Tagged: 手工啤酒

0

【騷.味濃新蒲點 潮吹本土手工啤】騷

實現夢想之餘,俾埋空間其他人追夢,成件事浪漫到暈。幾個80後青年喺尖沙咀開餐廳 —— 騷,將自己學到嘅廚藝同調酒技術變成事業,同時支持本地手工啤酒同Live Band。 呢度有廿幾款手工啤酒俾大家揀,差不多每晚都有Live Band Show。聽出耳油想一展歌喉?上台一齊唱啦! 吉列蝦(HKD48)炸得好香脆,配埋鹹鹹地嘅秘製蒜蓉芝士醬,惹味指數瞬間提升。 夏季限定嘅煙鴨胸青瓜配蜜糖芥末(HKD58)會清啲,厚身又熱辣辣嘅煙鴨夾新鮮青瓜片同沙律菜一齊食,清新唔油膩。蜜糖芥末醬用咗黃芥末,唔會好重味,少少甜幾開胃。 Mini Burgers(HKD98/3pc)雖然話係mini,但係都要好幾啖先可以ko佢。手打嘅豬肉漢堡扒加咗少少洋蔥,令味道再香啲甜啲。 主打嘅Cocktail個名已經好得意,左邊係菩提老祖(HKD108)檸檬汁糖水、力嬌酒(Liqueurs)、蘋果酒(Cider),甜啲啱女仔飲。右邊本地薑(HKD108)用肉桂粉、新鮮薑片、檸檬汁同雲尼拿糖水配薑味啤酒,令薑嘅辛辣味更加突出又唔會乸喉,好啱要Gur吓條氣嘅時候飲。   騷 地址:尖沙咀諾士佛臺9號冠福中心9樓904室 電話:6847 2018 營業時間:星期一至日: 17:00-02:00

0

【睇住波玩足球機 7000呎酒吧豪食美國菜】The Stadium

想同成班friend吹水、睇波又有得玩?喺觀塘嘅The Stadium就啱晒你啦!睇個名都知佢地以體育為主題,去到有好多部電視都播緊體育賽事,仲有足球機、鏢機同桌球玩,甚至連露天位抖氣位都有埋,目測都有成7000呎咁大!一齊睇下有咩好食啦! 餐廳內單單係啤酒已經有50種,仲未計cocktail同其他酒類選擇!實有種酒啱你啦,唔知有無人成功挑戰晒佢咁多種酒呢? 餐廳仲有室外座位,大家睇波睇到咁上下,可以出去抖啖氣,感覺都幾chill! 嚟到想飲酒配返份小食,可以試下巴馬火腿配無花果(HKD88),個樣夠晒得意趣緻!用巴馬火腿卷住無花果,食落既有火腿鹹香,又有無花果嘅鮮甜。上面嘅醬係特製嘅蒜蓉沙律醬,味道好特別,啱晒飲酒果陣食。 話明係美國菜又點可以唔食Burger呢?安格斯牛肉漢堡(HKD138)牛肉帶有炭燒香味,牛肉味濃郁又多汁,入面仲夾住勁多配料,好似煙肉、芝士同portobello蘑菇,食落口感超級豐富!跟住個漢堡仲會有埋一份厚切薯條,啖啖薯肉夠晒香口又豐富! 10oz美國極黑毛豬(HKD168) 配莎莎,呢個極黑毛豬煮到大約7成熟,食落鮮嫩又有濃香豬肉味。加埋香草、茄汁同芝士,真係好惹味呀!如果大家怕佢唔夠熟,仲可以落單嘅時候講明要全熟,都一樣好食! 意式香菇手搓粉(HKD138) 手搓粉形狀夠晒可愛,細細條好似螺絲仔咁,扭紋形狀可以輕易沾滿濃香醬汁,食落啖啖都係菇同粉嘅完美結合,就算唔係素食者都會愛上! 適逢The Stadium一週年,呢排都有好多唔同優惠比大家!詳情就要留意佢地Facebook啦! https://www.facebook.com/thestadiumhk/ The Stadium 電話:9311 9939/2509 3388 地址:觀塘興業街4號The Wave 4樓 營業時間:星期日至四:11:00-00:00 星期五至六:11:00-02:00

