Tagged: 排毒

0

【防催淚彈污染物積存體內 小球藻幫助排出二噁英】

近排大家都擔心催淚彈釋出嘅二噁英會危及健康,話晒佢可以透過皮膚接觸、食物、水源同空氣等途徑進入身體。但就算留喺室內都要呼吸,咁喺發放催淚彈重災區返工同生活嘅人又點會唔擔心呢?不過原來有研究指小球藻可以幫助身體排出二噁英,解毒有望呀! 二噁英有幾毒? 二噁英係一種無處不在嘅持久性環境污染物,雖然世衛相信低水平嘅二噁英唔會影響人體健康,但佢可以積存喺體內長達數年㗎。雖然平時喺肉類、奶製品、魚同貝類都會攝取到二噁英,不過近呢幾個月不斷發放嘅催淚彈都會釋出二噁英,如果大量積存喺體內會破壞免疫力系統、荷爾蒙分泌失調、可能引致崎胎、致癌等問題,都咪話唔驚。 食小球藻排走二噁英 歐、美、日分別有研究指出五億四千年前已經出現喺地球嘅小球藻,含豐富人體需要嘅維他命同18種氨基酸,有效提升同維持免疫系统運作;其中德國醫學博士 Frank Liebke更加指出,當地醫學界發現小球藻所含嘅特殊物質Sporopollein,可以結合體內各種毒素、重金屬等再排出體外,當中就包括二噁英喇!不過小球藻要進行破壁先方便被人體吸收,所以一般會製成營養品或補充劑。加上日本都有科學研究人員曾以哺乳媽媽做臨床試驗,發現佢哋服用小球藻之後,母乳之中嘅二噁英含量都有大幅減低,可以話大人細路都食得。 而身為美國國家註冊藥劑師、草藥專家、營養學教授敏德爾博士都發現小球藻可以增强人體免疫系統,仲喺《維生素聖典》一書指出「小球藻係完美嘅天然營養食品,除咗有複合蛋白質之外,還含有維他命B、C、E同重要礦物質,其中鋅同鐵嘅含量極高。」。既然搵到呢個天然方法可以減低二噁英留喺體內,都值得一試吖!

0

【 肝臟要有「解毒酶」! 營養師醒5大排毒貼士】懶健康貼士

「排出毒素身體好」呢句說話由細聽到大,依家身邊朋友都話「間中食清淡啲俾條腸唞唞順便排毒」。日又排夜又排,究竟點先真係排到毒呢?首先明白有咩毒圍繞住自己先啦。 要排咩「毒」? 毒分為兩大類。第一類係「內毒素」,即係身體新陳代謝後嘅副產物,例如乳酸、尿素化合物同來自腸道中微生物嘅廢物;第二類係「外毒素」,會通過進食、飲水或接觸進入體內,例如食物添加劑、殺蟲劑或海產中嘅汞等等。 肝臟要「解毒酶」幫手排毒 肝臟係有好強大嘅排毒功能,會將毒素轉化為尿液、糞便、汗液等方式將毒素排出體外,但如果一個人吸入嘅毒素超過咗身體排泄嘅能力,毒素就有可能會儲存喺脂肪細胞、軟組織同骨骼喇!不過每個人嘅排毒能力都唔同,會受環境、飲食習慣、生活方式、健康狀況同遺傳等因素而受影響,所以有啲人需要更多外來支援去排毒。 不過坊間嘅排毒飲食法唔可以亂試,好似飲幾日蔬菜汁,甚至禁食幾日呢啲建議除咗唔安全之外,仲可能會抑制體內嘅排毒功能添!因為肝臟排毒嘅時候需要有「解毒酶」(e.g. glutathione),但攝取足夠嘅蛋白質令解毒酶維持喺最佳水平;而且長時間禁食,或淨食蔬菜有機會造成營養不良,如果想知排毒方法有冇效,可以搵一個受專業訓練嘅健康專業人員,喺外國就有註冊營養師專係讀「綜合和功能性醫學營養」添。 5步back up排毒功能 健康嘅人一般都唔需要一個嚴密嘅排毒飲食計畫,不過以下5個飲食小貼士如果每日堅持的話,都可以支援排毒功能㗎: 保持充足水分,每日飲最少8杯水幫助沖走體內廢物。 每天最少食五份水果同蔬菜(2份水果+3蔬菜),幫助排出腸道廢物。當中可嘗試每日最少一杯十字花科蔬菜,例如羽衣甘藍、椰菜、西蘭花或抱子甘藍,而多用蒜頭、洋蔥、迷迭香做調味料,都有助支持解毒酶正常運作。 攝取適量堅果、種子同多食全穀物,幫助攝取足夠纖維。 攝取足夠嘅蛋白質,幫維持解毒酶喺最佳水平。(每日蛋白質攝取量計算方法:體重(kg)×0.8得出嘅數字,就係每日要攝取蛋白質嘅克數。) 吃自然發酵嘅食物,例如乳酪同德國酸菜(Sauerkraut),幫助身體控制腸道內微生物嘅毒素含量。   Moses Lee 現為“My Fitness”註冊營養師、澳洲營養及飲食治療碩士同澳洲營養師協會會員,擅長體重管理同運動營養。曾於醫院、社區中心、教會同非牟利機構等地方提供營養服務、舉辦營養講座同烹飪示範。現在為有需要控制體重嘅人士同運動員提供營養治療,制定飲食方案。  

