Tagged: 屯門

0

【日式食堂平價拉絲玉子燒 吉列豬扒飯皮脆肉厚】平霸

日式料理就一定貴?平霸話你知唔係呀!屯門新開嘅黑山食堂主打平價日式飯食同玉子燒,價錢又幾抵喎,入去試吓先! 小店牆身用唔少日式海報做裝飾,成個環境真係十足十日本屋台(路邊攤),唔講仲以為去咗日本呀。呢度座位唔多,得一列吧枱位同一啲摺枱,望入去就見到個開放式廚房,師傅同客人得閒就可以傾吓偈,都幾開心喎。 呢度每日會推出三款玉子燒,其中兩款係期間限定嘅,大約一個星期就會轉唔同口味,保持新鮮感咁話喎。呢款黑山玉子燒(HKD22)就每日都有,雖然入面冇餡料,但面頭有微微燒過嘅焦糖。入口有少少甜甜哋,但因為玉子本身只係放咗少少鰹魚汁調味,味道偏淡又唔會好膩。 其中一款期間限定口味係蟹籽蟹柳玉子燒(HKD24),蟹柳夾喺玉子入面一齊捲起。除咗玉子燒面頭放咗唔少蟹籽之外,仲有啲蟹籽撈咗落蛋漿度,食落口感就更特別喇。 試咗三款玉子燒,size都有啲唔同。呢款芝士拉絲玉子燒(HKD24)size細啲,但同樣相當足料。玉子內藏大量芝士,一夾起就會有拉絲效果,不過用水牛芝士整出嚟嘅拉絲芝士味道比較淡。聽店主講舖頭仲有一款芝士味濃郁啲嘅流心芝士玉子燒都係期間限定,想食嘅朋友仔就可以間唔中去碰吓運氣。 除咗玉子燒之外,今次仲試埋佢哋嘅滑蛋吉列豬柳飯(HKD39),即叫即整,分量勁多,真係胃口細啲都食唔晒!塊吉列豬扒幾乎有碗口直徑咁大塊,同啲滑蛋一齊鋪滿飯面。40蚊唔使就食到飽一飽,性價比都幾高。 唔止分量足,質素都唔hea㗎!吉列豬扒肉厚,粉漿都尚算薄,食起上嚟啖啖肉。而滑蛋名副其實夠滑溜,加埋炒香咗嘅洋蔥,餸飯食一流呀!   黑山食堂 地址:屯門青翠徑7號金邦大廈地下高層7號舖 電話:6072 0900 營業時間:星期一至五:12:00-14:00、18:00-00:00,星期六、日:18:00-00:00

