Tagged: 掟鏢

0

【今晚啤一啤 長沙灣最好hea掟鏢聖地】Overtime

放工之後帶住輕鬆心情去同朋友飲返杯傾下計就最梳乎!Overtime位於長沙灣,係呢一帶比較少有嘅清吧,嚟到除咗有大電視之外,仲有6部鏢機任你掟、任你飛!想靜靜傾計又得,想點玩都得! 酒吧裝修以木同磚為主,希望有別於一般大家對酒吧「黑媽媽」嘅印象,營造出英倫風。 酒吧除咗要夠大地方傾下計之外,最緊要有埋大電視,嚟到可以睇下波、會下班花生友! 成日都有人講呢邊無乜野玩,唔講唔知呢度有6部鏢機,係附近地區之中最多鏢機玩嘅酒吧之一,都幾多人嚟呢度練鏢㗎! 店主推介Guinness Draught(HKD69/杯)(Happy Hour)苦得嚟帶甘,而且無咁多氣,唔想飲到成肚氣可以試下。 招牌炸魷魚鬚(HKD58)炸得好酥脆,唔會一舊舊粉團,用嚟佐酒一流。成班人你一句我一句,食下食下好快就無晒。 肚餓嚟到都唔怕無好野食!日式燒一口牛(HKD68)醬汁食落甜甜地好得女仔鍾意,加埋芝麻同蔥,口感更多層次,不過最緊要都係味道啱晒送酒,嚟到有得飲有得食有得玩! Overtime 電話:2866 2722 地址:長沙灣順寧道47號嘉寧閣地下B舖 營業時間:星期一至日:17:00-03:00

0

【潮去尖咀乾杯 唱K、掟鏢、大飲靚cocktail】Cheers 乾杯

日日返工為咗五斗米爆seed,放工放假果陣自不然就會好想抖下、玩下、癲下!位於尖沙咀嘅Cheers乾杯可以滿足晒你嘅需要,嚟到除咗可以食野、飲返幾杯之外,仲有得唱K、掟飛標添!就算你為咗五斗米幾辛苦都好,嚟到即刻唔記得晒! Cheers嘅位置十分就腳,出開尖沙咀行街要上嚟都好方便。  嚟到除咗飲返杯之外,大家仲可以同朋友唱下K。 即使你十音不全,打個乞嚏都會走音都好,嚟到都唔駛怕無野玩!因為呢度仲有得玩飛鏢,可以玩返幾鋪癲下笑下。 雖然呢度係酒吧,但係都有高質食物供應。呢道炭烤紐西蘭西冷(HKD108)一啲都唔韌,食起嚟牛肉味濃郁豐腴,配埋粗薯條更加滋味。 June Bug(HKD58)由Tequila,Lemon Juice同Grendine組合而成。果汁味香濃,味道酸酸甜甜,非常易入口,女士一定鍾意。 有隻色走甩咗嘅Rainbow Bridge(HKD198),每杯都有豐富白色泡泡,其實全部都係Vodka泡泡嚟㗎,用咗分子料理製法製成。上面嘅粉紅色粉帶點士多啤梨味,無論外型抑或味道都好特別! Cheers 乾杯  電話:9702 6649 地址:尖沙咀亞士厘道28-34號天星大樓1樓B舖 營業時間:星期一至四:11:00-02:00 星期五至六:18:00-04:00 逢星期日休息