Tagged: 愛吃的旅人

0

【荃灣吃喝玩樂三大蒲點 室內打卡放電睇展覽】Local自駕遊

落雨天去邊度玩好?梗係去啲有瓦遮頭,有得玩又有得食嘅地方啦。荃灣雖然有地鐵同西鐵,但位置一頭一尾,有啲捐窿捐罅嘅位都幾唔就腳,有時揸車仲方便。南豐紗廠、Donut Café同荃灣帝盛酒店唔止可以泊車,仲可以睇最新嘅文化展、打卡同俾小朋友方電!而且場內仲有餐廳,一個地方又食又玩夠晒方便啦。   南豐紗廠 南豐紗廠係假日熱門蒲點,有唔少牆畫俾大家打卡留影。 【#那些美好的風景】點解嘅?點解會儲 #舊課本?舊課本有咩好睇㗎?就等 舊課本… Posted by The Mills 南豐紗廠 on Friday, 7 June 2019 呢度仲有唔少文化推廣活動啦,啱啱開始嘅《舊課本——那些美好的風景》展覽就展出唔少懷舊味濃嘅舊課本,俾大家認識吓以前嘅學習時代。睇完展覽當然要肚,等小編介紹幾間有靚靚打卡位嘅餐廳俾大家啦。   《舊課本——那些美好的風景》展覽 地點:荃灣白田壩街南豐紗廠紗廠坊 展覽日期:2019年6月14至7月10日 開放時間:10:00-20:00 (泊車及停車場詳情)   KoKo Coffee Roasters KoKo Coffee Roasters係一間俾人感覺好raw嘅咖啡店,仲自家烘焙咖啡豆添。 想食個包配咖啡的話,呢度有Levain Bakery嘅包點㗎。 另外,亦有日式咖哩牛腩飯俾大家揀。...

0

【將軍澳街坊熱捧宵夜檔 $17足料粉仔惹味又飽肚】平霸

唔知大家有冇食宵夜嘅心水推介呢?平霸今次就搵到喺寶琳街市入面嘅寶琳粉仔,最初老闆未開實體舖之前,主力做外賣,以往收到訂單就自己踩住架單車送外賣,係將軍澳之友嘅宵夜救星! 價錢平味道又好,成功俘虜一眾街坊,好多已經變成熟客仔,由踩單車年代幫襯到依家有實體店,可以話係寶琳街坊嘅集體回憶! 粉仔(HKD17)配料有蔥花、花生、豬油渣同菜脯,辣度可選唔辣至大辣。堂食分量算大碗,平霸叫咗BB辣,就咁睇唔覺有辣油喺面喎,但當你食咗一啖之後,啲辣就會慢慢滲出嚟,好刺激呀! 大家食嗰陣最好將所有配料都一次過放入口,同時品嚐到豬油渣嘅香味、爽脆嘅花生同惹味嘅菜脯,配埋煙韌彈牙嘅粉仔,口感非常豐富!重點係一定要飲埋啲湯,湯底濃而不稠,帶有微辣、味精又唔重,啖啖都好滿足呀! 除咗粉仔都有其他小食。辣味蜆肉(HKD10)有成10幾粒,蜆肉肉質肥美,味道鮮甜呀! 而且個辣汁唔係辣到噴火嗰種,唔食得辣嘅朋友都可以試吓喎! 酸辣無骨豬手(HKD10)嘅醬汁同蜆肉好大分別,明顯係泰式風味嘅酸辣汁,酸味更為突出,食落幾開胃喎!豬手肉質幾厚實仲要無骨咁方便,連埋豬皮大啖食,滿滿嘅骨膠原!   平霸小評:寶琳粉仔專做夜貓子生意,開到凌晨十二點半,就算OT都唔怕冇啖好食啦!小店一開門,已經有好多街坊過嚟落單,每個都起碼嗌兩碗以上,眼見老闆同客人都好似朋友咁,香港有時候就係需要更多呢啲充滿人情味嘅食店,希望小店長做長有呀! 寶琳粉仔 地址:將軍澳寶琳北路18號寶林街市PL86號舖 電話:9650 7563 營業時間:星期二至日:16:30 – 00:30(星期一休息) 《平霸》平食四方,歡迎各界報料。

