Tagged: 彩虹

0

【牛池灣街市貼地小店 必食隱藏版冷麵+懷舊盅飯】街霸

最近有街坊同街霸報料話牛池灣街市都有好西喎!街霸今集就一於去搵食啦! 舊式街市格局多數都係地下同1樓賣乾、濕貨,2樓就係熟食中心,呢度都唔例外! 第一間去食發記美食中心,舖頭細細但其實Menu都幾多選擇,不過唔少都係「隱藏Menu」,只有街坊熟客先識嗌㗎咋!Menu主要有公仔麵餐呀、普通常餐嘅選擇。今次街霸就要試試街坊們特別推介嘅飛碟(HKD27/連冷熱飲)同招牌冷麵(HKD27/連冷熱飲)。 飛碟總共有2個選擇,今次街霸叫咗芝士鹹牛肉同火腿芝士。飛碟呢種簡單小食,依家都唔係咁多地方食到喇!一隻好食嘅飛碟,除咗必需新鮮熱辣辣之外,烘到外脆內軟亦非常重要! 食芝士乜乜三文治,最怕就係塊芝士成塊唔溶凍冰冰。呢隻飛碟嘅芝士溶化得超完美,同鹹牛肉融為一體,用嚟做早餐超醒神呀!咬落脆卜卜,但內餡又超鬆軟,簡單小確幸呀! 另外招牌冷麵亦非常耍家!呢個冷麵貌似係一個隱藏Menu,因為當街霸問店員阿姐係咪有冷面嘅時候,佢呆一呆講咗句「咦!你又知有冷麵嘅?」睇嚟呢個冷麵唔係咁易食到喎! 麵底用公仔麵,餸有幾塊鴨胸、火腿絲同生菜絲等等。醬料方面酸甜得嚟又帶點辣,食落幾開胃。呢個冷麵喺出面應該真係食唔到㗎喇,因為呢個recipe似係喺廚房即興諗出嚟咁,好似9唔搭8,但食落又幾好食喎! 鴨胸不嬲都習慣攞嚟做冷盤,同酸酸甜甜嘅冷麵食落幾夾! 冷麵分量好足,目測應該唔止一個公仔麵,酸甜汁加埋生菜令到成個麵愈食愈開胃,感覺好fresh。街霸覺得呢個隱藏版冷麵唔錯喎! 行到熟食中心嘅盡頭就會見到呢間都幾多公公婆婆幫襯嘅新源茶樓喇! 街坊話佢哋嘅盅飯最值得食,話因為依家真正將「生米蒸成熟飯」嘅盅飯唔係咁易食到喎! 鳳爪排骨盅飯(HKD21)料非常足,排骨有成6、7嚿,鳳爪亦有一大隻,三隻腳趾齊晒! 排骨咬落頗腍,肉味略嫌有啲啲唔夠,應該係雪藏肉。不過呢個價錢唔可以要求太多喇!因為呢個飯嘅重點其實唔係啲餸,係飯呀! 呢個生米蒸飯真係不得了!我諗只有舊式嘅傳統茶檔先會做到呢個味道喇!飯粒粒粒分明,一啲都冇黐住,撈埋豉油食就最夾喇!21蚊大大碗食到攬住肚仔走!抵喇! 茶檔阿姐話牛肉腸(HKD17)亦好受歡迎,皮薄餡靚,食到腸粉嘅米香。坐底歎個早茶,食個傳統盅飯同點心其實真係人生一大樂事!茶檔風味唔係依家大商場酒樓可以feel到嘅感覺!   街霸最愛:今次街霸最surprise係發記嘅飛碟同冷麵!因為呢種咁學生年代嘅平價小食真係買少見少喇!飛碟外脆內軟,咬落爆晒餡,夫復何求呀!另外隱藏版嘅冷麵亦好好食,雖然唔係啲咩山珍海味、或者好特別好有gimmick嘅食物,就係樸實嘅平民美食囉! 發記美食中心 地址:彩虹牛池灣街市熟食中心2F 2-3號舖 電話:2538 4785 營業時間:從缺 新源茶樓 地址:彩虹牛池灣街市熟食中心 2F 8-9 號舖 電話:2726 4770 營業時間:06:00-15:30

