餐牌真係眼都花埋,炸物嘅選擇竟然有成三十種咁多,有選擇困難症嘅朋友真係唔知點揀好。 平霸最後揀咗炸雞粒、拉絲芝士條同啤酒薯條(HKD15/3款)。呢度啲小食都係即叫即炸,小編落單前未有人點嘢,等咗5分鐘左右就有得食。本來以為15蚊應該都會細份啲,點知竟然幾大盒喎,每款分量望落唔少之餘,拎上手仲熱辣辣添! 呢款拉絲芝士條真係拉到絲㗎!一咬落去就有外脆內軟嘅質感,入面嘅水牛芝士味道唔算好濃,但都幾香口。而啤酒薯條嘅炸漿同平時食開嘅唔同,個感覺有啲似食緊薯格咁,雖然冇咩啤酒味,但鹹香十足好惹味。 而炸雞粒分量唔少,都有成8、9粒,炸漿夠薄又煮得透心,成粒外至內都熱辣辣!加埋唔同嘅調味料就試到各種風味喇。 特別要介紹呢間小食店嘅一大特色,就係有成30幾種醬料嘅醬料架!客人可以依照自己嘅喜好自由加入唔同嘅調味醬料,西、日、韓、台等口味都有,好有新鮮感。除咗平時食開嘅醬料外,仲有比較偏門嘅調味料,好似麻辣小龍蝦、黃金鹹蛋黃、Pizza味等等。 除咗性價比極高嘅炸物之外,呢度嘅芝士撈麵都幾平喎。其中一款就係吉列芝心豬扒芝士撈麵(HKD18),俾吉列脆皮包住嘅豬扒肉質夠腍,仲有一層融化緊嘅芝士夾喺中間,雖然啲芝士冇一咬即流心嘅效果,但用兩款芝士mix埋嘅夾心都對得住佢個價錢有餘。而芝士撈麵就似放咗大量芝士粉落去,味道偏鹹,食晒成碗會有少少膩。另外,仲有海鮮芝士撈麵(HKD20)、什錦芝士撈麵(HKD18)同招牌炸雞中翼芝士撈麵(HKD18)俾你揀,如果芝士味唔啱你食,全部亦可以免費轉沙爹汁。如果肚仔餓,平平哋食佢嚟填肚都係唔錯嘅選擇。 舖頭不定期都會做買一送一優惠,今期就有三式燒賣(原價HKD15)。本身7粒一份嘅燒賣買一送一後有成14粒,唔買都對唔住自己啦。話明三式燒賣,裡面其實有黑松露豬肉燒賣、蝦肉燒賣同魚肉燒賣三款。燒賣嘅size比平時食開嘅細粒少少,但口感都幾彈牙,而且有三種口味食晒都唔會悶,其中黑松露豬肉燒賣就最好食。不過略嫌蒸得過熟,有啲燒賣皮同肉會分離。   365炸雞 地址:旺角彌敦道688號旺角中心一期一樓F88A 電話:6279 7023 營業時間:星期一至日:11:30-23:00

