Tagged: #打邊爐

0

【尖沙咀新店香辣惹味鮮魚鍋 開幕加推龍躉魚鍋套餐】新辣道鮮魚鍋

終於有新款火鍋店誕生喇!尖沙咀啱啱開業嘅新辣道鮮魚鍋,以7款湯底分別配搭龍躉、巴沙魚、鮟鱇魚等魚片,炮製蒜香、酸菜、紅湯等口味嘅冷鍋(HKD179起),食晒啲魚就可以開始打邊爐。依家至2月2日仲有開幕加推嘅龍躉魚鍋套餐,即刻睇吓有幾正啦! 見到呢個門口咪以為自己行錯路,因為餐廳下層係酒吧,喺度等齊人嘅時候可以順便鬆一鬆。 樓上就係用餐區,一嚟到就見到大大「魚」嘅幅特色牆添。 雖然鍋底好夠味,不過都有醬料提供。鍾意辣嘅朋友可以試佢中間嗰格,自家秘製辣椒醬加辣。 新春龍躉鮮魚鍋四人套餐(HKD888/4位用)包咗招牌紅湯龍躉鍋拼清湯,記得唔好開大火住,趁魚肉緊緊熟就食晒先呀。紅湯有唔少花椒酸菜,味道都辣辣哋。 中間圓形嗰格係放咗雞湯,啱晒放蔬菜、菌類呢啲清新食物,不過睇埋套餐包啲咩先。 豚牛雙拼(原價HKD149)有特選級牛西冷同西班牙黑毛豬,兩款都係薄切,淥一陣就得,而且唔覺肥膩。 前菜鹵水鴨腎(原價HKD49)同涼伴青瓜(原價HKD39)可以係餸興餸之間隔住食又得。 三寶拼盤(原價HKD99)有牛丸、墨魚丸、貢丸。其中牛丸味道幾濃,咬開仲有肉汁添。 而「魚別不同拼盤」就有招牌魚皮餃、手工魚扎同鮮味傳統潮州魚蛋。另外仲有健康淮山麵(原價HKD29)、現炸魚皮(原價HKD39)、黃金響鈴(原價HKD49)同蔬菜什錦(原價HKD89)。 單點火鍋之中一定要試太陽魚籽蝦滑(HKD89),壓扁蝦滑再將蛋汁搽勻表面就可以放落鍋,好爽口彈牙㗎。 而清新食材方面,新鮮淮山(HKD39)同繡花菌(HKD69)絕對可以俾你refresh返。   新辣道鮮魚鍋 地址:尖沙咀亞士厘道14號亞士厘大廈地下及1樓 電話:3164 1390 營業時間:星期一至日:12:00-00:00

