Tagged: 懷舊冰室

0

【新斗記班底開親民價冰室 鑊氣小菜+必食農夫包】春蘭冰室

傳統粵菜館新斗記班底最近靜悄悄,自己組隊喺深水埗開咗春蘭冰室,依家可以用親民價試到佢哋嘅小菜有幾鑊氣喇!話明係冰室,食物當然唔係傳統粵菜啦,而係大家熟識嘅菜式,即刻睇吓有咩啦! 冰室設計行懷舊風,牆上仲寫咗唔少為人熟悉嘅金句俾人話當年。負責人Jessica話原來好多人唔知「二仔底」係「死跟」咁解,因為咁同唔少食客打開話題添。 係人都知新斗記嘅咕嚕肉出名,但冰室都有其他小菜飯餐一樣正斗㗎。好似麻婆煮豆腐套餐(HKD55)配埋足料老火湯、飯同熱飲,見到呢個分量都飽咗。 呢個麻婆豆腐同平時有啲唔同,加咗榨菜增加口感之餘,微辣中帶點鹹香。而且豆腐同肉嘅比例近乎1:1,都落足料㗎。 自細去大排檔都鍾意食炸嘢,呢度都有,仲好夠火喉添!椒鹽九肚魚(HKD48)比一般酒家平成截,但都有約十件左右九肚魚。脆皮唔厚,魚肉炸到啱啱熟,滑嘟嘟,不過選用大條嘅九肚魚,魚骨粗啲唔可以食埋。 其他套餐同小菜都好抵食,而且款式都係大眾熱選嘅款式。 黑椒牛肉炒意粉(HKD48)係茶室人氣食品之一,呢度嘅意粉彈牙唔會發脹,睇落油光強勁但入口唔膩喎。黑椒香氣十足,牛肉就大件爽口。 除咗行親民路線之外,西式菜對粵菜班底都係新嘗試,不過絕對冇考起佢哋喎。皇牌馬來咖喱豬扒農夫包(HKD68) 係呢度嘅必食菜式之一,大大個超足分量。但提提大家唔好打卡太耐,要趁熱熱切開佢,等面頭嘅芝士滲埋入去!豬扒幾嫩滑有肉汁,咖喱香得嚟唔會好辣,香軟嘅麵包嗦咗咖喱汁更加令人食得滋味,令小編唔記得入面仲有飯添。 就算下午茶時間嚟都一樣有正嘢食,呢款朱古力紅豆法蘭西多士(HKD28)唔止賣相吸睛,西多士仲夾咗唔少花生醬! 蛋沙律西多士(HKD31)外表平平無奇,但一食係充滿兒時回憶嘅滋味囉!成口蛋沙律但配西多士,反而冇三文治乾噌噌嘅口感,又反傳統唔係配花生醬、牛油同糖漿。 竟然玩懷舊風又點少得黑牛(HKD22)同雪糕紅豆冰(HKD22)呢啲特色飲品呢?!而且紅豆仲好大粒㗎。   春蘭冰室 地址:深水埗福華街188號海峯地舖 電話:2881 8331 營業時間:星期一至五:11:30-22:30,星期六、日:11:00-22:30

0

【在地人必食澳門五大老字號茶記 邪惡厚蛋治+金磚西多士】新鴻發咖啡美食、南屏雅敘、滄洲咖啡小食、喜蓮咖啡麵食、路環輝記美食茶座

講起澳門嘅「咖啡室」,唔好以為係嗰啲文青cafe,其實通常係指冰室或者茶記。雖然澳門食肆依家愈開愈多,但喺大街小巷入面都隱藏唔少舊式茶餐廳,仲間間都有自己嘅特色添,一於同小編齊齊發掘吓啦!   新鴻發咖啡美食 唔少在地人都特別推薦呢間開咗廿幾年嘅新鴻發美食,原因梗係佢嘅食物質素有返咁上下啦。招牌食物有乾炒牛通(約HKD39)同埋法蘭西多士(約HKD28);前者做法同乾炒牛河差唔多,但通粉就更有咬口,炒得有鑊氣又唔油膩;而西多士嘅賣點除咗夠晒厚之外,中間仲夾咗層厚厚嘅邪惡花生醬,絕對食過返尋味㗎。   新鴻發美食 地址:澳門高士德賈伯樂提督街55號A 電話:+853 2853 0452 營業時間:星期一至日:06:00-18:00   南屏雅敘 要介紹澳門老字號茶記,又點可以唔提有50年歷史嘅南屏雅敘呢?入到去簡直好似時光倒流五十年咁,舖面仲有新鮮出爐嘅麵包、蛋撻等包點,好有懷舊嘅感覺。 呢度食物種類唔算好多,其中比較出名嘅係火腿蛋三文治(約HKD22)。一望就知有幾足料,入面嘅火腿蛋勁厚身,配返杯牛奶紅茶(約HKD15)就更加有懷舊風味喇。   南屏雅敘 地址:新馬路十月初五街85-85A號地下 電話:+853 2892 2267 營業時間:星期一至日:06:30-18:30 (逢每月1號同15號休息)   滄洲咖啡小食 View this post on Instagram 這家是我吃過最好吃的蛋撻了 超級厲害??????????? #極推 A...

