Tagged: 扒房

0

【網民控訴老扒房三大罪狀 牛扒冇肉味質素似快餐】伏務台

有時食扒都會去啲港式懷舊扒房,鋸扒之餘又食吓氣氛。但係深水埗有成40年歷史嘅飛鷹餐廳就有唔少網民俾負評,仲提出三大罪狀添!究竟出咗咩事?睇埋落去等小編話你知啦。 罪狀一:留座唔俾人入 小編喺平日1點半左右入坐,店內只坐滿三分一。唔少網民提及嘅留座問題當日都存在,明明等候嘅食客唔多,但有三分一嘅枱都放咗「留座」嘅牌。有啲食客坐好先被要求調位,而小編都無一倖免。 罪狀二:餐湯冇味 小編點咗羅宋湯,蔬菜分量足但味道奇怪,飲落好似茄汁加水咁,陣甜味好重,唔似蕃茄本身嘅原味……有賣相但內涵欠奉,同場都聽到有客人話喺屋企煲罐頭湯都好飲過佢喎。 罪狀三:鐵板唔熱,牛扒過熟冇牛味,落咗勁多鬆肉粉 嚟到扒房梗係叫返個鐵板餐啦!究竟呢份配黑椒汁嘅新西蘭肉眼餐(HKD98)有冇網民提及嘅罪狀呢? 店員會幫客人淋埋汁先上菜,不過鐵板夠熱,上菜都聽到吱吱聲,未有發生網民講鐵板唔夠熱嘅情況。不過黑椒汁太多又太鹹,已經蓋過咗肉味。小編落單要牛扒5成熟,切開都見到肉心係粉紅色,但唔見有血水。雖然呢塊肉眼扒幾厚肉又大份,但肉味淡到近乎冇,質素同快餐店牛扒不相伯仲,但質感就冇網民講嘅落勁多鬆肉粉而太鬆軟。不過配菜方面就少咗啲咁,薯條數量十隻手指數得,哂得八條!仲有啲椰菜同一塊蕃茄,而成個餐最食到原味嘅就係塊蕃茄喇。其實嚟得扒房鋸扒都係想食得滋味啲,但質素似快餐的話真係勁扣分囉……   小編伏氣:4星(5星滿分) 入伏點:飛鷹餐廳 入伏價:新西蘭肉眼餐(HKD98,另收加一)[跟餐包、餐湯同餐飲] 中伏by #MOMO 美術by #MOMO 攝影by #MOMO 《伏務台》歡迎各界報料。

0

【40年老字號扒房 新Menu推和牛肉眼扒】Morton’s of Chicago

喺美國芝加哥有40年歷史嘅Morton’s,佢哋嘅牛扒同海鮮都好出名!唔使飛美國都食到靚牛嘅,香港分店Morton’s of Chicago喺尖沙咀就有得食啦,啱啱仲出咗新Menu,牛迷又要出動喇! 前菜嚟個原種小蕃茄及烤蘆筍沙律配意大利軟芝士(HKD228),軟芝士成嚿雪糕球咁,未食先興奮!仲有大量清甜爽口嘅沙律菜,幾開胃醒神。 搞搞新意思有厚切煙肉配蜜桃威士忌汁(HKD138),將12安士嘅厚切蘋果木煙燻豬腩肉以傳統牛扒方式煮成!燒到焦脆嘅皮滲出香甜嘅白桃波本威士忌味,令味道更香濃,好啱重口味朋友放肆咁食。 鍾意海鮮嘅可以試呢道香煎鱈魚配烤紅椒醬(HKD478),醬汁用烤紅椒同杏仁煮成,酸酸甜甜嘅感覺令你胃口大增! 新Menu重頭戲之一係7 安士美國”和牛”免翁牛柳配烤青辣椒牛油汁(HKD688),香滑嘅辣醬汁同軟腍肉味濃嘅牛柳配搭得好完美!配埋中辣嘅墨西哥波布拉諾辣椒牛油,令牛扒味道嘅層次更豐富。 重頭戲之二係8 安士美國”和牛”皇家肉眼扒(HKD788),大啖肉又鬆軟嘅口感令人一食就爆發心心眼!油脂唔算多,唔怕勁油膩,絕對係食肉獸最愛。 Morton’s of Chicago 地址:尖沙咀彌敦道20號香港喜來登酒店4樓 電話:2732 2343 營業時間:星期一至六:17:30-23:00,星期日:17:00-22:00

0

【爐頭生銹雪櫃臭晒 前員工控訴灣仔扒房】食焦

又有員工爆料喇,不過今次係前員工!上個星期,喺飲食群組「中伏飲食報料區」度,有網友自稱曾經喺灣仔克街一間西餐廳做過,因為睇唔過眼餐廳廚房嘅衛生同食物安全,一於將真實情況,影晒相po埋上網,打足成段字po咗9張相出嚟(不過原po之後刪咗嘅!)。 呢位前員工有圖有字,數足餐廳九宗罪咁多㗎!有乜呢?包括話餐廳俾客人飲嘅係水喉水啦、熱水得95度冇殺菌啦、冰櫃半年都唔洗一次、過期食物同其他食物放埋一齊、個雪櫃臭晒無人理、發晒霉都無人理、爐頭生晒銹等等…… 喺個po嘅文尾仲寫埋(冇tag到!)灣仔Carlo Riva呢幾隻字,咁呢間食扒嘅西餐廳Carlo Riva又係喺克街,咁好難唔令人聯埋一齊諗囉!有相又有名,自然上埋報,餐廳負責人回應傳媒嗰時,就無否認到啲相,只係話相信係一名前「炒散」員工同公司不歡而散,可能玩報復放上網喎! 網友反應又點?分咗兩派,有人話冇諗過真係咁唔衛生,「未見過咁惡劣嘅衛生環境」、有人又話其實好多餐廳嘅廚房都係咁,大家「眼唔見為乾淨啦」!不過更令網友好奇嘅係,之前原po樓主仲話會有料爆,點解最後刪埋po兼潛晒水?冇料再爆,搞到網友冇得再剝花生呀!

