Tagged: 平霸

0

【$4起平食傳統糖餅 鬆化酥脆蝴蝶酥×杏仁條】平霸

今次平霸帶大家去試吓平盡大圍全區嘅老馮餅家,佢哋大部分嘅唐餅都係平民價HKD4件咋。朝早9點鬆啲就去到佢地喺顯俓嘅分店,都有唔少街坊幫襯㗎,店員仲話熱賣嘅嘢假期會好快賣晒,想食要早啲去買喇。 佢哋門市大大隻字寫明「本店只用日本麵粉」,今次真係食平啲又食好啲喇。買嚟當早餐、下午茶仲可以慳返唔少錢添。 英式鬆餅(HKD4/右)size比平常見嘅大1倍。佢外層幾鬆脆,內層就濕潤啲。不過牛油味唔係好突出,不過提子乾就大粒又香喎。 老婆餅(HKD4)嘅酥皮焗到金黃色,包裹住軟綿綿嘅冬瓜蓉,賣相都幾靚,入口鬆軟。內餡仲有啲杏仁片增加口感,成個餅食落甜甜哋唔會膩。 新鮮出爐嘅蛋撻(HKD5)分別有牛油皮同酥皮,牛油皮食落香脆啲,酥皮就鬆化啲,蛋味都幾明顯。如果買半打會再平少少,而且兩款可以任意配搭㗎。 小編覺得最有驚喜係蝴蝶酥同杏仁條(各HKD50/半磅),睇落有少少貴,但其實分量都幾多㗎。蝴蝶酥足足有成23塊,即係HKD2.2一件。而杏仁條都有18條,即係HKD2.8一條,都好抵食!不過食唔到咁多可以買細包裝(HKD10)過吓口癮。呢兩款都標榜手製225層薄脆酥皮,睇吓層次幾豐富! 蝴蝶酥食落好香脆,仲有糖粒集中喺餅邊,甜度適中唔油膩。而杏仁條食落鬆化酥脆,牛油香十足呀,食到尾仲有陣杏仁香,真係食唔停口囉! 招牌脆口曲奇(HKD32/半磅)有4種口味,包括由左至右嘅核桃、伯爵茶果仁、牛奶朱古力杏仁同埋特濃朱古力。唔好以為佢細細盒,數吓有成32塊,即係一蚊一塊咋!小編覺得茶味香濃嘅伯爵茶果仁就最吸引喇。   老馮餅家 地址:沙田大圍顯徑邨街市M25號舖 電話:從缺 營業時間:星期一至日:07:30-19:30

0

【土瓜灣小店掃街食炸物 爆餡韭菜餅+巨型炸雞髀】平霸

平霸搵食搵到去土瓜灣喇!今次就外賣咗三間土瓜灣小店嘅特色炸物,款款都唔超過廿蚊,有唔少食落仲好驚喜添。想知今次試咗邊啲抵食炸物就要睇落去喇!   1. 日昇小食 韭菜餅(HKD15/3件)真係好有驚喜!個皮煎到好金黃,一搣開,入面啲韭菜爆晒餡,係落足料嘅。 嚟到呢度梗要試埋呢款炸豆卜釀魚肉(HKD15/6件),咬開層次分明,魚肉同豆卜本身都有調味,所以唔使加醬汁都夠味   日昇小食 地址:土瓜灣馬頭圍道428號地下C舖 電話:6043 9799 營業時間:星期一至五:12:00-00:30,星期六、日:12:30-00:30     2. 囍囍小食部 轉個彎見到呢間囍囍小食店,廿蚊都唔使就食到大大隻生炸雞髀(HKD18),佢大隻到同塊面差唔多大㗎!雞髀上面嘅粉漿唔算厚,啲皮咬落脆卜卜,肉質夠嫩滑,仲啖啖肉添。 呢度仲有魚柳包(HKD13),雖然入面只有兩條魚柳條都幾單調,但炸魚柳勝在夠脆,而且入面啲魚肉唔乾身,搽咗滿滿嘅千島醬。   囍囍小食部 地址:土瓜灣天光道50號地下 電話:2712 6962 營業時間:星期一至六:08:00-19:00   3. 魚蛋佬 正正喺隔離嘅呢間魚蛋佬同樣主打各款特色小食,成間舖都貼滿Menu,嘢食款式都幾多。 見到魚蛋佬雲吞(HKD10/5粒)就即刻嗌嚟試試佢!個Size就幾迷你,一啖一件啱啱好,店舖亦預先加咗椒鹽提味,連醬汁都唔使落。仲有呢款出面少有嘅「鬼馬雙拼」(HKD11/8條;HKD22/20條),有豬柳條同墨魚條揀,雙拼都仲得!   魚蛋佬 地址:土瓜灣天光道50號地下 電話:從缺 營業時間:星期一至日:10:00-20:30...

