Tagged: 強國

0

【「維他牛」A貨扮港牌 強國山寨版乜都抄一餐】食焦

強國出品,有時真係笑死又嚇死㗎!成日都聽見有唔少乜乜山寨版出現,正版同A貨抄到十足,好似最近就發生咗「維他牛」事件喇!係首先有網友po咗張有「維他牛」字樣嘅飲品相,喺盒面仲有簡體字寫住「檸檬茶味飲料」,仲標明係「香港品牌」,咁嘅樣,一睇都知係抄緊「維他檸檬茶」喇! 呢張相隨即喺網上瘋傳,跟住就愈揭愈多,發現生產「維他牛」檸檬茶嘅公司係喺中山,佢嘅官網仲有唔少熟口熟面嘅山寨版出現,不過喺檸檬茶嘅最新官方圖片入面,已經唔見有「香港品牌」呢幾隻字,變咗用簡體字寫住「真茶+真檸檬」,同埋喺張相度有大大句「士撈緊」,寫住「要来就來真的!」你話諷刺唔諷刺先? 跟住有傳媒搵到呢間「維他牛」嘅負責人,佢就話確係有「參考」正版維他包裝喎,但就強調自家品牌個商標係合法喎,仲話想建議香港維他,可以主動出錢收購佢哋,嚟平息糾紛咁話!呢個說法係咪搞笑咗啲呢? 講到強國嘅抄抄抄,真係數唔盡,除咗「維他牛」呢個幾胞胎好笑之外,連餐廳都有餅印㗎!好似係深圳有間叫「Lady 7」嘅cafe,個名擺明好7,佢主打甜品系,其實由環境裝修logo再到食物賣相,都同台灣嘅「Dazzling cafe」似到十足,香港就真係有分店,但係「Dazzling cafe」冇開到去深圳囉!

0

【強國麥記推早餐賣粥 網民最期待真.麥牛河】食焦

強國麥記金拱門有新嘢出呀!今次係出粥,上星期推出咗新廣告宣傳,睇見咁多殘體字就梗係冇乜美感可言啦,至於啲粥,今次硬sell嘅有三款,就係酸菜脆筍雞肉粥、皮蛋雞肉粥同埋鹹蛋黄雞絲粥,全部都係雞!由依家開始到3月底供應,賣六蚊人仔起仲可以加埋個薯餅,點解唔學大陸KFC出埋油炸鬼啫? 今次強國麥記推呢個粥王系列,除咗有廣告相仲有埋片,咁邊個係粥王呢?其中一位仲係香港粥王李景,縱橫粥界四十幾年,退咗休再出山開舖,依家喺鰂魚涌主理「粥麵館」,廣告片入面幾位粥王仲講晒秘訣,要用東北大米啦、12:1黄金水米比例啦、仲要慢熬95分鐘煮到開花。 搵香港飲食名人拍片唔係第一次,當然最有印象梗係Chef Le Mon,上年九月幫強國麥記賣包,宣傳星廚系列,chok到呢,不過嗰陣未有摩打手唧醬啫!講返個粥,其實麥記賣粥亦唔係新鮮事喇,之前喺馬來西亞原来已推出過麥麥粥㗎喇,仲係全球第一間賣粥麥記添! 網民睇見呢個強國麥記粥嘅廣告,當然最關心係問「幾時有麥牛河?」!話說麥牛河呢個傳說,其實耐唔時都會俾人拎返出嚟講,最早係因為有網民向2004年參選立法會的中文大學生物化學系客席教授曹宏威挑戰,喺網上問佢:「點解m記冇牛河賣?」曹博士就回應:「因為你去錯地方。」於是曹博士就俾網民封為「牛河博士」同瘋狂改佢圖!到咗前年又傳到真嘅一樣有麥牛河,仲P晒圖成個廣告咁款,成為網民最期待嘅麥記食品!未有牛河食之前,粥你想唔想食?