Tagged: #懶健康

0

【秋風乾燥濕疹發作成身痕 忌4類飲食+護理小貼士】懶健康貼士

濕疹可以話係近年最困擾人嘅事!唔少朋友本身冇濕疹,但因為生活壓力、休息唔夠引致抵抗力下降、飲食失衡等問題而引發出濕疹。雖然每個人病發嘅原因唔同,但轉季都會辛苦啲,因為皮膚要重新適應,依家睇吓有咩飲食宜忌同護理小貼士啦! 忌4類飲食 1. 高糖食物 雖然唔開心會想食甜點,但攝取過高糖分反而令皮膚引起炎症問題,令濕疹問題加劇。   2. 辛辣同醃製發酵類食物 有濕疹嘅朋友適易進食袪濕同清熱毒嘅食物,減低內熱嘅狀態。但辛辣同醃製發酵類食物就偏燥熱,盡量食少啲啦。   3. 牛奶、濃茶、咖啡同酒 牛奶可以助濕,亦令因過敏而起濕疹嘅人情況加劇。濃茶同咖啡傷脾胃,降低身體嘅排毒功能。而飲酒會行血,令毛孔擴張,痕癢感覺會更加明顯,加上啤酒以小麥釀製,會使部分人過敏。   4. 濕毒、腥發食物 每位濕疹人士都知發作要戒蝦、蟹同蛋,不過容易唔記得羊肉、鰻魚等濕毒腥發嘅食物。   護理小貼士 1. 避開過敏源 除咗洗衣粉、洗潔精呢啲對皮膚有刺激性又常接觸嘅日用品,其實油漆、天拿水等裝修物料都有機會令濕疹爆發。以後新裝修嘅地方要少啲去喇。   2. 加強保濕 平時要搽lotion滋潤皮膚外,天氣轉涼自然會調高水溫,仲好似瞬間唔痕添!不過熱水澡係濕疹皮膚嘅陷阱,因為同時令皮膚本身嘅油脂都帶走,更易乾燥同引起痕癢感覺。如果唔想有黏笠嘅感覺,可以搽全水分嘅gel cream,帶出街一痕就搽都方便㗎,防止皮膚因為乾燥而脫皮、紅腫,甚至爆拆龜裂添。   3. 飲涼茶、食八寶粥  頭先講過適易進食袪濕同清熱毒嘅食物,所以粟米鬚煲水、冬瓜薏米水、袪濕嘅涼茶、苦瓜等袪濕清熱嘅食品先啱濕疹人士進食。而八寶粥等穀物食品可以健脾,不過記住要低糖分呀。