0

【鎖緊100%香濃肉汁 手打爆漿牛肉漢堡】Route 83

食Burger成日都話要個漢堡扒要食到超Juicy勁爆汁先夠正,聽聞位於大埔嘅美國菜餐廳Route 83,自己手打純牛肉做漢堡扒,佢地所製作嘅Burger超級Juicy!唔怕食到爆晒汁嘅你一定要去挑戰下啦! 舖頭裝修帶少少工業風,以灰黑色為主調。天花板仲掛住一串串小燈泡,氣氛令人好舒服。 呢個洋蔥煙肉焗大菇牛肉芝士漢堡(HKD78),食落爆晒肉汁而不失清新嘅感覺,漢堡扒仲帶少少牛肉韌度,唔會完全腍晒散晒,咬落去超級Juicy!原來佢地自己手打純牛肉,唔怪得舊肉咁多肉汁又有少少韌性!個漢堡仲有炒香咗嘅煙肉洋蔥同芝士醬焗菇,仲有埋芥末籽醬中和牛肉膩嘅感覺,個包脆脆地真係幾唔錯! 呢個83雜錦pizza(HKD65)啱晒想食辣肉腸但又唔想齋食肉嘅人,Pizza入面一次過有晒辣肉腸、三色椒、菠蘿同超大量芝士!食落Pizza餅底薄得嚟脆卜卜又唔油,加上價錢唔算貴,可以一戰。 招牌脆皮德國鹹豬手配薯蓉(HKD148)呢個豬手嚟到超熱超熱,食落超級脆。原來係即叫即炸!食落豬手啲肉嫩滑又入味,原來餐廳一早就已經醃定5-6個鐘,大家點菜之後先即炸嘅。配菜有紫椰菜、酸瓜同加咗鮮奶同牛油製成嘅薯蓉,真係大滿足呀! 嚟到想飲返少少,呢度都有好多唔同嘅手工啤酒可以揀!咁就啱晒鍾意新奇口味嘅你啦。 Route 83 電話:2638 4138 地址:大埔廣福道83號地舖 營業時間:星期一至日:12:00-23:00

0

【日本備長炭即叫即燒!中環極致日系串燒小店】Keyaki

想慢慢享受真正居酒屋風味,位於中環嘅Keyaki就啱晒你。木製趟門、深藍色布簾,整間店充滿日系感覺。店舖主打串燒,以日本備長炭即叫即燒,木炭燒烤爐火舌飛舞,處處瀰漫炭燒香氣。 店內裝潢極具日本情懷,泛黃鎢絲燈泡同日本懷舊海報令店內佈置更有質感。 鮑魚(HKD88/隻)新鮮鮑魚彈牙多汁,配自家製醬汁同少許蔥花,伴隨煙燻炭香,每一口都非常滋味。 自家製免治鶏肉(HKD45/串)自家製嘅雞肉棒,內裡混有雞軟骨、紫蘇、洋蔥等材料,口感更彈牙有嚼勁,加上日本生蛋一齊食用更加美味。鵪鶉蛋(右3)(HKD28/串)一整串新鮮鵪鶉蛋原隻上,火候控制恰當,只需加鹽,已經十分美味。 Keyaki 電話:2362 7223 地址:中環和安里14號地舖 營業時間:星期一至五:12:00-14:30;18:00-01:00 星期六:18:00-01:00 星期日:休息

