Tagged: 川菜

0

【旺角新派川菜中西合壁 辣控必試辣到噴火套餐】祥仔辣辣

煮開西餐,尤其擅長法國菜嘅大廚張錦祥Ricky,平時好鍾意食辣,出街食飯都會自備辣味香料。最近佢就開咗以川辣菜為題嘅祥仔辣辣,作為祥仔概念行政總廚都同精於四川菜嘅大廚誠哥交流,部分菜式會加入世界各地嘅西式香料,譬如印度黃薑、法國南部香草、泰國檸檬、台灣金不換等,出奇地令辣香層次有更多變化喎。 餐廳環境有啲中日式同古現代混合嘅感覺,感覺都幾輕鬆自在。食物方面都一樣俾大家「有得揀」,大部分嘅菜式都可以自選少辣、中辣、大辣,甚至地獄辣。Ricky話如果你可以生食指天椒或者成包18禁薯片,歡迎你挑戰地獄辣呀!如果冇特別指明辣度,都會以中辣烹調,所以小編都試呢個辣度體驗吓先。 食辣要食得出色除咗挑戰辣度,仲會享受帶酸、麻、香、甜等唔同嘅辣味,所以辣到噴火精選套餐(HKD388/兩位)就將呢啲味道注入六道菜式。前菜先試酸辣開胃嘅惹火山木耳同埋肉質嫩滑嘅川味口水雞,呢兩款人氣川菜未至於辣到噴火,但開始有麻香嘅感覺留喺口喇。 招牌菜可以二揀一,先睇呢盤水煮安格斯牛肉,紅卜卜咁真係幾嚇人,但加入迷迭香令麻香更有層次,食慾即刻大增!入口即刻俾麻辣味衝擊到要飲水,但肉味依然明顯,呢樣真係估佢唔到。不過餐廳會按時節轉換肉類,下次嚟就可能轉款喇。 相比之下,同樣落咗迷迭香嘅祥仔招標酸菜魚會辣啲,但開頭會俾自家製嘅酸菜掩蓋辣度,但後尾真係愈食愈辣同麻痺呀!鱸魚厚薄適中冇咩骨,質感滑不留口添,大力少少都會夾斷魚肉㗎。 套餐仲包埋三款特色小菜,噴火小籠包係罕見嘅口味,湯汁微辣幾惹味,唔蘸醋都好夠味,不過呢款就冇得揀辣度喇;香芹豬肉手水餃內面冇加辣,怕辣嘅朋友可以蘸少啲醬汁;乾煸四季豆反而爽甜唔辣喎。 最後食埋冰凍嘅黃金南瓜露解辣收尾,清涼甜滑,而好似海底椰嘅亞塔子仲增加咬口添。 食唔到咁多都有其他選擇,好似午市套餐嘅麻婆豆腐石鍋飯(HKD78)都俾足誠意,炒飯底配上滑嫩甜辣嘅麻婆豆腐,食晒都幾飽㗎。 而全日供應嘅招牌辣辣撈丁(HKD58)先麻後辣好惹味,撈勻櫻花蝦同蛋汁一齊食唔止香滑,好似冇咁邪惡添!   祥仔辣辣 Ricky’s Spicy Kitchen 地址:旺角彌敦道639號雅蘭中心2樓201號舖 電話:2885 1910 營業時間:星期一至日:12:00-15:00,18:00-23:00