0

【屯門新開甜品店限量布甸燒 岩漿戚風蛋糕+濃滑奶凍】一糖

相信唔少新界友對天水圍呢間人氣甜品店一糖唔陌生,最近佢仲踩入屯門,喺新開嘅美食廣場Go Go Mall開咗間甜品外賣店添。入面賣嘅戚風蛋糕同奶凍都係外賣店限定,仲有新出嘅布甸燒都係每日限量發售㗎,記得去試吓呀! 新開咗一、兩個月嘅分店係外賣形式嘅,大部分甜品都喺天水圍本店自家製,每日整好運過嚟。如果想堂食,可以坐喺美食廣場提供嘅開放式座位度慢慢歎。 外賣店新開冇耐,有唔少新品陸續推出。最近公開發售嘅新品就有一糖布甸燒(HKD48),燙印咗一糖logo嘅布甸燒係每日自家新鮮製作,選用成本較高嘅北海道忌廉芝士整成,食落口感濃厚幼滑,夠晒creamy! 將布甸燒倒轉倒出嚟,啲焦糖均勻咁沾滿成個布甸,有淡淡焦糖香添。布甸分為布甸同芝士蛋糕兩層,比例大約7:3。布甸燒倒出嚟仍然好挺身,入口幾綿密,食到芝士同蛋香,又唔會太甜膩,值得一試。 而呢度最吸睛嘅就梗係招牌嘅戚風蛋糕(HKD48-50)啦! 平時大大個蛋糕想獨食都難,所以舖頭好貼心咁研發咗呢啲一人份嘅戚風蛋糕,等你哋可以獨食成個蛋糕,同朋友一齊食仲可以試多幾種口味添。呢款士多啤梨乳酪忌廉戚風蛋糕(HKD48)將乳酪忌廉淋上面,再放上新鮮嘅士多啤梨粒,賣相精緻。 另外,芒果乳酪忌廉戚風蛋糕(HKD48)面頭嘅乳酪忌廉都多到瀉,仲有鮮甜多汁嘅芒果肉,夠晒fresh呀! 呢款就係百利甜酒忌廉戚風蛋糕(HKD48),面頭嘅朱古力忌廉加咗少少百利甜酒調味,有微微嘅酒香但唔算突出。 各位抹茶控必食呢款宇治抹茶忌廉戚風蛋糕(HKD48)!唔止用咗抹茶忌廉,連蛋糕都係抹茶口味,面頭再灑上抹茶粉,抹茶味夠晒香濃呀! 外賣店限定嘅人氣甜品仲有各款奶凍(HKD25-30),每日隨機推出大約十種口味。期間限定嘅就有榴槤奶凍(HKD30/左)同紫薯奶凍(HKD30/右)。咪睇佢哋外表好似平平無奇,榴槤奶凍雖然冇榴槤肉喺入面,但一打開蓋就有濃郁嘅榴槤香散發出嚟;而淺紫色嘅紫薯奶凍就有淡淡嘅紫薯味。全部食落都滑嘟嘟,奶香十足。 特別推介呢款荔枝奶凍(HKD25/左),喺奶凍上層有荔枝啫喱封頂,入面仲有荔枝果肉添。另外,咁靚嘅三色宇治抹茶紅豆奶凍(HKD28/右)都係熱賣之選,底部係濃郁嘅抹茶,配埋粒粒紅豆一齊食就最夾喇。 舖頭仲有賣乾果冷泡茶(HKD28),入面有菠蘿、檸檬同蘋果三款乾果,味道酸酸甜甜咁幾醒胃。不過目前只有呢款口味,有興趣嘅朋友仔可以去試吓。   一糖 地址:屯門鄉事會路112-140號雅都商場Go Go Mall1樓S54號舖 電話:從缺 營業時間:星期一至日:12:00-22:00

0

【內地小清新茶飲店攻港 雲石紋蛋糕奶茶顏值高】sofu

之前喜茶襲港搞到開幕嗰日排成幾個鐘先飲到咁誇張,其實想飲有驚喜嘅茶飲仲有其他好選擇嘅,不如試吓呢間新開嘅sofu啦!呢間茶飲店(梳芙)嘅發源地都係喺內地,之前集中喺二、三線嘅城市,最近就引入咗嚟香港,喺屯門開咗香港首間嘅代理店。論名氣梗係同喜茶冇得比,但實力其實有返咁上下㗎!sofu嘅茶飲相當有特色,除咗招牌水果茶,仲有比較少見嘅蛋糕系列,賣相同味道都冇得輸呀! 開喺商場地面嘅角落,位置都幾易搵,店舖行簡約清新路線,以白色為主,望落幾舒服。 呢度嘅蛋糕系列喺坊間比較少飲到嘅,小編就俾佢呢個雲石紋理嘅外表吸引到,對呢個系列好有興趣!呢杯蛋糕珍珠奶茶(HKD26/中)以自家製新鮮現打蛋糕醬加入珍珠奶茶,蛋糕醬飲落好滑身好Creamy,有啲似食緊Cheese cake嘅感覺,同奶茶味道又好夾。珍珠比較煙韌,唔係好腍身嗰種,比較有咬口。 呢杯蛋糕靜岡抹茶(HKD26/中)都係熱賣之選。同樣以自家製嘅蛋糕醬做掛杯,配合抹茶嘅淡綠色,個紋理就再出啲,賣相攞滿分喇,唔知味道又點?第一個感覺係好有奶香,可能加咗蛋糕醬嘅關係,令到奶味再重啲,另外抹茶味都幾濃,似平時飲開嘅抹茶鮮奶,應該啱晒一眾抹茶控! 主打新鮮水果茶嘅茶飲店,又點可以唔介紹招牌金允烏龍水果茶(HKD35/大)呢?呢杯水果茶以四季春茶底,加入唔同橙片、菠蘿、西瓜同新鮮百香果肉整成,仲會用越南小青檸中和返成杯茶嘅酸甜度,所以飲落唔會覺得好酸,感覺會比較清新,聽講呢杯嘢有唔少男士捧場㗎! 呢杯紅柚綠妍(HKD33/大)最有驚喜!驟眼睇以為有奶蓋喺面,其實成杯係冇奶嘅成分,面頭係加咗蜜柚肉打成嘅冰沙,中間就係新鮮果肉。由於小編唔多鍾意苦澀味,所以一向對柚子冇乜好感,但呢杯所用嘅蜜柚冇平時西柚嗰種澀味,果肉比較甜身,配合茉香綠茶茶底,飲落幾有花香味,小編竟然話咁快成杯飲晒。 想飲奶蓋就可以試吓雪櫻烏龍奶蓋(HKD25/中),呢個雪櫻烏龍茶底真係有櫻花味㗎!花味比較突出,面頭嘅芝士奶蓋係落玫瑰鹽而唔用岩鹽,奶蓋相對上係冇咁鹹。飯後飲啱晒喇! 當然要照顧埋一班無黑糖不歡嘅朋友仔啦,黑糖髒髒奶(HKD28/中)入面個黑糖味夠香,以全鮮奶沖製所以好濃郁,唔會輸俾啲乜乜堂㗎! sofu 地址:屯門鄉事會路83號V City地下G-16號舖 電話:2715 0633 營業時間:星期一至日:11:00-22:00