0

【荃灣意粉小店足料外賣 $30高質意粉配大碗薯蓉】平霸

今次去到荃灣,又俾平霸搵到高質好味嘅平價西餐喇!呢間喺小巷中嘅小混混主打西式意粉、小食,一間咁低調嘅小店竟然有高質西餐水準,價錢仲夠晒親民,20蚊就食到各式意粉,認真估唔到喎! 呢間意粉外賣店隱身喺荃灣鱟地坊嘅小巷當中,規模都幾細,當日都只有一個店員看舖,由落單到炮製食物都係自己一腳踢。而且呢間小店只做外賣生意,冇堂食位㗎,淨係得一張高身枱俾你喺度立食。 由於呢間小店規模細,Menu上嘅菜式選擇的確唔多。全店食物簡單分為A、B兩區,A區食物每款HKD20;B區可以食物每款HKD12。想試多款嘅,就可以A+B咁揀,都係HKD30咋,仲可以自由配搭添。 今次就嗌一個A+B餐(HKD30)嚟試吓先,揀咗卡邦尼芝士煙肉意粉(單價HKD20)同黑松露野菌芝士煙肉薯蓉(單價HKD12)。呢度啲嘢食全部都係落單後新鮮即煮嘅,不過當時唔多人,店員亦好快手,等咗十分鐘左右,全部食物就到手喇。 先講卡邦尼意粉先,雖然裝意粉嘅外賣碗唔算太大個,但啲意粉裝到滿一滿,分量都幾多,Lunch食都應該夠飽。而忌廉汁沾滿每條意粉,煙肉碎夠多,入口Creamy,意粉亦軟硬適中,有高質西餐廳嘅食物水準。 呢款黑松露野菌芝士煙肉薯蓉同樣都係超晒班!一打開蓋就有好香嘅黑松露味,偏橙黃色嘅薯蓉質地幼滑,面頭淋滿黑松露野菌汁,仲有細細塊嘅煙肉片增加口感。不過略嫌煙肉比較少、芝士味唔夠突出。而裝薯蓉嘅外賣碗比裝意粉嘅細少少,但分量就同KFC個大薯蓉差唔多,單食呢個做下午茶都幾滿足喎。 平霸仲額外買咗碗蜆肉周打忌廉濃湯(單價HKD12),一樣充滿驚喜呀!雖然只係十幾蚊,但質素一啲都唔Hea。一潷就有勁多蜆肉同細細粒嘅帶子仔,仲有大量粟米同薯仔呢啲配料喺入面添。每一啖都濃稠足料,非常抵飲!   小混混 地址:荃灣鱟地坊80-84號華成樓B座地下B3號舖 電話:5922 8600 營業時間:星期一至日:12:00-22:00 (星期三休息)  