0

【旺中人氣小店手卷贏晒 $15芝士玉子燒完美拍檔】平霸

平霸又同大家去旺中覓食喇!講真旺中真係每層都有新食店可以發掘㗎喎,包你每次都有驚喜! 今次介紹呢間手卷駅,最初係朋友帶平霸去食先知,貪佢平得嚟又有一定水準,食完忍唔住自己再嚟幫襯呀!    芝士玉子燒(HKD15),平霸係一個玉子控,普通嘅玉子燒已經令我瘋狂,何況加埋芝士嘅玉子燒?價錢仲要咁平,點忍到口呀?見住上面層邪惡芝士,平霸食指大動呀! 玉子燒有返一定厚度,食落口嗰吓堅滿足!上層芝士被火槍燒過,食落口仲有陣煙燻味,加埋芝士咪話唔邪惡!蛋味夠香濃,連埋沙律醬一啖放入口,正到飛起呀! 同其他嘅玉子燒最大分別係,入面居然會有啲飯粒,仲係軟腍腍嗰隻,食落更加有口感呀! 原隻軟殻蟹手卷(HKD26),開頭見到咁平都冇咩期待,見到實物之後又覺得ok喎!真係原隻軟殻蟹,食到落最底都仲食到有軟殻蟹㗎!外層非常酥脆,好香口呢! 最令平霸驚喜係估唔到入面仲有蟹膏喎!再加上飯粒入面有埋啲蟹籽粒喺度,好滋味呢! 芝士吉列蝦卷(HKD24),燒過嘅芝士寧舍好味,下面仲有沙律醬,同炸蝦一齊食味道超夾,想encore食多個呀! 吉列蝦炸到脆卜卜,肉質算彈牙,最勁係加埋芝士食一啲都唔會有膩嘅感覺,配搭真係絕!當日見到有唔少食客都叫呢款同埋軟殻蟹手卷喎,睇嚟大家都好識食呀!   平霸小評:今次呢間小店嘅手卷同壽司嘅質素真係掂!重點係,價錢夠平吖嘛,小店一樣有高水準㗎! 手卷駅 地址:旺角彌敦道688號旺角中心一期2樓SA30A舖 電話:5281 3548 營業時間:星期一至日:12:00 – 21:00 《平霸》平食四方,歡迎各界報料。

0

【大埔隱世冰室名不虛傳 $28一口花生奶醬多超值】平霸

唔講唔知,喺大埔嘅寶湖道街市有間隱世冰室好受街坊歡迎,雖然位置有少少隱蔽,但人氣依然不減,仲有好多客仔山長水遠專登去幫襯添! 今次平霸介紹大家去珞桐冰室,最出名係一口多士,28蚊食到「小山丘」多士,仲要包埋飲品,抵到爛!價錢夠親民,味道又點呢? 一口粒粒花生奶醬多士(HKD28)套餐送埋咖啡/茶,轉凍飲就要加3蚊。提提大家,多士要11:30之後先開始供應,想食記住睇啱時間喇!平霸呢日閒日下晝去到,人流唔算好多,落咗單唔使等好耐已經有得食喇。上到枱,賣相係吸引嘅,估唔到呢個價錢仲有「小山丘」分量,即刻心心眼! 一口多士滿佈香濃花生醬同煉奶,多士仲要烘到脆卜卜,細細粒size就咁放入口啱啱好。花生醬加埋煉奶一齊真係好邪惡呢!面頭仲要灑咗少少白砂糖,食落好好味,難怪個個一坐低已經爭住order佢啦! 最鍾意花生醬有粒粒,唔單止多士夠脆,加埋粒粒花生一齊食更有口感!不愧為珞桐冰室嘅名物,有料到㗎! 另一款滋味蝦多士(HKD28)都好多人叫,價錢一樣,仲有埋薯條同飲品,咁抵,點可以唔試埋佢?可以配薯條/沙律,平霸今次就揀咗薯條,仲有茄汁同沙律醬兩款醬俾你點呢!鍾意點食都得啦! 蝦多士有兩嚿,切開一半蝦肉分量都算多,唔會話得嗰少少,而且外層嘅炸粉一啲都唔厚,炸到脆卜卜,蝦肉又夠彈牙,食落幾香口,點埋沙律醬就一流! 薯條算厚切,食落都幾重薯味,仲帶有些少微辣喎!   平霸小評:好多時街市入面嘅食肆先係臥虎藏龍,處處出名物呀!今次專程去珞桐冰室食一口花生多士,真係好有驚喜,仲要價錢咁抵添!幾遠水路都值喎! 珞桐冰室 地址:大埔寶湖道3號寶湖道街市P2舖 電話:2653 8846 營業時間:星期二至日:06:30 – 17:30(星期一休息) 《平霸》平食四方,歡迎各界報料。