0

【荃灣$15平價飯窮人恩物 多料魚香茄子撈汁送飯】平霸

今次平霸去荃灣覓食!喺荃灣呢間大家姐小食店都算出名㗎,好多時平霸都會俾佢嘅小食吸引到,忍唔住手就買返兩串嚟食。呢次又點呢?竟然俾平霸留意到餐牌又有抵食平嘢,就係15蚊一碗嘅平價飯喎!係真唔係呀? 小食店主要賣煎釀三寶、串燒同雞蛋仔呢啲小食,餐牌上面都有一項「精選飯類」係全日供應嘅,最平只係15蚊一碗,不過就註明係「針量級」,即係細細碗啦!好,平霸點都要試吓,即刻嗌咗15蚊嘅魚香茄子飯同豉油皇雞翼飯各一碗。原來嗌嘅時候都有得揀Size,$15細碗、加多5蚊就加大碗少少(輕量級)。 旁邊有用餐區俾客人坐喺度食,以小食店嚟講空間感都算多喇,仲有店員幫手執嘢清潔,乾淨企理。 呢碗魚香茄子飯(HKD15)望落幾吸引,唔似食開嗰啲頹飯,個汁聞落都幾濃郁。驟眼睇魚香茄子分量都幾多,蓋住成個飯面。呢碗飯叫得做針量級,自然稱唔上大碗啦,不過女仔食完應該都夠飽,胃口大啲嘅就可能要嗌埋其他嘢食喇。問心嘅,呢個價錢有呢個分量同質素,真心抵喎! 平霸食嘅時候真係隨便一羹都有唔少茄子,啲茄子夠腍身,色澤幾靚㗎,又煮得入味。除咗茄子,都食到幾多肉碎,入口有微辣。魚香茄子個汁唔會好稀,有少少芡喺飯面,用嚟送飯食一流!成個飯惹味又唔會食到成口油,值得一試㗎! 就咁睇個名,以為會俾雞中翼,點知呢度嘅豉油皇雞翼飯(HKD15)係成隻雞全翼放喺飯面,隻雞翼仲滷到成個色水都係焦糖啡咁,睇見都想食! 啲雞翼係預先用豉油汁煮定嘅,嗌嘅時候店員會主動幫你再用豉油汁翻浸隻雞翼。雖然成碗飯冇其他配料,但係雞翼個豉油汁撈飯都好夠味,反而係略嫌個飯冇乜味,如果俾多少少豉油汁就更好喇!   平霸小評:15蚊一個飯預咗係頹飯質素,冇乜味道可言,點知食落又幾有驚喜喎。有時食飯又唔想食咁多嘅話,呢個細細碗又夠平就啱晒,仲係打工仔恩物添,以後糧尾又多個選擇喇! 大家姐小食店 地址:荃灣青山道144-172號荃豐中心1樓 電話:從缺 營業時間:星期一至日:07:00-23:00  

0

【尖沙咀榴槤主題外賣店 貓山王拉絲Pizza極香濃】么么Da

講到榴槤,未必人見人愛,但鍾意起上嚟就可以好瘋狂!呢間小店么么Da好大膽咁用咗榴槤做主角,設計咗一系列榴槤嘅主題小食。食榴槤食到上晒癮嘅小編梗係唔會錯過啦,即刻睇吓有咩特色嘅榴槤美食先! 舖頭開喺尖沙咀熱鬧嘅橫街,人流都幾旺,唔少遊客同上班族都會去幫襯。主力做街頭小食,所以舖面唔大,亦都冇座位,全部都係做外賣生意。 重頭戲梗係呢個拉絲嘅貓山王榴槤披薩(HKD148)啦!Pizza足足有8吋,夠3-4人一齊食。薄餅皮上面先鋪咗一層橙黃色嘅芝士,中間再搽幾厚嘅榴槤蓉,面頭就放上大量嘅水牛芝士,等個Pizza焗完之後,就有勁邪惡嘅拉絲效果。 成個Pizza切出嚟大概有6件,每件Pizza仲放咗雪凍嘅榴槤粒,慢慢溶喺熱辣辣嘅Pizza上面,令到榴槤味再重啲。小編食落口第一個感覺係榴槤同芝士嘅味道竟然可以咁夾,兩種味道咁濃嘅食物加埋都唔會搶咗大家個味,如果鍾意食榴槤又鍾意食芝士嘅朋友仔就要試喇!不過小編覺得呢個Pizza一定要趁熱食先夠香同有拉絲效果,最好即整即食啦。 望落咁金黃嘅炸物炸榴槤彈(HKD48/4件),炸物入面整咗榴槤流心,咬開即刻有好濃嘅榴槤漿流出嚟。即叫即炸,新鮮炸起嘅榴槤球超熱,老闆娘好細心咁提醒小編食嘅時候要小心啲。 雞蛋仔度度都有得賣,但榴槤味嘅雞蛋仔就比較少見,放榴槤肉落去整嘅就少之有少喇。呢個貓山王榴槤雞蛋仔(HKD35)外表平平無奇,但內藏驚喜喇!幾乎每粒都食到榴槤肉,味道夠晒濃。 見住店員將啲榴槤肉逐粒逐粒咁加落個雞蛋仔模度,再淋上蛋漿,真係好治癒呀! 呢杯霸王貓山王榴槤特飲(HKD78)好啱小編口味,有好濃嘅榴槤味之外,仲加咗自家製嘅奶蓋落去一齊打,所以好有奶香添。雖然70幾蚊唔算平,但見住老闆娘親手放咗四大羹榴槤肉落去整呢杯特飲,都算落重本㗎,咩都抵返晒啦!   么么Da 地址:香港九龍尖沙咀堪富利士道8號F地下 電話:6585 6837 營業時間:星期一至日及公眾假期:12:00-22:30  