0

【戒牛肉拯救亞馬遜森林? 營養師建議4類代食品】懶健康貼士

「地球之肺」亞馬遜森林嘅大火,令大家多咗關注農民以焚燒樹林開墾土地方法飼養牛同生產飼料嘅問題,亦有網民發起罷食牛肉運動,希望拯救地球之肺。香港係巴西牛肉嘅重點出口地之一,不過依家豬肉仲係受非洲豬瘟疫影響幾貴吓,你又會唔會轉食豬肉保護環境呢?其實食牛肉除咗味美之外,仲有冇其他原因要食佢呢?營養師Moses就話:「牛肉同豬肉係蛋白質嘅主要來源,亦含有豐富嘅維他命B雜同鐵質。如果唔食呢兩種肉,其實仲有四類食物可以代替,同時可以保持營養均衡㗎。」 1. 深海魚 「深海魚之中,三文魚、吞拿魚等含豐富嘅優質完全蛋白質,同牛肉、豬肉最大分別係深海魚含有豐富嘅奧米加3!牛肉同豬肉含有飽和脂肪,相反奧米加3係多元不飽和脂肪酸,具有抗炎同保護心血管嘅健康功效,而人體並唔能夠自行製造呢種脂肪酸。美國心臟協會建議健康成人可以每星期最少兩次進食脂肪含量較高嘅魚類,所以大家不妨試試用深海魚嚟代替紅肉。」 2. 雞蛋 「雞蛋就含有豐富嘅優質蛋白質同維他命B12。相比牛肉同豬肉,雞蛋所含有嘅蛋白質生物價值(biological value)更高,更容易俾人體吸收同使用,對成長同修補細胞損耗有幫助。而且蛋黃亦含有豐富鐵質, 兩隻大雞蛋(生)已經含有大約1.75毫克鐵質,而一塊2.5安士嘅西冷牛排含鐵量約1.30毫克,可以煮蒸水蛋或蕃茄炒蛋等餸菜取代紅肉㗎。」 3. 大豆製品 「黃豆有40%都係蛋白質,佢同大部分存在喺植物嘅蛋白質唔同,黃豆擁有所有人體必需嘅氨基酸,令黃豆製品可以成為肉類代食品。黃豆除咗有優質蛋白質外,仲含有多元不飽和脂肪酸同異黃酮素,對心臟同血管健康令其他肉、魚類都被比下去。而且黃豆係低熱量食品,對想控制體重嘅朋友亦係好選擇。加上每一份豆腐(150克)含有約2.40-8.0毫克鐵質,即使食素都可以有均衡營養。」 4. 乾豆類 「乾豆之中,紅腰豆同軍豆都含有豐富蛋白質,但係屬於不完全蛋白質,只包括部分人體必需嘅氨基酸,所以佢唔能夠完成取代肉類。不過間中食豆類取代肉類其實更健康,因為豆類含有豐富膳食纖維,可以維持助腸道健康,降低膽固醇同幫助控制體重。大家不妨每星期抽一至兩日用豆類煮餸,增加纖維嘅攝取量。每一份豆類(3/4 杯)就含有大約2.6-4.9毫克鐵質,不過植物性食物所含嘅鐵質需要維他命C幫助吸收,所以食豆類同時要食含豐富維他命C嘅食物,例如橙、柑、奇異果、蕃茄、西蘭花等。想簡單啲對照呢四類食物同牛肉、豬肉營養價值有咩分別,可以睇埋由美國農業部營養素資料實驗室節錄嘅資料: 牛排(側腹,熟) 豬排(熟) 三文魚(熟) 原隻雞蛋(生) 腰豆(熟) 硬豆腐(生) 份量 75克 75克 75克 2隻 3/4杯 150克 蛋白質(克) 20.92 20.68 19.08 12.6...

0

【潤腸排毒Fruit Smoothie Bowl 顏色鮮艷打卡一絕】懶健康貼士

慢活對都市人嚟講幾奢侈,但係歎一個快速製作,可以打卡又潤腸排毒嘅Fruit Smoothie Bowl就一啲都唔奢侈,睇吓呢個Bowl有咩重點材料啦: 火龍果嘅植物性白蛋白比一般蔬果多,可以同人體內嘅重金屬離子結合再排泄出體外;而佢嘅種子亦有促進消化同潤腸嘅功效。 香蕉有豐富嘅膳食纖維,仲含有果膠添,對潤滑腸道同通便都有效。 奇亞籽既有抗氧化功效,佢嘅可溶性膳食纖維可以促進腸道蠕動,防止便秘。 健康有喇,如果想打埋卡呃like可以提前一晚切好生果,放入冰格冷藏,第二日攞出嚟攪拌後質地會黏稠啲,喺雪糕同雪葩之間;如果放保鮮櫃就會似奶昔,但係擺將其他生果放而會容易下陷。選用唔同顏色嘅生果唔止健康啲,打卡都靚啲。 Fruit Smoothie Bowl 材料: 紅心火龍果 – 2個 香蕉 – 1條 益力多 – 1罐 面料: 藍莓 – 適量 奇亞籽 – 適量 奇異果 – 1個 香蕉 – 1條 做法:...