0

【乜記士多一蚊一粒乜都平! 抵食燒賣魚蛋+邪惡厚多士】平霸

嚟到深水埗,一定唔怕冇嘢食。今次平霸又搵到寶,喺西九龍中心入面發現呢間乜記士多,主打多款地道嘅香港街頭美食,價錢仲要鬼咁親民,平霸今次就試咗三款小食,樣樣都CP值爆燈!         門口已經見到大大張Poster寫住燒賣魚蛋十蚊十粒! 一蚊一粒燒賣魚蛋嘅食店真係所剩無幾,乜記士多仲要開喺商場入面,真係良心食店。 燒賣魚蛋(HKD10/10粒)仲可以雙拼,不過記得要買夠十蚊先至係一蚊一粒呀,五粒燒賣五粒魚蛋先係Perfect Match嘛!醬汁除咗有豉油、辣油,店員就同平霸推薦佢哋自家製嘅咖喱汁,聞落去咖喱味非常香濃呀! 燒賣每一粒都好飽滿,入面魚肉脹卜卜咁,味道唔會腥呢!再沾滿自家製咖喱汁,超級入味呀! 另外值得一讚係魚蛋,竟然係陳皮魚蛋喎 ,陳皮味好出,加上微辣咖喱汁,正呀! 乜記雙拼厚多士(HKD16),識揀一定係叫煉奶同花生醬!呢兩個醬嘅配搭永遠都係最邪惡!有成兩大塊厚切多士,分量十足呀! 烘過嘅多士入口非常香脆,上面塗滿粒粒花生醬同煉奶 ,出奇地食落又唔會話好甜,反而令人想一啖接一啖咁食落去,花生醬有埋粒粒花生,勁有口感呀! 抹茶紅豆格仔餅(HKD23),乜記嘅格仔餅好出名,依家連抹茶紅豆味都出埋!食落口抹茶味非常濃郁,打開入面可以見到鋪滿晒粒粒嘅紅豆,勁足料! 格仔餅口感煙韌,好似食緊麻糬咁嘅質地,帶有甘香嘅抹茶啱啱好可以中和返紅豆嘅甜味,而且外皮外脆內軟,食一個都好飽肚喇!   平霸小評:一蚊一粒燒賣魚蛋已經夠晒抵食!最令平霸驚喜係厚多士,又平又大份,仲要好好味,配上邪惡花生醬真係想日日都食呀! 乜記士多 地址:深水埗欽州街37號西九龍中心1樓128B鋪 電話:9602 7150 營業時間:星期一至日:11:00 – 20:30 《平霸》平食四方,歡迎各界報料。

