Tagged: 拉麵

0

【住家清湯底拉麵榮登米芝蓮 多賀野過江必食醬油味】多賀野拉麵

喺東京有唔少人龍店,以清湯底聞名,仲米登米芝蓮嘅Takano Ramen多賀野拉麵都係其中一間,佢哋首間分店兼海外店上月喺尖沙咀K11 Musea開始試業。總店由一對日本夫婦主理,佢哋將由住家製作嘅清湯底拉麵帶到大家面前,而且呢個住家味道仲攞咗四屆米芝蓮,仲喺日本食評網Tabelog曾經取得3.99高分!依家佢哋嘅招牌麵食嚟到香港,麵款同總店一樣,但加咗飯類、小食同甜品,即刻睇吓有幾正啦! 多賀野拉麵總店負責人高野夫妻對出品好有要求,雖然將湯底同製麵技巧傳授俾香港店兩位師傅,但佢同先生每隔半年都會嚟香港監察品質。 店內環境好有日本風格,仲貼心咁設有屏風間格,為單獨嚟嘅食客增添私人空間。 製麵師傅依家每日約製作兩至三轉麵條,仲時不時拎起麵條度尺,務求保持同日本一樣嘅品質添。 麵嘅密度幾高,但口感仲係彈牙,亦唔會好易發脹。 先試相對淡味啲嘅粟國塩味拉麵(HKD128),湯底好清唔多油,但係用咗日本粟國出產嘅高質鹽嚟烹調,味道其實幾鮮味又唔會死鹹,飲晒都冇問題。 而最招牌梗係多賀野醬油拉麵(HKD128),湯底用上雞肉、雞骨、豬骨、豬軟骨、薑蔥蒜、魚乾等材料熬煮,出餐前再撞落單即煲嘅鰹魚乾精華湯汁,令清湯底都有香濃味鮮嘅效果;配料同粟國塩味拉麵一樣有火炙叉燒、香滑嘅溏心蛋同紫菜。如果想湯底再特別啲,可以將叉燒喺湯浸一陣,會有少少火炙味帶落湯度㗎! 佢哋嘅辣麵同一般嘅濃湯唔同,口味傾向中式少少。芝麻辛辣拉麵(HKD138)味道唔係好辣,加咗芝麻醬汁只係令湯杰啲啲啫,入口依然順滑。配料除咗火炙叉燒,仲有肉粒增加口感。 酸辣擔擔麵(HKD138)係香港大廚鍾意嘅口味,同樣唔係太辣,但酸酸哋嘅味道令人覺得好爽!而且加咗啲炒過嘅榨菜幾特別,配麵或肉一齊食更加爽口添。 豚鴨沾麵(HKD168)嘅湯底用上鴨肉、鴨骨、雞、蜆、菇等材料熬煮再撞鰹魚乾精華湯,只係比醬油味鹹少少,但食完加湯飲埋都唔會太鹹。 沾麵麵條粗啲,但湯底唔係杰身,所以唔會好掛湯。 想試小食的話,不妨點大隻又嫩滑嘅自家製吉列炸蠔(HKD78/3件),或見到一絲絲蟹肉嘅自家製蟹肉薯餅(HKD68/3件)。 呢度仲有山形果汁、汽酒同波子汽水(各HKD48/枝)同果味濃郁嘅雪葩。其中柚子雪葩(HKD68)比較甜啲,菠蘿雪葩(HKD68)就好清新。   多賀野拉麵 地址:尖沙咀梳士巴利道18號K11 Musea 2樓220號舖 電話:2881 8331 營業時間:星期一至日:12:00-22:00