0

【身體響警號要食維他命丸? 營養師5小測快速辨識】懶健康貼士

注重健康嘅風氣,令愈來愈多人接受食營養補充品同維他命丸,話晒返工咁辛苦,唔通想放假先嚟病咩。但係你究竟知唔知自己缺乏邊種維他命呢?定係平時飲食唔均衡先引致身體出現狀況呢?睇埋落去等營養師Moses話你知,順便做個小測試啦! 「如果你想追求準確啲嘅分析,可以利用網上免費工具,例如美國農業部網頁或USDA’s SuperTracker,輸入你嘅食習慣分析平時有冇均衡攝取營養;不過呢個方法比較費時,想方便啲可以揾註冊營養師用電腦程式分析。又或者按食物金字塔飲食法,答下面5條問題快速測試亦得,話晒食物金字塔嘅編制基於大量科學研究,每種食物類別都提供唔同嘅營養素;例如肉類有豐富嘅維他命B雜,而蔬菜同水果就係維他命C嘅主要來源。」 快速5問: 1. 你是否每餐都食大量穀物? 2. 你是否經常少食蔬菜? 3. 你是否經常每日食少於兩份水果? 4. 你是否經常每日食少於一份乳製品類? 5. 紅肉、雞同魚嘅分量是否佔你晚餐最大部份? 如果有三題或以上答「是」就有機會營養攝取唔均衡喇。   5種營養香港人最易缺乏 「2014香港首個總膳食研究指出一般成年人攝取鈣、鐵同鉀分量不足;而2016年嘅衞生署行為風險因素調查報告,亦指出大約有8成18-64歲嘅香港人食用少於五分蔬果,但食得少蔬果可能會導致維他命C、鉀同食用纖維缺乏。就咁聽好似唔太緊要?其實身體可能已經出現問題,睇吓下面呢5種香港人比較常缺乏嘅營每日應該攝取幾多,缺少咗又有咩影響啦: 1. 維他命C 如果你成日覺得虛弱、疲倦、抵抗力減弱、牙肉發炎同出血,有可能缺乏維他命C。維他命C嘅主要功能係加強抵抗力同製造膠原蛋白。世衛建議健康成年人每日最少攝取45 mg,即係一個中型嘅橙已經可以滿足需要。而大部份維他命C 補充劑嘅劑量係500 – 1000 mg,但多餘嘅維他命C會經尿液排出,唔會儲存喺體內,如果長期過量攝取反而增加患上腎結石嘅風險。 2. 鉀質 身體缺乏鉀質最明顯嘅影響係引致高血壓,令中風同患上冠心病嘅風險增加。因為鉀質可以幫助控制血壓同排走身體多餘嘅鈉質,減低水腫情況。報告指出一般香港成年人每日攝取1900mg鉀,但一般成年人每日應攝取約4700mg。建議每餐最少食半碗蔬菜,最好多選用薯仔同蔬菜入饌;同時正餐以外食水果代替零食。 3. 鐵質 面色蒼白、容易疲倦乏力同氣喘都有可能係鐵質攝取不足。女性更加因為月經會流失鐵質,所以需求比男士更高!一般女性每日需要18mg,而男士只要8mg。不過鐵質分紅血鐵同非紅血鐵兩大類:前者來自紅肉或動物內臟,後者就來自深綠色蔬菜、乾果、加添鐵質穀麥類同豆類。 4. 膳食纖維...

0

【靜脈曲張4點「加減」飲食習慣 改善血液循環紓緩症狀】懶健康貼士

長時間站立工作嘅上班族好容易出現靜脈曲張嘅問題,想紓緩腿部不適係咪著壓力襪就足夠呢?其實靜脈曲張其中一個問題係血液循環唔好,除咗做適當運動、按摩同矯正坐姿之外,加減飲食方法都有助改善血液循環,想知「加」咩「減」咩就睇埋落去啦! 「加」習慣 1. 維他命E有助促進新陳代谢同改善血液循環,而且缺少維他命E會令皮膚粗糙同老化㗎。大部分果仁含有豐富維他命E,喺經常食到嘅果仁之中,葵花籽嘅維他命E含量尤其豐富,杏仁同榛子就僅次於葵花籽。不過果仁嘅脂肪含量都唔少,唔好一下子食太多,如果唔係增重反而令加劇靜脈曲張嘅情況。 2. 降血壓及抗氧化蔬果有大量維他命同礦物質,可以增強身體抗氧化能力同增加血液循環。其中蕃茄含有維他命P,可以提高抗氧化能力之餘,仲有保護血管彈性嘅作用,預防血栓形成;蘋果就有防止血液中膽固醇增加嘅作用,亦可以減少血液中嘅含糖量;而木瓜含有十幾種氨基酸,可以幫助軟化血管。 「減」 習慣 1. 煙酒本身就對身體做成傷害,但靜脈曲張患者就更加要小心看待!酒精嘅中間產物乙醇對可以對靜脈造成傷害,甚至加劇靜脈局部腫脹嘅情況;而吸煙會增加血壓。 2. 高油鹽食物會引至高血壓、血管硬化、三高等問題,絕對有害無益!