0

【中西合璧紀念家鄉味道 傳統VS新派川辣出色】1935 壹玖叁伍

壹玖叁伍喺中環蘭桂坊附近嘅商廈開業大約半年,喺商廈19樓都有唔少捧場客。餐廳搵咗擅長煮外省菜嘅大廚坐鎮,點解老闆咁鍾情中菜?其中一個原因係老闆細個喺家鄉四川俾婆婆湊大,時不時都懷念家鄉味道。為咗紀念婆婆 ,仲用佢嘅出生年份(1935)為餐廳名命添!餐廳除咗有川辣菜式,仲有傳統同新派中菜。餐牌同餐具都參考西餐模式,例如湯類可以每位叫自己想飲嘅款式而唔需要叫一煲,令大家更舒服享受中菜。 中西合壁裝潢好優雅,同屋企人或閏蜜嚟都一定盡興。 想有私人空間仲可以包房,就算招呼公司客戶都一樣得體。 黃金淮山葵(HKD105)係天使與魔鬼嘅結合!淮山同秋葵都係健康嘅食材,口感本身亦冇咩特別,但沾上炸漿炸過後,再同炒到起沙嘅厚厚鹹蛋黃撈埋一齊,脆皮加上鹹香味真係冇得頂囉,話咁快就掃清一碟。 話明參考西餐上菜嘅排序,所以食主菜前可以先品嚐金絲和田玉(HKD135)清一清喉嚨。圓碌碌嘅冬瓜球以一串晶瑩剔透嘅白玉葡萄呈現,用瑤柱同鮮雞上湯熬到腍晒,入口爆汁,味道好清新。 鍾意辣嘅朋友有兩款菜係必試推介,水煮牛肉餅(HKD280)嘅香麻味令小編辣到有啲滴汗都仲追住食。佢嘅辣停留喺口腔,唔會落到喉嚨,加上爽彈嘅牛肉餅同吸晒湯汁嘅薯粉,真係好難唔愛上佢囉。 第二係川椒香辣軟殼蟹(HKD225),比水煮牛肉餅再辣啲,但乾炒嘅感覺又唔同;最特別係軟穀蟹嘅炸漿唔係日式嗰種,啱啱煮起就食幾脆口,隔一陣食入面會變到啲似麵包嘅質感,亦冇油淋淋喎。 餐後梗係要食甜品,呢度仲中西混合添。花雕話梅雪糕(HKD55/位)係自家製雪糕,小編一食即刻打咗個震醒晒!原本以為雪糕係清香口味,點知一入口係好濃嘅花雕味,跟住話梅味湧埋出嚟。雖然嚇咗嚇,但慢慢食又幾正喎,質感仲幾滑添。 呢度嘅cocktail唔單止飲得,靚到可以打卡!左邊Dragon Gossip(HKD60)主要用抹茶同開心果醬調製,味道幾清,不過同右邊1935beer(HKD60)相比就會甜少少。1935beer用薑啤加煉奶調製,但有薑啤中和所以唔覺得甜,男士都啱飲! 1935 壹玖叁伍  地址:中環威靈頓街2-8號M88威靈頓廣場19樓 電話:2156 1935 / 9858 1565 營業時間:星期一至日:12:00-15:00,18:00-23:00