0

【新開平價小店$32兩餸飯 必食嫩滑蒸魚家常菜】平霸

深水埗主打兩餸飯嘅眾發美食開咗一個月就儲落大班捧場客,成為近期嘅街坊飯堂,靠嘅係啲乜?咪就係又平又好食囉!平霸親自幫襯過,發現呢度$32兩餸飯嘅菜式選擇多,包埋例湯或飲品,食物質素仲幾好添,真係平價飯嘅首選。而學生著住校服嚟食更只需$30就食到,絕對係良心小店,屋企冇飯開不妨嚟食佢哋充滿人情味嘅家常菜喎。 呢間新開嘅平價飯堂專賣大碟兩餸飯(HKD32),如果想多啲選擇,就可以加HKD8多一款餸喇。另外包埋例湯、汽水、咖啡或茶其中一款,好似好抵食咁,即刻幫襯試吓先。 小店話就話朝早十點開始營業,但平霸嚟到嘅時候啲餸菜仲陸續出緊,直至將近12點就有最多菜式選擇。眼前所見有近廿款菜式新鮮煮起,而菜式日日唔同。每盤餸菜底下都有熱水座熱,keep住熱辣辣。 今次就食得豐富啲,嗌個兩餸飯(HKD32)再加一個餸(+HKD8),小編揀咗梅菜肉餅、豉汁蒸鯇魚同埋咖喱薯仔炆雞。如果喺店內堂食,都會好似碟頭飯咁樣上枱,飯同餸放埋一齊,冇得分開裝嘅,所以揀有好多汁嘅餸嗰陣就要有心理準備喇。飯量正常,想要多飯或少飯都可以提早同店員講,調整相應嘅飯量。 呢塊咁厚身嘅肉餅質地軟腍,唔會蒸到乾晒,而入面撈咗唔少梅菜,味道略鹹,餸飯食就啱啱好,係住家菜嘅味道呀! 平霸食過咁多間兩餸飯,唔少舖頭嗌蒸鯇魚呢類貴啲嘅食材都要加錢,但呢度不但唔使加錢,塊鯇魚仲好厚肉,一啲都唔慳成本。魚肉食落新鮮嫩滑,連埋有膠質嘅魚皮,啖啖鮮味呀。 而跟飯送嘅是日例湯係粉葛豬骨湯,呢度嘅老火湯冇加味精,飲落清甜,唔係又鹹又冇料嘅款;仲有啲粉葛湯渣俾你咬吓添。   眾發美食 地址:深水埗長沙灣道90號地舖 電話:5214 5815 營業時間:星期一至日:10:00-22:00