0

【麵包機都整到芝士脆脆 自家製雙色醬任你點】mui mui家政課

小編屋企有唔同嘅煮食廚具,不過有時吓吓都跟足部機點整嘢食都幾悶,不如今次就玩吓新意思,好似麵包機咁,原來放咗啲芝士落去烘,係會整到出乎意料咁好味嘅鹹香脆片喎!呢個時候小編廚神上身喇,快速即製兩款醬料,將佢變成墨西哥風味慢慢嗒,想學就跟住做啦! 材料與分量: 墨西哥芝士脆脆(兩大塊分量) 帕馬臣芝士 – 3湯匙 帕馬臣芝士 – 2湯匙 車打芝士 – 1湯匙 乳酪醬 原味乳酪 – 140克 蔥粒 – 少許 鹽 – 少許 胡椒 – 少許 檸檬 – 1/2個 牛油果醬 牛油果 – 3隻 蒜頭 – 2粒 洋蔥 – 1/2個 蕃茄 – 1隻...

0

【唔搞美食車轉戰開地舖 去骨酥脆咕咾肉炸出新味】咕咾

充滿回憶嘅咕咾肉係咪特別好味嘅呢?尖沙咀嘅咕咾Goolo打正旗號就係賣咕咾肉,負責人Franki話細個時唔鍾意食肉,爸爸就整咕咾肉嚟引佢食,佢見到嚿嚿脆口嘅肉塊配埋酸酸甜甜嘅醬汁就即刻搶住食。點解會諗到開舖呢?本身係設計師嘅Franki就解釋:「兩年前見到株式會社老闆黃傑龍先生(Simon)有個美食車計劃,招募一班想創業又有好idea嘅年青人。我就好大膽交咗計劃書俾佢,點知佢又好鍾意喎。但後來知道美食車嘅details,計過覺得差少少,咁就留起個idea去開舖啦。」唔怪得成日話機會係留俾準備好嘅人啦,儲埋嘅計劃總有一日可以實現嘅! 店內只得少量座位,外賣定堂食自己話事喇! A系列有三款唔同部位嘅酥炸咕咾肉,咕咾拼盤(HKD98)可以一次過試晒梅頭肉、豬腩肉同豬爽肉喇。要爽口、多肉汁、多肥肉嘅質感都有,而且去晒骨,食得好方便。每隔一段時間仲有以豬肉做膽嘅「每期限定」,想食就留意佢哋Facebook喇。 醬汁方面仲玩咗好多花款,每份咕咾肉都可以免費跟一個醬汁,想試多啲味可以加錢。前面左至右係醒胃嘅皮蛋紅薑醬(HKD8)、他他醬(HKD8)、酸甜嘅菠蘿咕咾醬(HKD10)。後面左至右係fresh啲淡忌廉芝士牛油果醬(HKD10)[圖中牛油果醬係改良前版本]同鹹香惹味嘅金沙蛋黃醬(HKD10)。平時食咕咾肉啲汁已經撈好晒,點解仲有咁多醬要分開點?「因為細個覺得撈埋冇咁好食,爸爸見到就冇再煮埋一齊,等我哋想點汁先點。」真係所有靈感都來自童年的咕咾肉喎! C系列就有刈包,Franki話覺得刈包夾住塊肉,好似俾老虎咬住咁,所以又叫虎咬系列。呢個虎咬原隻軟殼蟹(HKD68)都唔嘢少,原隻軟穀蟹炸得啱啱好,啖啖肉真係幾滿足。加埋酸青瓜、蕃茄片同大量牛油果醬,可以減低油膩感,食一個都醫到肚㗎。 而A同C系列任何一款食物加HKD15,就有埋小食同汽水一杯。小食有炸薯角同香炸菇菇(正價HKD18)兩款,小編揀咗菇,睇落好似細份但食落有好多㗎,又唔會炸到乾晒。 飲咩送咕咾肉?可以揀涼茶啤(HKD28/杯),其實係將冇酒精嘅涼茶打氣,要唧層出蜜糖打成嘅泡扮啤酒。口味有三款,竹蔗茅根‧啤、夏枯草‧啤同相入面嘅洛神花茶‧啤,亦係最醒胃解膩。 當然仲有其他食物啦,煙肉芝士條(HKD28/2條)貴咗啲,但又幾惹味喎。切開睇真啲,煙肉同芝士都足料,食落外脆又夠鹹香味,想食完再食囉。 呢度嘅甜品好邪惡,虎中一點甜(HKD38/個),有黑同白兩隻味,小編揀黑,因為鍾意朱古力味雪糕呀。用即炸嘅刈包夾住即燒棉花糖,再放上一大嚿朱古力雪糕,淋埋朱古力醬。外熱內冷,口感同味道層次都勁豐富囉。 等緊攞食物嘅時候可以去Happy corner,玩吓佢哋特別設計嘅印章,感覺即刻好似去咗台灣同日本啲旅遊景點咁。   咕咾  地址:尖沙咀柯士甸路15號金巴利大廈B座地下C舖 電話:3460 2328 營業時間:星期一至日:12:00-00:00