0

【火鍋撚冬季限定暖胃豬肚雞鍋 新推黃金系列+特色調酒】火鍋撚

鍾意打邊爐嘅朋友,就算未食過都會聽過火鍋撚,因為個名盞鬼之餘,食物質素都唔錯。最近西環店推出唔少限定款式,即刻睇吓有咩正嘢啦! 店名盞鬼,連店內嘅牆畫都跟返店名意思嚟設計。 等緊個鍋嘅時候最好有小食咬吓,依定西環店限定嘅惹味小食之中就有落足鹹蛋嘅黃金椒鹽粟米(HKD56)同黃金雞皮(HKD56),炒到粟米同雞皮都俾起砂嘅鹹蛋黃包住㗎!簡單啲亦有脆炸土豆片(HKD45)呢類同樣惹味嘅小食。 冬天打邊爐都係想暖吓身,呢度就有季節限定推出嘅招牌胡椒豬肚雞鍋(HKD298)。上鍋時店員會即刻剪開已煮咗嘅豬肚,同藏喺入面嘅原隻雞,分量好足!湯底滾返熱就食得,最好先飲碗胡椒雞肚湯,辣得嚟幾爽㗎。食埋爽口嘅豬肚同嫩滑雞件就開始淥其他嘢啦! 新出嘅點心火鍋系列全線分店都有,水晶叉燒包(HKD39)、水晶奶黃包(HKD39)、黑松露什菌餃(HKD55)都幾受歡迎,小編就覺得水晶叉燒包有驚喜,滿滿嘅叉燒餡好香又唔膩。經理教路最好用200-400度火慢慢浸熟,如果唔係好易滾爛。 如果想試返熱門湯底,咁就一定要試用牛奶煮成嘅蜂巢豆腐白湯鍋(HKD138)同有十幾種香料嘅祖傳秘製麻辣鍋(HKD138)。白湯滾起20分鐘左右就可以先食呢條韓國人參,都已經好出味㗎喇。而麻辣鍋除咗有滑嘟嘟嘅鴨血,亦同樣佢哋自家製嘅蜂巢豆腐,大件又唔易爛。 打仲有打邊爐必食嘅火鍋撚御用手切肥牛(HKD299),呢份大size絕對夠食肉獸醫肚呀!大火滾起湯底淥8秘就食得,肉味好濃添。 創意午餐肉菜甫餃(HKD59/左)大隻飽滿,鹹香又唔覺膩,而酒糟五花肉(HKD78/右)就煮完都仲有好濃嘅酒香。 唔打邊邊只係想同朋友吹水?西環店仲有新推嘅特色Cocktail同ShiSha(HKD200)。其中竹葉青酒(HKD68)帶椰香,夠薑就點我(HKD68)微辣得嚟幾清爽喎。   火鍋撚 地址:西環石塘咀皇后大道西554-560號日富里百好大廈地下1號舖 電話:2878 8001 / 5565 8850(WhatsApp) 營業時間:星期一至日:17:30-03:00

0

【九龍區5大肥美卜卜蜆 18禁辣度+獨食貝貝鍋】 潮窩私房火鍋、為食仔海鮮火鍋專門店、魚魂98、鮮蒲、回到味來

上深圳覓食嘅朋友唔少人會食卜卜蜆,唔會好滯又抵食。不過吓吓搭車上去都幾攰。小編搜羅集結喺紅磡同旺角五間有做卜卜蜆鍋嘅餐廳,等大家想食就即刻食到。而且有潮洲蒜香味、18禁爆辣版、高級版、任食同一人獨食鍋俾你揀,梗有一款啱你! 紅磡 1. 潮窩私房火鍋 新開潮式火鍋 喺紅磡新開嘅潮窩私房火鍋現時只做晚市,佢哋嘅火鍋湯底有港式同潮州風味。其中呢款招牌卜卜蜆鍋底(HKD168)嘅蜆肉質飽滿,入口有濃郁嘅蒜香味,但食完又唔覺得口腔有蒜味。湯底鮮甜唔過鹹,可以當湯飲返碗添。 View this post on Instagram 阿拉斯加蟹🦀 兩食,蟹腳打邊爐,蟹身就做花雕蒸蛋!鮮甜、嫩滑、多膏諗起都流口水😋 鍾意食海鮮的朋友,訂座時可以預留你喜愛的海鮮喔🦀🦞🦐🦑🐙🐠🐟! A post shared by 潮窩•私房火鍋 (@chillcuisine_hotpot) on Jul 10, 2019 at 5:47am PDT 而且呢度除咗火鍋料新解,就連阿拉斯加長腳蟹、象拔蚌(市價)等刺身都好吸引!因為佢哋每日攞貨,保證新鮮,想食最好預先order留貨喇。   潮窩私房火鍋 地址:紅磡灣中心20號 電話:9584 5588 營業時間:星期一至五:18:00-00:00,星期五至日及公眾假期:17:00-00:00...