0

【屯門隱世拉麵店$35一大碗 下午茶送日式炸薯餅超值】平霸

平時食碗拉麵閒閒哋都要6、70蚊,有冇諗過35蚊就可以食到質素唔差、分量又多嘅拉麵呢?今次平霸去到屯門,搵到間隱世平民拉麵店岡一拉麵。拉麵最平只係賣35蚊,下午茶時段仲做大贈送,日式炸薯餅、汽水同油菜任揀,咪話唔抵食呀! 喺巷尾轉角位嘅呢間拉麵店門口裝潢都好有日式風格,舖頭唔大,一眼望晒只擺到四張枱,但坐得唔算逼,繁忙時間可能就要等耐少少,平霸咁啱喺下午茶時段嚟到就唔多人,可以慢慢歎碗拉麵。 平價之選就係呢碗炸餃子拉麵(HKD35)!成碗麵有三隻炸餃子、半邊蛋,仲有木耳絲、蔥花同芽菜呢啲配料,望落都豐富嘅!湯底係豬骨湯,隻色幾奶白,但唔算好濃。咁平嘅拉麵冇得揀拉麵嘅軟硬度都正常嘅,麵質適中,唔太硬身,個麵底仲幾多。 拉麵入面啲餃子炸得幾香脆,不過呢度拉麵同炸餃子唔會分開上,啲炸餃子會放埋喺麵上面,所以如果鍾意食脆口啲嘅可以食咗餃子先,咁就唔驚會浸腍晒啦;餃子餡就冇乜特別,同平時食嘅急凍餃子差唔多。 呢碗叉燒烏冬(HKD37)都幾抵食㗎,湯底除咗揀豬骨湯,仲可以揀辣湯,今次平霸就試咗地獄辣湯先,辣湯嘅辛辣味係慢慢辣出嚟嗰種,唔似平時日本拉麵嗰種辣味,都幾過癮,不過對好辣嘅朋友仔嚟講就未必夠辣喇。同埋呢度啲拉麵全部都可以免費轉烏冬,烏冬比較粗身,都幾有咬口。 成碗麵有三塊叉燒,啲配料就同頭先嗰碗差唔多。叉燒嘅肥瘦都幾均勻,肉質又估佢唔到咁幾腍。 舖頭仲做緊下午茶優惠,喺星期一至六嘅3點至5點半期間,除咗提供下午茶套餐之外,叫正價嘅拉麵或飯就有得免費任揀罐裝飲品、日式炸薯餅或者油菜其中一樣。即係35蚊一碗嘅拉麵都有嘢送呀! 小編就揀咗呢款日式炸薯餅(下午茶免費),係一塊薯餅開半咁上,加埋都有手掌咁大塊,可以配埋旁邊嘅沙律醬食,幾貼心,仲放咗啲椰菜絲喺下面墊底同吸油,睇得出免費送嘅小食都唔Hea㗎!講返塊薯餅先,炸得好脆好香口,入面係咖喱味薯蓉,有啲類似紅蘿蔔嘅配料,咖喱味都幾濃,但冇乜辣味。 平霸小評:新界區都有唔少平價又高質嘅食店,呢間拉麵店可以話係其中一間。最平35蚊有咁大碗拉麵食,而除咗拉麵之外,呢度嘅日式咖喱飯都好多客人叫㗎,下午茶時段仲有優惠添!賣得咁平,當然唔可以要求佢有日本拉麵專門店成百蚊一碗嘅水準啦,但平霸覺得如果想平平哋食碗質素唔錯嘅拉麵,呢度絕對係唔錯嘅選擇。 岡一拉麵 地址:屯門井財街9號錦發大廈地下1號舖 電話:2404 0832 營業時間:星期一至日:12:00-23:00