0

【旺中小食店大大盒炸物$15三款 脆口惹味任加30種醬料】平霸

旺中出名多平嘢,今次平霸就帶大家去到一樓嘅美食立食區度尋寶,聽聞呢間365炸雞嘅小食性價比夠晒高,$15三款大大盒炸物,仲有成30種調味醬料任加?!想知質素如何就睇埋落去啦! 呢間小食店舖面細細,門面貼滿餐牌,有咩賣都一眼睇晒。 $15就有三款小食似乎幾抵食喎,梗係要試試佢啦!一睇個餐牌真係眼都花埋,炸物嘅選擇竟然有成三十種咁多,有選擇困難症嘅朋友真係唔知點揀好。 平霸最後揀咗炸雞粒、拉絲芝士條同啤酒薯條(HKD15/3款)。呢度啲小食都係即叫即炸,小編落單前未有人點嘢,等咗5分鐘左右就有得食。本來以為15蚊應該都會細份啲,點知竟然幾大盒喎,每款分量望落唔少之餘,拎上手仲熱辣辣添! 呢款拉絲芝士條真係拉到絲㗎!一咬落去就有外脆內軟嘅質感,入面嘅水牛芝士味道唔算好濃,但都幾香口。而啤酒薯條嘅炸漿同平時食開嘅唔同,個感覺有啲似食緊薯格咁,雖然冇咩啤酒味,但鹹香十足好惹味。 而炸雞粒分量唔少,都有成8、9粒,炸漿夠薄又煮得透心,成粒外至內都熱辣辣!加埋唔同嘅調味料就試到各種風味喇。 特別要介紹呢間小食店嘅一大特色,就係有成30幾種醬料嘅醬料架!客人可以依照自己嘅喜好自由加入唔同嘅調味醬料,西、日、韓、台等口味都有,好有新鮮感。除咗平時食開嘅醬料外,仲有比較偏門嘅調味料,好似麻辣小龍蝦、黃金鹹蛋黃、Pizza味等等。 除咗性價比極高嘅炸物之外,呢度嘅芝士撈麵都幾平喎。其中一款就係吉列芝心豬扒芝士撈麵(HKD18),俾吉列脆皮包住嘅豬扒肉質夠腍,仲有一層融化緊嘅芝士夾喺中間,雖然啲芝士冇一咬即流心嘅效果,但用兩款芝士mix埋嘅夾心都對得住佢個價錢有餘。而芝士撈麵就似放咗大量芝士粉落去,味道偏鹹,食晒成碗會有少少膩。另外,仲有海鮮芝士撈麵(HKD20)、什錦芝士撈麵(HKD18)同招牌炸雞中翼芝士撈麵(HKD18)俾你揀,如果芝士味唔啱你食,全部亦可以免費轉沙爹汁。如果肚仔餓,平平哋食佢嚟填肚都係唔錯嘅選擇。 舖頭不定期都會做買一送一優惠,今期就有三式燒賣(原價HKD15)。本身7粒一份嘅燒賣買一送一後有成14粒,唔買都對唔住自己啦。話明三式燒賣,裡面其實有黑松露豬肉燒賣、蝦肉燒賣同魚肉燒賣三款。燒賣嘅size比平時食開嘅細粒少少,但口感都幾彈牙,而且有三種口味食晒都唔會悶,其中黑松露豬肉燒賣就最好食。不過略嫌蒸得過熟,有啲燒賣皮同肉會分離。   365炸雞 地址:旺角彌敦道688號旺角中心一期一樓F88A 電話:6279 7023 營業時間:星期一至日:11:30-23:00