0

【食西瓜解暑太寒涼? 中醫消暑茶療清甜易煲】懶健康貼士

一熱啲就話要食凍嘢消暑,其實幾時開始要解暑?食咩唔會太寒涼?咁專業嘅問題,梗係留俾中醫師梁尹倩 Cinci EC解答啦!「首先要明白身體外在同內在有暑熱先至要消暑清熱,例如天氣炎熱或身體有偏熱症狀,但體質偏虛嘅人,例如陽虛、脾虛者其實都唔適宜清熱。」 中暑先兆 「夏天過熱,暑氣過盛形成暑邪,體內熱度一時未能降低,令身體失去平衡導致中暑。個人會有身熱頭痛、大量出汗、煩躁口渴、噁心胸悶等症狀出現。簡單啲講,就係當你突然覺得不適,眼前一黑、睇嘢好似多咗啲發光圍邊、突然想大小便、作悶想嘔等,都係中暑前嘅先兆。」 西瓜偏涼可消暑 「由於西瓜屬性偏涼,夏天消暑最簡單就係食用西瓜,甚至用西瓜皮煮湯或煲水飲。根據中醫典籍記載,將西瓜綠色皮同紅色肉中間嗰一層曬乾就係叫做『西瓜翠衣』嘅中藥;屬性偏涼,有清熱解毒、消暑瀉火、生津解渴同降血壓嘅作用。如果想食啲屬性平和嘅消暑食材,可以揀節瓜同合掌瓜;前者功效似平和版冬瓜,可以健脾胃同袪濕;後者健脾開胃又清肺化痰,兩樣都適合任何體質人士食用。另外,荷葉都係屬性偏涼,可以清熱消暑同祛濕降脂,但脾胃虛弱者不宜。另外,亦可以煲消暑茶療一家人飲,又方便帶出街。」 消暑茶療 竹蔗茅根紅蘿蔔水 材料: 紅蘿蔔 – 2條 竹蔗 – 4節 茅根 – 300g 生薏米 – 30g 冰糖 – 適量 做法: 1. 所有材料洗淨備用。將紅蘿蔔同竹蔗去皮切成細件,茅根剪短。 2. 將所有材料加入約1,500 ml水,武火煮至水滾後改文火煮40分鐘,加入適量冰糖就完成。   梁尹倩 Cinci...

0

【簡易去水腫大法 6款茶飲食療你要知】懶健康貼士

冬天有人會用熱水浸腳行氣去水腫,順便保暖,不過步入夏天又好難長期咁浸嘅。水腫某程度反映身體狀態麻麻,或者飲食習慣出現問題。既然係咁,不如由飲食著手調理啦!小編搜羅6款簡易茶飲食療俾大家,睇吓邊款方便你啦。 紅菜頭紅棗桂圓茶 材料(2人分量): 紅菜頭 – 100g 紅棗(去核) – 12克 桂圓 – 8克 冰糖 – 18g 清水 – 2碗 做法: 1. 將紅菜頭去皮切片。 2. 將清水、紅棗同桂圓一齊加入鍋,開大火煮滾後加入紅菜頭;轉細火煲10至15分鐘就得喇。 功效:紅菜頭紅棗桂圓茶鉀質豐富,可以幫助去水腫。飲完食埋紅菜頭、紅棗同桂圓就更加有益添。   陳皮粟米鬚水 材料(2人分量): 陳皮 – 10g 粟米鬚 – 10g 水...