0

【週末帶埋寵物 食原隻松葉蟹Paella!】Roofy Bar & Cafe

而家喺香港,個個都鍾意特色野。小編路過山林道,見到一間店面綠色為主嘅餐廳Roofy Bar & Cafe,單睇店面已經非常有個性。原來餐廳以Cafe × Bar為概念,除咗可以帶比食客新鮮感之外,仲可以發揮到廚師特色,務求大家食飯飲酒同樣盡興!有狗狗嘅朋友仔,逢星期六、日仲可以帶埋狗狗嚟食返個brunch添! 餐廳裝潢帶少少美國風情,最緊要都係感覺舒適。 首先係相機食先必備嘅原隻松葉蟹海鮮焗飯(HKD878),大約6-10人份量,跟返西班牙傳統Paella用煎pan上 。大大隻松葉蟹加上多種海鮮,好似青口、帶子、魷魚一齊放喺煎pan,未食已經可以呃咗視覺上嘅like先!食落款款海鮮都好鮮味,同成班鍾意食海鮮嘅朋友一齊食夠晒開心。 食厭咗中式燒腩仔?可以試試呢一味西班牙啤酒烤五花腩(HKD170)咪睇好似簡簡單單一份烤肉,其實準備工夫好充足!廚師會先以啤酒Estrella醃3日,再喺早一日先用啤酒麥芽發酵,令肉質更鬆化,然後再慢煎,將皮煎至脆身!食嘅時候配上葡萄芥末子醬,食落香口之中肉質帶點軟腍豐腴,有中式燒腩仔嘅香脆而肉質帶多重鬆化嘅感覺,好值得一試! 粟米片配牛油果醬+蕃茄沙沙(HKD88)佐酒小食又點少得粟米片呢?嚟到點一客粟米片,感覺唔油膩,配上牛油果醬同蕃茄沙沙感覺更清新,仲可以點多支手工啤酒同朋友慢慢傾計添! 店內仲有提供多款手工啤酒,好似呢幾款啤牌啤酒就夠晒盞鬼。咁多位賭俠傳人,記得同埋朋友試試啦!每張啤牌都有唔同味道同濃度,同班friend湊夠數整返個俘虜或者四條都幾好玩! Roofy Bar & Cafe 電話:2782 5772 地址:尖沙咀山林道46-48號運通商業大廈地下20-27號舖 營業時間:星期一至五:1430-23:00;星期六、日及公眾假期:12:00-00:00

0

【麵包+啤酒?超霸氣組合!】Tap The Ale Project

Tap The Ale Project位於旺角黑布街,專門以麵包和啤酒為基礎設計食物。佢地嘅麵包選用天然酵母發酵嘅搔耳朵麵包,小店更以大麥麥芽自創出獨門招牌啤酒包。啤酒方面,會精心揀選適合當下時令啤酒,其中包括高質進口啤酒,仲有新鮮嘅本地啤酒添!係大家悠閒暢飲嘅好去處。 吐司雞(半份)(HKD49)以香脆又鬆化嘅厚切西多為基底,配以介央牛油散發陣陣香氣,再加埋香脆炸雞,同埋淋上大麥麥芽糖漿。非常豐富惹味,每啖入口都飽嚐幾重口感,令人回味無窮。 退役超人(半份)(HKD73)以招牌啤酒包為基底,配以火腿、火雞、莎樂美腸、煙肉、太陽蛋、醃青瓜、紅洋蔥、蕃茄、牛油果及辣根蒜蓉蛋黃醬。太陽蛋蛋汁非常豐富,令餡料入口更添一分柔滑嘅感覺。 Rye on wood(左)(42/0.2L)加入橡木釀造的粿麥啤酒,酒精濃度6%,帶有麥芽甜同埋絲綢咁柔滑嘅口感。Classic Pale Ale(右)(40/0.2L)酒精濃度5%,有淡淡的西柚、核果和松子的香氣。 而家只要係TFFF專頁嘅粉絲,仲可以享用更優惠「雞全部都係雞」套餐,Like我地facebook再去啦! https://www.facebook.com/toofullforfood/ 「雞全部都係雞」套餐包括: 吐司雞(價值HKD82) 雞翼(價值HKD58) 薯條(價值HKD44) 再配以1 Jug Classic少爺麥啤(價值HKD260),有齊咁多樣野(總值HKD444),埋單只係(HKD298)! Tap The Ale Project 地址:旺角黑布街15號地下 電話:2468 2010 營業時間:星期一:18:00-00:30 星期二至四及日:12:00-00:30 星期五至六:12:00-02:00