0

【美法式炭香靚牛 扒房新貴專食Flat Iron】Top Blade Steak Lab

喺何文田有唔少小店都做到出神入化嘅美食,Top Blade Steak Lab就係其中一間喇。呢度特別之處係專賣Flat Iron牛扒(牛肩胛部位嘅翼板肉),唔會見到西冷同肉眼扒㗎!點解?老闆之一嘅Edgar解釋,Flat Iron肉質軟腍似牛柳,但又似西冷扒咁肉味香濃,想俾大家食到不一樣嘅牛扒;而少地方賣係因為要花時間挑筋,唔易處理,所以有得賣嘅都多數好貴。 呢度感覺幾美式,好似入咗電影世界咁,影相都幾有feel。 Flat Iron Steak未挑筋之前叫Top Blade Steak,係牛肩唯一較軟嘅部位,餐廳名就係咁嚟喇。視乎牛嘅大細,一隻牛呢個部位開到5-7件扒,都幾珍貴。Top Blade Steak Lab提供美式同法式牛扒俾你揀,有咩唔同?美式係冇汁嘅,鍾意嗒真啲肉味嘅朋友可以試呢款;法式會配汁,冇汁不歡嘅朋友就要揀呢款喇。 美式香草平鐵牛扒(HKD150)配焗蒜頭,一啖肉一啖焗到好似薯蓉嘅蒜頭,令肉嘅甜味更突出。牛扒用秘調香草油掃過先燒,喺濃濃炭香味之間有少少清香嘅感覺。點少少海鹽,味道會更加突出。 法式客席主廚平鐵牛扒(HKD188)配薯蓉同牛仔骨汁,建議大家唔點汁食一啖先,小編勁Like牛扒嘅炭香味,點汁就會將呢種味洗走一半。牛仔骨汁有少少酒香,幾creamy。 呢度仲有限量供應以食朱古力大嘅朱古力飼和牛(HKD298),啲雪花紋幾靚,每日得10份咋!呢款係澳洲Mayure農場純血統和牛(Full Blood Wagyu),即係父母都係純種和牛冇mix過。Mayure農場係澳洲第一代飼養和牛嘅農場,有百年歷史喇。 朱古力飼和牛煮到五成熟都幾軟腍,肉非常新鮮,雖然見到血但唔會腥,好似肉汁咁。入口有脂肪嘅油香,但唔會用油份浸死你,配埋香草油煮嘅蔬菜,新鮮爽口幾正㗎。 Lunch想食牛扒,又唔想成塊肉咁多就揀招牌牛扒三文治(HKD68)啦。咪睇少佢,都差不多有半份牛扒,啖啖肉㗎。醬汁唔算多,食到本身香濃嘅肉味,配埋外脆內軟嘅薯條都幾飽。 Hot Coffee(HKD28)有幾款揀,不過都係Espresso Based,所以呢杯Cappuccino冇平時飲開嗰啲咁甜,男士都啱飲。   Top Blade Steak Lab 地址:何文田梭椏道4A號榮英大厦地舖 電話:3956 2011 營業時間:星期二至日:12:00-16:00,17:30-22:00

0

【黯然銷魂飯現身佐敦 重新打造高質黑毛豬! 】Baby K 寶貝廚房

想去市區食返個扒,唔一定要幫襯連鎖餐廳嘅。想靜靜喺小店慢慢歎返餐,小編推介位於佐敦嘅Baby K 寶貝廚房,大家可以物超所值嘅價錢,享受用心製作嘅上佳西餐。 餐廳入面格仔檯布非常搶眼,餐廳特色牆同燈飾令人感覺舒適。 作為前菜,鍾意食薯蓉嘅你一定好難抗拒呢個香草田螺焗薯蓉(HKD78),焗過嘅薯蓉喺柔滑之中增添咗幾分香烤味道,加埋田螺作為小食或前菜都十分滋味。 嚟得食西餐,自然會對扒類有期望。K至尊西班牙黑毛豬配薯菜(HKD178)完全唔會韌,食落肉汁豐富,配埋香脆粗薯條簡直一絕!嚟到食個晚餐,仲會包埋餐湯、蒜蓉包同熱飲。 如果想食海鮮,呢個K至尊阿拉斯加銀鱈魚扒配薯菜(HKD228)就啱晒你啦。鱈魚滑嫩而唔會鬆散,鍾意嘅話仲可以配檸檬汁或者特製醬汁加倍鮮味! 選擇困難唔知食咩好,呢個海陸空(HKD128)就啱晒你啦。有齊晒魚柳、豬扒同雞扒,豬扒同雞扒煎得香脆又不失肉汁,魚柳夠晒嫩滑,加埋薯條成餐就夠晒豐富啦! 叉飯就叉飯啦!但係呢個黯然銷魂飯(HKD78)係高級版!因為選用咗西班牙黑毛豬,入口感覺額外爽脆。仲係每日11:00-18:00限量發售10份,售完即止,想食到黯然銷魂飯就要留意啦,食唔到真係好黯然好銷魂呀! Baby K 寶貝廚房 電話:3704 7821 地址:佐敦白加士街7號康寧大廈地下 營業時間:星期一至日: 07:00-23:00