0

【小食部兩蚊起仲有鐵皮玩具 九龍灣食真懷舊茶座口味】九五茶座 – 放宮樂園

成日話懷舊,冇啲舊嘢又點夠味道呢?!但九龍灣Megabox 嘅九五茶座 – 放宮樂園就明白呢點喇。呢度有好似士多咁有小食同舊時代嘅玩具俾人話當年,啲零食都係兩蚊起,就連茶座嘅食物都係舊時嘅味道,仲冇加一添!所以呢度除咗懷舊,都希望等大家收工之後可以喺度放鬆吓。呢度仲有好多打卡位㗎,即刻帶大家睇吓啦。 門口有大大副,由本地插畫家全神畫嘅牆畫扮士多,set埋枱櫈俾你,任影唔嬲。 小食部有好多款細個成日食嘅可樂糖、士的朱古力、BB糖等等,都係兩蚊起咋! 康樂部仲有好多舊式鐵皮玩具、火車、飛機等等。聽到有啲客人同小朋友講「爸爸媽媽細個就係玩呢啲喇。」,仲忍唔住會買返一、兩件添。 行入啲就係茶庭喇,有埋圍欄、雀籠、同本地插畫家畫嘅六、七十年代香港環境,食嘢之前要再打卡囉。不過小編影到有啲餓,真係要開餐喇! 先嚟個咖喱牛腩(HKD68),可以配飯、意粉或者蒜蓉包。平時見到餸同飯分開上,都會感覺碟餸細咗,不過呢碟食落係拮極都仲有牛腩,唔係薯仔多過肉㗎。而重點嘅咖喱汁好有梛香味,咖喱味會慢慢滲出嚟,質感好滑唔會杰晒。牛肉亦燜得夠腍同仍然有咬口。 呢個蕃茄燴炸髀(HKD52)都好驚喜,炸雞髀唔上大隻,炸漿嘅質感就係舊式嘅感覺,鹹度啱啱好。外脆脾肉嫩,仲有少少肉汁流出嚟添。而估佢唔到嘅係蕃茄汁燴意粉都做到舊式嘅酸甜味,原來呢度真係請返當年喺茶座嘅人嚟做大廚,用返蕃膏,唔怪得味道可以咁傳神啦。 如果想食個下午茶簡簡單單,加料邪惡西多士(HKD30)就啱晒喇。面頭放咗塊牛油之外,仲灑咗勁多糖霜!切開入面發現,原來有3層麵包,即係用嘅醬都多啲。不過邪惡嘅嘢喺核心地帶,因為入面再夾咗芝士!令士身炸到鬆軟香甜嘅西多士,增加一份鹹香味。 豬仔包唔一定夾豬扒嘅,咸牛肉蛋豬仔包(HKD26)都一樣咁掂。豬仔包鬆軟又有空氣感,加埋厚厚嘅咸牛肉蛋,唔埋朝早定下午茶食都咁滿足囉。 而無敵風火輪(HKD98)有五款大家鍾意嘅港式小食,炸雞翼、煙伕腸仔卷、炸墨魚餅、炸幼薯條同雞肉串燒。睇落唔多,食落幾飽,因為好多肉呀!跟埋必點嘅茄汁、沙律醬同酸甜醬,惹味同滋味程度極高囉。 門口嘅小食檔好似道具咁?真係有嘢賣㗎!下午茶時段會推出師傅每日新鮮製嘅撻(HKD7/件),會視乎材料決定當日整咩,當日小編就試到蛋撻同椰撻。呢兩款都好驚喜,蛋撻酥皮薄到咬落去唔會feel到一層層,蛋仲滑到好似水蛋咁。椰撻中間冇咗粒紅色車厘子差啲唔認得佢,焗到面頭香脆,入口係滿滿香軟嘅椰絲,唔會太甜,直得再食呀! 但平日嚟食嘢就要注意喇,因為餐廳做到六點就截單,不過出面零售嘅位置會繼續開俾大家買糖果同玩具㗎。   九五茶座 – 放宮樂園 地址:九龍灣宏照道38號企業廣場5期Megabox 9樓23號舖 電話:2458 6032 營業時間:星期一至五:08:00 – 21:00,星期六、日:08:00 – 22:00