0

【意廚炮製頂級配搭 野生白松露盛宴食得高貴】Nicholini’s

黑松露乜乜乜食得多,今次試吓白松露啦!香港港麗酒店嘅Nicholini’s,意籍主廚Riccardo Catarsi就炮製咗頂級白松露宴。來自意大利嘅野生白松露,盛產喺秋冬季節,加埋主廚嘅廚藝,完美拍檔啦! 酒店選用嘅野生白松露,來自意大利布埃蒙地區Alba小鎮呢個王者出品地,當地土質肥沃,係對生長環境要求極高嘅白松露嘅理想成長地。白松露香氣濃郁,集泥土、麝香、菇菌、蒜香同芝士等獨特氣息於一身,主廚今次以新鮮白松露入饌,搭配時令食材,夠晒頂級呀! 牛油慢煮波士頓龍蝦(HKD680),配上地中海蘿蔔同芹菜根,特色海鮮濃湯鋪上原片新鮮嘅白松露,龍蝦肉嘅熱力將白松露嘅幽香揮發,聞死人呀! 慢煮小牛柳伴抱子甘藍、豬頰肉(HKD650),牛柳肉質非常幼嫩,搭配牛肝菌、羊肚菌、雞油菌同矜貴嘅白松露等,再混合野生蘑菇味道,成個味蕾被菌香填滿,香氣十足。 鮟鱇魚火腿卷(HKD650),將清甜嫩滑嘅鮟鱇魚用薄薄帶鹹香嘅特級Culatello火腿片卷起,再輕輕用慢火煎至金黃色,鮮味同鹹香相輔相成,油潤嘅質感更加將白松露嘅香氣帶出。 和牛薄切伴香煎鵝肝(HKD580),配雞油菌、白松露,薄切嘅和牛牛味濃郁,配上軟滑鵝肝,兩者味道完美融合。 白朱古力榛子白松露芭菲(HKD280),選用鮮甜嘅車厘子作點綴,帶出白松露嘅幽香,加埋果仁香氣同香滑忌廉,入口順喉幼滑,滋味無窮! 食物除咗可以單點,餐廳由即日起至12月期間仲會提供四、五至六道菜嘅白松露嚐味晚餐菜譜,最平食四道菜都只係1588蚊咋!呢個白松露套餐咁抵食,仲唔快啲去試吓!   Nicholini’s 地址:金鐘金鐘道88號太古廣場港麗酒店8樓 電話:2521 3838 營業時間:星期一至六:12:00-15:00;18:30-22:30;星期日:11:00-15:00;18:30-22:30

0

【旺中新店首創魚蛋佬雲吞 廿蚊12條鬼馬雙拼係咩?】平霸

旺中簡直係平價天堂啦,除咗有衫賣,好食西都係不可缺少嘅一環。依家愈來愈多食店進駐,平霸覺得直頭係九龍版葵廣咁喎,九龍人唔使去葵芳咁遠喇!今次平霸喺旺中搵到寶,就係魚蛋佬喇! 開喺旺中二樓,雖然舖頭細細,但係好sharp嘅黃色招牌一睇就知係佢,加上店舖貼滿餐單,食物相都影到好吸引呢,見到都想試晒咁多款呀! 魚蛋佬雲吞(HKD15/5粒),話係全港首創,外脆內彈,睇落賣相好似好特別! 聞落好重黑椒味,雲吞上面灑滿調味粉,食落會有少少辣,幾過癮㗎! 雲吞皮炸到脆卜卜,好似食緊薯片咁,比起出面食開嘅雲吞皮更香脆。 入面嘅「雲吞餡」,平霸覺得似係魚蛋,成嚿放晒落口真係外脆內軟,夠晒彈牙!不過略嫌調味粉落得有啲重手,食完2、3嚿覺得有啲鹹,如果大家想試就要叫老細落小啲調味粉喇! 另外有個鬼馬豬柳墨魚條(HKD20/12條),有得雙拼添,一次過滿足晒二個願望,掂呀!size啱啱好一口食一條,超方便呀! 鬼馬條上面同樣都有灑上調味料,墨魚條食落非常之彈牙,完全係墨魚丸嘅長條版,小食嚟講絕對有驚喜。 口感唔似有啲墨魚丸咁煮耐咗會變到好腍身,呢個條條都咁彈牙,唔想食燒賣魚蛋不如試吓呢個啦。 豬柳條口感就好似食緊豬肉咁,開頭平霸以為同麥記豬柳漢堡差唔多口感,點知質感更加厚實,一條接一條,食吓食吓好快清晒。   平霸小評:每次同朋友行街,一定要買返啲小食,一路行一路食先夠滋味!唔好再食魚蛋燒賣喇,不如試吓新嘢,食返條鬼馬條先啦! 魚蛋佬 地址:旺角彌敦道688號旺角中心一期2樓SB05舖 營業時間:星期一至日:12:30 – 23:00 《平霸》平食四方,歡迎各界報料。