0

【米芝蓮大廚炮製私房菜 川味深海龍躉滾到起泡】漁牧

原先喺尖沙咀以食川菜同雞煲出名嘅漁牧,最近搬竇移師九龍灣MegaBox插旗,新店裝修大玩中式feel,牆上壁畫仲係人手畫上去,真係氣派不凡!招牌烤鴨可能好多人都知,不過為免有漏網之魚,依家餐廳將大大個風乾機放喺門口當生招牌添喎。新店新介紹,今次唔講燒魚同雞煲喇,其他單點菜式一樣咁正。依家由米芝蓮大廚鋼師傅掌舵,嚟緊會推出私房菜,小編率先試咗啲,真係擺返圍宴客都好得體呀! 試業一個月,午市時間好爆場,想食就要訂枱啦,唔好博呀。 新店多咗幾間VIP房,呢間仲可以唱卡拉OK添,同親友食飯就更加盡興啦。 鋼師傅之前喺六福菜館由開業做到2009年,攞咗米芝蓮之後就轉戰內地,依家再回歸連帶烹調嘅菜式都帶啲內地風味。小編問鋼師傅有冇喺漁牧引入六福菜館嘅菜式,佢就話只有海鮮類囉。講咗咁多,即刻帶大家睇吓有咩正嘢食啦! 介紹新菜之前,先嚟個涼菜九宮格(HKD188)開開胃,有辣有唔辣,有肉亦有素,啱晒唔同口味嘅朋友。其中麻辣牛?、麻辣豬耳同牛肚係小編最鍾意嘅,香口惹味亦煮得夠腍;之後食件爽甜青瓜粒同木耳,清清喉嚨又可以準備食下一道菜喇。 新菜亦係私房菜之一就係呢味香麻味重,但唔太辣嘅漁牧沸騰深海龍躉(HKD588),用咗沙巴龍躉,另外都有5-6斤重嘅大鯰魚俾你揀。鋼師傅話舊時成日講「老魚嫩豬」,魚愈大條就愈好食,因為肉質結實啲。魚肉用滾水浸到大約7成熟就上碟,即刻淋上子彈椒、炮彈椒、花椒等辣椒同滾菜油。上菜嘅時候仲見到啲油滾到起泡泡,令食客可以品嚐到熱辣辣又啱啱夠熟嘅魚肉,嫩滑彈牙。碟底仲有芽菜同紅薯粉,最好係菜油嘅口感唔肥膩,反而更加滑。 另一味私房菜就係特色香辣龍蝦干鍋,不過仲未定價,想食嘅話建議打去問咗先。餐廳選用本地龍蝦,肉質彈牙多肉汁,即使炸過再炒都好鮮甜。一隻龍蝦有斤幾接近兩斤重,呢碟例牌size有4隻龍蝦,夠10位用㗎!呢味菜用嘅辣椒同漁牧沸騰深海龍躉一樣,不過再加咗辣椒醬、豆瓣醬等醬料一齊炒,所以食嘅時候有啲豆豉嘅香甜,之後先有陣香麻嘅辣味滲出嚟;仲有萵苣、蓮藕、薯仔、青瓜同雲耳做配料,真係好豐富呀! 然後點少得漁牧嘅招牌菜呢,老北京烤鴨片皮鴨(HKD170/半隻)大約5斤一隻,每隻鴨都掛咗個號碼牌,可以追蹤返係來自邊個農場㗎!鴨上咗鴨皮水之後風乾一晚,唔使落醃料。先用電爐烤乾鴨身,再轉用荔枝木呢款果木繼續烤,令鴨肉更加香。呢度嘅片皮鴨唔使加錢都俾埋肉你食,其實幾抵吓。 餅皮幾薄,餐廳好細心咁每塊都用紙隔住易夾啲。包好之後仲可以咬到鴨皮脆口嘅質感,食到「嗦嗦聲」添,最驚喜係鴨皮睇落去肥,食落唔覺油喎。不過肉味會淡咗,因為餅皮嘅香味會蓋咗少少,想試濃啲嘅肉味就建議就咁食。 漁牧混豬(HKD298/半隻)都係好多人點嘅,特別之處係自家調製嘅醃料同三色醬料。100日嘅乳豬用西芹、紅蘿蔔、辣椒等新鮮材料醃製,比平時婚宴食嗰種清甜啲。乳豬燒到後段仲釀埋煮過嘅糯米飯一齊燒,將豬油逼入糯米飯,令味道更加香。食嘅時候除咗有平時嘅乳豬醬之外,仲有加咗沙律醬調製嘅抹茶醬同秘製芥末醬,兩種帶甜但清啲嘅醬料可以減退乳豬嘅肥膩感。不過小編最鍾意係乳豬皮呀!光皮嘅燒法鬆脆啲,唔會好硬,堅食唔停口囉。 曹池汁大蝦配手抓餅(HKD108)嘅醬汁有啲似咖喱炒蟹嘅味道,但質感唔杰身,手抓餅都易沾起醬汁。不過手抓餅記得趁熱食,因為佢用酥油整,凍咗就會有啲酥味喇。大蝦肉質好結實彈牙,啖啖肉勁滋味。 雙色水晶球(HKD48)睇落普通,但用足料㗎!尤其係紅豆苛水晶球,除咗有一粒粒嘅紅豆增加口感,仲好難得咁食到陳皮味呀! 雙色馬拉盞(HKD58)有黑糖同抹茶味,口感鬆軟到似海綿蛋糕,但質感厚啲。味道唔會好甜,做飯後甜味都唔覺膩。如果你係嗜甜嘅朋友,佢配嘅肚臍餅、百力枝同煉奶就啱晒你喇。   漁牧 地址:九龍灣宏照道38號企業廣場5期Megabox13樓5號舖 電話:2529 8383 營業時間:星期一至日:11:30-15:00;17:30-23:00

