Tagged: 希慎廣場

0

【勁綿滑!日本冠軍卷蛋糕】8b DOLCE

原來喺大阪已經有18年歷史既冠軍日式卷蛋糕品牌8b DOLCE早喺幾個月前進駐銅鑼灣希慎廣場6樓!所有產品都由大阪神戶直送,品質絕對有保證。店員非常細心招呼,一問之下發現呢個蛋糕喺韓國爆紅,打入韓國市場好快就開立多過10間分店。 相信大家對瑞士卷絕對唔會陌生啦,但經日本人改良之後,卷蛋糕厚度同口感都大幅提升,裡面個餡增加份量,近年風靡全個亞洲。原來鎮店之寶係呢個「原味卷蛋糕」(HKD178),喺日本卷蛋糕比賽臝過冠軍,好巴閉嫁! 蛋糕外層勁綿,差不多做到梳乎里咁鬆軟。裡面個生忌廉仲勁,用北海道3.7牛乳再抽出70%水份令到成個生忌廉特別濃郁香滑,一放入口你就明點解會拎到冠軍!食之前記得要解凍晒先至好食呀,如果唔係就食唔出真正口感,嘥左。 除左原味其實都仲有朱古力、士多啤梨、宇治抹茶捲入相同味道既生忌廉,有部份味道仲會增添果肉,口感更豐富。 想特別推介下最近新推出既味道,「宗兵衛抹茶味」(HKD258)望個樣都知道要做到咁深綠色,抹茶濃郁程度要極高!抹茶控又要出動喇! 驚食唔到咁大個卷蛋糕,可以試熱帶小甜圈(HKD33-36)過下口癮。兩塊蛋糕夾住同樣滑溜既生忌廉,有多款口味選擇,其中最新出係蘋果百爵茶味! 產品款色好多,連雙層芝士撻(HKD168)都有,特別之處係兩層之間夾左一層檸檬衣,可以平衡芝士味道,做法好有心思。 買任何產品滿HKD580,仲會送個8b Dolce哈哈笑杯添! 8b Dolce 地址:銅鑼灣軒尼詩道500號希慎廣場6樓628號舖 電話:9639 3999 營業時間:星期一至四,日: 10:00-22:00 星期五至六: 10:00-23:00

0

【北海道 真 ‧ 湯底】梅光軒

銅鑼灣希慎地庫有個超市Jasons,裡面有間拉麵店「梅光軒」,外表好似好低調,其實大有來頭!本店源自北海道號稱拉麵王國嘅「旭川」,1969年開業,成為第一間得到旭川拉麵大賞之【最優秀拉麵大獎】嘅拉麵店,仲未講完,佢間北海道本店亦喺2012年被選為米芝蓮推介食店!係咪估唔到佢咁威威豬呢? 可能喺依一刻你就會諗,車,係威都係北海道威啫,香港點同。咁你就錯喇!香港間梅光軒所用嘅湯底由北海道急凍直送,成個湯頭裡面包括每一滴水都保存住北海道原汁原味,問你服未!係咪真係要試下先。 首先食人氣No.1嘅旭川拉麵(HKD75),湯頭用豬骨、雞、沙甸魚、昆布, 熬煮多過10個鐘,有濃郁鮮味,整體味道比較清淡。 用心望下啲筍,同一般拉麵店扁扁一塊嘅筍係有分別嫁!連筍都係北海道直送,條條又厚身又夠爽脆,加多20蚊就可以再追加多8條! 另外就係香港限定麻辣拉麵(HK85),味道一樣做得非常細緻,係重口味之選,仲有半隻流心蛋添。見唔見到中間個蒜蓉醬,好好味啊。 人氣小食之一芝士餃子(HKD42),望到啲拉絲就知道點解係人氣小食啦! 雖然大家近年來都食韓式炸雞多,但係依個日式炸雞(HKD38)配埋個芝麻醬都唔輸蝕嫁,一樣好味。同場加映,梅光軒對面有間木屋仔放住好多日本口垃濕,樣樣都好似好好味。 試左個Wasabi味北海道魷魚絲(HKD90),好正,力推! 梅光軒 銅鑼灣軒尼詩道500號希慎廣場B2層Jasons‧Food & Living內 星期一至星期日:10:00 – 22:00 電話:28703072