0

【日本人氣辣麻味噌拉麵登銅鑼灣 最強辣麻度集酸甜苦辣】鬼金棒

日本人氣辣麻味噌拉麵鬼金棒終於喺銅鑼灣開業喇!三浦社長話喺日本傳說之中,攞住「鬼金棒」嘅鬼怪都厲害啲,所以佢將鍾意嘅辣同麻加入拉麵,炮製出理想嘅辣麻味噌湯底。不過十年前喺東京神田開業嘅時候,日本人唔係好接受到辣味拉麵,所以辣麻度各有5個自選程度,令每款拉麵有25種配搭,保證試到最啱你嘅口味。唔講咁多,即刻睇吓有咩用料先。 店內有29個座位,想近距離感受師傅爆醬料同炒小菜嘅強勁鑊氣,你一定要坐吧枱,如果唔係都有二人或四人枱。 湯底唔同嘅麻辣度就係靠呢8-9款香料煮成,其中最辣嘅「鬼增」仲用上2013年登上健力士世界紀錄大全,為世上最辣嘅卡羅萊納死神辣椒,小編陣間就會一會佢! 鬼金棒拉麵嘅叉燒其實係成嚿肉上,用香料慢火燜煮過夜之後,到上枱前再切件放入醬缸浸到入晒味。兩層脂肪同肉相間,脂肪煮到入口即溶好正㗎! 坐定後店員會俾QR Code你掃瞄落電子單。拉麵碗會按order嘅辣度用返相應顏色嘅碗,白碗係「無」至「中」,紅碗係「高」,黑碗係最勁嘅「鬼增」級別,而三浦社長推介組合就係高辣配高麻嘅紅碗。 如果你係芫荽控,必定要試芫荽辣麻味噌拉麵(HKD110)。滿滿嘅芫荽未食都聞到佢嘅香氣,配上用熬足8個鐘嘅豬骨湯、魚介湯同自家製味噌煮成嘅湯底,香甜味十足。 如果貪心啲,可以好小編咁點特製辣麻味噌拉麵(HKD120),本身配兩件叉燒、一隻溏心蛋、一條玉米筍同爆炒過嘅芽菜,不過其中一款拉麵係玉米筍辣麻味噌拉麵就知佢嘅玉米筍都係必食佳品,所以追加玉米筍(HKD15),咁就有大約8條。雖然呢碗辣麻都係「鬼增」(各加HKD15),但依然食到玉米荀嘅清甜同火炙味,口感幾爽同多汁添。湯底濃厚,入口頭幾秒試到甜味,辣麻同微醱嘅感覺會慢慢湧現,但依然食到肉同蛋本身嘅味道,如果你食到譚仔小辣都應該食到呢款;如果咬到灑喺面嘅香料會有少少苦,不過同湯底撈勻就唔多覺。可惜偏多辣油,所以飲湯嘅意欲降低,唔怪得社長話紅碗最好啦。 為咗表揚同呵護返挑戰黑碗嘅食客,餐廳會送返粒果味鬼金棒糖俾挑戰者。 想貫徹日本風味食拉麵的話,食完麵可以追加飯拌湯。呢碗仔肉碎飯(HKD35)其實都係將叉燒撕細,所以點邊款飯就睇你想食幾多肉喇。飯底本身加咗底味,撈埋湯食係成餐另一個滋味點囉。 如果普通分量就夠,可以試辣麻味噌拉麵(HKD90)高辣高麻版本。 增量叉燒×2辣麻味噌拉麵(HKD135)就係肉量最多最大嚿嘅款式。   鬼金棒 地址:銅鑼灣謝斐道530號 電話:2481 3383 營業時間:星期一至日:11:00-00:00