0

【重慶風味有辣有唔辣 冷鍋酸菜魚香麻嫩滑】捌壹壹

新餐廳日日都有,但夏天開川菜店會唔會感覺又熱又辣呢?旺角捌壹壹嘅老闆Thomas就話唔怕,因為佢哋有4個辣度俾大家揀,如果唔想每道菜都辣,仲可以走辣添。8月頭開始試業到依家都幾多人,所以晚市都係book位穩陣啲。「捌壹壹」其實係舊時重慶嘅電話地區號碼,直接用嚟做餐廳名夠晒代表性啦!餐廳用嘅調味香料全部都由重慶運嚟香港,連大廚都係重慶人,確保煮出最正宗嘅川味。小編試嘅都係小辣程度,入口feel到陣香麻味先,之後就有啲辣滲出嚟,一般人都表受到。 除咗單點菜式之外,呢度仲可以打邊爐,枱櫈咁闊落一啲都唔逼呀。 呢度最最最一定要食,又令小編迷上嘅就係招牌必食冷鍋酸菜魚(HKD148)!話明係冷鍋,上枱後唔好加熱食咗先,因為再煮啲魚就會老。Thomas揀咗用3斤重嘅生魚,因為肉質好爽滑彈牙,連魚皮都好有厚度㗎!如果唔想食生魚,可以問店員當日有冇其他魚揀,價錢會按種類調整。湯底可以飲埋,微微酸、唔油又清潤嘅感覺異常開胃,小編都飲咗兩碗呀!頭先提過佢哋嘅香料由重慶運嚟香港,估唔到連酸菜都係,咬落仲有啲嫩嫩哋嘅口感。食完魚仲可以加水變打邊爐添。 什錦香鍋(HKD148)係邪惡美食,肥腸、大蝦、午餐肉、蓮藕、土豆條等材料都炸過,好脆口惹味。加埋多款辣椒、花椒一齊炒,香料味道出晒嚟呀!呢款菜有三種口味選擇,分別麻辣、泡椒同孜然,如果好鍾意辣嘅朋友可以揀泡椒。 乾煸肥腸(HKD88)將肥腸炸到好香脆,口感唔會好油膩,係勁惹味嘅下酒菜呀! 黑糖糍粑(HKD25)係四川街頭熱賣小食。糍粑用糯米做成,客人落單先即炸再灑上黃豆粉。趁熱食可以品嚐到外脆內煙韌嘅口感。當地人會點埋黑糖醬,質感會juicy啲。小編食吓食吓,一個人都KO咗半碟呀! 最後想解辣涼一涼又點少得冰粉呢?!Thomas將呢款甜品改良咗少少,用紅糖整成紅糖桂花冰粉(HKD23),再配口啲紅莓乾,清涼又解滯,好正呀! 冰粉以外可以選擇沙冰,藍莓沙冰(HKD32)大杯又清甜,順便護埋眼。   捌壹壹 地址:旺角奶路臣街33號地下F舖 電話:2481 3030 營業時間:星期一至四:11:30-00:00;星期五至日:11:30-01:00