0

【薯仔無辜變增肥殺手 含抗性澱粉質幫助減肥】懶健康貼士

嚟到五月天除咗諗起台灣歌手,仲會諗起天氣轉熱喇!又要減肥喇!然後個個都話戒澱粉質,唔通真係要戒晒?當然唔係啦,因為吸收一定嘅碳水化合物,包括澱粉質、糖分同膳食纖維先可以健康咁為身體提供能量。如果真係想減量,其實可以考慮用薯仔代替飯喎,而且煮得啱係可以幫助減肥㗎,想知點解就睇埋落去啦。 每100克薯仔嘅熱量大約有80卡,但同等分量嘅白飯大約有140卡,熱量低啲,起碼冇咁易增肥先。而且薯仔都係高鉀食物,可以幫助去水腫。而薯仔皮周邊存有綠原酸,可以抑制脂肪嘅分解同吸收,減低積聚皮下脂肪同內臟脂肪,所以最好連皮食埋呀。 薯仔含有高抗性澱粉質,身體好難吸收佢嘅糖分子,反而喺腸道會轉化成短性鏈脂肪酸,而且薯仔本身係高纖食物,更加幫助腸道蠕動同穩定血糖添。不過要注意食物加熱得愈耐,抗性澱粉就流失得愈多;而且抗性澱粉質會喺腸道發酵,容易有脹氣同放屁嘅問題。 蒸薯仔妙法 薯仔本身冇咩味,好多時煮食都加入大量油同調味,甚至係芝士,咁樣食法又唔夠運動量消耗實肥啦! 其實最好用蒸或煮嘅方法,只需要少量油同鹽調味。如果蒸,可以先蒸10分鐘後熄火焗10分鐘,又可以避免長時間加熱令抗性澱粉質流失。

0

【營養師醒你慳錢營養餐單 3餐60蚊仲食到焗檸雞】懶健康貼士

二月又新年又情人節,成個月食好嘢嘅代價,就係換嚟三月要慳返啲喇,所以又要搵My Fitness營養師Moses教大家整咩先食得健康又慳錢!「慳錢唔等於日日食廿幾蚊快餐或頹飯,甚至一日三餐變兩餐咁dry嘅。自己煮都可以食得飽,仲順便減肥添。不過唔係叫你食菜就算,都要營養均衡嘅。我呢個一日三餐嘅慳錢餐單俾大家參考,唔使一百蚊,都可以食得好好㗎。」 早餐:穀物早餐 Weet-Bix原味穀物早餐:3塊(HKD3.3) 新鮮脫脂奶:1.5杯(HKD7.3) 蘋果:1個(HKD4.3) 好多人因為慳錢而唔食早餐,但咁會令身體嘅能量處於低水平,反而令我哋更想食高脂肪同糖份高嘅食物。如果將花喺買零食嘅錢,轉為買穀物早餐,咁就更健康啦。一碗穀物類早餐含有豐富維他命B,可以幫助維持新陳代謝,而穀物早餐同蘋果都係纖維嘅主要來源,又會飽肚啲。 午餐:吞拿魚蘑菇意粉 意大利粉(乾):100g(HKD4) 蘑菇(罐):230g(HKD9.5) 水浸吞拿魚(罐):95g(HKD8.5) 鮮洋葱:1/4個(HKD1) 意大利粉係低升糖指數食物,幫助穩定血糖唔怕飯氣攻心,而吞拿魚有豐富優質蛋白質,幫助增加飽肚感,不過用罐頭蘑菇口感會差少少,但價錢平啲,而且同新鮮蘑菇嘅營養冇太大分別,但係調味方面就唔好用醬汁,只用蒜蓉(1湯匙)、少量鹽同黑胡椒同油(2茶匙)乾炒就更健康喇。 下午茶:香蕉 香蕉:1隻(HKD1.5) 晏晝三、四點口痕?食水果幫手頂肚啦,又避免晚飯前食過量嘅情況。香蕉係幾好嘅選擇,因為有豐富嘅纖維同色胺酸。色胺酸會幫助體內合成血清素,有助放鬆心情同壓力㗎。 晚餐:蜂蜜檸檬焗雞胸飯 雞胸:100g(HKD7.9) 檸檬:半個(HKD2.75) 西蘭花:1杯(HKD4) 蜂蜜:2茶匙(HKD1.3) 白飯:1.5碗 放工已經攰喇,晚餐用焗或蒸嘅方法煮會方便啲,想香口啲梗係焗啦。雞胸用鹽同黑胡椒調味,放上檸檬片入爐焗熟,食之前掃上蜂蜜。配菜揀西蘭花,因為佢含有豐富嘅纖維同維他命A,幫助保護疲倦嘅眼睛健康,而蒸可以保留更多營養。想冇咁淡口,可以用油(2茶匙)爆香蒜蓉(1湯匙)同黑胡椒鹽(少量),最後加少少水煮滾做成醬汁淋喺面。 加加埋埋,全日都係食咗HKD60左右,三餐仲夠晒健康同營養平衡添。當然我哋唔可以日日食呢幾款,身體都要攝取唔同營養素,但花少少心思都可以有「營」咁慳錢。 *以上價錢參考HKTV mall同惠康超級市場(日期:27/02/2019) *呢個全日餐單樣本大約含有1800卡路里,大約係一位成年女性輕活動量嘅一日平均需要,如有問題請咨詢註冊營養師。 Moses Lee 現為“My Fitness”註冊營養師、澳洲營養及飲食治療碩士同澳洲營養師協會會員,擅長體重管理同運動營養。曾於醫院、社區中心、教會同非牟利機構等地方提供營養服務、舉辦營養講座同烹飪示範。現在為有需要控制體重嘅人士同運動員提供營養治療,制定飲食方案。