0

【酒店新推環球午市套餐$68起 平歎天婦羅+炭燒肉眼扒】Centre Street Bar

要食高質又物超所值嘅午餐,其實可以留意酒店嘅餐廳。好似喺西營盤,港島太平洋酒店入面嘅Centre Street Bar最近推出全新午市套餐,有齊中、西、日式共八款選擇。HKD68起包埋是日餐湯、鮮磨咖啡或紅茶,而且星期一至日嘅12:00-14:00都有供應,fit晒唔同日子放假或上班族去食。 呢個雜錦天婦羅(HKD108)幾抵喎,有大蝦、蟹柳、冬菇等等,款式多之餘配埋茶碗蒸添。 豬軟骨拉麵(HKD78)炆得軟腍入味,湯底又夠濃;一啖食埋溏心蛋更加滋味到暈。 炭燒安格斯牛肉眼(HKD158)就啱晒食肉獸,有炭香,又juicy有肉汁,食完人都開心晒。 鍾意食香口嘢嘅朋友,亦可以試吓炸果仁紅𩶘魚柳(HKD88)。香脆又嫩滑嘅魚肉點埋沙律醬,愈食愈停唔到口囉。 田園蔬菜三文治(HKD68)啱素食人士,多蔬菜又有牛油果。而且麵包烘咗底,交足貨喎。 唔少人鍾意食龍蝦伊麵,不過lunch整個入門版滿足吓先啦。滑蛋蝦球燴伊麵(HKD98)入口好鮮味滑溜,蝦球都幾彈牙。 如果你鍾意傳統中菜,或者同長輩嚟食,港式飲茶套餐(HKD128)就啱你喇。呢個套餐有齊點心、乾炒牛河同老火湯㗎。 招牌海南雞飯(HKD138)嘅雞肉嫩滑,油飯仲好香,值得一試喎。   Centre Street Bar 地址:西環西營盤干諾道西152號港島太平洋酒店UG樓 電話:2131 5901 營業時間:星期一至日:10:00-01:00 (有加一服務收費;而惠顧滿HKD300有兩小時免費泊車,包括免費電動車充電服務)

0

【藝人踩過界麵店愈開愈多 包辦港台西日熱門麵食】大茶飯、一君士多、麵麵店、FOODO、阿久根拉麵屋

好多藝人都殺入飲食界開餐廳做老闆,其中有唔少係開麵店添。小編盤點近期開嘅五間人氣明星麵店,間間都有特色,而且港、台、西、日嘅熱門麵食樣樣齊,睇埋落去就出發搵食啦!   黃美棋:大茶飯 View this post on Instagram 大茶飯開咗一個月啦❤️ 我真係覺得好感動好感恩🙇🏻‍♀️ 同大家分享當日開張嘅花絮先✨ . . Tube Top @rigbyandpellerhk Blazer @missselfridge Accessories @coach Heels @jimmychoo Nails @beaunail Eyelashes @glowin_beaute #經得起風浪先食得起大茶飯 #坐埋同一條船先可以齊上齊落 #將軍澳中心 A post shared by Meiki...

0

【東京濃厚雞湯拉麵登陸尖沙咀 雞髀肉叉燒配雞白湯底】麺屋 武一

又一間日本拉麵登陸尖沙咀喇,今次係東京新橋起家嘅麺屋 武一,招牌雞白湯底濃度達10度,係用新鮮雞隻熬製13個鐘,再以雞骨架、洋蔥、蒜頭、昆布等材料煮成嘅清雞湯稀釋,但口感仍然好creamy。為咗配合素食客人口味,香港特別推出用15種新鮮蔬菜熬製湯底嘅蔬菜拉麵,加埋濃厚系雞湯底同清湯系雞湯底有三個系列,共10款拉麵俾大家揀。想再食得健康啲,仲有低糖質蒟蒻麵(加HKD10)可以選擇添,即係睇吓邊款麵啱你啦! 廚房開方式設計,睇住師傅煮麵特別餓囉。 呢度嘅叉燒用雞髀肉整成,口感嫩滑多汁;以和風高湯、昆布、特選醬油等材料熬製嘅湯汁低溫炆煮,都幾入味喎。 濃厚系雞湯底係呢度嘅招牌系列,其中濃厚醬油拉麵(HKD88[左上])嘅湯底用醬油加濃厚雞湯混合而成;濃厚鹽味拉麵(HKD88[右上])就以鹽味雞湯帶出雞湯嘅鮮味同香醇;濃厚味噌拉麵 (HKD88[左下])混合咗日本出產嘅赤味噌同白味噌再加入雞湯,味道會濃郁啲,呢款仲可以揀更惹味嘅濃厚辣味噌拉麵(HKD95[右下])。 清湯系雞湯底有兩款拉麵,東京醬油拉麵(HKD78[左])嘅湯底以雞隻同雞骨架熬成嘅清湯加醬油而成,鮮甜中帶點鹹香;鹽雞拉麵(HKD78[右])湯底就係清新嘅雞湯,味道香甜清爽。 為香港特別推出嘅蔬菜湯底就有四款,鹽味蔬菜清湯拉麵(HKD80[左上])同醬油蔬菜清湯拉麵(HKD80[右上])嘅湯底冇加肉類,睇落清淡但實際充滿蔬菜嘅甜味。不過雞湯有濃厚系列,蔬菜湯又點可以冇呢?!鹽味濃厚蔬菜拉麵(HKD85[左下])同辣味濃厚蔬菜拉麵(HKD90[右下])湯底就用咗洋蔥、紅蘿蔔、椰菜、粟米、菇、昆布、蒜頭、薑、薯仔等十幾種蔬菜打成蓉加入湯底,完全係一個蔬菜濃湯拉麵囉! 呢度仲有唔同嘅小食,鰻魚串(HKD40/串)肉厚肥美,外皮燒到帶點焦香,係幾惹味嘅。 薯仔沙律(HKD28)有埋半隻溏心蛋,同薯仔撈埋一齊食會更滑。   麺屋 武一 地址:尖沙咀棉登徑13-15號白蘭軒道3號棉登大廈地下A舖 電話:2191 3570 營業時間:星期一至日:11:30-23:30(截單時間:23:00)