0

【冬蔭功火鍋味不對辦 湯底十級鹹海鮮雪味十足】伏務台

有時約唔到飯腳,但係又想過吓邊爐癮,自己食個一人份火鍋既方便又實惠。以為火鍋好難中伏?偏偏小編遇上了!九龍灣稜閣屋呢間日式餐廳,格局同價錢比連鎖快餐店高啲,有個冬蔭公海老Champonの盛鍋好似幾吸引,點知食落冇冬蔭功味,啲蝦仲好唔新鮮,唔怪得接近六點晚飯時間,成間餐廳得幾丁客啦……究竟湯底變成點?啲蝦又點?睇埋落去揭曉啦! 環境偏日式裝潢,都算整齊嘅,六點左右有小編同另一枱客,不過食到七點左右都未滿座,但同區其他餐廳就個別已經出現人龍喇。 呢個冬蔭公海老Champonの盛鍋(HKD108)有加一服務收費,比平時嘅連鎖快餐店都貴咗三十至四十蚊左右,但見到實物已經覺得唔太值,食完就更加唔會點頭囉。 成個餐嘅樣就係咁,海老就係一隻蝦、而餐牌上面寫嘅淡水龍蝦球,其實唔係球,係得一片仔嘅龍蝦肉,嚟近鏡睇吓: 隻蝦同呢一片仔龍蝦肉賣相好唔吸引,不過照煮滾佢試咗先。 煮完之後,隻蝦變到死灰色,唔係橙紅色已經唔敢食;塊龍蝦片咬落非常之爽,只係雪得過耐而煮熟嗰種爽口感,食到嗦嗦聲。小編明白呢個價錢唔係食啲靚嘢,但都應該比平時快餐連鎖店好先啱囉。 如果冬蔭功湯底真係有冬蔭功嘅酸辣味,都可以幫手遮多啲食物嘅雪味。但呢個酸辣味近乎零,反而同日式「精華」濃湯激似嘅味道。點解係「精華」呢?因為小編食到重度鹹味,愈食愈想飲水。滾到咁上下想加湯,即使加咗枱面一早已經準備好嘅清水都依然係鹹味濃囉。 其他食物好似青口、蔬菜、蟹柳都正正常常。不過件豆腐就好假,質感超滑幾Q彈,好似蒟蒻咁,只係冇咁爽口啫,當然亦都冇豆味啦。 而豚肉同烏冬當然都雪到冰晒啦,所以擺吓等佢解凍。呢兩樣食落幾正常,同埋係成個火鍋最好食嘅,真係有啲本末倒置嘅感覺,加埋個麻醬就更加唔覺得係冬蔭功火鍋添。   小編伏氣:呢個火鍋兩大主角冬蔭功同海老都唔掂,湯底味道貨不對辦已經唔多高興,俾咗錢又食唔到原本想食嘅味道。加上雪到啲肉死晒嘅蝦肉,真係買個即食湯包返屋企自己煮都冇咁嬲。仲要呢個一人份嘅價錢再俾多少少,已經可以去連鎖快餐店食到兩份,仲要食物質素好過佢囉。俾錢埋單嗰陣,見到出餐位置擺咗七、八份豚肉出嚟疑似等人落單(眼見現場已有客人食緊,又冇新單叫啦),咁樣處理食物更加唔會返轉頭啦。 入伏點:稜閣屋 入伏價:冬蔭公海老Champonの盛鍋(HKD118.5已加一) 中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【$188任食2個鐘宮廷火鍋 必試養生燉湯+麻辣湯底】老沸爺火鍋

