Tagged: 平價麵包

0

【超值麵包小店$8自選三個大麵包 香軟斑蘭蛋糕配滑溜蛋撻】平霸

平時喺連鎖麵包店想用8蚊買一個包都未必買到,今次竟然俾平霸喺元朗搵到呢間鴻運麵包餅店,而且係8蚊有三個麵包呀,仲有大把款式揀,一星期早餐食足七日都得,簡直係終極慳錢之選!除咗麵包之外,呢度啲蛋撻都好受街坊歡迎㗎,3蚊一件,買五送一係咪夠晒抵食先? 呢間街坊麵包店喺橫街入面,舖頭細細但有多款麵包、蛋糕同酥點。同好多舊式麵包店一樣係前舖後工場,店內嘅出品都喺自設嘅麵包工場每日新鮮即製。 8蚊3件喎,平霸梗係唔執輸,又揀返啲嚟試吓先!唔好以為平價麵包就冇乜款,數數吓都有12款俾你揀。 小編揀咗墨西哥包(左)、蒜蓉包(中)同沙律火腿包(右)(共HKD8)。三款賣相正正常常幾大件,長型麵包仲有成8吋長,而且拎上手仲熱辣辣㗎。當然3蚊唔使就有一個麵包,都唔期望味道會特別有驚喜,但呢間麵包店啲麵包品質都算唔錯,三款都夠鬆軟又有麵包香,大件夾抵食。 最香嘅就梗係新鮮出爐嘅蒜蓉包啦!平霸買完拎住佢喺街度行都keep住聞到陣蒜蓉香呀。 而呢款沙律火腿包就最抵食喇,面頭有兩片幾長嘅火腿,再加埋沙律醬同燒香咗嘅芝士,味道就冇咁單調喇。 呢個墨西哥包就不過不失啦,略嫌面頭層脆皮比較薄,但麵包質地都幾鬆軟。 除咗麵包,仲留意到唔少人買呢度嘅蛋撻(HKD3),買五送一嘅蛋撻HKD15就有6個,價錢幾平,而且有酥皮同曲奇皮可以隨意配搭。 蛋撻入面,酥皮同蛋漿嘅比例幾適中,個皮唔會太厚,但酥皮嘅厚度就有啲唔平均。蛋撻嘅蛋味唔算好濃郁,偏甜有淡淡嘅蛋香,但口感幾滑身,酥皮亦都脆口。 最後就試埋呢度嘅三角蛋糕(HKD5),HKD13就有3個,每個都係獨立包裝,size都算大,早餐食都幾夠飽。呢款蛋糕有原味、朱古力同斑蘭3種口味,綠色斑蘭味呢款一拆開個包裝就聞到一陣陣椰香,食落個椰味都真係幾重,口感仲好柔軟,下次再試埋其餘兩款口味先!   鴻運麵包餅店 地址:元朗俊賢坊18號權益大樓地下9號舖 電話:2479 9117 營業時間:星期一至日:06:00-20:00

0

【佐敦餅店銅板價懷舊酥點 雙層豆沙酥香甜鬆化】平霸

今次小編經過佐敦呢間飽餅皇,唔係想介紹麵包控食嚟買包,而係發現擺喺門口嘅酥餅櫃竟然有唔少懷舊酥餅。選擇夠多之餘,大部分都係HKD4.5-5,望落幾抵食喎,一於揀返幾個試吓先! 同一般舊式麵包店一樣,店入面有工場自製各款新鮮出爐嘅麵包同糕餅。平霸喺下午近六點去到嘅時候,酥餅櫃雖然有啲款式幾乎賣晒,但仍然有唔少選擇,驟眼睇大概有成十幾款酥餅俾你揀。 佢哋外層嘅酥皮基本上款款都一樣,但包住唔同餡料就化身成各款式傳統酥點。酥餅面頭掃上蛋漿再焗,有啲又灑上黑芝麻,賣相吸引。 老婆餅(HKD4.5)裡面有傳統嘅冬瓜蓉,入口幾清甜又唔漿口,連酥皮一齊食就唔會太甜膩。唔少食客試過都大讚呢款酥點,唔輸俾啲大餅家㗎。 最有驚喜就係呢個豆沙酥(HKD4.5)!金黃嘅酥皮外層拎上手冇老婆餅咁鬆散,質地比較厚實。搣開竟然係有兩層豆沙餡,餡料放得好多,一啲都唔慳!豆沙餡整到起沙,亦有少少紅豆微粒。唔使5蚊就食到咁足料嘅酥點真係幾抵喎。 皮蛋酥(HKD5)入面包住蓮蓉同皮蛋,傳統嘅皮蛋酥放酸薑,呢款同樣食到淡淡薑味,但就冇食到有薑粒。 而呢款圓碌碌嘅蛋黃酥(HKD5)內餡就係鹹蛋黃同蓮蓉,啲蓮蓉唔會太甜,食落好似月餅咁喎。不過略嫌啲鹹蛋黃比較少、唔夠香。   飽餅皇 地址:佐敦佐敦道37號G地下 電話:2388 7515 營業時間:星期一至日:06:00-00:00

