Tagged: 投訴

0

【元朗烤鴨片附送發霉麵皮 事主:黃膽水都嘔埋出來!】食焦

成日話眼不見為乾淨,咁擘大隻眼清清楚楚見到污糟嘢,咁好難話乾淨喇啩?好似呢位咁唔好彩嘅網友咁,喺元朗一間食川菜嘅餐廳霸王川莊食飯,叫咗碟烤鴨片,好例牌梗係會有埋一碟麵皮上埋枱,夾埋啲片皮鴨一齊食啦,點知見到塊皮上面有一點點嘢囉…… 「頭3片麵皮我們沒有看清楚就吃了,起初誤以為麵皮表面是蔥花」。事主將相po咗喺盡在元朗群組,睇見啲麵皮真係發晒霉咁款喎,好恐怖!估唔到事主竟然會以為係蔥花食鬼埋喎!事主仲話「昨晚肚子開始不適,每次想起發霉的麵皮黃膽水都嘔埋出來,我以後也不會再幫襯」。 其他網友見到都話恐怖啦,又叫事主點解唔即刻叫食環報海關等等,有網友又話事主其實嗰晚餐飯唔使俾錢,又有甜品送又有100蚊禮券又滿意接受晒經理道歉,唔明佢點解刪完個po之後又要再po過出來,咁樣公審間餐廳唔係咁好! 輪到事主又回應喇,佢話唔係錢嘅問題,而係唔想再有人成為受害者啫,亦都希望呢間餐廳能夠以後做好嚴謹監管食物質素,唔好再有同類事情發生咁話!咁又真喎,連咁明顯嘅發霉麵皮都拎得出嚟俾食客,又真係要講出來等人警惕吓先得㗎!

0

【公審牛涮鍋禁素葷同枱 無理素食者被網友圍攻】食焦

素食者有時都好有堅持,網上仲不時出現素食者同肉食者嘅矛盾大對決添,掀起過好多爭論㗎!最新一單係點呢?就係素食者要去牛肉火鍋放題店食素,究竟係咩玩法呢?最近有素食者喺自家素食專頁開帖,「不會再來這餐廳~牛涮鍋 因為他 “禁止”素食和肉食朋友同枱食 我被迫要”一個人坐開”食團年飯」。 話說事主同屋企人去咗黃埔間牛涮鍋食團年飯,而事主係素食者,佢話店家唔俾佢同屋企人坐埋一枱喎,「是他們質素差,反而我們食素的, 會有種豁達」,仲話以後唔會再幫襯添!此po一出,引來唔少網友分享去其他飲食群組,結果,好多人都覺得事主口口聲聲話自己豁達,但又公然將事件放上網想公審店家,根本係假豁達! 而網友異口同聲都話店主將佢哋分枱坐嘅做法係正常不過,你食素係冇問題嘅,只要你肯俾返食肉者選餐嘅同樣價錢就得,唔肯嘅話,店家要求你分枱坐亦好合理,「如果全枱1個俾肉錢,其餘6個俾素錢然後狂食肉咁點?真係豁達嘅茹素者應該深明此理,無人歧視你!」 網友仲話事主食素要去牛涮鍋都已經夠搞笑,仲好意思想公審店家!咁點先可以同枱呢?原來只要加返10蚊相等於肉食者嘅同價就得,即係事主唔肯自己加嗰十蚊雞,先要分開枱坐啫!自己開po得唔到共鳴,反而仲要俾其他網友圍攻,做人更豁達都受唔住啦!所以呢,眼見群情洶湧,事主拿拿臨刪po,仲連自己個素食專頁都del埋!算唔算攞嚟衰?