0

【食勻荃灣路德圍平價小店 $40內正餐甜品食到飽】平霸

荃灣路德圍不嬲出名多平嘢食,今次平霸就試吓點樣唔使40蚊就可以食到飽,提供一條「路德圍平食路線」俾大家參考吓啦!   第一站:新宏利粥麵 呢間新宏利粥麵,睇佢個招牌咁殘舊就知佢屹立多年,主打傳統嘅港式粥品、油器,價錢仲要相當親民添。舊舖轉角仲連住間新舖,想食平價粥品又想坐得舒服就可以行過隔離喇。 呢度嘅粥品介乎HKD17-19不等,今次就叫左一碗艇仔粥(HKD17)。灑滿蔥花嘅艇仔粥有正常湯碗大小,仲裝得幾滿添。一撈就撈到好多料,有豬皮、魷魚同肉碎,分量亦都唔喎。粥底煲得夠綿,食落有米香,而且呢碗粥本身嘅調味已經好夠,唔使再落任何醬料喇。依家平過20蚊嘅粥品真係買少見少,更難得係佢咁足料,整體質素又ok,食完都飽咗一大半。   新宏利粥麵 地址:荃灣路德圍75號 電話:從缺 營業時間:星期一至日:06:00-23:00   第二站:桜Sakura 再行吓就見到呢間日式手卷店桜Sakura排晒長龍喎,呢度嘅手卷價錢平均都平過出面,唔怪得咁多人排啦。最平嘅12蚊有交易,有成十款口味俾你揀添。 小編試咗大熱嘅三文魚手卷(HKD12),拎上手分量正常,有兩大片三文魚,而且唔係薄切hea你㗎。而最令小編驚喜嘅係原來塊三文魚片好長,食到尾都仲有呀!加上食到最後一啖塊紫菜都係脆口,質素唔錯。   桜Sakura 地址:荃灣荃興徑8號昌泰大樓地下4B號舖 電話:從缺 營業時間:星期一至日:13:00-00:00   第三站:贊和豆品 嚟到路德圍,又點可以唔食呢個遠近馳名嘅3蚊豆腐花呢?!其實呢間贊和豆品同隔離嘅亞玉豆腐花都係做緊3蚊一碗豆腐花,雙拼都唔使加錢,不過見到贊和豆品嘅芝麻糊啤點賣得平啲,最後就揀咗佢嚟食喇! 本來以為咁平芝麻糊豆腐花(HKD3)會得細細碗,但竟然有成個湯碗咁大!會唔會太抵食先?今次嗌咗芝麻糊拼豆腐花,試晒兩款甜品。熱辣辣嘅豆腐花夠滑,亦唔會碎濕濕,食落有淡淡嘅豆香味。而芝麻糊都算稠身,芝麻味唔係話好濃郁,但配埋豆腐花就啱啱好夠甜,唔使另外加糖。如果唔食豆腐花,單買芝麻糊都只係6蚊咋。全部都係即點即潷熱辣辣,冬天食認真一流。   贊和豆品 地址:荃灣荃興徑6號昌泰大廈地下5A舖 電話:從缺 營業時間:星期一至日:11:00-00:30   第四站:康樂茶冰廳 食到呢度已經幾飽,不過喺贊和豆品對面嘅康樂茶冰廳,五點之後所有包點都係兩蚊雞一個呀!平霸第一次行過仲見到菠蘿包,再返轉到就得返餐包,即刻買埋做聽日嘅早餐啦。食勻四間都係用咗HKD34,仲可以變做兩餐,夠晒抵呀!   康樂茶冰廳 地址:荃灣荃興徑21號地下荃發大廈D座...

0

【深水埗良心黃店抵食套餐 嫩滑口水雞+勁量撈粗】平霸

一聽見去深水埗西九龍中心美食廣場,唔少人第一時間都諗係劣食,但平霸今次要幫佢平反吓。皆因呢度都可以搵到抵食,而食物質素又唔錯嘅良心小店㗎,89美食就係其中一個好例子喇! 呢間小店除咗貼滿舖頭嘅食物餐牌之外,仲有近期最靚嘅「連儂牆紙」做裝飾,成間店面黃到發光呀!不過講返舖頭啲嘢食先,呢度嘅飯或撈麵套餐價位係HKD35-38,跟餐有油菜或飲品,似乎幾抵食咁喎,唔知食物質素又係點呢? 見到舖頭嘅招牌口水雞飯(HKD38)睇落幾吸引,仲可以跟汽水添!雖然係快餐,但呢度好貼心咁將飯同餸分開上,等飯唔會嗦晒啲汁。飯同雞嘅分量驟眼睇落都幾多,口水雞大約有8、9件,大部分都係肉,唔係得啲骨俾你。而白飯以平時嘅碗仔飯嚟計,差唔多有一碗半,真係胃口細啲都食唔晒。 鋪咗上飯面嘅口水雞都有白飯嘅一半,仲有啲沾滿口水雞醬汁嘅青瓜,食落非常入味。而雞肉夠厚身,肉質算嫩滑唔嚡口,入味之餘都食到少少雞味;質素認真唔錯,叫佢做「招牌」都唔係冇原因嘅。 另外嗌埋柱侯牛腩撈麵配油菜(HKD35)試吓先!見到佢真身嘅時候真係俾佢嚇親,啲麵量超多,可以話係勁量級。今次平霸就試咗撈粗麵,亦見到有人嗌幼麵嘅賣相都唔錯。 牛腩有4-5嚿,正常size嚟嘅。呢度嘅牛腩煮得軟腍,唔癡牙,不過就有少少乾身。 而撈麵嘅色水都幾靚,麵質較硬,如果淋多少少牛腩汁就更好喇。 呢度啲套餐可以免費配油菜或飲品,平時想食碟油菜閒閒哋都要加十蚊、八蚊啦,但呢度就跟餐送埋,仲要分量正常喎。不過係是日油菜,冇得揀菜嘅種類。飲品就係平時普通嘅罐裝汽水,但唔使加錢都幾好吖。   89美食 地址:深水埗欽州街37號西九龍中心8樓美食廣場9號舖 電話:6389 9833 營業時間:星期一至日:12:00-22:00