0

【屯門素食薄餅小店 即焗雙拼Pizza足料香噴噴】素學堂

呢間薄餅專門店喺屯門好受歡迎,店名叫常嚐素,仲夠膽聲稱自己係全港唯一嘅素食薄餅店添!小店由趙生兩兄弟主理,點解開素店賣Pizza?唔多唔少都同本身係素食者嘅趙媽媽有關!話說趙生細細個同媽媽去街市,佢話見到檔口啲人劏魚又劏雞,見得多都覺得殘忍,於是慢慢就跟媽媽一樣食素喇! 趙生入行超過十年,先後喺多間大型薄餅店度做廚,最後決定自己開返間全素食嘅薄餅專門店,有堂食又有外賣服務!兩兄弟由打理店舖、諗新菜式、落單、聽電話到揸車送貨都親力親為㗎!唔怪得咁多街坊熟客支持。趙生仲話店名叫常嚐素係有意思㗎,就係希望多啲人嘗試去食素,咁就唔止身體健康啲,連皮膚都靚啲咁話喎! 店內提供15款薄餅,小編今次分別叫咗兩個雙拼普通批(HKD88),可以一次過試齊四種味呀!分別係海鮮總匯、世外桃園、日式芥辣風同照燒素鰻魚。即叫即焗,Pizza喺焗爐出嚟已經香噴噴喇!Pizza嘅麵粉會先用機器打,再用人手搓,食落特別香脆鬆軟。海鮮總匯口味係千島醬配素蝦、蟹柳、青椒、菠蘿同芝士,味道算濃郁,啖啖都有料放入口;世外桃園口味就係千島醬配水蜜桃、蘑菇、金菇、粟米同芝士,食落甜甜哋好清新。 輪到日式芥辣風即係Wasabi醬配素三文魚、蟹柳、粟米、素獅子狗、紫菜、芝麻同芝士。素三文魚係蒟蒻製品,喺顏色上點綴不少,薄餅落足Wasabi醬,一食落口搞到小編有啲標眼水,每一啖都好刺激;照燒素鰻魚就有照燒醬配蘑菇、素丸、青椒、素鰻魚、芝麻同芝士,用紫菜同大豆纖維做嘅鰻魚,像真度十分高,照燒醬汁令Pizza多咗日式風味,同香脆鬆軟嘅餅底又好夾啫! 除咗薄餅,都有其他主食!菠菜汁雜蔬焗飯(HKD44)雖然材料只係用西蘭花、粟米芯、蘑菇同粟米,但味道令小編好驚喜。菠菜汁用白蘆筍汁再加菠菜打勻,加埋芝士再放入焗爐之後,真係抵擋唔到誘惑呀!菠菜汁濃郁得嚟又有芝士香,配埋各類蔬菜就平衡返晒! 鮮茄素肉醬意粉(HKD42)都好特別!仲可以改用只喺用米嚟提煉,而唔含任何蛋奶成份嘅米芝­士(HKD6),適合純素人士,不過暫時就得呢個意粉有得轉米芝士,其他菜式用嘅芝士都係含蛋奶成份嘅澳洲進口芝士,如果純素素食者就要小心喇。小編都係第一次試米芝士,味道冇普通芝士咁濃郁,軟軟哋質感幾得意,但就無得拉絲啦! 小食選擇可以試馬來素雞串燒(HKD34/5串)同素麥樂雞(HKD40/8件)。鹹鹹哋嘅素雞串燒估唔到係用蘑菇椗嚟做,質感嚡嚡哋好似食真雞胸咁,點埋甜酸汁真係味道一流!咪以為呢個係麥記嘅麥樂雞呀!望落真係勁似,但呢個係用大豆纖維做㗎,外脆內軟好快一件食一件呀! 羅宋湯(HKD10)有素肉,味道都算濃郁,但就同一般嘅羅宋湯冇太大分別。   常嚐素 地址:屯門井財街青棉徑5號金寶大廈地下7D號舖 電話:3488 0072 營業時間:星期一至日 :11:00 – 22:30