0

【天瑞街市有條小食街 掃盡泰川台美食話咁易】街霸

上星期街霸同你去完大埔墟街市尋寶,今次去邊呢?「天水圍好似冇啖好食㗎喎!」,呢句嘢講真街霸成日都聽到,話晒天水圍咁多個商場輪住翻新,翻新完之後開晒啲連鎖貴餐廳,街坊真係冇咩選擇㗎!不過咁,街霸覺得大家可以試吓去天瑞街市出面嘅小食街度搵食,除咗有港式格仔餅、燒賣魚蛋之外,仲有四川嘢、泰國嘢同埋台灣手抓餅添!今次一於一個街市食勻幾國菜啦! 呢條小食街由晏晝2-3點開到凌晨1-2點㗎,取代咗以前不定期會喺天瑞輕鐵站隔離出現嘅小販檔咁喎!一字排開嘅小食店感覺都幾乾淨企理,不過大多數係小店經營,人手唔會太多,宵夜時段要排吓隊喇! 呢間泰好味顧名思義就係食泰國嘢,街霸見佢個餐牌都有幾多選擇嘅,除咗比較輕食嘅炸春卷、扎肉沙律之外,仲有炒金邊粉、冬蔭功套餐(包白飯)呀、椰汁糕呀咁,幾多選擇㗎。 街霸試咗呢個豬頸肉沙律(HKD40)喇,沙律嚟講好似有少少貴,但係你睇吓,勁足料呀!佢啲豬頸肉有種蜜糖烤過嘅微炭燒味,夠晒惹味。沙律除咗生菜之外仲配有蕃茄、紅蘿蔔絲同大蔥,味道帶酸甜,清新得嚟又中和到豬頸肉嘅油膩感,正呀!呢盒嘢兩個人些牙啱啱好,食完唔會太飽,又可以再掃過! 如果你同街霸一樣鍾意食辣嘢,四川嘢啱晒啦!川味軒上至涼拌豬耳下至麻辣燙都一應俱全,今次街霸就叫咗重慶酸辣粉(HKD22)同埋拍青瓜(HKD25),唔好睇少呢兩樣嘢,俗語都有話,最簡單嘅嘢往往係最考工夫嘅,係咪先? 街霸叫咗小辣,望落去唔算滿江紅咁樣,不過都清楚見到粒粒辣椒碎(定花椒?),粉係粗身嘅紅薯粉,同傷心酸辣粉嗰種一樣。飲落個湯唔會好重口味,但辣味都夠嘅!不過我諗如果平時食譚仔十小辣嘅朋友仔就可能要叫姨姨再輕手啲喇,因為佢個小辣都有啲啲分量嘅,你當5小辣咁上下啦。22蚊嚟講算幾大碗,女仔實夠飽!仲可以加餸添! 拍青瓜其實都算幾驚喜,因為街霸曾經喺啲連鎖舖頭食過,一係太油一係就冇乜味,但呢個拍青瓜配料都好多,面頭嘅黃金豆同蔥花多到睇唔到青瓜咁滯。將青瓜同底下嘅秘製辣油撈好之後嗰種酸辣味道真係好刺激嗅覺呀,正!青瓜超級爽口,辣味有層次,吞落肚嘅時候嗰種麻辣先慢慢滲出嚟,好過癮!鍾意食辣嘅朋友唔好錯過!同酸辣粉一樣,呢個拍青瓜嘅小辣都唔嘢少,大家因應自己食辣嘅程度執生喇! 如果想食啲冇咁heavy嘅嘢,可以選擇呢間賣台灣手抓餅嘅日日店,黃金餅底(HKD10)另外再加配料上去,分別有基本嘅芝士(HKD5)、煙肉(HKD5)、火腿(HKD5)、煙鴨胸(HKD5),另外仲有啲fusion選擇,例如煉奶肉鬆(HKD10),不過街霸今日就唔試啲咁「新奇」嘢喇,留返你哋試完話俾我知啦! 街霸試咗黃金手抓餅,加咗芝士同火腿。有少少蔥油味幾香口,仲夾住啲芝士醬,問返老闆先知,原來「黃金」就係指啲芝士醬。哎吔,早知就唔加芝士加過第二樣啦!不過唔緊要,試啖先。咦,芝士味果然好濃,咬落口都有啲拉絲嘅感覺,不過雙重芝士感覺有啲啲膩喇! 除咗以上三間,隔離仲有間賣港式魚蛋燒賣、印尼撈同埋糖水舖㗎,下次去開濕地公園記住喺天瑞站落車試吓喇! 街霸最愛:豬頸肉沙律毫無疑問係街霸心目中嘅no.1呀,料多又好食,食完想翻兜添呀!(不過真係有啲遠……) 泰好味 地址:天水圍天瑞邨街市T13號舖 電話:無 營業時間:不定 川味軒 地址:新界天水圍天瑞邨街市T64號 電話:無 營業時間:10:00-01:30 日日店 地址:新界天水圍天瑞邨街市T52號 電話:無 營業時間:不定