0

【網民諗起作嘔 IRVINS致歉 人氣鹹蛋魚皮驚現炸壁虎】食焦

之前掀起過一陣鹹蛋乜乜乜熱潮,最熱門梗係鹹蛋魚皮,其中來自新加坡嘅IRVINS SALTED EGG更加令人食上癮,仲過江攻港開埋期間限定實體店添,大排長龍個個買一大袋!又脆口又有鹹蛋香嘅魚皮確係零食之寶,塊塊炸到脆卜卜,有冇諗過會有一日食落肚嘅唔係塊魚皮呢? 唔係魚皮咁係咩?係條炸壁虎呀!唔係啩?當事人係一位泰國女子,佢喺12月29日將呢段恐怖經歷po咗上facebook,佢話開咗包IRVINS嘅鹹蛋魚皮,阿媽同細佬食食吓竟然發現有隻鹹蛋炸壁虎(gecko)混埋喺入面,事主細佬最初仲以為係魚頭,幾乎想食落肚㗎喇,好彩睇睇吓個樣愈諗愈唔對路,先冇放入口! 事主有圖有真相,清楚見到一隻幼條壁虎狀嘅物體,面頭仲沾滿咗鹹蛋黃咁,真係唔留心嘅話隨時食咗落肚都唔知呀!事主好肯定咁認為隻壁虎係同啲魚皮一齊混埋嚟炸!呢個驚嚇po一出就引來媒體報導,事主接受新加坡《海峽時報》訪問嗰陣,話自己11月初喺曼谷一間超市Villa Market買咗包鹹蛋魚皮,之前都買過幾次同屋企人同埋同事食,佢話喺曼谷買鹹蛋魚皮好貴,一包要成700泰銖,差唔多百七蚊港銀! 咁唔好彩遇到炸壁虎,事主話佢阿媽依家諗返都想作嘔!俾網民瘋傳鹹蛋炸壁虎相,IRVINS SALTED EGG創辦人Irvin Gunawan喺1月2日,立刻喺官方fb專頁度回應,表示感到震驚同難過(very shocked and devastated),向事主致歉,仲話公司會作出退款同支付相關醫藥費,重點係佢話公司已轉用另一間生產工廠,會更嚴謹控制檢驗過程同衞生情況咁話喎!

0

【鐵板餐冇鐵板變膠碟上枱 食客報海關大家樂補鑊】食焦

鐵板餐冇鐵板係咩玩法呢?仲要個原因係因為間舖細,所以唔用鐵板上?呢個原因真係令人搲晒頭喎!大家樂嘅鐵板餐咁耐歷史,其實係唔少人嘅童年回憶添㗎,唔用鐵板上變咗做膠碟餐就真係完全唔係嗰回事啦! 理想與現實相差太遠,話說有網民去咗日出康城間大家樂分店,諗住食返個鐵板餐,點知換來膠碟餐,「早幾日係康城間大家樂食鐵板餐,夠膽死鐵板都無個,就咁俾隻膠碟你上,D肉就半暖,D汁同菜就凍,好難食……」最令人接受唔到嘅係廚房師傅嘅說法,「同個廚房講,佢竟然答我:因為間鋪太細,所以無鐵板,仲同我講有唔滿意就一係退錢一係換過第二樣……」 依家喺大家樂食個鐵板餐要成70蚊,冇鐵板上仲要咁難食,事主梗係嬲豬啦,難得嘅係事主老竇識得苦中作樂,仲同事主講「我老豆仲叫我當係all day breakfast咁食個觀感就fit晒!」不過事主都係氣難下,send咗投訴信去海關、消委會同大家樂,睇吓有冇違反商品說明條例! 未收到大家樂回覆,但係事主經過「膠碟大家樂」嗰陣,發現原先餐牌上嘅鐵板餐,已經下咗架喇,偷龍轉鳳換咗個「滋味扒餐」,即係冇鐵板嘅!而事主之後就收到大家樂嘅官方回覆喇,都係好官腔咁話,其實康城店一直都係冇鐵板餐嘅,只係嗰日員工疏忽上咗鐵板餐牌喎,跟住都有耍晒冧道歉嘅!咁大家以後要識路喇,要食真.鐵板餐,唔好再去康城大家樂喇!