0

【最新人氣文青café 5大打卡位hea足一日】治癒羔羊

小編身邊啲朋友成日都話深圳啲café好靚,打卡影相就最啱,又話啲嘢食都好好味,總之隔一陣就忍唔住北上一轉!其實想搵間靚café啫,唔係得深圳先有好選擇嘅,香港都有㗎! 長沙灣嘅治癒羔羊開咗一個月左右,逢星期六、日都總係爆晒場!就係因為餐廳有成超過十個打卡位,食物款式又好夢幻,重點係任你hea足全日都唔會趕你走喎,咁正,仲唔快啲捉埋男朋友過嚟一齊治癒吓! 治癒羔羊嘅老闆係兩位九十後女生。兩位老闆娘本身任職傳媒,做開女性資訊,所以對女人市場好熟悉,兩人又想創業,於是齊齊轉行開餐廳!用咗短短2個月時間籌備,真係好叻豬㗎!點解會叫做治癒羔羊?佢哋話因為大家都好鍾意「治癒」呢兩個字,可以帶俾人一個好放鬆好舒服嘅感覺;而「羔羊」就有兩個含義,因為佢哋大家一個姓高一個姓楊;其二就係因為羔羊嘅感覺好慢活、懶洋洋咁,同治癒呢兩隻字好夾。 治癒羔羊除咗係Café,店內仲有唔少服飾售賣,亦會定期開設workshop,好多元化! 環境以白色同木系做主題,雖然餐廳地方唔算大,但都唔覺有壓迫感。 餐廳宗旨想帶俾客人「懶、治癮、放鬆同慢活」,每個Corner同背景都可以影到好多靚相,每處都係打卡位呀!無論情侶、朋友定家人都好啱去慢活吓㗎! 餐廳設每位最底消費30蚊!當日小編叫咗人氣最高嘅焗薯,有三款選擇,分別係碎蛋、煙肉同菠菜。小編試咗烤芝士碎蛋焗薯 (HKD78),配沙律菜,車厘茄同茄汁豆,分量幾多吓!用咗薯味較重嘅美國薯,薯仔皮較厚身。先將薯仔焗熟,挖出來之後再打碎加入雞蛋同芝士,之後再釀返落薯皮內焗(當中芝士仲落得好重手),確保大家食到嘅每一啖都充滿住芝士拉絲,口感好滿足!另外值得一讚係薯皮上面加咗少少鹽調味,成個味道提升晒呀!即叫即製,所以大概要等15分鐘左右,不過小編認為絕對值得等,因為實在太好味喇! 薯蓉好均勻好綿密,而且一啲都唔膩,食多幾個都得呀! 焗三文魚撻(HKD78)係店內新出產品,配沙律菜同車厘茄。 撻皮焗到非常酥脆,唔想食太飽叫呢個分量啱啱好喇! 餐廳主打女生路線,唔少得粉紅色系甜品啦,打卡影相一流!玫瑰花千層蛋糕(HKD52)加咗自己調製嘅玫瑰醬同花瓣,賣相已經好靚,而且餅皮同忌廉都偏厚身,食落特別冰涼幼滑,啖啖都散發住玫瑰清香,甜度適中,一啲都唔膩呀! 特濃朱古力布朗尼 (HKD52)配香草雪糕,賣相吸睛不特止,入口一啲都唔乾身仲好濕潤, 一冷一熱連埋雪糕一齊食超正呀! Healing soda(HKD47),聽個名就知有幾治癒啦,賣相好夢幻!望落去見到啲顏色咁pink pink真係好有治癮feel!加咗粉色系冰(冰塊混入草莓汁、檸檬汁同波子汽水),少女必飲呀! Ocean soda(HKD45)係波子汽水味嘅梳打,飲落酸酸甜甜,雪糕融化之後,甜度更突出呢! 打卡位一,餐廳有嘢食仲有嘢賣,好似有唔少設計得好有特式又靚款嘅耳環,少女們一定心心眼呀!   打卡位二,店內充滿住家居feel,隨手一拍又係一張超自然嘅靚相喇! 打卡位三,呢個藤椅基本上係重點打卡位,隨時變身做model啦! 打卡位四,白色背景配埋小食,又係靚靚嘅配搭! 打卡位五,木系傢具又有旁邊嘅植物襯托,fit晒啦! 治癒羔羊 地址:長沙灣福榮街344-348昌發工廠大廈D座9樓8室 電話:6547 9375 營業時間:星期一至日:12:00-19:00