0

【12蚊5個包得個平字 20蚊2盒煎炸點心最正】平霸

平霸搵食,今次去到屯門嘅包點料理。每日下晝兩點半開始,豆沙包、蓮蓉包同饅頭都係賣12蚊5個,超級抵呀!嗰日去到門口已經好多街坊排晒隊爭住買,好有人氣喎!除咗呢三款包,其他包點就賣12蚊4個,都係抵啦! 小編叫咗蓮蓉包、豆沙包同饅頭(HKD12/5個),強烈建議大家真係可以唔使買!!佢啲包係keep住咁refill嘅,不過我攞到上手,啲包係硬到一個點,要用力先可以將佢分開一半;而佢個饅頭表面仲要有啲灰塵係上面,放落口嗰時真係要睇清楚啲呀!豆沙包就真係好唔掂,硬到黐晒線,叮熱咗要即刻食先勉強話擺得落口,真係唔好食呀! 蓮蓉包 豆沙包 饅頭 小編除咗食包,仲有試埋其他嘢食;佢嘅北菇滑雞飯(HKD16),唔使20蚊就食到,都算平喎!而且佢入面啲雞件都幾多吓,仲要係大嚿㗎,都算足料,糧尾都可以搵佢救吓急嘅。 小編覺得佢嘅煎炸點心(HKD20/2盒)最好食,最有驚喜! 款式又夠多,有生煎菜肉包、生煎鍋貼、什果沙律卷、鹹水角同豆沙煎堆仔等。 每盒入面都有四件,我就叫咗生煎菜肉包,出面啲皮煎到脆卜卜,食落口係甜甜哋,加埋啲菜肉餡,好正;而另一款就叫咗什果沙律卷,其實同平時喺茶樓食到嘅差唔多,都好食㗎! 平霸小評:今次呢間包點料理有少少中伏嘅感覺,因為啲包除咗抵,真係又硬又唔好食。好彩,點心同飯攞返分,而且味道都唔錯,但可能一直keep住好多人排隊,店員啲態度都唔算好好,如果大家買嘅話都係建議食返最好食嘅煎炸點心喇! 包點料理 地址:屯門啟民徑15-45號美恒樓地下3號舖 《平霸》平食四方,歡迎各界報料。

0

【街坊激讚屯門兩大餐廳 必食蛋牛意咖喱腩】發發快餐、屯門咖喱屋

今次小編精心挑選咗兩間喺屯門好出名,應該所有屯門友都知道嘅餐廳,就係有成三十幾年歷史、好多街坊由細食到大兼激讚嘅發發快餐;而另一間係同樣咁出名嘅屯門咖喱屋,呢兩間都幾乎係屯門必食嘅選擇呀! 發發快餐嘅裝修好懷舊,由餐牌到格局都睇得出充滿歲月痕跡,係屬於八十年代嘅港式快餐店呀!小店可以三十多年都屹立不倒,確實唔容易! 小編嗰日叫咗必食嘅煎蛋免治牛肉意粉(HKD34),可以話係發發嘅名物,呢個餐仲配埋餐湯同熱飲,價錢非常親民! 佢嘅肉醬好足料,食晒啲意粉都仲會有醬,唔會話好乾,加埋啲蛋汁簡直一流!非常夠味呀! 另一款就叫咗炸雞髀薯條(HKD34),呢個就冇跟餐湯,但都有配飲品。薯條又係勁大份,睇住廚師放幾多落去炸,就放返幾多落隻碟度,絕對冇偷工減料呀!雞髀個皮炸到非常香脆乾身,但入面嘅雞肉仲可以保持嫩滑 ,犀利喎!唔怪得街坊個個有讚冇彈啦! 發發快餐 地址:屯門屯門鄉事會路2A號 H.A.N.D.S S區2樓S-208號舖 電話:2451 0831 營業時間:星期一至日:07:00-21:00 屯門咖喱屋都不相伯仲,係好多學生哥嘅飯堂,每日下午時段都例必爆場,排晒長龍一啲都唔誇張㗎!小編去到當然要食佢嘅咖喱啦,其實午市餐單唔算特別多選擇,但都可以咁出名,真係有返咁上下實力㗎。 咖喱牛腩(HKD43/牛腩再加7蚊),成個套餐會有湯、蔬菜、薯條、烤餅、飯同餐飲,抵到爆!咖喱確實同平時食開嗰啲有分別喎,食落都幾重味同埋係辣辣哋而唔係甜咖喱,分量又係大到嚇死你,小編就最鍾意個烤餅,炸到金黃色脆卜卜,點咖喱汁食一流! 餐飲叫咗拉茶(加HKD10),師傳會拎住兩個壺喺你面前拉,好似睇表演咁,拉到起晒泡就會倒落個杯度,都要有技巧㗎!拉茶用咗超過7款香料去製作,有肉桂、羅勒、薑同荳蔻果實等。咁有印度feel,值得一試喎! 另外仲試咗個印度甜品糖水甜煎堆(HKD25),老闆一早話過會好甜好甜同好甜,但小編出於好奇心都想試一試,結果真係好甜!甜到有啲過份,可能印度人都比較重口味,不過口感都幾特別,用咗米粉去整,又唔似糯米咁煙韌,唔怕甜嘅可以一試吧! 屯門咖喱屋 地址:屯門彩華花園25號地舖 電話:2404 1444 營業時間:星期一至日:11:00-15:00;18:00-23:00