0

【前DJ怒數唔尊重食客 鏞記$100燒鵝麵掀網戰】食焦

成百蚊食碗麵仲要食到一肚氣,今次就係為咗碗燒鵝麵喇!不過估唔到因為咁反而惹咗唔少網民惡言啫!前港台DJ何嘉麗喺自己專頁度出po,話去鏞記食燒鵝麵食到火都嚟,仲話「簡直覺得係俾鏞記羞辱!」,好激動呀! 究竟為乜咁嬲呢?就係話說叫咗碗100蚊嘅燒鵝麵,上到枱見到嘅燒鵝,鵝皮嘅唔同色明顯係來自唔同鵝,亦好明顯係師傅左一忽右一忽咁斬落嚟,拼拼砌砌咁上碟!「大佬,$100,你可能覺得唔係乜嘢錢,但係都請你尊重下我,俾返舊齊齊整整嘅肉我啦!」仲曲線咁讚師傅喎,「大大細細切頭切尾都可以砌到咁靚,,師傅刀法真係神乎其技!」 呢個po一出就有網民話全行燒味佬都係咁切法喎,又話點解唔當場投訴要食完先po文出來呀……不過咁,留意返呢位前DJ嘅說法,「咁斬鵝就梗係拼砌㗎啦!你話。問題係呢啲擺到明就係啲肉頭肉尾,呢度一忽嗰度一片咁砌成!」佢話最氣頂嘅係咁樣做法好唔專重自己個老字號同埋食客喎! 搞到出埋新聞見埋報,鏞記發言人就對傳媒回應,話鏞記嘅燒鵝係以炭燒方法烹調,喺炭燒過程入面,即使同一隻鵝受熱程度都會唔一樣,燒鵝皮先有機會顏色唔同喎。而何嘉麗就似乎唔多接受呢個解釋喇,佢留言話「越解釋越亂」! 其實鏞記係老字號兼燒鵝出名唔使多講,不過亦有唔少人對佢評價有相反意見,覺得鏞記近年嘅水準每況愈下,加上伙記服務態度非常麻麻,喺呢個講求CP值嘅年代,鏞記連食老本嘅資格都無,有網民仲話近年去鏞記幫襯嘅好大部份已經係陸客喇!

0

【鰻魚牛油果貨不對辦 齋舖知衰:可能搞錯咗!】食焦

又有貨不對辦喇!不過今次就誇張啲,唔係話件雞少咗幾嚿、碗麵得返半碗喎(都係唔可以接受㗎喇),而係叫嗰樣嘢直頭係冇咗,有冇離譜啲呀?話說有網友去咗旺角一間齋舖度買外賣,叫咗個鰻魚牛油果卷,點知一打開個盒,鰻魚呢?鰻魚呢? 呢位事主中晒伏,po上網俾大家睇吓個分別,餐牌上面張相同實物真係差得遠,就咁睇完全唔會發現係同一樣食物先勁囉!事主留言話「又係乜都唔駛講睇圖就知伏喺邊……外賣鰻魚牛油菓卷,返到公司一打開盒已經X咗出聲,打落去齋舖全程㩒住把火投訴,最終忍唔住鬧咗句:有冇錯得咁X離譜」,其他網友睇完都話唔可以接受啦! 鰻魚卷變咗青瓜卷,事主仲話「買俾個食齋嘅客食嘅,一打開盒,我以為自己拎咗盒廚餘」,不過有網友就話去過呢間旺角齋舖,之前食過都冇出事,仲話好食添,事主都有回應嘅,原來事主都算係熟客,佢話上次都有叫過個鰻魚牛油果卷,正正常常,只係要佢等咗成45分鐘搞到有啲燥底啫! 咁事主打返去間齋舖度投訴又點呢?事主話「聽電話件阿姐攬晒上身話:唔好意思,我啱啱返咗三日工,乜都唔識可能我攪錯咗,對唔住~」有網友就話肯道歉都算態度好喇,但係令人莫名其妙嘅係,如果真係搞錯咗,消失的鰻魚又去咗邊呢?明明餐牌上面係冇青瓜卷或者牛油果卷㗎喎,咁真係搞錯得太離譜喇!雖則話係食齋啫,唔係真係齋到咁吓話?