依家打邊爐湯底真係愈出愈多,最好集邪惡同養生於一身就最啱添!最近銅鑼灣新開嘅老沸爺火鍋就將川派麻辣、台式養生、老火湯同多個國家風味整成16款湯底,加埋川式火鍋料,任食兩個鐘最平每位188蚊就可以試到好多種食物,餐廳裝潢仲好有宮廷feel。負責人之一Wyan話:「餐廳裝修以宮廷為藍本,而清朝慈禧太后又叫老佛爺,再加入唔少禪意嘅佛像做裝飾;『佛』同『沸』個音好似,配埋打邊爐『沸騰』嘅意思,就起名『老沸爺』。」。有幾皇宮、邪惡同養生氣派?睇落去有圖有真相! 仿古設計嘅木椅一張坐到兩個人,成張宮廷大班椅咁。 呢度有兩個任食價錢(HKD188/位或HKD288/位),都係食兩個鐘,不過配嘅拼盤、火鍋料同湯底當然有唔同。16款湯底之中,最吸睛梗係數量有限,每日燉成四個鐘先有嘅養生燉湯啦;跟住就到滋補老火湯同其他中、西、日、韓式等湯底。 小編叫咗鴛鴦鍋(HKD288/位,另加一次性收費HKD30;燉湯亦另加一次性收費HKD30),鍋底點咗雪燕緊蹄龍骨燉湯拼馬拉沙嗲。燉湯一大盅拎上枱再放落鍋,一開蓋就聞到好大陣香氣,店員隨手一潷就係滿滿嘅湯料。建議大家先飲碗湯,唔止煲到出晒味勁清甜,再加水都係落返燉湯而唔係清水,所以只會愈滾愈香濃呀!而馬拉沙嗲湯底好滑同惹味,有沙茶、沙嗲、乾蔥、椰奶同花生碎等十幾種香料,夠味但唔會過鹹,一樣試得過喎。 附送嘅拼盤按人頭計算分量,兩種任食價附送嘅款式都唔同。呢盤係HKD288嘅四人分量,喺12款收費食物之中送10款俾你淺嚐,有美國A級安格斯牛頸脊、爽脆炒齡鵝腸、大刀黑毛肚、新鮮千層肚、彈牙黃喉、油花牛胸爽、去骨鴨掌、正宗潮汕手打牛肉丸、雲南雪花繡球菌同台灣水蓮菜,試過先再落單就更有保證啦。 小編另外叫咗兩款冇跟喺拼盤嘅收費食物試吓。手切溫體雪花肥牛(HKD228/小)脂肪唔算好多,口感厚啲,但都幾滑同比平時嘅肥牛重肉味。 美國桶蠔(HKD168)非常大隻同飽滿,因為餐廳揀咗幾乎最大嘅size,滾嘅時候要耐啲先熟透㗎。 任食款式選擇就比較多川菜食物,一定要試筷子牛肉(前右),廚師按照牛肉嘅紋理,切肉眼邊有啲筋嘅部位,所以口感特別爽口彈牙,滾20秒就食得喇;仲有可以咬軟骨嘅瘋狂牛肉(左)同鹹香嘅川式臘腸(後右)都值得一試。 如果想解辣,當然係食返碗降火解辣冰粉(原味)面頭加咗提子乾、西瓜粒、山楂粒、糖冬瓜粒同玫瑰花,味道同層次更加豐富。想方便啲又可以叫杯巨峰提子蘇打冰粉爽,邊啜邊食嘢又得啫。 門口嘅川式自助小食都吸引唔少人去攞㗎,而部分蔬菜同飲品就自己去大雪櫃任攞。咁多款配搭好亂?睇埋下面嘅menu就一目了然啦。   老沸爺火鍋 地址:銅鑼灣堅拿道西10號冠景樓1樓B學舖 電話: 2361 6818/2361 6918 營業時間:星期一至日:17:00-03:00