0

【大學學會訂咗嘢食「失蹤」 小店老闆:要有交帶!】食焦

不要浪費食物!做人仲要有交帶同責任心㗎!話說公開大學學會同一間喺何文田嘅小店訂咗盒130蚊嘅煎炸嘢食,有炸餃子、春卷同咖喱角嘅大拼盤,約好晒會五點半去攞,結果到八點收舖都唔見人,小店老闆又電話又WhatsApp都冇回音!於是老闆只好將盒嘢食放咗喺舖頭旁邊嘅小枱度喇! 小店老闆將呢件事po咗上網,話「到8:00收舖都唔來?連一個電話也沒有?第三世界上真係有好多人是正在饑荒……你哋都130蚊都俾左啦!點解你唔來?對你無著數,真係講多次非常浪費……」 第二朝學生會先WhatsApp老闆道歉,話原来係因為尋晚有就職典禮好忙,又冇帶到電話,所以先完全冇回音囉!到咗凌晨兩點先醒起唔記得叫人去拎嘢食喎!「我們已立即到貴餐廳領回食物……避免浪費食物……亦不想浪費貴餐廳心血……」仲話已經將盒嘢食食晒咁話! 網友點睇?有人話學生唔啱又話埋依家啲九十後梗係唔掂、有人就覺得既然都俾咗錢唔記得去拎啫,咁樣公審唔係咁好囉!老闆點睇?有來有往,人哋都道咗謙,老闆都公開咁話「我只係要有交帶!該學會已有回覆,亦講凌晨兩點找人來拎去食晒,我由始至終主要係有交帶!人要有承擔!責任!不浪費!」 文字上道咗謙都未夠,原来為表誠意仲當面賠罪添!老闆再po文講返「今日整個學生會主要成員一起來道歉,這種共同進退!共同承擔責任!呢點真係唔係人人做到……」老闆啖氣落晒,班學生又唔使俾網友再話廢青冇責任心,總算大和解,應該食返多盤炸嘢慶祝吓啦!

