Tagged: 惹味

0

【重新演繹泰式街頭風味】巷卅八

想品嚐真正泰式街頭風味菜,你一定要試試炮台山嘅巷卅八。所製作嘅泰菜口感惹味,味道令人無法抗拒!佢地嘅理念係製作出嚟嘅菜式,不單能夠保留傳統風味,同時亦揉合嶄新烹調手法,加入不同元素、煮法同調味,打造泰菜全新一頁。 「巷卅八」總廚自幼跟隨父親紮根香港,並以現職香港著名連鎖泰國餐廳大廚的父親為榜樣,立志做泰菜廚師,用心做好每碟菜式。「巷卅八」個名嚟自泰國曼谷Sukhumvit大道旁邊嘅第卅八號巷,本來係好出名嘅泰國街頭美食天堂,提供地道美食超過四十年!但係2016年初,因為當地有新建築落成而令多間食肆被迫搬遷。為咗保留住傳統街頭美食,店主特意改名「巷卅八」,更聯同年青泰籍團隊,將泰國街頭美食重新演繹並帶嚟香港! 泰國街頭燒雞肶(HKD68)以秘製香料醃製,再放喺炭爐烤製。將肉汁緊緊鎖住,食落皮脆肉嫩,又有炭爐獨有燒烤香味,十分惹味! 豬頸肉沙律法包(HKD68)啱啱烤起嘅豬頸肉帶有爽脆口感,配上酸辣的秘製醬汁同埋新鮮生菜、蕃茄,一齊夾埋喺香脆法包入面,惹味又開胃。 邊個話冬蔭公淨係要嚟飲?拎嚟煮野食都好好味㗎!冬蔭公蝦球炒飯(HKD88)首先將飯炒至乾身,粒粒分明。食落冬蔭公香味濃郁,酸酸辣辣,配埋彈牙蝦球,口感同味道相互配合,令人欲罷不能! 燒羊架配芭提雅蛋包炒飯(HKD148)怕食蛋好膩嘅朋友可以放心食!呢款蛋白飯嘅的蛋皮好薄,包住酸酸甜甜嘅炒飯,配埋肉感嫩滑又多汁嘅羊架,一啲都唔羶。賣相非常吸引,唔止相機可以食先,同時亦滿足到你味覺享受。 自家製原個南瓜糕(HKD88)將鮮南瓜原個起肉,南瓜肉經過多重烹調同雪藏,令到南瓜肉嘅甜味好出,入口仲有啖啖南瓜肉添!鍾意食南瓜嘅朋友一定要試下呢款咁特別嘅甜品啦! 巷卅八街頭泰菜 地址:北角城市花園道233號地舖 電話:2861 1638 營業時間:星期一至日:11:00 – 23:00