0

【麻辣火鍋夫妻肺片攻港改名 首間海外店跟足台灣配方】夫妻沸片

今次唔睇真啲都以為自己搞錯,今日開始喺旺角試業嘅夫妻沸片個名同台灣麻辣火鍋鼻祖夫妻肺片激似。不過唔好以為係冒牌,佢哋係如假包換嘅夫妻肺片首間海外店。話晒係33年以來第一次衝出海外,所以想個名好意頭啲,將「肺」轉成「沸」,有沸騰嘅意思又配合到火鍋嘅感覺。因為佢馳名嘅麻辣湯底加入牛骨熬煮,所以味道濃郁香口。咁仲有咩湯底?睇埋落去啦。 餐廳有唔少卡通牆畫,木櫈都好寬敞,擺咗袋都仲坐得幾舒服。呢度用平板自助落單,上菜速度唔錯。 湯底有五款,分別係夫妻鍋(HKD188)、兄弟鍋HKD148)、美人鍋(HKD198)、閨蜜鍋(HKD188)同暖男鍋(HKD198),亦可以叫鴛鴦鍋(每款揀選嘅湯底都係HKD108,即共HKD216)。今次先介紹頭三款,首先梗係講跟台灣做法,有33年歷史嘅麻辣湯底,即係夫妻鍋。呢個湯頭用咗唔少藥材同牛骨熬製,飲落味道濃郁又香口;但滾完啲食物再夾入口,咀邊又會覺得有啲麻,原來個鍋上枱前會再放啲花椒落去,愈滾愈出味囉。跟鍋嘅餸料仲有秘製鴨血同豆腐,煮到入晒味,令人食完一件又一件。 兄弟鍋就係另一款台式經典湯底「酸菜白肉鍋」,酸菜同豚肉分量好足。食嘅時候先食涮肉,令肉汁同油脂溶化喺湯頭。飲湯嘅時候又夾埋酸菜,感覺又會冇咁膩。 美人鍋就啱晒女士喇。用花膠、一隻光雞、杞子、紅棗同當歸等多款藥材熬煮,滋陰養血又清甜,記得飲碗湯先開始淥嘢食喇。跟住睇吓有咩火鍋料啦: 安格斯肥牛片(HKD198)分量唔算多,但肉質唔錯;滾完之後唔會有太多肥膏,入口滑而不膩。 豚肉花(HKD118)一朵都幾大,台灣叫松阪豬,亦即係豬頸肉。口感偏爽,煮耐咗都唔會好老喎。 海鮮拼盤(HKD288)就啱啲想食得多而精嘅朋友,因為有鮑魚、青口、蝦、墨魚仔、扇貝、沙白同斑片。全部都好新鮮,小編煮晒幾隻沙白,全部都開口㗎。 繁花似錦(HKD138)有六、七款唔同嘅蔬菜同菇類,不過建議有四至五個人先叫呢款,因為真係超勁量囉。 飲品方面有三十幾款,培火鐵觀音珍珠奶茶(HKD28/冷,HKD26/熱)茶味算濃,珍珠都煮得好軟腍。   夫妻沸片 地址:旺角彌敦道625及639號雅蘭中心地庫B102B102 號鋪 電話:2625 0199 營業時間:星期一至四及日:17:30-02:00,星期五、六:17:30-03:00

