Tagged: 意菜

0

【全新意式餐廳隱身西營盤小巷 帶骨肉眼扒重磅登場】LucAle

依家難得出街食飯,想揀間性價比高又有氣氛嘅餐廳食好啲?最近新開嘅意式酒吧餐廳LucAle由兩位意大利名廚主理,喺度就可以合理價錢食到一系列正宗意菜,感受吓異國風情。由大大份巴馬火腿芝士拼盤,去到重量級帶骨肉眼牛扒,一啲都冇欺場。呢間酒吧餐廳隱身喺西營盤第三街嘅巷弄入面,私隱度高,喺度Chill吓放鬆心情都唔錯㗎! 打頭陣嘅係巴馬火腿芝士拼盤(HKD288),成盤滿滿嘅巴馬火腿中間放上一大嚿布拉塔水牛芝士,分量多到起碼夠3-4個人開心share! 有別於一般凱撒沙律,呢道反傳統凱撒沙律Caesar Salad Revisited(HKD168)係以原個羅馬生菜上碟㗎。面頭特製嘅鵝肝碎入口即融,非常creamy!而生菜配上意大利葡萄黑醋珍珠同榛子醬,味道夠晒獨特喎。 黑松露芝士手工意粉Cappelletti Di Bolognese(HKD158)都係呢度必食嘅招牌菜,所用嘅意粉係餐廳每日新鮮自家製嘅結他麵,口感煙韌有咬口。配上黑松露同意大利產羊奶芝士,再加啲核桃麵包碎,素食意粉都可以好吸引㗎。 成1kg嘅重量級Fassona帶骨肉眼牛扒(HKD988)出場喇!成塊扒真係大得誇張,食肉獸必試!而且旁邊配上三款配菜,兩、三個朋友share嚟食都夠晒飽。 牛扒選用上等帶骨肉眼部位,所以肉質係非一般咁軟嫩,牛味亦都係特别濃嘅。牛扒無特別調味,只係簡單灑上鹽嚟提味,咁就可以歎到佢本身嘅原汁原味喇。另外都有附上牛扒醬汁照顧埋重口味嘅朋友仔。 最後梗係要食埋個甜品至圓滿啦!呢款創意甜品Nutella Broken Pie(HKD88)擺盤精緻,賣相好似藝術品咁靚呀。以士多啤梨同荔枝配上Nutell同脆片,而中間嘅荔枝味自家製雪糕入口清新,仲食到果肉添。   LucAle 地址:西營盤第三街100號A舖 電話:3611 1842 營業時間:星期二至日:18:00-23:00

0

【揉合意、法、葡國菜 尖沙咀高質海鮮歐陸菜】Bel Cibo

尖沙咀厚福街一向係區內特色菜嘅集中地,位於H8嘅Bel Cibo,店名其實係意大利文,意思係指美味可口嘅食物。餐廳主要混合意、法、葡菜,以傳統烹調方法加上創新元素,為食客帶嚟歐陸菜嘅新鮮感。 餐廳注重情調,以水晶吊燈,油畫作裝飾,都幾有氣氛㗎!而座位方面有適合情侶嘅卡位,亦都有適合一大班人聚餐嘅大長枱。  海鮮拼盤(HKD528),拼盤有新鮮波士頓龍蝦、生蠔、翡翠螺、青口、蜆,同埋大蝦。其中生蠔係嚟自法國嘅Kry-Stale,海水味偏重,適合配白酒享用。 素食人士可以試下乾茄露荀野菌天使麵 (HKD148),乾茄嘅酸味好惹味,加上蒜香露筍同野菌,再配上幼身天使麵,食落感覺十分清新。 到甜品環節,有沙巴翁黑炭球(HKD88),球中間係吉士cream,而外層係朱古力意大利雪糕,最外層鋪上朱古力粉。對朱古力狂迷嚟講,有層次十足嘅甜品作結,實在滿足! 如果唔想有選擇困難症,唔想用腦諗食乜。可以試下二人晚餐(HKD1288),而家仲有65折(HKD837.2)!套餐包括三款頭盤、兩碗餐湯、固定菜式海膽黑松露意大利飯,再加埋主菜四選二,仲有兩份甜品同兩杯飲品,認真豐富!招牌頭盤鮑魚忌廉汁凍盤,食落去爽口彈牙,無經過冷藏,鮑魚鮮味十足!配上嘅香濃忌廉汁更覺香甜細膩。 海膽黑松露野菌意大利飯,海膽份量多到可以鋪住個飯!海膽由北海道直送,只會喺時令季節提供,保證大家食到最新鮮、香甜嘅海膽。黑松露野菌意大利飯好creamy,同海膽一齊入口更覺柔滑,令人食唔停口,試得一試! BEL CIBO Seafood Bar & Restaurant 地址:尖沙咀厚福街8號H8 12樓 電話:2321 2112 營業時間:星期一至六: 12:00-15:30; 18:00-23:30 星期日: 18:00-23:30