0

【超值麵包小店$8自選三個大麵包 香軟斑蘭蛋糕配滑溜蛋撻】平霸

平時喺連鎖麵包店想用8蚊買一個包都未必買到,今次竟然俾平霸喺元朗搵到呢間鴻運麵包餅店,而且係8蚊有三個麵包呀,仲有大把款式揀,一星期早餐食足七日都得,簡直係終極慳錢之選!除咗麵包之外,呢度啲蛋撻都好受街坊歡迎㗎,3蚊一件,買五送一係咪夠晒抵食先? 呢間街坊麵包店喺橫街入面,舖頭細細但有多款麵包、蛋糕同酥點。同好多舊式麵包店一樣係前舖後工場,店內嘅出品都喺自設嘅麵包工場每日新鮮即製。 8蚊3件喎,平霸梗係唔執輸,又揀返啲嚟試吓先!唔好以為平價麵包就冇乜款,數數吓都有12款俾你揀。 小編揀咗墨西哥包(左)、蒜蓉包(中)同沙律火腿包(右)(共HKD8)。三款賣相正正常常幾大件,長型麵包仲有成8吋長,而且拎上手仲熱辣辣㗎。當然3蚊唔使就有一個麵包,都唔期望味道會特別有驚喜,但呢間麵包店啲麵包品質都算唔錯,三款都夠鬆軟又有麵包香,大件夾抵食。 最香嘅就梗係新鮮出爐嘅蒜蓉包啦!平霸買完拎住佢喺街度行都keep住聞到陣蒜蓉香呀。 而呢款沙律火腿包就最抵食喇,面頭有兩片幾長嘅火腿,再加埋沙律醬同燒香咗嘅芝士,味道就冇咁單調喇。 呢個墨西哥包就不過不失啦,略嫌面頭層脆皮比較薄,但麵包質地都幾鬆軟。 除咗麵包,仲留意到唔少人買呢度嘅蛋撻(HKD3),買五送一嘅蛋撻HKD15就有6個,價錢幾平,而且有酥皮同曲奇皮可以隨意配搭。 蛋撻入面,酥皮同蛋漿嘅比例幾適中,個皮唔會太厚,但酥皮嘅厚度就有啲唔平均。蛋撻嘅蛋味唔算好濃郁,偏甜有淡淡嘅蛋香,但口感幾滑身,酥皮亦都脆口。 最後就試埋呢度嘅三角蛋糕(HKD5),HKD13就有3個,每個都係獨立包裝,size都算大,早餐食都幾夠飽。呢款蛋糕有原味、朱古力同斑蘭3種口味,綠色斑蘭味呢款一拆開個包裝就聞到一陣陣椰香,食落個椰味都真係幾重,口感仲好柔軟,下次再試埋其餘兩款口味先!   鴻運麵包餅店 地址:元朗俊賢坊18號權益大樓地下9號舖 電話:2479 9117 營業時間:星期一至日:06:00-20:00