0

【萬聖節主題餐單食手指 血祭墳墓劏開酥皮打卡】魔衣櫥咖啡廳

好快到萬聖節喇,準備扮晒嘢去邊度玩?都要填飽個肚先有力氣俾人嚇㗎嘛!魔衣櫥咖啡廳應晒節推出萬聖節主題餐單,連環境裝修都鬼咁有feel!電梯一開,見到餐廳logo同各種鬼怪造型嘅擺設,已經好哈囉喂啦,真係未食已經嚇餐飽!  餐廳有五位老細,本身都係魔幻電影迷,又咁啱想創業,於是決定開間以魔法為主題嘅餐廳。點解叫「魔衣櫥」?反而唔關電影事喎,純粹係覺得Wardrobe呢個名好好聽,於是就叫做魔衣櫥咖啡廳咁解啫。 餐廳亮點一定係呢個大書櫃,單係用餐環境都花咗唔少心思喺設計同擺設上面,真係充滿魔幻感覺。呢個大書櫃呢,原來係一個秘密入口嚟㗎,推開書櫃門,就係一個隱藏房間,真係好神秘嘅VIP房喎! 萬聖節餐單有四款單點食物,有頭盤、主菜、甜品同酒精飲品。頭盤蛆蟲天國-紅花絲忌廉青口(HKD118),用紅花絲扮到條條血管咁嘅形狀,而薑蔥就好似毛毛蟲嘅造型。 先將薑蔥炒香,再加入白酒、紅花絲及青口連同忌廉一齊煮,煮到醬汁變成泥黃色,唔好以為味道會好怪,食落口就知有幾正喇!法國南青口肉係細細粒,不過入口多汁鮮甜,食落仲有微微海水味,而且一啲都唔腥,配上濃郁醬汁,青口鮮味更突出! 主菜血祭墳墓-焗野豬薯蓉批(HKD218),用酥皮整成棺材造型,隔離仲有個小 「墓碑」!切開酥皮,材料有野豬肉、雜菜粒同薯蓉,而且仲加咗紅酒同黑啤一齊煮,酒香味滲透落每樣食材度,鬼咁滋味呀! 每嚿野豬肉肥瘦適中,煮到腍身,一啲都唔韌㗎,薯蓉加香脆酥皮,口感特別正! 甜品衛斯里斷指-香脆炸手指(HKD98),主廚特登整到外形驚嚇少少,可以吸引多啲客人影相打卡嘛!以麵團加糖造成斷指形狀,然後炸至酥脆,再加士多啤梨醬同糖霜點綴,萬聖節氣氛出晒嚟,敢唔敢食手指呀? 味道都幾有驚喜,口感有啲似食緊冬甩咁,加埋士多啤梨醬酸酸甜甜味道,食到又甜又驚呀! 南瓜造型嘅party drink就更加特別,Wizard’s placebo每位收費HKD58,最多三人享用。一上到枱調酒師會先點火,相機食先之後就可以飲得喇! 呢款cocktails係比較烈嘅酒,每杯都有唔同嘅水果味道。好似藍色就用咗血橙,綠色就係菠蘿,而紅色就係雜莓味。 萬聖節餐單供應日期:即日起至2018年10月31日 魔衣櫥咖啡廳 地址:尖沙咀金巴利道40號MW Plaza 1樓 電話:2659 0128 營業時間:星期一至日:12:00-17:00;19:00-03:00