0

【 肝臟要有「解毒酶」! 營養師醒5大排毒貼士】懶健康貼士

「排出毒素身體好」呢句說話由細聽到大,依家身邊朋友都話「間中食清淡啲俾條腸唞唞順便排毒」。日又排夜又排,究竟點先真係排到毒呢?首先明白有咩毒圍繞住自己先啦。 要排咩「毒」? 毒分為兩大類。第一類係「內毒素」,即係身體新陳代謝後嘅副產物,例如乳酸、尿素化合物同來自腸道中微生物嘅廢物;第二類係「外毒素」,會通過進食、飲水或接觸進入體內,例如食物添加劑、殺蟲劑或海產中嘅汞等等。 肝臟要「解毒酶」幫手排毒 肝臟係有好強大嘅排毒功能,會將毒素轉化為尿液、糞便、汗液等方式將毒素排出體外,但如果一個人吸入嘅毒素超過咗身體排泄嘅能力,毒素就有可能會儲存喺脂肪細胞、軟組織同骨骼喇!不過每個人嘅排毒能力都唔同,會受環境、飲食習慣、生活方式、健康狀況同遺傳等因素而受影響,所以有啲人需要更多外來支援去排毒。 不過坊間嘅排毒飲食法唔可以亂試,好似飲幾日蔬菜汁,甚至禁食幾日呢啲建議除咗唔安全之外,仲可能會抑制體內嘅排毒功能添!因為肝臟排毒嘅時候需要有「解毒酶」(e.g. glutathione),但攝取足夠嘅蛋白質令解毒酶維持喺最佳水平;而且長時間禁食,或淨食蔬菜有機會造成營養不良,如果想知排毒方法有冇效,可以搵一個受專業訓練嘅健康專業人員,喺外國就有註冊營養師專係讀「綜合和功能性醫學營養」添。 5步back up排毒功能 健康嘅人一般都唔需要一個嚴密嘅排毒飲食計畫,不過以下5個飲食小貼士如果每日堅持的話,都可以支援排毒功能㗎: 保持充足水分,每日飲最少8杯水幫助沖走體內廢物。 每天最少食五份水果同蔬菜(2份水果+3蔬菜),幫助排出腸道廢物。當中可嘗試每日最少一杯十字花科蔬菜,例如羽衣甘藍、椰菜、西蘭花或抱子甘藍,而多用蒜頭、洋蔥、迷迭香做調味料,都有助支持解毒酶正常運作。 攝取適量堅果、種子同多食全穀物,幫助攝取足夠纖維。 攝取足夠嘅蛋白質,幫維持解毒酶喺最佳水平。(每日蛋白質攝取量計算方法:體重(kg)×0.8得出嘅數字,就係每日要攝取蛋白質嘅克數。) 吃自然發酵嘅食物,例如乳酪同德國酸菜(Sauerkraut),幫助身體控制腸道內微生物嘅毒素含量。   Moses Lee 現為“My Fitness”註冊營養師、澳洲營養及飲食治療碩士同澳洲營養師協會會員,擅長體重管理同運動營養。曾於醫院、社區中心、教會同非牟利機構等地方提供營養服務、舉辦營養講座同烹飪示範。現在為有需要控制體重嘅人士同運動員提供營養治療,制定飲食方案。