0

【小心5大高卡湯底 營養師醒你火鍋餐單】懶健康貼士

12月真係冬天㗎喇,約朋友食飯多數揀火鍋,一班朋友圍爐烚吓烚吓,開心又暖笠笠!不過少食多滋味,多吃肥死人呢!面對大量火鍋飯局,身邊唔少人都話:「下星期有四次火鍋飯局,今次點減都好難打回原形啦。」。其實食火鍋都可以食得健康,最重要係知道邊款湯底最邪惡,邊款會健康啲。今次俾埋餐單,教埋你食咩控制卡路里,要做幾多運動減返,甚至唔使減都有數得計啦。 五款邪惡高卡火鍋湯底 芝士火鍋 邪惡點:以一人分量250 毫升計算,佢已經含有大約572卡路里同33.6克脂肪。雖然芝士含豐富維他命D、蛋白質同鈣質,但係佢同時係乳製品,含有來自牛奶嘅飽和脂肪;而且通常食芝士火鍋會配埋西餐常見嘅炸薯條、香腸等高熱量食物,所以極之邪惡! 邪惡指數:5粒星 重慶麻辣火鍋 邪惡點:呢款火鍋本身用咗大量牛油或植物油(清油)烹調,以市面上常見嘅預製麻辣湯包計算,一鍋就已經有高達650-800卡路里!當中超過八成嘅卡路里都來自脂肪,每一件淥熟嘅食物沾上當中嘅油份,會令卡路里攝取量大增。傳統嘅麻辣火鍋係用牛油烹調,變相有飽和脂肪,攝取過量除咗引致體重增加,仲會增加壞膽固醇同心臟病風險添。 邪惡指數:5粒星 雞煲(加湯轉火鍋) 邪惡點:喺烹調嘅時候會加入大量醬料,好似柱候醬、沙茶醬、花椒油同麻油,每湯匙醬料已經含有約40-135卡路里,而且煮一個雞煲要用6-7湯匙醬料同香油,加埋鮮雞喺烹調嘅時候,會迫咗大量雞油出嚟,令雞煲火鍋打入邪惡火鍋行列。 邪惡指數:4.5粒星 沙嗲湯底 邪惡點:為咗令湯底更鮮味,多數用咗大量牛骨熬製,再加上大量沙嗲醬調味,而一湯匙嘅沙嗲醬已經大約107卡路里,如果落6-7湯匙醬料就已經有大約640-750卡路里喇! 邪惡指數:4粒星 豬骨湯底 邪惡點:以豬排骨做例子,100克重量豬排骨嘅熱量有208卡路里,脂肪有14.7克。熬一個濃濃嘅豬骨火鍋湯底一般用2-3磅豬骨,而豬骨內嘅脂肪都會迫晒出嚟,增加湯底嘅熱量㗎!如果食店為咗令湯底更濃郁,有時會加入牛油調味,變相又增加埋熱量添。 邪惡指數:4粒星   除咗高卡路里嘅問題,大部份火鍋都含有相當高嘅鈉(鹽份),有啲火鍋湯底一鍋嘅鈉含量仲高達9000毫克(世衛建議每日鈉攝取上限係2000毫克)。攝取過多鈉唔止引致水腫,仲會增加患上高血壓嘅風險,長期高血壓可以引致心臟病、中風同腎衰竭等疾病添。   點樣打邊爐可以健康啲? 有時的確避唔開邪惡湯底,始終係惹味啲嘅。大家可叫鴛鴦湯底,另一款揀個比較清嘅湯底,好似皮蛋芫荽湯底、柴魚昆布湯底或蕃茄豆腐湯底,邪惡湯底就盡量淺嚐啦。   營養師建議健康火鍋配搭(約500-600卡路里) 湯底:皮蛋芫荽湯底 芋絲7件 西洋菜 半碗 烏冬半碗 金菇 半碗 木耳 半碗...