0

【屯門親子自駕遊食勻四餐 環保「源 · 區」浸免費SPA】Local自駕遊

一有時間就想去遠啲玩吓,但喺香港揸車去邊啱一家大細放電?其實屯門唔錯喎。沿住龍鼓灘再揸上去會去到T · PARK [源 · 區]。呢度集轉廢為能、休閒活動同教育於一身,有導賞團帶大家了解呢度點樣接收香港11間主要污水處理廠嘅污泥,再轉化成能量;又有免費SPA俾市民享用,無論大人定小朋友嚟都可以加強環保意識;即使輕鬆啲純參觀,呢度都有大量打卡位㗎。唔講咁多,睇吓環境先,之後出返屯門市區,由下午茶一路食到宵夜! T · PARK [源 · 區]有9,800平方米嘅戶外花園,包括2,800平方米嘅環境教育中心同雀鳥保護區,有機會見到小鸊鷉、翠鳥、苦惡鳥、蜻蜓同兩棲類動物添,淨係影相寫生都有排玩。呢度嘅電力自給自足,設計好開揚,陽光玩遊戲又呼吸埋新鮮空氣,值得嚟啦! 而焚化過程中產生嘅熱能就為「源 · 泉」設施內嘅水療池水加熱,市民可以預約免費使用添。置身熱水、温水同冷水嘅水療池,可以眺望后海灣一望無際嘅海景,唔使飛都放鬆身心啦。嚟呢度參觀一般預3個鐘或以上,視乎大家報咩活動啦,因為間中仲舉辦工作坊俾大家嚟玩㗎。 嚟之前記得喺到訪日期前3-30日內網上預約,提提報導賞團嘅朋友最好喺開始前15分鐘到達,因為逾時不候㗎。 場內分咗十個區域,而「源 · 茶」係自助茶館,提供簡單輕食,入面嘅桌椅同餐具都係用環保物料製造,切實教育點樣推動環保喎。 駕駛指南(請預約使用私家車停車場): A. 沿皇珠路,往內河碼頭方向。 B. 請轉龍富路,往內河碼頭方向。 C. 沿龍門路,龍鼓灘路前住稔灣路。 D. 進入新界西堆填區後,左轉過橋,沿海旁向前行。 E. 從左邊第一個入口進入。 唔想揸到咁入的話,都有免費穿梭巴士服務來往屯門V city同T · PARK [源...