0

【連日互插 網友剝花生 虎蝦變海蝦羅生門奇案】食焦

又有海鮮偷龍轉鳳事件發生喇!今次更加曲折離奇,苦主同店主都企硬仲互相出招,搞到件事喺網上洗晒版愈嚟愈激,真係好睇過戲呀!有網友喺群組大投訴,話自己買咗虎蝦去食店加工,等咗成個鐘唔在講,上枱嗰碟仲要全部係海蝦仔!「我買二百幾蚊斤虎蝦俾佢蒸,佢竟然求其拎碟普通海蝦俾我……呢間黑店係大埔街市三樓熟食中心,大家千其唔好幫襯,極度無良商家」。 有圖有真相,虎蝦成隻手掌咁大,上枱嗰碟又的確係細咗幾倍嘅海蝦仔!呢間喺大埔墟街市嘅新樂園即刻俾網友圍插啦,仲俾人數埋佢之前有疑似偷龍轉鳳嘅前科,3隻蟹俾佢蒸,出到嚟變咗3蟹4蓋,又係唔同晒樣! 繼續鬧哄哄,苦主同店主都有接受傳媒追問,搞返清楚嘅係,苦主原来只係俾咗3隻虎蝦啫,唔係成碟分量咁誇,食店最後係有賠返$390蚊虎蝦費,但冇退返百二蚊加工費;而店主兩姊弟就同傳媒呼晒冤添,話嗰日只係見到一隻虎蝦咁大把喎,仲話開咗邊嚟蒸係一定會縮水,又話可以同海鮮檔證明,苦主的確只係喺檔口買咗一隻虎蝦!店主仲話唔想俾人冤枉,已經去埋警署備案添! 跟住又再有疑似店主嘅人喺網上po文,長篇大論反擊,「我地都希望當時人會返黎當面對質。因為你一個動作。令到我公司及我本人受到好多不公平及無理嘅評擊!」潛水幾日嘅蝦主終於又開聲喇,「夾埋樓下魚檔造假,希望警方到街市調查」。大家都似咬住大家唔放咁款!兩方都企硬各有版本,呢單奇案睇嚟仲有大把花生剝喎!

0

【半自助餐主菜唔俾打包 網民嬲豬拒再幫襯】食焦

食唔晒嘢都唔俾打包?話係餐廳規矩喎!有食客就覺得搞到自己變咗大嘥鬼,認為餐廳唔俾人打包唔合理,仲話以後唔會幫襯添!不過嗰份唔俾打包嘅食物,其實係餐廳半自助餐嘅主菜食物,其他網友就話餐廳咁做冇唔啱喎,惹嚟好大迴響! 成件事係有食客同埋7歲仔仔去咗鯉景灣間Wildfire食晏,揀咗嗰日餐廳嘅半自助餐餐牌,沙律吧同甜品係自助任食,主菜就任揀一款啦!食客仔仔揀咗個兒童餐,有pizza又有嘢飲,咁主菜未嚟就去咗攞碟沙律仔,食客強調攞嘅分量真係好細碟㗎咋,點知主菜嚟到,個pizza好大件頭,最後食剩2件,想打包竟然侍應話唔得! 原因係話公司規矩,「侍應竟然說午市期間,因為有自助salad bar的關係,所有食物不能讓客人帶走。我問餐廳的經理,這些食物反正是被倒進垃圾筒的,為什麼不能讓客人帶走以免浪費?她說雖然之前已經收到很多客人投訴,但這是公司定的規矩……」仲話客人落單嗰陣已經提醒咗係唔可以帶走食物嘅! 食客嬲豬將事件po咗上群組,臨尾仲問:「這樣的餐廳,我以後都不幫襯了!你呢?」點知其他網友嘅反應好激烈喎,話餐廳咁做係因為有好多人食semi-buffet都狂食沙律吧嘅嘢但就專登打包主菜,所以認為餐廳依家唔俾打包嘅做法好合理,加上又有事先講明,覺得食客唔應該咁樣po上網嚟公審間餐廳! 網友愈講愈激,事主都好有心情回應吓,仲列咗十點說明出嚟添,最後佢話「……其實,我的貼文只是希望喚起社會對「惜食」的關注,大家咁湧躍發言,無論閣下觀點如何,我都感到高興。多謝大家!」其實講到尾,餐廳有餐廳規距,食客有食客選擇,搞到變網上罵戰就無謂啦!

