Tagged: 少女心

0

【韓國甜品過江龍旗艦店 限定特飲×夢幻蛋糕】LE BREAD LAB

韓國人氣少女心甜品店LE BREAD LAB(르브레드랩),以草莓奶油捲做主打甜品。上年12月先喺尖沙咀開舖,依家話咁快就喺銅鑼灣開旗艦店喇。咁值得慶祝,所以將韓國人氣蛋糕款式帶埋過嚟,好似彩虹系列同熔岩蛋糕系列,仲有香港限定特飲添!加埋店內浪漫甜美嘅粉色裝潢咁夢幻,快啲約閏蜜一齊去打卡high tea啦。 彩虹系列有三種蛋糕,包括造型小巧精緻嘅小彩虹蛋糕(HKD198),兩個人食啱晒。 想大個啲可以揀彩虹雲朵蛋糕(HKD428),切開雪白嘅忌廉就見到六色彩虹喇。 還有選用皇牌草莓嘅彩虹草莓蛋糕(HKD468),果肉香甜多汁實令你一試難忘。 熔岩蛋糕系列(HKD158/4吋裝,HKD398/6吋裝)都係呢度人氣之選,一切開蛋糕,裡面嘅漿好似岩漿咁流出嚟㗎!宇治抹茶流心熔岩蛋糕製作講求用料,將宇治著名丸久小山園嘅「又玄」同古川製茶嘅「朝日」等多款嚴選抹茶粉混合,令蛋糕呈現抹茶原有嘅翠綠色澤同獨特香氣,味甘而清幽。 咖啡流心熔岩蛋糕就用咗LE BREAD LAB自家新鮮咖啡液製成,咖啡香氣齒頰留香。 伯爵茶流心熔岩蛋糕以著名英國品牌Twinings伯爵茶同其他紅茶調配而成,茶味清香。 香港限定特飲有左邊嘅草莓多多(HKD46)以草莓醬混合乳酸菌同檸檬汁。右邊嘅檸檬小姐(HKD46)以新鮮檸檬為主,消滯醒神。   LE BREAD LAB 地址:銅鑼灣波斯富街108-120號寶榮大樓地舖 電話:從缺 營業時間:星期一至日:10:00-22:00

0

【龍蝦店Lady路線新搞作 套餐都玩自由組合】Girlboss by Master Kama

以龍蝦出名嘅Master Kama又有新搞作,喺荃灣開咗以西日Fusion為主嘅Girlboss by Master Kama,俾大家反轉傳統反轉套餐Set死晒嘅概念,成個menu俾你自由組合咁滯! 餐廳裝潢走高貴Lady格調,燈光幾鮮明,唔會昏昏沈沈,大方又舒服。 Bossy Royal Set(HKD358/2人餐)可以跟指示,喺單點Menu自由組合7款食物,兩個人食都幾飽,即刻睇下小編揀咗先: 前菜點咗兩款,凱撒沙律配漬溏心蛋玻璃杯沙律嘅蛋同沙律醬都加咗少少紅菜頭汁,幾清甜,同食物好夾;而三文魚柚子檸檬玻璃杯沙律嘅柚子檸檬汁好醒胃,食之前要倒入杯用力shake,小編建議shake完倒落碟會容易啲食。三文魚、水果同菜都好新鮮㗎。 Master Kama出名整海鮮嘅菜式,小編當然唔執輸啦。先食香草龍蝦蛋捲配竹炭脆多士唔可以用平時嘅多士去理解,佢質感似脆咗又鬆開咗嘅龍鬚糖,幾得意。芝士蟹肉釀蟹蓋(另加HKD28 upgrade)嘅魚仔脆片好香口,加上成個蟹蓋都係實的的嘅蟹肉,滿足程度有A級。 重頭戲烤蒜蓉牛油龍蝦(另加HKD68 upgrade)係天衣無縫嘅配搭,拎埋嚟已經傳出陣陣香味!重點係龍蝦唔細㗎,一拮起成條肉扯出嚟咬落去,呢part唔好理儀態喇,狠狠咬落去,流出嚟嘅肉汁鮮味到咩都抵返晒。 再嚟有龍蝦芝士Mac & Cheese(另加HKD30 upgrade),芝士唔會好膩,但都輕輕滿足吓芝士控嘅心。由三種芝士同龍蝦汁一齊焗大長通粉,所有鮮味同湯汁都吸收晒。再慢慢拆龍蝦鉗嗒埋啲肉肉,滋味到手指都食埋啦! 之前咁多肉,食返輕量少少嘅Lady煙肉蘑菇忌廉意大利粉配62ºC溫泉蛋啦。意粉嘅汁都加咗少少紅菜頭汁,感覺健康啲。溫泉蛋勁流心,切開後啲蛋黃汁即刻流晒出嚟,Hold都Hold唔住。 如果唔係勁食海鮮,都可以揀Half Half雙拼,部分主食可以以半份嘅分量點兩款。素食朋友可以點南瓜甜酒燴意大利飯(半份),蔬菜嘅清甜滲晒入飯。梅子吉列大蝦五穀米茶漬飯(半份)好有日本風味,茶湯清澈味道唔會太濃,但梅子醬一定要溝勻成碗飯,如果唔係就太酸喇。 如果想自己一個或輕食少少,Girlpower Set(HKD138/1人餐)都啱大家,可以自選Burger或Bun+雙重炸薯條+飲品Lady’s Beer一杯,一個輕鬆下午茶咁就誕生。呢個慢煮豬腩肉包唔好以為肥喎,冇咩脂肪,肉又腍又入味。Shake Shake雙重炸薯條配自選日本Shake粉,有章魚燒、BBQ、咖啡杯麵、香蒜、芝士波、烤雞、海苔、黑胡椒、玉米湯同梅子味,全部味粉都係來自日本㗎。無酒精Lady’s Beer係喺蘋果味忌廉梳打上面鋪上特製奶蓋,當氣泡升起就會令奶蓋冒起奶白色嘅忌廉泡,攪勻後入口似creamy嘅少甜檸檬茶,又有啲啲汽水feel,幾好飲。 神秘嘅甜品Cool! Coco!(HKD58)冇喺Menu度㗎,要問服務員點嘅。由芒果熱情果雪芭、椰汁芒果糯米飯同脆米組合而成,唔同嘅口感由軟滑食到煙韌,不過小編最鍾意佢椰汁味幾香,可以列入Encore名單。 以上食物由15:00起開始供應,Lunch嘅食物唔同呢啲㗎。   Girlboss by Master...