0

【親民價拉麵冇偷工減料 $98限定海膽拉麵超滿足】一生懸麵

一生懸麵喺日文有努力、盡全力去做嘅意思,所以店主Gary用嚟做拉麵店店名。點先盡全力去做?好似豚骨湯每日用三十斤豬骨加三十斤雞腳熬最少十個鐘,就知認真又足料喇!最初牛頭角總店已經出名抵食分量足,分店開到去旺角繼續呢個理念喎,點解咁堅持?「本身我好鍾意煮嘢食,做咗十五年西餐、五年日本餐。之後見愈來愈多人鍾意食拉麵,覺得好厲害就去日本學師,嗰時做咗義工半年先打動到位師傅教我。當時傾咗個日本拉麵品牌返嚟,依家就開『一生懸麵』,做親民價拉麵。人哋九十幾蚊碗都咁多人食,我賣六十幾蚊會開心啲囉。係冇咩錢賺,如果為錢我就唔做呢個價啦,希望分店大啲、多啲人食到。」講到咁抵食,即刻睇吓限定嘅海膽拉麵有幾足料啦! 簡約日本小店風格俾人感覺好乾淨整齊。 雲丹拉麵(HKD98)係限定產品,做到3月15日就會稍停一段時間,之後有機會加入日常menu。點鮮咁受歡迎?「有啲人幾鍾意海鮮類,呢個麵嘅湯底加咗40g韓國海膽一齊煮,所以比平時嘅豚骨湯再厚身啲同杰少少,加埋面頭再鋪40g輕輕火灸過嘅海膽,真係好抵食。」雖然味濃但唔會過鹹,質感仲幾滑,想佢快啲正式加入日常menu就快啲同老細反映喇! 「二郎系」拉麵,係日本其中一個拉麵派系,簡單啲講即刻啲料又多又足又亂咁堆晒啲材料!有食客就覺得一生懸麵呢個名古居二郎系拉麵(HKD68)嘅材料唔夠「亂糟糟」,Gary又點睇?「係㗎,我都想整亂啲㗎!如果喺名古居嘅二郎系拉麵,擺盤會將所有食材一『pat pat』咁撻上麵度,但嚟到香港如果唔了解嘅可能會誤會我哋求其,所以冇整太亂。」咁小編都撈亂啲先食喇!其實初時見咁大堆蒜頭,有啲擔心味道唔夾,點知蒜味滲入豚骨湯底係異想融合喎,唔會搶咗湯底嘅味又層次豐富啲。厚切豚肉肥瘦大約2/8比例,入口唔會油淋淋。大約煮兩個鐘,上枱前再火灸,令香味更濃郁,兩大塊肉令人食得好滿足!湯底睇落油膩,但入口幾順滑,飲晒都冇問題喎! 另一個受歡迎嘅係濃香櫻蝦沾麵(HKD78),湯底加咗海量櫻花蝦,食到底都仲有,不過豚骨湯質感好似比名古居二郎系拉麵薄啲嘅?「因為配櫻花蝦,所以溝埋豬骨湯同魚介湯用嘅比例調整過,而呢款用魚介湯會多啲。」好在味道唔會淡咗,因為沾麵嘅湯本身比拉麵鹹啲,反而想冇咁濃味可以先唧啲青檸汁喺麵度。 唐揚炸雞(HKD32)一碟5大件,幾令人滿足。外皮脆口,炸漿又唔厚,唔點沙律醬都好夠味,點咗就中和返啲!   一生懸麵 地址: 旺角通菜街73號地下 電話:2748 1001 營業時間:星期一至日:12:00 -22:00