0

【11蚊4粒手掌咁大麻糬球 鮮果雪米糍勁Creamy抵食】平霸

荔枝角呢間將軍堡有茶餐廳同麵包店,主要做附近街坊生意,唔少客人對佢哋麵包店嘅甜品糕點都讚口不絕,價錢仲好貼地,今次平霸就睇中咗麻糬球同埋雪米糍喇!有幾抵食即刻睇落去啦! 喺正大馬路嘅將軍堡有兩個相連舖位,一邊係茶餐廳、另一邊就係麵包店。 下午4點幾去到,麵包款式唔算好多,驟眼睇有廿款左右,反而甜品糕點就比其他麵包舖多,至少有十幾廿款,而且賣相精緻,唔係普通西餅款,價錢仲幾平。 睇睇吓原來係QQ麻糬球(HKD11/4粒) ,size真係細過隔離個包少少咋,大過平時啲麻糬球成個有多喎,11蚊仲有4粒,可以隨意配搭芝士或朱古力兩種味,平霸未食已經覺得執到寶。 嗱!平霸冇誇張㗎,呢粒芝士味麻糬球真係有手掌咁大,面頭有少少烤過嘅芝士,但係買嘅時候應該已經出咗爐一段時間,唔夠熱辣辣咁都正常嘅。粒麻糬球扁身少少,入面幾飽滿,唔似一啲麻糬球咁空心嘅。咬落幾煙韌,仲有少少軟心嘅芝士喺入面添,圍起一粒麻糬球唔使3蚊,抵呀! 朱古力味麻糬球就比芝士味嘅細粒少少,但都幾乎遮得晒成隻手掌。面頭有啲焗溶咗嘅朱古力粒,但唔算有好多。食落朱古力味反而比想像中濃,見到入面都有啲溶溶哋嘅朱古力喺度,用咗比較苦嘅黑朱古力粒嚟整,所以朱古力味相對上比較重。 各款雪米糍(HKD12)亦係舖頭嘅熱賣之選,有芒果(左)、藍莓(中)同士多啤梨(右)三種口味俾客人選擇。雪米糍並唔係平時細細粒嗰種,比長洲糯米糍更大,Size同拳頭差唔多。唔好睇佢大大件又賣得咁平就以為揸流攤呀,入面唔係就咁用果醬㗎,而係放鮮果做餡,全部真材實料,係咪抵食先? 三款雪米糍都用好薄嘅糯米皮包住水果同鮮忌廉,買嘅時候店員會喺凍櫃拎出嚟,包住雪米糍嘅皮依然好薄好軟,完全唔覺得乾同硬。入面啲Cream好滑身,加埋鮮果食唔覺膩,食晒成個都冇問題!芒果雪米糍(HKD12)啲芒果分量都幾多,有成三、四嚿,芒果顏色幾深黃仲幾甜,唔係用啲好酸嘅生芒果,感覺有少少似食緊芒果班戟咁。 藍莓雪米糍(HKD12)就有少少唔同,因為藍莓本身冇乜味,所以除咗鮮藍莓之外,仲加咗有果肉嘅藍莓果醬落去,令到藍莓味會出啲。加咗藍莓醬嘅雪米糍就甜身少少,但因為啲Cream冇乜甜味,所以甜度都適中,會食到新鮮藍莓同啲果醬入面嘅藍莓乾,幾有層次感。雖然落咗果醬,但都唔會因此減少鮮藍莓嘅分量,仲有成7-8粒,抵讚呀! 士多啤梨雪米糍(HKD12)就只有新鮮士多啤梨喺裡面,大概兩粒士多啤梨再開邊嘅分量。士多啤梨都算鮮甜,但味道就冇芒果同藍莓味咁濃。因為雪米糍入面勁多Cream,個皮又煙韌,所以係比較難切嘅,成個拎住咬嚟食就最滿足喇!如果唔係即刻食嘅話,最好返去雪多陣,等啲Cream挺身啲,會更加好味。   平霸小評:手掌咁大嘅麻糬球煙韌軟熟,11蚊就有4粒,除返一粒都唔使3蚊,早餐買嚟食兩粒都飽啦,仲有兩粒留嚟當下午茶,窮人恩物呀!除咗麵包抵買,估唔到麵包店嘅甜品都可以咁高質,包住新鮮生果嘅雪米糍,皮夠薄身又唔會穿,成個雪米糍勁Creamy又滑身,加埋鮮果唔會膩,12蚊物超所值! 將軍堡 地址:荔枝角長沙灣道808號香港紗廠工業大廈1及2期地下C2B 電話:2989 1221/2989 1222 營業時間:星期一至日:06:30 – 23:00