0

【海鮮大咖合體酒吧推新菜 刁鑽麻辣串燒爽口彈牙】辣吧

鍾意返大陸食四川菜嘅朋友都可能食過海鮮大咖,呢種用一個大平底盤放滿唔同種類海鮮,再倒入麻辣湯嘅打邊爐食法近年好流行。上年第一間引入呢種食法嚟香港嘅麻辣派,早前由旺角搬咗去尖沙咀諾士佛臺,由20個位增加到有90個,仲改名為辣吧添。新舖除咗有海鮮大咖,仲有多款刁鑽部位嘅麻辣串燒、麻辣烤海鮮同四川冒菜等菜式;另外仲有中式cocktail同啤酒,將麻辣同酒吧合體。不過大家放心,都有極少數食物係唔辣嘅! 新店座位好闊落,亦有吧枱可以俾你飲酒吹水。嚟到新店,小編梗係試新菜先啦! 小編好想試嘅網紅海星(HKD128)真係要問店員點食先啱。廚師烤熟後用海鹽墊底上碟,反轉剪開底部挖綠色嘅內臟出嚟,就咁食幾似食緊蟹膏,濕濕哋有少少汁;正宗啲點芥末豉油亦得,不過會蓋過佢本身嘅鮮甜味,所以小編鍾意點海鹽,因為鹽可以提升鮮味呀!店長話有啲人都因為海星慕名而嚟,不過有人會覺得腥,但小編又唔覺喎,可能因為小編勁鍾意食蟹膏啦。 跟住到麻辣串燒喇,肉類同素菜加埋成四十款,老闆之一Sonic話四川嘅串燒食材比較爽口,有啲部位仲好刁鑽,所以餐廳用料多喺國內運嚟,香港其他地方未必有㗎。上菜嘅時候,會用火一路熱住鐵盤,不過建議大家趁熱食,擺得耐會乾。小編試嘅4款由左至右分別係: 鴨郡把(HKD26/串)係鴨腸同鴨賢之間嘅血管,口感比鴨腸爽口同厚啲,都易咬開。 豬鼻樑筋(HKD26/串)真係估唔到有得食,係呢幾款之中最彈牙,亦係小編最鍾意嘅,因為冇咁肥。 豬天梯(HKD26/串)係豬喉嚨,雖然都爽口,但質感會相對硬少少。 手打牛肉餅(HKD26/串)就係將手打牛丸壓扁整成餅,同煮湯麵嘅手打牛丸比會乾啲,但一樣彈牙。 食完呢幾款串燒,個咀都有啲麻,辣度似譚仔3小辣同2小辣之間,都容易接受。 魚喺燒烤菜式之中,最常見係多春魚,呢度反而烤耗兒魚(HKD32/條),Sonic話鍾意佢嘅肉質夠結實同鮮甜。小編平時好怕食魚要挑骨,但佢好易起肉,細骨亦唔多。 折耳根烤大茄(HKD48/條)面頭唔係蒜蓉,而係落咗折耳根,即係平時煲綠豆沙用嘅魚腥草(臭草),順便清熱一吓又幾好喎。味道就係平時燒茄子咁,微辣但非常多汁,好似右圖咁一壓落去就睇得出幾咁juicy呀! 熱鍋串串(HKD128/揀10款,每款3串)啱晒想輕食又想有食火鍋feel嘅朋友,餐廳煮好就一大碗咁上菜,拎起真係熱到冒煙㗎!葷素加埋有42款選擇咁多,小編揀咗素菜多啲同唔辣嘅蒜蓉汁。其中右邊嘅海帶薄薄哋幾軟滑,左邊嘅麻吉燒喺魚蛋裡面加年糕,煙韌唔覺膩喎! Sonic話好多鍾意食辣嘅人會追辣,因為愈食愈過癮,所以佢哋都有爆菊花系列滿足同好。不過小編仲想有命落樓,只係挑戰5隻辣椒。 湖南小米椒干爆雞軟骨(HKD88)雖然係當日食嘅嘢之中最辣,大約接近譚仔小辣。食嘅時候記住吞晒先好講嘢,否則啲辣粉好易嗆喉㗎。雞軟骨嘅炸漿唔算厚,都幾脆,係好正嘅下酒菜呀! 嚟到當然要試埋辣吧嘅招牌海鮮大咖(HKD288/一人份)啦!呢個大盤裝咗8人分量,但唔需要按人頭落order,如果4-5人可以叫2人分量,可以留肚試埋其他小菜吖嘛。餐廳每日提供6-8款海鮮,會按時節調整款式;仲有配菜俾你揀添,豆卜、芽菜、薯條、冬瓜、生菜、白蘿蔔、土豆粉可以揀四樣,食落都咪話唔飽。湯底有唔辣嘅蒜蓉汁同分大、中、小辣嘅麻辣汁,小編揀咗小辣,惹味又品嚐到海鮮嘅鮮味,依家近距離睇吓質素點先! 膏蟹係深得小編歡心嘅,微微炸過令膏同肉冇咁易散,啖啖甘香嘅蟹膏食到流晒口流㗎! 貴妃蚌同鮑魚仔平排,明顯睇到貴妃蚌堅好肉地,一咬就嗦嗦聲。 蟶子王同魷魚筒都同樣出色,尤其係魷魚筒,好少有咁大隻,一路煮都唔會韌。 酒類可以試吓cocktail,呢兩杯係兩位老闆嘅最愛,所以用返老闆個名命名。左邊SONIC(HKD118)用檸檬草浸嘅龍舌蘭酒、蘋果汁、蘋果花茶、百香果糖水等用料調製,果香中帶甜,不過唔會甜死人。右邊YU(HKD118)用咗廣東米酒、桂花陳酒、Rum酒、菊花茶同菊花糖水調製,真係好似飲菊花茶咁清新下火喎。兩款cocktail嘅酒精濃度唔算高,唔嗆喉,喺食濃味嘢同時可以refresh吓都幾好㗎。   辣吧 地址:尖沙咀諾士佛臺1號1樓 電話:6433 3362(WhatsApp) / 2363 0313 / 2363 7288 營業時間:星期一至日:17:00-03:00