0

【屯門隱世拉麵店$35一大碗 下午茶送日式炸薯餅超值】平霸

平時食碗拉麵閒閒哋都要6、70蚊,有冇諗過35蚊就可以食到質素唔差、分量又多嘅拉麵呢?今次平霸去到屯門,搵到間隱世平民拉麵店岡一拉麵。拉麵最平只係賣35蚊,下午茶時段仲做大贈送,日式炸薯餅、汽水同油菜任揀,咪話唔抵食呀! 喺巷尾轉角位嘅呢間拉麵店門口裝潢都好有日式風格,舖頭唔大,一眼望晒只擺到四張枱,但坐得唔算逼,繁忙時間可能就要等耐少少,平霸咁啱喺下午茶時段嚟到就唔多人,可以慢慢歎碗拉麵。 平價之選就係呢碗炸餃子拉麵(HKD35)!成碗麵有三隻炸餃子、半邊蛋,仲有木耳絲、蔥花同芽菜呢啲配料,望落都豐富嘅!湯底係豬骨湯,隻色幾奶白,但唔算好濃。咁平嘅拉麵冇得揀拉麵嘅軟硬度都正常嘅,麵質適中,唔太硬身,個麵底仲幾多。 拉麵入面啲餃子炸得幾香脆,不過呢度拉麵同炸餃子唔會分開上,啲炸餃子會放埋喺麵上面,所以如果鍾意食脆口啲嘅可以食咗餃子先,咁就唔驚會浸腍晒啦;餃子餡就冇乜特別,同平時食嘅急凍餃子差唔多。 呢碗叉燒烏冬(HKD37)都幾抵食㗎,湯底除咗揀豬骨湯,仲可以揀辣湯,今次平霸就試咗地獄辣湯先,辣湯嘅辛辣味係慢慢辣出嚟嗰種,唔似平時日本拉麵嗰種辣味,都幾過癮,不過對好辣嘅朋友仔嚟講就未必夠辣喇。同埋呢度啲拉麵全部都可以免費轉烏冬,烏冬比較粗身,都幾有咬口。 成碗麵有三塊叉燒,啲配料就同頭先嗰碗差唔多。叉燒嘅肥瘦都幾均勻,肉質又估佢唔到咁幾腍。 舖頭仲做緊下午茶優惠,喺星期一至六嘅3點至5點半期間,除咗提供下午茶套餐之外,叫正價嘅拉麵或飯就有得免費任揀罐裝飲品、日式炸薯餅或者油菜其中一樣。即係35蚊一碗嘅拉麵都有嘢送呀! 小編就揀咗呢款日式炸薯餅(下午茶免費),係一塊薯餅開半咁上,加埋都有手掌咁大塊,可以配埋旁邊嘅沙律醬食,幾貼心,仲放咗啲椰菜絲喺下面墊底同吸油,睇得出免費送嘅小食都唔Hea㗎!講返塊薯餅先,炸得好脆好香口,入面係咖喱味薯蓉,有啲類似紅蘿蔔嘅配料,咖喱味都幾濃,但冇乜辣味。 平霸小評:新界區都有唔少平價又高質嘅食店,呢間拉麵店可以話係其中一間。最平35蚊有咁大碗拉麵食,而除咗拉麵之外,呢度嘅日式咖喱飯都好多客人叫㗎,下午茶時段仲有優惠添!賣得咁平,當然唔可以要求佢有日本拉麵專門店成百蚊一碗嘅水準啦,但平霸覺得如果想平平哋食碗質素唔錯嘅拉麵,呢度絕對係唔錯嘅選擇。 岡一拉麵 地址:屯門井財街9號錦發大廈地下1號舖 電話:2404 0832 營業時間:星期一至日:12:00-23:00