0

【整衰咗補鑊衰多次 網購翻糖蛋糕一肚氣】食焦

買蛋糕同人賀壽本來係開心事,但結果搞到又嘥錢又要嬲!呢次唔係收到個「生日快乐」殘體字祝賀牌喇,係訂咗個完全貨不對辦嘅蛋糕,仲要係好核突吓!有事主喺網上大控訴,叫人「大家小心,唔好訂呢間既(嘅)蛋糕」!然後po齊有相有字嘅對話出嚟,真係睇見蛋糕個製成品都冇晒胃口呀! 係咁嘅,事主喺間蛋糕網店訂造蛋糕,仲要兩個星期前俾咗原圖佢,講明公仔唔使加㗎喇,但出到嚟嘅翻糖蛋糕係變咗泥膠公仔咁,完全唔似樣,仲要收成760蚊添!事主梗係即刻投訴pm佢啦,結果店主就話係個朋友整嘅,佢自己睇見都O哂嘴喎,又話點都會補鑊整返個新嘅蛋糕俾事主! 好,事主再send多咗張圖俾店主,講一大輪總之係話一定整到啦,電光火石間已經即刻報咗價,又話做漸變色要加錢乜乜乜,最後係$420,唔計嗰$760,即係俾返$340事主,一聽個價,事主就話不如hold一hold,但係店主秒回佢話已經焗緊喇,咁即係焗要啦!結果,補鑊呢個所謂蛋糕都係慘不忍睹囉! 重點係,又有網友說出重點來,「有無可能由預備焗蛋糕材料去到完成一個蛋糕一小時可以起貨?」仲有位自稱係做咗十幾年師傅嘅網友踢爆,話佢「根本係用後備蛋糕!」俾人連番追擊,其實店主都有還吓手嘅,喺ig度po咗段委屈文自己發洩吓,不過眼見個火愈燒愈大,最後fb專頁同ig都收咗檔!咁潛水避吓啱嘅!

0

【連登仔投訴找少錢唔俾返 收銀姐回應:規矩等埋數】食焦

遇到收銀找少咗錢,但係都冇得攞返,應該點做先好?有連登仔開po話有日lunch去咗調景嶺間翠河餐廳食晏,叫咗個三色蒸水蛋有蛋殼喺入面都算喇,仲要埋單發現收銀找少咗錢,「個餐$43 我怕太多散銀比左$55,跟住個收銀望都唔望就以為我比$50,直接找左$7比我,咁我本身另轉身諗住走,但feel到唔對路……」 呢位巴打仲將自己同收銀姐嘅對話打晒出嚟,簡單啲講,個餐43蚊,巴打俾55蚊,係要找返12蚊嘅,但係收銀找咗7蚊啫,佢擰返轉頭同收銀講,點知俾人話「總知你另(擰)轉左身就當走嫁啦,走左就唔會比返你」、「 總知宜家冇得比返你啦,如果我地今晚真係多左錢,咁你聽日黎拎返」! 結果巴打嬲到連嗰7蚊都冇要到嘅!巴打話po上網唔係想公審間餐廳同個收銀喎,只係想大家唔好貼錢買難受咁話!當然有唔少人回應佢,話佢做乜唔當場報警呀、食43蚊點解要俾人55蚊,更多人係話翠河根本就係難食,一早唔應該去喇! 小編打咗去調景嶺間翠河,接電話位員工原来就係當日位收銀姐,佢話:「如果個個擰轉背先話找少咗錢,個個係咁,我哋唔使出糧啦!我做收銀咁多年,遇過太多呢啲情況,嗰日嗰位係後生仔嚟嘅,我冇話係邊個錯,點都要等嗰晚埋數睇吓係咪真係多咗先,呢個係規矩!」 收銀姐就話當晚埋數,係多咗15蚊!「我只係話唔可以即場俾佢,要埋咗數先得!嗰晚係多咗15蚊,佢嗰7蚊係佢自己唔要俾返我嘅!(咁係咪有12蚊多咗會俾返佢?)我都話佢第二日嚟,我咪俾返佢囉!」巴打仲去唔去呢?