0

【大角咀平價包店抗通脹 $3爆餡糯米糍軟熟煙韌】平霸

行經大角咀,突然聞到好大陣麵包出爐嘅香味,唔係誇張,陣麵包香仲愈聞愈濃烈,傳出香味嘅源頭就係呢間香麥屋。入面啲麵包唔止香仲夠晒平,吸引咗唔少街坊入去幫襯。平霸梗係唔執輸,即刻入去睇睇啦! 全部麵包都係新鮮即製,舖頭後面有自家麵包工場,師傅會間唔中出舖面睇吓邊款麵包就嚟賣晒就即刻補貨起勢整喇。平霸短短逗留幾分鐘,已經見到有兩、三款麵包陸續出爐上架,唔怪得成條街都充滿麵包香啦。 以麵包店嚟講,舖面算幾闊落,一入去就有成列麵包櫃,驟眼睇都有三、四十款俾客人揀,選擇多;而且大部分麵包只係賣5、6蚊,相比出面好多麵包店都平一大截啦,款款都咁平唔知點樣揀好呀!另外仲有賣一啲平價西餅蛋糕,不過通常下午先會出,想食嘅朋友仔就要留意吓喇。 玻璃櫃入面見到糯米糍賣3蚊一大粒,仲分別有芒果、紅豆同奶黃三隻味揀,點可以唔試吓呢? 成粒咁鮮黃嘅芒果糯米糍(HKD3),面頭佈滿椰絲,個皮夠軟熟又煙韌,搣開入面真係有新鮮芒果㗎,芒果分量唔算多,有一、兩粒果肉咁,但係都食得出新鮮芒果嘅鮮甜,又冇酸味,正喎!加上啲椰絲都幾多吓,食落椰子味幾出,同芒果味match得到,但因為有好多椰絲喺粒糯米糍面頭,會食得有少少麻煩。 就咁睇外表唔會估到佢就係奶黃糯米糍(HKD3),呢粒糯米糍拎上手都幾「聚手」,個皮一樣咁腍,一咬開入面原來都包咗幾多餡。入面啲餡就係淡黃色嘅,食落幾creamy,啲奶黃又夠滑,比芒果嗰款更重椰奶味。 呢粒紫色就係紅豆糯米糍(HKD3)喇!啲紅豆蓉真係多到成口都係,幾濃紅豆味,仲食到紅豆粒添。其實三款口味都冇得輸,但平霸最鍾意食紅豆味,因為紅豆同椰奶味又係好夾,連埋個皮食唔會覺得好甜,食到好香嘅豆沙味。值得一讚個糯米糍皮真係好軟熟,唔會有好似雪咗好耐嗰種硬身。除咗本身夠大粒,入面個餡都好足料,兩者比例啱啱好,3蚊真係物超所值! 除咗糯米糍,平霸仲俾佢個朱古力流心包吸引到。 只係賣$5.5係咪真係有流心呢? 朱古力流心包(HKD5.5)可以話係旁邊個墨西哥包嘅朱古力版,面頭有塊薄薄哋嘅啡色脆皮,仲有啲朱古力粒喺上面。買嘅時候呢個包有啲微溫,應該出咗爐一段時間,搣開個包竟然仲見到少少流心,冇凝固晒,但略嫌朱古力漿唔夠多,令到流心效果唔夠明顯。一啖咬落去,軟綿綿嘅包夾住朱古力漿,仲有脆皮口感,味道唔錯喎,朱古力味唔係話好濃,但都對得住呢個價錢啦!   平霸小評:依家啲麵包店嘅麵包好多都係喺其他地方整好再運過嚟,愈來愈少食到新鮮出爐嘅麵包。呢間香麥屋係大角咀嘅恩物,麵包每日新鮮即整,價錢仲咁大眾化,真係好難得㗎。除咗麵包,3蚊一大粒嘅糯米糍亦係舖頭師傅每日自己搓粉整嘅,個皮軟熟又煙韌,啲餡又多,試晒三隻味都唔使10蚊! 香麥屋麵包西餅地址:大角咀大角咀道115號地下4號舖電話:2333 2383營業時間:06:00-20:30