0

【只做晚市限量賣150碗 頂級和牛拉麵碗碗清】一盛極牛

拉麵唔配叉燒仲可以配咩?尖沙咀只做晚市嘅一盛極牛唔止用牛骨湯做拉麵湯底,仲用頂級嘅A4-A5熊本黑毛和牛中嘅「和王」代替叉燒。點解咁巴閉?100隻熊本黑毛和牛,大約得7-8隻可以去到「和王」級別咋!所以為咗俾大家有多啲味覺衝擊,有刺身、火灸同燉三款俾大家揀。不過拉麵嘅供應量真係激罕㗎,日限150碗,有時11點半左右賣晒就提早收舖,店員仲呼籲大家10點半後睇佢哋Facebook專頁有冇update先好去。拌麵就睇彩數喇,因為切肉時有大髀筋部位先會煮到,即使有都係供應十幾至二十碗,一樣要留意專頁公布睇當日有冇得食啦。不過呢款要時間燉,大約7點左右先會供應。 「一盛極牛」呢個名唔係好順口?其實係日文嚟㗎!「一盛」係指盛大,「極牛」係指頂級嘅牛。 老闆薗田昌己本身做肉類生意,即使開咗拉麵店都唔會成日駐場。 牛骨湯每日用75斤牛骨加20斤和牛牛脂新鮮煮成,要全日輪班煲成廿個鐘,成本一啲都唔嘢少囉。再加埋用元貝、蝦米等6-7樣乾貨煮成嘅自家製醬油,撞湯之後味道更加鮮甜,入口唔覺油膩,有牛嘅香味濃郁又清爽順滑,飲晒都ok喎。普遍濃度都唔會好鹹,重口味嘅朋友可以挑戰濃味。 火灸極牛拉麵(HKD108/1份肉)嘅肉燒過之後肉味更出,有油香但唔會成口油。1份肉大約40-50g,唔夠喉可以加碼,有2份肉(HKD148)同3份肉(HKD188),仲可以兩溝刺身同火灸添。配料都好重手,有芽菜、黑木耳絲、荀、紫洋蔥、蔥、紅椒絲、紫菜,可以揀冇配料、1份或2份;而溏心蛋可不選或要半隻,追加就HKD6/半隻。呢度嘅溏心蛋都值得追加,因為蛋黃味道好香濃。 麵底「真空雞蛋麵」係同日本南天製麵喺香港嘅廠房攞貨,落到舖再發酵4-5日先用得。冇咩鹼水味,麵質鬆軟彈牙都唔錯,感覺比平時嘅麵底重量啲添。 因為選用大髀肉,和牛刺身白牛拉麵(HKD118/1份肉)嘅肉質口感煙韌啲,不過雪花紋嘅油脂一樣咁靚。同樣可以揀2份肉(HKD158)同3份肉(HKD198)。喺牛骨湯底再加一大湯匙白松露醬,小編覺得呢個普通濃度已經好香濃,但唔會蓋過牛湯味道,如果第一次試可以考慮淡味。配菜同極牛拉麵一樣咁揀。 如果食食吓覺得真係太濃味,可以加啲雪菜,會帶返清新嘅感覺出嚟;想香口啲就加炸蒜片啦。 可遇不可求嘅燉和牛拌麵(HKD108),美味指數同極牛拉麵有得揮呀!和牛入味又軟腍,筋都好易咬,唔講仲以為係慢煮添。麵本身落咗自家製醬油,調味可以再揀七味粉、芝麻同麻油。配料有黑木耳絲、荀、紫洋蔥、蔥,蛋可以揀溏心蛋或生蛋,不過小編建議你揀生蛋,因為撈勻之後成個麵滑上加滑,蛋香亦提升味道層次添。   一盛極牛 地址:尖沙咀金巴利道65-67B號太平洋大廈地下A號舖 電話:從缺 營業時間:星期一至六:18:00-02:00

0

【台灣出珍珠奶茶拉麵 開店2粒鐘賣清食客讚好】食焦

珍珠乜乜乜真係去到乜都可以加珍珠嘅地步!以為pizza同梳乎厘加珍珠都已經夠出奇啦,依家連拉麵都可以喎,整咗味台日crossover嘅「極品」出嚟!最近喺高雄嘅一間拉麵店,真係諗咗呢條橋出嚟,珍珠拉麵呀!你敢唔敢試? 呢間喺高雄嘅拉麵店「極道ラーメン 」,上個星期推出咗珍珠拉麵,喺碗拉麵上面見到鋪滿一粒粒珍珠奶茶嘅珍珠,喺佢哋個專頁度話「台灣珍奶VS日本拉麵,鮮奶茶的圓潤口感做為湯底,配上珍珠新食感,台日混血珍珠拉麵就此誕生顛覆你的想像!珍奶也可以這樣吃……」 個個睇見張相都覺得難以置信,估佢唔到珍珠都好以加埋落拉麵度,好多人都紛紛留言問究竟係咩味,即係鹹定甜?有勇士去食咗喇,竟然係話整體味道係ok喎,仲解開咗大家都好想知嘅謎底,原來珍珠係無!味!道!㗎!「整體很好吃 多了珍珠(沒味道)的口感還附上鮮奶油讓湯頭有淡淡的奶香!」 呢碗限量供應嘅珍珠拉麵,賣270蚊台幣,計返大約70蚊港銀,拉麵店仲話開賣無耐,就即刻賣清添!反應咁好,好多人梗係貪新奇想去試吓啫,keep唔keep到熱賣真係要再睇多一輪時間喇!話晒咁有創意嘅配搭真係未必人人頂得住,湯底係雞湯+紅茶+牛奶,而話時話,無味嘅珍珠其實加落去又為乜呢?下次會唔會炒埋啲黑糖落去呢?咁就真係又喊又甜,加埋麻辣湯底,乜味都有喇!