0

【深水埗平價糕品撼贏米芝蓮老字號 $7大件紅豆糕軟腍足料】平霸

坤記糕品係深水埗糕點界老字號,仲攞埋米芝蓮咁巴閉梗係多人識啦,但原來街尾仲有另一間同樣賣糕點嘅小店都好評如潮㗎。聽講呢間鴻發涼茶嘅傳統糕點足料又抵食,唔少客人仲話佢撼得贏米芝蓮老字號添。平霸今次就試晒兩間嘅出品,睇吓誰勝誰負! 先去米芝蓮老字號坤記糕品專家,一去到就已經見到好多客人幫襯,人氣真係有返咁上下喎。呢度糕點款式選擇都算多,大約有十種。而全部糕點都一個個入晒袋,獨立包裝夠衛生。揀咗紅豆糕、芝麻糕同茶果三件糕點,盛惠HKD31.5。 之後嚟到鴻發涼茶喇,舖頭係由一間地舖分拆出嚟,細細間唔多起眼。以為涼茶舖賣嘅糕點質素一定麻麻哋?錯喇!食過嘅客人都大讚佢哋嘅出品高質,食過返尋味㗎。不過呢間小店嘅糕點量冇坤記咁多,全部都係賣晒就冇。平霸去到已經冇晒芝麻糕、芋頭糕,就買咗紅豆糕、綠豆糕、雞屎藤同蕃薯餅嚟試。 左邊係鴻發出品嘅紅豆糕(HKD7),半圓形嘅紅豆糕大大件,大約係湯碗嘅一半;而右邊坤記嘅紅豆糕(HKD11)就長方形一嚿,size就細三分一。望落似乎鴻發嘅抵食啲,不過試埋味道再定斷! 左邊嘅紅豆糕入面有超多紅豆粒,夠晒足料,而且入口軟腍,啖啖紅豆蓉,食落仲有陳皮香,好似飲緊煲到起晒沙嘅紅豆沙咁;相反,右邊紅豆糕嘅紅豆量睇落就冇咁多,糕點質地再腍身啲,但紅豆就硬咗少少,冇陳皮味。 而鴻發除咗紅豆糕之外,仲有綠豆糕(HKD8)賣添。成塊有手掌咁大,綠豆煮得夠腍,綠豆味好濃,食落唔太甜,係低糖健康之選。 而坤記就有招牌嘅九層芝麻糕(HKD11),層層分明咁係睇得見嘅層次呀,質地就好似平時食開嘅千層糕咁黏糯、軟綿綿。本來想比較吓兩間嘅芝麻糕,點知鴻發竟然賣晒,唯有下次再試。 雖然芝麻糕賣晒,但鴻發店主就推介咗呢款有芝麻餡嘅蕃薯餅(HKD6),甜食嘅蕃薯餅煙煙韌韌咁,外表微微煎香,芝麻餡都算多,似係濃縮版嘅芝麻糊。而另一塊冇餡嘅蕃薯餅都係同價。 最後就試埋同樣都係花生餡嘅茶果。鴻發嘅雞屎藤茶果(HKD8)個皮比較硬,入面啲花生餡就乾身啲,質感同味道都同糖不甩啲糖花生差唔多,呢款茶果另有甜嘅芝麻同鹹嘅眉豆口味。而坤記嘅中山茶果(HKD9.5)就比較軟身,入面啲花生餡濕到黏埋咗一嚿,仲有種好似澀澀哋嘅橙皮味,都幾特別。呢款就另有紅豆沙、椰蓉同沙葛蝦米餡,口味都幾多元化。 平霸小評:試晒咁多款糕點之後,平霸就覺得鴻發涼茶嘅糕點全部都好足料、低糖,食落唔會太甜膩,其中有陳皮香嘅紅豆糕就最有驚喜。而且糕點定價唔高,比坤記賣得平但更大件。而坤記糕品嘅糕點品質其實都唔差,不過加咗價之後價錢就偏貴,唔多抵食喇。所以不論喺價錢、分量同質素方面,都係鴻發涼茶嘅出品佔優,可以話係撼贏坤記呀。   鴻發涼茶 地址:深水埗北河街128號地下 電話:2985 1846 營業時間:星期一至日:10:00-20:30 坤記糕品專家 地址:深水埗福華街115-117號北河商場地下10號舖 電話:2360 0328 營業時間:星期一至日:08:00-23:00