0

【狂食片皮鴨龍蝦回本 中國八大名菜自助餐】THE PLACE

有時食得西餐多都幾想食返餐豐富嘅中菜,不過淨食一個地方嘅中菜又未必個個鍾意。依家喺旺角香港康得思酒店嘅THE PLACE就破格呈獻「中國八大名菜」主題自助餐,帶你食盡中國大江南北唔同嘅菜式。 THE PLACE開放式嘅空間,色調柔和,用上大量白色、青綠色同橡木陳設,夠晒親切溫和。 中國最具代表性嘅八大菜系包括粤菜、川菜、蘇菜、浙菜、閩菜、湘菜、徽菜同魯菜,佢哋各有代表菜式㗎! 粤菜:點心、鼎湖上素、梅菜扣肉、八珍豆腐、菊花蛇羹。 川菜:魚香肉絲、酸辣薯粉、怪味雞。 蘇菜:香煎小籠包、砂鍋雲吞雞、松子魚、無錫醬排骨。 浙菜:東坡肉、杭州醬鴨、油燜春筍、香炸響鈴。 閩菜:香菇竹筍、香蔥煎薯餅、生煎明蝦。 湘菜:東安子雞、乾燒香辣茶樹菇。 徽菜:黃山燉鴿、雪冬燒鷄。 魯菜:蔥爆羊片、湯爆雙脆。 自助餐有多款特色前菜有花雕醉雞、手撕雞、拍青瓜、麻香菇芹、涼伴黑木耳、涼伴綠豆粉等等,仲有唔少重頭菜式: 肥美嘅即片北京烤鴨啖啖肉,不過係用包唔係用薄餅包住,呢樣就視乎個人喜好喇。 四川辣椒芝士焗龍蝦呢個fusion幾搞鬼,睇樣就唔覺好辣,但好過成日都龍蝦伊麵咁悶吖嘛。 創意「中式」甜品夠晒破格,按中菜造型特別製作多款吉祥甜品,包括「鮑魚」造型嘅朱古力慕絲蛋糕、「海參」造型嘅咖啡蛋糕同烏龍茶布甸。其他精緻嘅傳統甜品有糖不甩、椰汁桂花糕、冰糖湘蓮及紅豆啫喱等等,食味道之餘食埋個樣,又可以打卡啦。 餐廳都照顧鍾意西餐嘅朋友,即開生蠔同即煎鵝肝會繼續供應,回本依然冇難度。   自助晚餐供應時間:即日至2018年3月31日 (18:30-21:45) 星期日至四及公眾假期: 成人:HKD618;小童及長者:HKD438 星期五、六及公眾假期前夕: 成人:HKD658;小童及長者:HKD478 所有價錢另有加一服務費,食物或會因應季節變化及供應而改變。   香港康得思酒店 – THE PLACE 地址:旺角上海街555號香港康得思酒店L樓層 電話:3552 3028...