0

【型格講究風味牛宴】Crafty Cow

想活得有型,除咗先天性格,衣、食、住、行等等生活細節都好體現到個人品味。位於西營盤嘅型格小店Crafty Cow提供講究用心嘅食物同多種酒類飲品比大家享用,同一樣想活得出色有型嘅你互相輝映,不妨一去細味。 店內燈光較為昏暗,裝潢簡約講究情調,更顯型格。 鍾意食炸薯條嘅朋友不妨試試炸蕃薯條CC Fries(HKD58)。蕃薯條比起一般薯條更添一分甜味,口感亦都比較實,粉感較低。小店將蕃薯條炸得非常香脆,爽甜滋味,欲罷不能! Big Ass Truffle Grilled Cheese(HKD98)外層烘烤過嘅厚身麵包,內層仍然保持軟身,再搽上牛油。中間夾住Gruyere、Cheddar、Mozzarellar三種芝士,再加上黑松露,香濃芝士味同黑松露味大迸發!趁熱食,唔止外脆內軟更有流心溶化嘅效果,鍾意黑松露嘅朋友必check! Numbing Bone Marrow(HKD158)牛骨髓上面灑上花椒、蔥、蒜,味道香郁。骨髓食落軟腍柔滑,花椒辣味令味道更出色!香辣牛骨髓配多士別有一番風味,值得推介。 Aussie Wagyu Hanger Steak (HKD148)為咗將肉味進一步提升,小店提供多種口味嘅鹽同醬料比大家,廚師仲會為你推介最適合嘅調味料,令你可以體驗多種滋味變化。今次小編點選嘅呢份牛肉屬於比較瘦,少脂肪,淡味嘅選擇,好受女士歡迎!廚師推介嘅醬汁,有韓式辣醬、黑胡椒,柚子醬。每種醬料都變化無窮,大大提升肉嘅鮮味,食完仲好想叫多份食多轉! 酒類選擇亦相當豐富,小店備有超過三十多款的手工啤酒可供選擇。識飲識食嘅大家又多一個好去處啦! Crafty Cow 地址:上環差館上街3-3A號地舖 電話:2915 8988 營業時間:星期一至六:12:00-23:30 星期日:11:00-23:00

0

【隱世後巷風味串燒】串酒里

聽聞尖沙咀有間神秘串燒店串酒里,引入咗火山石燒技術。用呢種技術燒出嚟嘅食物,除咗外脆內軟之餘,仲可以鎖住肉汁,比起碳燒亦更加健康!齋諗已經覺得好鬼死吸引,收工去尖沙咀行街,路過山林道即刻去試下先! 餐廳位於山林道一條小巷,外面睇好有神秘感。舊名叫串燒燒烤專門店,依家已經改名叫串酒里。 餐廳裝潢以木為主題,營造出野外燒烤嘅感覺。光線柔和,整體令人感到非常舒服,啱晒同三五知己一齊食飯傾下計。 「燒雞翼,我鍾意食!」嚟到串燒店梗係要嗌燒雞翼先夠頂癮。呢度嘅札幌芝麻香燒雞翼($38)燒到啱啱好,外皮香脆唔黏稠,內裡又有豐富肉汁,唔止本身炭燒嘅香味,入口嘅時候連表層嘅黑芝麻都散發住香味,真係諗返起都覺得肚餓呀! 唔想串燒單嗌肉類咁dry,呢款BB露筍煙肉卷($34)就好適合你。BB露筍唔係浪得虛名,夠晒鮮嫩。加埋豐富肉汁嘅煙肉緊緊包住,食落外層夠晒豐厚內層又夠清新,啱晒鍾意清爽口感嘅朋友。 嫌唔夠喉,芝士控可以追加拉芝士醬(HKD20),濃滑嘅芝士緊緊包圍住食物,加了一層軟滑細膩嘅感覺。 鹽燒日本秋葵($28)好多朋友都唔鍾意秋葵嘅口感,怕佢咬落好黏嘅質感。不過呢個秋葵外皮燒到好香,食落有啲爽口,好特別!值得一試! 鍾意食魚香茄子煲?不妨試埋呢個惹味魚香燒原條茄子($45)啦!一嚟到未食,聞到已經好香!食落肉碎非常之惹味,加上燒過嘅茄子肉質嫩滑鮮甜,原條燒仲可以大大條茄子慢慢食,讚! 除咗串燒,小編特別推介大家試下呢款芝心日本廣島蠔脆棒($78)。趁熱食脆棒外層脆皮包住軟綿綿香濃芝士,一啖咬落去入面滾熱辣嘅蠔連埋半溶芝士入口即溶。如果再配埋沙律醬,直情係超高級軟滑享受! 食串燒又點少得啤酒呢?想啤啤佢嘅話,店內仲有好多特色手工啤酒任你揀!收工想放鬆下歎世界嘅朋友要試下啦! 大家睇完係咪好想食呢?如果想享受全單8折優惠,飲啤酒買1送1,免費食價值$20拉芝士醬,只需要完成以下步驟: 1.影張拉芝士相 2.上載到你 Instagram或Facebook 3.Hashtag # 同 Check in “串酒里” 4. 出示俾店員睇就OK喇! 串酒里 尖沙咀山林道6號B舖 星期一至日:18:00-01:00