Tagged: 得獎

0

【獨創日本海藻烏冬】宏 Hiroshi

好多香港人都好鍾意日本,鍾意佢嘅講究同純粹,即使係微不足道嘅一件小事,處處都包含住佢地嘅用心。喺尖沙咀The One 5樓嘅宏 Hiroshi係一間非常講究嘅日本食店,細至一隻雞蛋,喺日本邊一度入貨都十分用心,務求味道完美,客人食得開心滿足之餘,仲食得健康。講究細節,堅持用心,值得欣賞。 日本野菜天婦羅冷烏冬(HKD89),野菜天婦羅係由一條條蕃薯沾上脆漿炸成一舊,食落除咗可以食得出一條一條脆卜卜嘅豐富口感之外,蕃薯好甜好新鮮!雖然係即炸,但係完全唔會感覺到熱氣。蘸上醬油,仲可以保持到脆感,味道仲更加清爽! 烏冬為日本海藻烏冬,佢嘅奧妙之處係100%由日本國內小麥粉製成,含有非常豐富食物纖維、維生素同多種營養,仲獲獎無數!食落好彈牙,海藻粒粒令麵條口感非常豐富,質感煙韌,感覺極之獨特!一定要試試! 用嚟蘸冷麵嘅醬汁係鏗魚上湯加日本醬汁,清新淡雅而富有魚香。 日本溫泉蛋(HKD20)。 嚟自日本福岡農場嘅雞蛋,蛋白比較厚實,蛋黃較為紅潤,食落完全唔腥,味道純厚。順帶一提,宏出品嘅所有甜品都係用呢一種雞蛋,質素來自細節。 嚟到宏,梗係要食甜品!各位抹茶控一定要試試抹茶窩夫(HKD68),香濃嘅抹茶味食落每一啖都好似飲緊清香嘅抹茶咁,唔會太甜亦唔會覺得苦澀。窩夫唔係厚粉漿一舊舊,反而有種輕柔,做到外脆內軟嘅效果。配上日本抹茶雪糕、栗子蓉同抹茶曲奇,更加可以試到多種滋味,任你配搭! 宏 Hiroshi 地址:尖沙咀彌敦道100號The ONE 5樓502室 電話:2737 2665 營業時間:星期一至六:12:00-23:00 星期日:12:00-22:30