0

【快煮零油派對小食 三色蛋盤小朋友都整到】懶健康貼士

依家個個都話輕食,樣樣都食少少就夠,連帶招呼朋友嘅小食都準備得健康少少,今次就整個零油三色蛋盤,滿足吓健康又細食嘅朋友啦!三色分別係: 牛油果 —— 算易飽肚嘅高纖生果,水份含量高,對腸道有益。佢嘅植物固醇可以幫助降低壞膽固醇,加入日常餐單都有助降血脂同降膽固醇。 粟米 —— 含有核黃素(即維他命B2),係形成紅血球、製造抗體嘅必需營養素之一,仲可以舒緩眼睛疲勞。 車厘茄 —— 含有維他命A、B、C、E、K同少量葉黃素等等,有助保護眼睛。佢嘅茄紅素亦係其中一種抗氧化劑,幫助對抗自由基,延緩衰老。 三色蛋盤 材料: 雞蛋 1盒 吞拿魚 2湯匙 粟米粒 2湯匙 牛油果 半個 車厘茄 5-7粒 芝麻 適量 黑胡椒 適量 香草 適量 1. 把雞蛋烚熟後挖走蛋黃。 2. 將一半蛋黃同吞拿魚溝勻,攪成蛋黃醬備用。 3. 將車厘茄同牛油果切粒。 4. 將蛋黃醬、車厘茄、牛油果同粟米粒按喜好放上蛋盤,灑上芝麻、黑胡椒或香草調味,食得! 肥唔肥你話事,招呼朋友唔失禮。

0

【旺角三大章魚丸 皮薄餡靚決勝負】伏務台

小編對章魚丸有情意結,讀緊初中嗰陣,學校附近間百佳有得賣日船嘅小丸子,仲好多人排隊㗎!咁就當一餐晏仔,已經好開心,但後尾變咗第二間接手,試咗好失望,已經好少食喇!之後喺旺角見到有咁多章魚丸,真係勁興奮,小編又重拾返丸子熱愛喇!今次走出旺角,即刻同大家試晒最熱門嗰三間,睇吓邊間啲餡最伏! 日船 打響頭炮嘅係老字號日船,一盒6粒HKD24,六粒丸子淹沒咗喺啲醬度,醬同柴魚片一樣份量十足,一啲都唔小氣呀! 外賣返到公司成半粒鐘都無變形喎,仲係圓碌碌脹卜卜,唔怕辣嘅可以點少少佢哋嘅芥末醬添! 咬落去唔會成啖粉,因為多醬,外皮只有少少脆身,章魚細細粒,但睇到佢嘅章魚粒都有調味過,成粒放入口,超滿足呀! 價錢︰●●●○○ 醬汁︰●●●●● 配料︰●●●●○ 章魚粒︰●●●●○ 味道︰●●●●● 總分︰21粒(25粒滿分) 東京站 喺正街口嘅呢間東京站,一盒6粒HKD22,呢款紙盒就差啲啦,個邊位好易就散開,沙律醬每邊一行,再夾咗啲紫菜碎喺面,不過好快就濕到變咗咁。 章魚丸無咁圓碌碌,啲醬都冇掛喺粒丸子度,唔理咁多!食咗先講! 粒章魚都幾大粒同彈牙!不過食落粉感有啲重,沙律醬食落微酸,有同事就覺得味道唔差,不過醬汁就真係少咗啲囉! 價錢︰●●●●○ 醬汁︰●●●○○ 配料︰●●●○○ 章魚粒︰●●●●○ 味道︰●●●○○ 總分︰17粒(25粒滿分) Hot.com 成條街都係小食,小編對於Hot.com本來充滿期望,呢款大切章魚燒,賣成HKD26,一樣得六粒,但最得意係佢除咗柴魚片仲有肉鬆,不過兩樣份量都偏小。 外形圓碌碌非常結實,拎上手最重就係佢,下面仲有好多燒汁,加咗肉鬆,味道都好香。 咬落就見真章,皮勁厚,好似面糊一樣,咁食法一餐實好飽,章魚粒顯得好細粒;食落似食麵粉糰多過章魚丸,失望。 價錢︰●●○○○ 醬汁︰●●●○○ 配料︰●●●●○ 章魚粒︰●○○○○ 味道︰●●○○○ 總分︰12粒(25粒滿分) 豬太郎點指兵兵 食咗咁多粒章魚丸,日船就完勝其餘兩間,皮薄餡靚之餘仲唔會乾爭爭,價錢三間比較起上嚟差唔多,最估唔到係嗰日唯一要排隊等嘅Hot.com最令小編失望,勁厚粉之餘,仲咬咗都唔覺有嘅章魚丸。下次識揀喇!  ...