0

【主題房通頂任玩喪唱 $28食埋麻辣鴛鴦鍋】Partyland Plus

一班人想玩得盡興又坐得舒服,好多人都會揀party room嚟book!Partyland算係第一代party room中打出名堂嘅,喺觀塘嘅分店Partyland Plus大間啲,有6間主題房,包唱K、勁多Switch game、Broad game、街機之餘,仲有得打邊爐呀!依家有暑假優惠益大家,4人起就可以包房最少3個鐘,真係我有我唱K、你有你玩game都唔會悶呀! 俾大家睇住幾間房先啦,愈大間就愈多道具影相同玩遊戲㗎: WWF(15-30人房) Mega World(6-15人房) Chimney House(4-8人房) Secret Room(2-3人房) 遊戲都好多花款,飛鏢、Broad game、換衫自拍等等。頭先講過有得打邊爐,即刻睇睇先: 想享用鴛鴦火鍋套餐(麻辣+鮮茄湯)*^要提早一天預約。有美國特級肥牛、A級豚肉片、特級台灣邊爐丸、特濃芝士腸、香脆響鈴、日式烏冬、蔬菜豐盛拼盤;凍頂烏龍茶、汽水等飲品任飲添!麻辣湯充滿辣椒仔,雖然辣但唔油,仲好香添;而鮮茄湯用上大量鮮蕃茄煲,蕃茄味極濃又鮮甜,香脆響鈴浸落湯度吸盡鮮茄湯,極之一流呀!台灣邊爐丸好Q彈,蝦丸大大粒好滿足;肥牛肉厚,分量都算多,油脂比例平均;豚肉片更加大大塊! *圖爲3-4人量 ^暑假優惠: 10:30-13:30:HKD88/位,包房加打邊爐。 14:30-17:30:HKD98/位,包房加打邊爐。 00:00-07:00:HKD128/位,包房玩足7個鐘,另外每位加HKD28就有埋打邊爐。 優惠條款: 1. 提前一天預訂; 2. 去Partyland Facebook專頁將優惠post截圖,然後WhatsApp到5931 8688(Partyland)book場,就可以享有暑假優惠喇。 提提大家,玩完記得還原場地呀。   Partyland Plus 地址:九龍觀塘開源道55號駱駝漆大廈7樓C室 電話:5931...

0

【貼地茶記打邊爐出晒名 雙龍海鮮鍋鮮甜多料】玫瑰餐廳陳儀興

呢排天氣真係好似女人咁好難捉摸呀!趁住仲有少少涼意,小編約埋班fd打吓邊爐喇,早就聽聞新蒲崗有間茶記玫瑰餐廳陳儀興打邊爐好食到出晒名,梗係唔執輸去試吓啦! 今次嗌咗呢個雙龍吐珠海鮮鍋(預訂價HKD298;原價HKD308),鍋底用蔬菜墊底,有栗米、南瓜、蕃茄同菇類,全部索晒海鮮嘅鮮味,正呀! 至於主角海鮮方面就有本地龍蝦仔、貴妃蚌、蝦、大大隻元貝同大蜆,款款都超鮮甜,肉質彈牙。呢個鍋係4人分量,大家早一日預訂就減10蚊!原價係HKD308㗎。 打邊爐除咗要有好嘅海鮮,湯底亦非常重要㗎!巨龍海鮮鍋用咗多款海鮮配料熬製而成,飲落啖啖龍蝦鮮味,鮮甜得嚟又清新,最重要係一啲都唔油膩,啱晒一眾怕肥又想打邊爐嘅為食貓喇! 如果嫌食海鮮唔夠喉嘅話,店內都提供多款火鍋配料俾大家選擇。小編揀咗呢個黑松露墨魚丸(HKD98)喇,咬入口相當彈牙,仲咬到粒粒墨魚添;而且黑松露特有嘅「煤氣味」亦相當出,聽侍應講,原來呢款墨魚丸係廚師親手打㗎!果然係機器做唔到嘅口感! 另外不得不推介呢個魚鰾(HKD68),其實小編咁大個人都未食過,因為一直覺得賣相麻麻,血淋淋又脹卜卜咁。不過侍應哥哥話,「平時你哋食嗰啲花膠呀,咪就係魚鰾本人囉,曬乾咗之嘛!」咁小編即管試吓,食落係有少少腥嘅,不過咬得出啖啖骨膠原嘅感覺,好「膠」呀! 雖然係海鮮鍋,但打得邊爐又點可以唔食牛喎!呢款超正牛爽肉(HKD68)食落滑嘟嘟,從肉上嘅花紋可以睇到佢嘅脂肪比例冇一般肥牛咁高,啱晒怕肥嘅女士們呀!另外如果男士們始終都係愛肥牛嘅話,亦可以嗌埋呢個招牌手切本地肥牛(大)(HKD218),比起平時食開薄過塊紙嘅肥牛呢,呢度嘅肥牛真係好有咬口,而且好有牛味,非常新鮮!   玫瑰餐廳陳儀興 地址:新蒲崗爵祿街33A-37A號百勝工廠大廈地下 電話:3583 1123 營業時間:星期一至六:07:00-23:00;星期日:18:00-22:30