Tagged: 山系

0

【山系潮人必去!灣仔戶內玩轉露營餐廳】野玩山店 Something Wild

香港依個石屎森林,喘息嘅空間買少見少,平時返工放工,已經佔據每日絕大部分時間。到咗假日,當然想出去郊外散下心,但最後又好容易因為懶而留係屋企……有無一個兩全其美嘅方法?小編聽聞一間以戶外生活為主題特色餐廳,無論係裝潢擺設,甚至烹調方法,都會令你以為自己真係去咗露營,但同時間又唔需要攀山涉水就可以做到。 內裡裝飾帶有山系嘅味道。唔單止似係去緊香港露營,仲好似去咗外國野餐。 去到露營,整返啲風沙蝦(6件)(HKD128)食下確實幾有風味!風沙蝦用上大量新鮮蒜蓉同黑椒,食落非常惹味,辣辣地但唔會油膩!蝦肉爽甜,如果配埋檸檬汁就更加鮮味! 鮮露筍忌廉青口配蒜蓉包(HKD108)青口好清甜,配上露筍同忌廉好清新,味道更柔和。烤過嘅蒜蓉包外層脆卜卜,唔會過硬或者感覺油膩。食完青口再食蒜蓉包,口中嘅鮮甜感覺令麵包香味加倍昇華。 焗芝士燒烤菇(HKD88)大啡菇加上Velvety Camembert同Parmesan Cheese,再配上煙肉同韭菜,入口感覺清新,田園風味滿分!加上室內環境似足野外,真係點題無限fun! 去露營點都要有隻燒雞先有feel,露營者至愛嘅荷蘭鍋喺呢度都有得食!荷蘭鍋烤原隻野雞(HKD258)大約22oz,配以牛油、蔥、蒜、洋蔥去焗,一上枱香氣瀰漫。食落雞肉嫩滑而多汁,分分鐘自己出去露營燒雞都無咁好食! 自家製拿破崙酥(HKD78)可以揀芒果配吉士醬/香蕉配朱古力醬。拿破崙外皮十分鬆脆,完全唔會油。咬落去感覺到酥皮一層一層嘅細膩口感,再加上中間夾住香甜芒果,真係又甜又脆!如果蘸上吉士醬味道更柔和。 野玩驚喜(HKD108)就咁睇以為係簡單一個白朱古力波,但當你淋上熱嘅朱古力漿,裡面有驚喜!原來入面有新鮮生果,例如野莓、藍莓,仲有布朗尼同雪糕!有咁多種朱古力同雪糕混埋一齊食,味道、賣相、驚喜都滿分! 野玩山店 Something Wild 地址:灣仔軒尼詩道288號英皇集團中心1樓101-104號舖 電話:2997 5233 營業時間:星期一至五:11:30-00:00 星期六、日及公眾假期:10:00-00:00