0

【得意趣怪雪糕蛋糕】HeyYO!!

食雪糕食來食去嗰幾隻味,食到悶悶地?不如試下自己D.I.Y.乳酪雪糕啦!HeyYO!!有多種口味嘅乳酪同Toppings比你任意挑選,想食啱自己心水嘅味道話都無咁易啦!除咗乳酪雪糕之外,仲有多種得意造型嘅蛋糕任你慢慢揀添! 嚟到HeyYO!!當然要試試佢地嘅乳酪(HKD18/100g)啦!有專人控制品質,食得夠晒安心!加上無論係乳酪嘅口味抑或Toppings都夠晒多元化,五花八門嘅Toppings完全由你話事,想落咩就落咩,一定啱晒你口味!仲會不定期有乳酪新口味推出添! 除咗乳酪之外,仲有好多款造型好可愛嘅雪糕蛋糕(1磅)(HKD268.8)比你帶返屋企!每款雪糕蛋糕外形都好得意趣怪,可以揀嘅味道亦都有少少分別,但係唔駛擔心,可以揀嘅口味平均都有十幾樣,實有一種啱味啱晒你! 就好似仲夏之熊同冰河小企鵝都有多種口味可以選擇,包括:草莓天使、甘栗碎杏仁、石板街、雲尼拿曲奇、香脆朱古力、士多啤梨、菠蘿綿花糖、香蕉曲奇、泡沫咖啡碎朱古力、焦糖咖啡曲奇、荔枝雪果、蜜桃乳酪雪糕、薄荷碎朱古力、忌廉曲奇、意大利朱古力同埋意大利雲尼拿。 無論你揀咩口味都好,上面嘅得意公仔都係一樣細緻又得意,想點呃like就點呃like,大人細路收到都咁開心!除咗可以相機食先之外,雪糕蛋糕仲非常幼滑又香甜,而且密度比較高,唔會充滿空氣,食兩啖就無晒!如果太多種味道唔知點揀好,不妨叫多幾個朋友仔一齊食。加大蛋糕,每磅加(HKD130),2磅或以上仲可以揀1-2款味道,咁就可以要多一款味道唔駛諗得咁辛苦啦!雪糕蛋糕仲不定期推出期間限定嘅趣怪款式添! 除咗雪糕蛋糕之外,仲有忌廉蛋糕㗎!鍾意食芒果或者拿破崙嘅朋友一定要試下(4″)芒果拿破崙(HKD138),表層堆滿切粒芒果已經夠晒香噴噴,下面再以忌廉圍邊,食落芒果鮮甜度頓時倍增!切開一件件食落去,拿破崙脆脆地再配埋鮮滑芒果,每啖口感都好豐富又香甜脆口! 如果想試獨特口味可以選擇(4″)朱古力曲奇芝士蛋糕(HKD138),蛋糕外形似足一塊巨形朱古力曲奇,非常得意。表層仲有曲奇同士多啤梨作裝飾,鍾意食曲奇餅嘅朋友又點忍得口!蛋糕入口鬆化,每啖都滲出濃香朱古力曲奇味道,再加埋芝士質感更幼滑,但係一啲都唔膩! 分店資料如下: HeyYO!! Frozen Yogurt 九龍區分店: 地址:觀塘觀塘道418號創紀之城五期(apm)地下高層UC45舖 電話:3422 8645 營業時間:星期一至日:11:00-22:00 HeyYO!! Frozen Yogurt 香港區分店: 地址:銅鑼灣告士打道311號皇室堡地庫B71號舖 電話:3583 2065 營業時間:星期一至日:11:00-23:00 HeyYO!! Frozen Yogurt 新界區分店: 地址:沙田港鐵沙田站大堂38號舖 電話:2608 9113 營業時間:星期一至日:11:00 – 23:00...