0

【排毒降脂抗氧化 彩虹卷捲出3個願望】懶健康貼士

依家咩都講高效,食彩色蔬菜就可以多元化令腸道更健康。彩色啫,唔係真係嗒彩虹,間唔中食齊紅、黃、綠燈籠椒就搞掂啦。原來唔同色嘅燈籠椒有唔同功效,孖住一齊就好似Kinder出奇蛋咁滿足你三個願望! 紅燈籠椒 —— 含有大量辣椒紅素,比胡蘿蔔素更具抗氧化功效。紅燈籠椒比綠燈籠椒多5倍維他命E同2倍維化命C,呢兩種維化命都係抗氧化劑。維他命E有助防止多元不飽和脂肪酸同磷脂值被氧化;維他命C可以減輕抗壞血酸過氧化物酶基底嘅氧化。 黃燈籠椒 —— 辣椒素加快脂肪嘅新陳代謝,防止體內脂肪積存,有利降脂減肥,小朋友都啱食。 綠燈籠椒 —— 含有豐富嘅葉綠素,幫助排便順暢,加促廢物嘅排泄,對改善便秘好有幫助。 彩虹米紙卷可以一次捲晒咁多種燈籠椒,如果有小朋友,仲可以一齊整添,親子樂之餘多啲顏色又食得開心,氹佢哋食多啲蔬菜都易啲啦。 彩虹米紙卷 材料: 米紙 隨意 燈籠椒 紅、黃、綠各一隻 粟米芯 5-7條 粉絲 一扎 芫荽 少許 蝦 6-8 隻 魚露 1湯匙 辣椒 2隻 青檸 半個 胡椒 隨意 鹽 隨意 1. 燈籠椒及粟米芯切條;浸發粉絲;蝦切件並用鹽及胡椒醃好; 2. 灼熟蝦、粉絲、燈籠椒同粟米芯; 3. 米紙濕水幾秒後鋪平,灑上芫荽碎,鋪上食材包好; 4. 攪勻魚露、辣椒粒、青檸汁做成醬汁,食得。 營養均勻有肉食,瘦得精神迷死人。

0

【冷壓果汁霉素超標要下架 營養師教你分真假排毒】懶健康貼士

呢個星期消委會公佈咗測試40款冷藏果汁樣本嘅結果,其中2款澳洲牌子嘅冷壓果汁驗出霉素超標要即時下架!其實近年冷壓果汁大熱,仲講到話有排毒功能,甚至有千幾蚊嘅排毒減肥套餐出現。究竟點樣嘅果汁先夠好,定係食原隻水果最健康?小編搵咗註冊營養師謝詠瑩 等佢講吓有乜好建議: 冷壓果汁有咩好處同壞處? 冷壓果汁嘅技術的確有助保留某啲營養素,尤其係水溶性維他命,例如維他命B、C、葉酸等較易受熱力破壞嘅營養素,但維他命C需要加熱到大約70°C先會明顯流失。雖說傳統嘅榨汁機或攪拌機喺快速轉動時會產生熱力,但會唔會加熱到一個高溫點會破壞營養素呢?呢方面需要更多數據支持。而且好多營養素都比較耐熱,例如纖維、鐵、鈣等等。   冷壓果汁有冇排毒功能呢? 好多時冷壓果汁果糖太高,部份人會腸胃唔舒服而引致肚瀉,誤以為有排毒效果。但排毒係指排走便便,或經過排汗將身體內唔需要嘅代謝物排走,同埋肝臟會幫助分解有毒物質,再經腎臟排出身體。而原個水果食先會食埋纖維,促進腸道蠕動排走便便就係真正排毒。 冷壓果汁真係比鮮榨果汁健康嗎? 以今次消委會報告嘅橙汁樣本為例,鮮榨橙汁每100毫升平均約有35毫克維他命C;而經過巴斯特消毒法或冷壓嘅果汁樣本,每100毫升平均約有33毫克維他命C,其實唔係相差得好遠。但係邊款果汁都好,如果隔晒渣,纖維會比食原個蔬果低,而抗養化營養素都會伴隨纖維被抽走。   點樣分真假冷壓果汁? 要睇營養表係咪100%純鮮果,正常唔會寫水或濃縮果汁嘅字眼。   原個生果 vs 冷壓果汁 vs 濃縮果汁 vs 天然果汁排次序,最好到最差係咩呢? 1. 原個生果:纖維最豐富又食埋落肚,會增加飽肚感;而可以減慢吸收糖分嘅速度,血糖會比較平穩。 2. 冷壓果汁:無加熱咁多,keep到多少少維他命C。 3. 天然果汁(盒裝或包裝好嘅100%果汁):通常經過巴斯特消毒法,以比較高溫少少處理過,容易啲流失維他命C。不過有啲會再添加返維他命,最後都要睇營養標籤做比較,未必差過冷壓果汁。 4. 濃縮果汁:通常經過好高溫加熱,然後再加水份,會流失更加多營養素,例如葉酸、維他命B雜等等,仲有好多其他添加劑。 1日可以飲幾多果汁呢? 香港衛生署建議每日應該食2份水果,1份水果大約等於180毫克果汁,但唔建議一次過飲360毫克當食咗2份。建議每日最多飲180毫克嘅鮮榨果汁,因為食用新鮮水果嘅纖維同水溶性維生素比較高。   想排毒食咩水果最好呢? 木瓜、熱情果、火龍果同纖維素效高;西梅有天然瀉藥成分。下面嘅數據俾大家參考唔同水果嘅纖維量: 保存水果小貼士:可以加少少檸檬汁,當中嘅維他命C可以令水果無咁易氧化。 消委會公佈40款市面常見嘅冷藏果汁測試結果,好多都誇大營養成分,其中有2款冷壓果汁驗出棒曲霉素超標要下架! (棒曲霉素常見於發霉嘅蔬果同穀物,嚴重會引致腸胃充血、抑制免疫反應、損害神經、影響胎兒發育) 二款果汁有棒曲霉素超標須下架:...