0

【定食中伏滑蛋變蒸蛋 乾柴豬扒重口味鹹爆】伏務台

A1-Bakery出品嘅麵包一直係小編早餐嘅第一位,麵包全部鬆軟又好味。不過麵包出色,唔代表做第二樣嘢都掂囉…… 好似最近小編去咗A1-Bakery旗下嘅副線Balencia Bakery & Cafe食飯,水準就差到令小編打咗個凸,估唔到咁伏喎! 小編叫咗滑蛋豬扒鍋定食(HKD86),呢個價錢講真係偏貴喎,不過喺午餐時段同下午茶時段會包埋飲品,配白飯同味噌湯。好喇,全部食物上晒枱,咦,點解碗味噌湯唔同咗樣嘅?梗係即刻問侍應啦,唔問係唔會講㗎喎,要開聲問句,先知原來賣晒味噌湯,所以轉咗是!日!餐!湯!其實可以落單前同個客講清楚啫,如果好想飲味噌湯點算呢?眼前呢個組合實在好唔協調囉! 先講吓呢個是日餐湯,好多滴油鋪喺面喎,睇見都唔係咁開胃。不如又玩吓估湯仔吖,呢碗嘢你估係乜湯呢?小編最初以為係忌廉乜乜湯之類啦,原來,侍應話係周打魚湯喎!吓,哦,好呀! 一啲魚味都飲唔出,仲要係蔬菜為主! 主角出場喇!其實滑蛋同豬扒呢兩樣食材,煮得出色當然要啲技巧啦,但至少,係好難會煮得難食嘅!不過偏偏呢碟就……睇睇個賣相,核突唔在講,連味道都好唔合格! 就咁睇,已經睇唔出滑蛋嘅色水,出奇地食落係蒸蛋嘅口感。滑蛋變蒸蛋,仲要係「蒸」到好老嘅蛋,唔配飯就咁食仲要鹹到飛起,到底加咗幾多鹽落去? 到豬扒喇,只係輕輕用筷子一夾,個炸皮居然成塊甩咗出嚟,皮肉分離,成餐飯真係好多 「驚喜位」。 豬扒非常薄切,而炸粉同豬扒嘅厚度比例幾乎係1:1喎! 食咗一啖豬扒,同樣鹹到飛起呀!豬扒韌得嚟又冇肉汁,乾柴柴咁款,連鍾意食肉嘅小編食咗一啖都想放棄喇!   小編伏氣:老實講,真係冇諗過滑蛋豬扒可以煮到咁難食,要蛋味冇蛋味,啲豬扒又乾又老,仲要索價86蚊,連埋加一差唔多成嚿水!俾一百蚊食呢個滑蛋豬扒定食,只能說非!常!不!值!喺7仔買嘅叮叮飯仲好食過佢呀! 入伏點:Balencia Bakery & Cafe(沙田分店) 入伏價:滑蛋豬扒鍋定食(HKD86) 中伏by #愛吃的旅人 美術by #車雲 攝影by #愛吃的旅人 《伏務台》星期一伏務大眾,歡迎各界報料。