0

【$2.9罐可樂1蚊包薯條 彩虹懷舊士多激罕平】平霸

話說平霸上次去完鑽石冰室,行過隔離無意中見到呢間成興行,雖然招牌唔算太顯眼,不過入面買嘅嘢都好平㗎! 今次小編就用咗30蚊買足12樣嘢有飲有食,真係超級抵啦!快啲睇吓小編買咗啲咩啦! 嚟張大合照俾大家睇吓買咗啲咩先! 飲品篇  zero cream soda同新出嘅coca cola zero都係(HKD2.9),真心喺香港未見過有咁平嘅汽水買!而2.9系列仲會有埋芬達、西柚、檸檬+C同檸檬可樂等選擇。 大盒包裝嘅陽光飲品(HKD3.5),又係從來都冇見過有咁平嘅大包裝飲品買三個半囉,小編見到都O晒嘴呀! 其他嘅細包裝飲品仲平(HKD2.5),細包裝選擇就會多啲,有維他奶、蘋果綠茶、菊花茶、解茶同蜂蜜檸檬茶等。 薯片篇  泰國薯條(HKD2),入面有埋包茄醬俾你,細細包,又好似真係食緊薯條咁喎! 合味道叻沙味薯片(HKD5),呢個係大包裝嚟,新味嚟講仲要賣5蚊又係平到黐晒線,小編點忍得手,買! 一蚊雞系列 寶貝薯條(HKD1),店員話啲零食一蚊包嗰陣,我聽完都吓咗聲,咁即刻買返包先!其實同泰國包薯條好似,過吓口癮又得啫! 爆炸糖(HKD1),簡直係兒時回憶,好耐冇食過,同細細個買個價一樣啊! 大發鱈魚香絲(HKD1.2),又係細細個必食零食之一,童年回憶滿滿呀! 平霸小評:今次咁啱行過見到呢間士多,估唔到入面有咁多平嘢買,一班街坊愛死佢啦真係!大家如果去開彩虹邨影相,一定要嚟呢間士多幫襯吓,真係超抵呀! 成興行 地址:彩虹青楊路11號彩虹邨金碧樓27號地舖 《平霸》平食四方,歡迎各界報料。

0

【21蚊炸魚薯條皮脆肉嫩 平價冰室超值下午茶】平霸

如果去開彩虹,其實只要細心啲搵,一樣有好多平嘢食㗎!今次小編就去咗呢間開咗好多年嘅鑽石冰室,一到下午茶,好多街坊都幫襯㗎! 點解?咪就係因為佢價廉物美,又平又抵食囉! 兩個餐都好抵食呀! 吉列魚柳+薯條或什果沙律(HKD21),下午茶餐會包埋熱飲,呢個價確係非常之抵呀!送餐速度都幾快,上到枱都好足料㗎!魚柳好大塊,炸到金黃色,非常香脆,魚肉亦都好鮮嫩又冇腥味,點埋沙律醬,正呀!薯條分量一樣咁多,仲要係粗薯條,食都食得過癮啲呀! 咖喱角+春卷各三件(HKD19),同樣都係包埋熱飲,下午茶唔使食咁多,叫呢個就啱晒喇。不過佢啲炸物就冇醬汁點,所以食落會有少少乾,但整體嚟講都唔差嘅!要餡有餡,皮又香脆,算係咁啦!個人覺得咖喱角味道夠濃,就算冇醬汁點,食落都唔會好淡,相反春卷就真係dry咗啲喇! 平霸小評:呢間鑽石冰室果然夠晒平呀!一個炸魚薯條都係21蚊搞掂,一個字抵呀!不過服務就差咗啲喇,不過都係嗰句啦,食得平嘢就唔好期望有好好嘅服務態度喇! 鑽石冰室 地址:彩虹青楊路11號彩虹邨金漢樓37號地舖 電話:2761 3037 《平霸》平食四方,歡迎各界報料。

0

【彩虹邨平價名店 6蚊兩串炭燒雞肉】平霸

今期平霸搵食,小編嚟到彩虹邨好出名嘅名店楓林軒。食物有超多款式選擇,價錢又親民,放學時段簡直係學生哥天堂,平到唔使睇價錢都可以直接叫呀,唔做平霸都唔得啦! 今次小編叫咗個全雞宴,加埋飲品30蚊都唔使,超抵食喎!即睇小編食後感! 麥樂雞(HKD5)5蚊有4件麥樂雞,其實食落我覺得同麥記嗰啲係冇分別嘅,想食麥樂雞,唔使去麥記喇,楓林軒幫到你。買10蚊就已經有8件,絕對夠食呀! 吉列雞扒(HKD5)炸粉同雞肉嘅分量係一比一,食落冇乜味,但5蚊咁平都算收貨嘅!小編都係推介麥樂雞多啲啊! 雞鎚(HKD6)食落就乾身咗啲喇,不過相對嚟講冇咁油,雖然冇乜肉汁,純粹過吓口癮都唔錯㗎! 炭燒雞肉串(HKD6)絕對有驚喜呀!好明顯食得出真係有燒烤味,而且啲醬汁好濃味,雞肉都夠滑,堅好食喎! 椰果豆漿(HKD7)飲落唔會話偏甜,不過神奇地覺得自己飲到啲荔枝味,椰果分量都算多,豆漿味會慢慢滲返出嚟,又ok喎! 平霸小評:平霸搵食大成功!楓林軒除咗雞之外,其實仲有唔少小食揀㗎,好似丸類、麵類乜都有,糧尾又有咩好怕喎! 楓林軒 地址:彩虹彩虹邨商場 4 號地下 營業時間:星期一至六:06:00-20:30(星期日休息) 《平霸》平食四方,歡迎各界報料。