0

【經典川菜半山殺落銅鑼灣 必食水煮魚招牌菜】三希樓

之前想食正宗川菜,一定係上半山科達中心嘅三希樓先過到口癮。自己地方一定要整靚啲,佢古色古香嘅傢俱,唔同嘅窗景仲可以遠晀香港動植物公園同ifc,真係幾寫意。覺得唔多就腳?依家去銅鑼灣就得喇,因為三希樓慶祝開業十週年,揀咗喺時代廣場開分店,地點咁方便又唔使去到半山,食完飯仲可以行吓街。不過新店好多時會爆場,穩陣啲最好就訂位先。 三希樓出名將正宗川菜、家鄉粵菜同巧手點心結合,一路食一路感受到師傅嘅功力。其中最出名嘅水煮魚同麻辣鍋係一定!一定!要食!今次小編都試咗其中一款。 必食前菜蒜泥白肉(HKD98)嘅蒜泥亦磨到好幼滑,腩肉同青瓜片到薄一薄,師傅刀功十足。入口爽、滑、脆,口感層次好豐富! 招牌麻辣口水雞(HKD328/大;HKD198/例)麻辣嘅勁力調得啱啱好,食落有淡淡嘅香氣攻上鼻,雞肉仲好滑嫩添。 主菜干鍋牛肉粒(HKD198)用咗大量辣椒同香料炒成,好有川菜風味。牛肉粒分量都唔少,幾有鑊氣同惹味。 水煮野生魚(HKD438/大;HKD368/例)肉質滑得嚟結實彈牙,仲有粉皮一齊煮,可以當湯粉咁食。 極品流沙包 (HKD34)唔講得笑,皮薄餡靚係基本,但流沙嘅感覺可以做到水溶狀態真係唔多,呢個攞滿分呀!   三希樓 地址:銅鑼灣勿地臣街1號時代廣場食通天11樓1102號舖 電話:2111 9952 營業時間:星期一至日:11:00-23:00

0

【㗎妹甜 韓妹醇 川妹辣 中日韓冷麵激戰連場】韓宮、拉麵來、慶麵

夏天食熱嘢,就算冷氣幾勁都好,一樣可以食到大汗疊細汗,但係食冷麵就可以舒舒服服,降住溫咁食喇。除咗蕎麥麵、冷烏冬同水冷麵之外,下面呢三款中、日、韓特色冷麵你一定要試! 黃埔地鐵站一上嚟就見到韓宮,呢度由一位韓媽媽做大廚,絕對食到正宗韓食嘅味道。唔好以為食傳統韓食就等於一成不變,老闆娘耐唔耐就會引入一啲韓國潮流菜式㗎喇。 呢個冰豆漿冷麵(HKD108)就係依家韓國大熱食品,連冰上嘅冷麵唔太常見㗎。湯底用韓國飛過嚟嘅豆漿煮成,唔會因為啲冰溶咗而變得淡口,清甜無油,成碗湯飲都得。溝埋黃豆粉會杰啲,但豆味會更加香濃,一啖麵一啖湯咁食係最好嘅食法,唔好就咁夾一撮麵咬呀。 韓宮 地址:紅磡黃埔新村民兆街16號地舖 電話:2334 5567 營業時間:星期一至日:12:00-23:00   拉麵來老闆同2010﹣2011年度「全日本拉麵大賽」獲獎嘅日籍拉麵師傅小林宏結緣之後,一齊為香港食客調配出唔同口味嘅拉麵。老闆話日本其實有好多五花八門嘅拉麵,唔係得豚骨湯底、味噌湯底同醬油湯底咁單調。 旺角分店同總店一樣用返日本懷舊feel嘅裝飾,有時空穿越嘅感覺。 未食有機豆乳擔擔冷麵(HKD92)之前,小編以為會好辣,點知一飲啖湯原來係重有機日本豆奶嘅清甜味,之後先慢慢滲出輕微鹹鹹辣辣嘅豆板醬味道,好啱夏天食。湯底預先雪凍咗,而自家製拉麵過冷河之後會更加彈牙爽口,呢樣亦係佢哋嘅賣點之一。配菜用有機豆腐、日本青瓜、日本芝麻、日本京蔥同豬肉碎,集清新、爽甜同香口喺同一碗麵,如果想食齋仲可以走肉碎添。注意:呢個麵係期間限定,10月左右會轉做大閘蟹拉麵,到時想食要等出年喇。 拉麵來 地址:旺角黑布街23號地下 電話:2715 0811 營業時間:星期一至日: 12:00-23:30 拉麵來(總店) 地址:大坑浣紗街20-22號地下B舖 電話:2808 4468 營業時間:星期一至五:11:30-16:00;18:00-22:30;星期六、日及公眾假期:11:30-21:30   大角咀愈來愈多餐廳,慶麵都喺度插旗。老闆身兼大廚,原本想學上海菜,但機緣巧合之下接觸川菜之後,發現佢變化多啲。加上老闆鍾意食辣,所以餐廳就以川菜做主打。 「慶」字嘅來由原來係老闆爸爸個名,細個係爸爸教佢煮餸,咁開餐廳當然要紀念一下啦。 冰火冷麵(HKD34)顧名思義又凍又火辣辣啦!雖然係中菜,但麵底揀咗比正常粗嘅拉麵,老闆話咁樣啲汁會更易掛上麵。質地煙煙韌韌,口感唔錯。撈麵嘅汁用咗幾種辣椒——青麻椒、野山椒同指天椒秘製而成,味道由開頭嘅辣到後尾會變成麻辣,變化出唔同層次。小編食到一半飲啖水,麻辣嘅感覺即刻衝擊成個口腔,愛好食辣嘅朋友必試! 慶麵 地址:大角咀角祥街2號J地舖 電話:2609 0966 營業時間:星期一至日: 12:00-21:00