0

【謀殺少女心!韓式人氣棉花糖炸雞】YadlliePlate

韓國多達50多間分店嘅手工炸雞專門店YadllieChicken,喺香港已經有一間分店啦!香港店名YadlliePlate,選址旺角兆萬中心,嚟到香港仲有香港獨有特色食物,例如乳酪窩夫炸雞,棉花糖作料炸雞等等,全部都係香港人而設,而且仲會聆聽客人意見調整口味,一齊去睇下有幾特別! 餐廳氣氛甚佳,感覺好舒適。 嚟到YadlliePlate又點可以唔試下造型出位又好食嘅棉花糖作料炸雞(HKD168)呢?YadlliePlate出名比起坊間炸雞更為脆身薄皮而入味。原來Yadllie好講究用料同製法,除咗使用韓國進口雞、醃料之外,仲會將雞用20多種天然材料做成嘅醬料醃製48小時。等雞件入味後更會再等10小時瀝乾水份,再用人手喺雞件輕輕撲上韓國進口嘅薄乾粉,只為求雞件蘸上嘅炸粉更加薄身!咁係因為雞件上面嘅炸粉越厚身,出嚟就只食到大量油份同炸粉,雞嘅鮮味就會被蓋過,所以越薄越有雞味、越薄脆!到炸製雞件嘅步驟,就會使用韓國雙重高壓油炸技術將雞件炸到金黃香脆! 香港分店當然唔少得香港先有嘅特色食物!包括有乳酪窩夫炸雞(HKD178)同棉花糖炸雞(HKD168)。雞件總共有5個辣度可以選擇,揀最辣嘅5星後悔級,挑戰成功仲會有一份獎品添!今次唔係好食得辣嘅小編一於試下棉花糖炸雞!就咁睇樣,棉花糖漲卜卜圓沽碌咁擺喺炸雞上面真係好可愛,謀殺所有少女心呀!然後店員就會用火槍將棉花糖燒呀燒,燒到棉花糖由軟綿綿一個波,變成一條條甜絲絲黏住炸雞。食嘅時候就會感覺到又甜又辣,棉花糖嘅甜味輕輕中和咗雞件嘅辣味,好容易入口,雞件又豐富多汁脆皮,真係好好食呀! 手抓飯(HKD88)材料有紫菜、蟹籽同芝麻。特別之處係你點咗之後會有韓國店員喺你面前將米飯同各種食材搓成一球球,總共有12球咁多,粒粒圓沽碌都幾得意㗎!食落會滲出紫菜同芝麻香味,同加上蟹籽粒粒脆卜卜嘅口感,米飯煙煙韌韌,食落真係好夾! 香港有好多唔同種類嘅街頭小食,其實韓國都一樣㗎!想一次過食晒幾款韓國小食?首爾街頭小食盤(HKD188)就啱晒你喇!裡面有齊多款韓國人氣小食,包括有年糕、魚餅、雞蛋同埋炸物。係咪一次過滿足晒你多個願望呢? 食嘅時候,魚糕串同年糕吸晒甜辣秘製醬汁,食落甜甜辣辣又煙韌,混合半溶芝士更煙韌濃郁!另外仲有脆卜卜炸物,口感好豐富! 小食類小編好推介大家試試脆炸雞腎(HKD68),每一日廚師都會將每一件雞腎嘅筋逐一去除,確保食落嘅口感唔韌,好用心㗎!雞腎唔韌得嚟好香脆,配埋粒粒脆炸青陽辣椒,鍾意食炸物嘅朋友一定會好鍾意! 甜品有三款雪冰可以選擇,包括韓式拌飯雪冰(HKD88)、韓式黏糕雪冰(HKD68)及草莓雪冰(HKD68),款款都各有特色。最後小編決定試試韓式黏糕雪冰。冰上面鋪上滿滿一層黃豆粉,裡面夾住黏糕同埋杏仁脆片。黏糕煙煙韌韌,沾上黃豆粉感覺更幼滑。至於下面嘅雪冰,因為加咗煉奶,混合一齊食感覺又香又甜,配埋黃豆粉同杏仁片感覺更香,又有卜卜脆口感! YadlliePlate 地址:旺角西洋菜街1號兆萬中心11樓 電話:2360 0233 營業時間:星期一至日:17:00-00:00