0

【摩登優越川滬菜館】川上龍

嚟到尖沙咀海防道有一間川菜館川上龍,係由4名80後合作開設,感覺好摩登,無論食物、環境抑或服務都非常優質。除咗可以食到麻麻辣辣嘅川菜之外,仲同時可以品嚐到滬菜。有咁多選擇,無論你食唔食到辣,都可以同朋友一齊嚟試下! 餐廳室內燈光較為昏暗,裝潢古雅但唔老氣,古色古香中帶點摩登,低調之中盡見講究別緻。窗邊位置仲可以一邊食飯邊望住窗外榕樹,非常寫意。 招牌雞煲(半隻)(HKD168)可選半隻雞或全隻,一打開蓋,香辣雞味即時湧出!用十多種香料,包括花椒、小茴香、十三香等等製成醬汁。雞煲上檯後再以電磁爐加熱。食落味道香濃惹味,雞肉嫩滑,即使食到落底都仍然保持到鮮嫩口感,而且好入味,越食越香濃。不得不提,雞煲內放有上海年糕,非常入味又飽肚。辣度有大、中、正常、小辣任你揀。 四川麻婆豆腐(HKD78)麻辣惹味,豆腐非常滑,肉碎唔太肥食落入味又有肉嘅鮮味同彈性,用呢個汁撈飯一流! 辣子雞(HKD168)辣椒同雞粒都非常足料,辣勁十足,又夠麻夠香,唔食得辣嘅朋友記得要求小辣呀! 食完麻辣,可以試試夠晒香噴噴嘅孜然豬仔骨(HKD98)。豬仔骨先用孜然粉醃過,炸熟之後再用孜然粉快炒,香味非常強烈!炸過嘅豬仔骨仍然保持到肉汁,外脆內軟,佐酒一流。 糯米蟹(450g)(HKD288)糯米飯好香軟,每粒糯米飯都煙韌有彈性,粒粒分明得嚟少少黏身。再加埋蟹肉再多咗一重海鮮味,更顯得味道鮮甜,一個人食晒成個糯米飯不是夢! 川上龍 地址:尖沙咀海防道38-40號中達大廈3樓 電話:2377 4567 營業時間:星期一至日:12:00-17:00;18:00-23:00