Tagged: 撈麵

0

【足料小店必點爆餡手工餃子 惹味首選脆皮雞扒撈麵】平霸

平霸又捐窿捐罅搵好嘢食喇!今次俾小編搵到喺油麻地一個小角落嘅竹地小館,無論係餃子定麵食都大大份又好食,符合晒小編成日話「夠抵食都要夠好食」嘅理念。即刻睇吓究竟有幾正啦! 呢間小店喺轉角位,堂食座位大約有十個,不過疫情關係佢哋暫時只做外賣,拎返屋企食更安全呀。 佢哋究竟有幾抵食?成個餐牌最貴都唔過HKD40,撈麵都只係HKD20起。鍾意落廚嘅朋友可以買生餃(HKD35/12隻)返去煮,平均唔使3蚊一隻,超抵呀! 咁啱小編去到嘅時候師傅包緊餃子,佢哋話每日朝早開始包餃子,隻隻都係人手當日即製。餃子落足料,好有分量㗎!呢款韮菜豬肉餃真係超多韮菜㗎,鍾意食韮菜嘅朋友要試吓喇。 煎、湯餃(HKD35/10隻)同價,小編就試咗煎餃。熱辣辣即叫即煎,外皮香脆,食落夠多汁。 粟米豬肉餃(左)同招牌菜肉餃(右)粒粒都賬卜卜,皮薄爆餡,多菜少肉夠晒健康。呢兩款味道唔會重,都新鮮好食,但小編推介粟米豬肉餃多啲啲,食落比較有咬口。如果係正常食量嘅女仔,8粒餃子(HKD30)已經夠晒飽。 試埋大大碗嘅蔥油撈雞扒麵(HKD30)先,會配一碗白蘿蔔清湯㗎。厚肉嘅雞扒煎到皮脆肉嫩,撈麵嘅蔥油味唔算濃,反而醬油味比較突出,似醬油撈麵多啲,不過勝在食落唔油膩;嗜辣嘅朋友加少少佢哋自製嘅蒜蓉辣椒醬會更惹味。   竹地小館 地址: 油麻地廣東道838號金冠樓地下 電話: 3614 5672 營業時間:星期一至日:11:30-21:15

0

【$23嫩滑手撕雞撈麵 親民小店回頭率高】平霸

平霸線眼夠多,好多時都有唔少餓底介紹啲平靚正美食。好似聚興樓咁,就係餓底線人報料俾平霸喇! 呢間街坊小店係手撕雞專門店,最受歡迎就係手撕雞飯/撈麵,價錢貼地又親民,仲係唔少街坊嘅加餸飯堂嚟㗎! 手撕雞撈麵(HKD23),有原味同麻辣汁兩種口味,店員會先問你要唔要點麻辣汁,今次小編就叫咗原味喇!見店員當場喺手撕雞面灑上芝麻,食落除咗有雞味,仲好有芝麻香喎! 個人覺得如果齋食手撕雞料嘅話,感覺會偏鹹咗少少,不過勝在雞皮夠爽、雞肉又嫩滑,配埋撈麵食就鹹度啱啱好,可以中和返! 瑞士汁雞髀飯(HKD23),浸到入晒味嘅瑞士汁雞髀,咬開肉汁爆發,雞肉醃得都非常入味,瑞士汁入口甜而不苦,撈汁送飯真係超級開胃!除咗雞髀大大隻,飯嘅分量一樣勁,男士食都夠飽呀!瑞士汁仲好多,唔會食到最後得返白飯乾爭爭呢,抵讚! 平霸小評:小店雖然以外賣為主,不過生意一樣咁好!好多食客都會外賣份手撕雞返屋企加餸,諗唔到食咩嗰陣,落街買個手撕雞撈麵又平又方便,小編呢次好滿意呀! 聚興樓 地址:藍田安田街23號平田商場地下G04號舖 營業時間:星期一至星期日:10:00-20:00 《平霸》平食四方,歡迎各界報料。

0

【太子小店賣花膠米響朵 新推嫩滑牛頸脊湯米】潮州人

店名叫潮州人唔一定要食潮州菜嘅!身為潮州人嘅老闆Atta都話好多人會以為佢做潮州菜,其實店名嘅由來只係Atta爸爸成日話做人要有潮州人刻苦打拼嘅精神咁解啫!Atta就話,佢只係想煮自己鍾意嘅住家菜同大家分享咋。 舖頭雖少,但心機同用料一啲都唔少!試過有段時間舖頭嘅鎮店花膠斷咗貨源,Atta並冇將價就貨用次級嘅花膠頂上,因為佢想大家都可以食到又平又靚嘅花膠,依家仲有新menu添。 蠔皇花賿撈米(HKD68)同湯麵款一樣,有原條肥厚花膠㗎!花膠炆得幾入味,好有肉地又軟熟彈牙;膠質都豐富,有少少漿口,男士食都爆心心眼呀!配上幼細嘅新竹米粉,吸湯吸汁都易啲,又唔會搶咗花膠嘅味道。米粉都隔得幾乾水,手勢唔錯呀。 本身嘅menu係海鮮食物多,不過遇上有靚食材都會變動吓。新鮮手切肥牛湯米(HKD53)加入menu冇耐,用肉味濃嘅本地新鮮手切牛頸脊肉,煮到啱啱熟即起,保存到佢彈滑嘅質感,所以你都唔好浸咁耐先食呀。湯底同花膠麵一樣,用大量雞精煮而成,仲有洋蔥等材料提味,好鮮甜㗎。 仲有兩款小食都係新出嘅,貴妃蚌(HKD56/2隻)聽落有啲貴,但上枱見佢大隻過湯匙即刻嘩咗聲!有肉爽口又鮮甜,食得出係靚海鮮,豉油都唔好點太多,食原味堅正! 酒釀溏心蛋(HKD18/隻)選用日本蛋,浸酒都要兩至三個鐘,酒香喺口腔慢慢散發都唔錯。 老闆仲會每日煲唔同嘅滋補靚湯,有成十幾款㗎!   潮州人 地址:太子界限街12號A地舖 電話:6536 6626 營業時間:星期二至日:15:00-00:00

0

【口碑瘋傳爆場店 秘製豬扒大過塊面】炊豕店

各位食肉獸,唔知大家有冇食過大過塊面嘅豬扒呢?小編就有喇!呢間喺銅鑼灣嘅炊豕店,係一班打工仔嘅飯堂,價錢合理又食到高質豬扒,長期都有好多人排隊㗎!! 負責人話佢啲豬扒係有少少偏台式同上海嘅排骨,食落口好酥脆,令人一試難忘呀!見到menu咁少選擇?其實係老闆特登嘅,餐廳想專心做好豬扒,希望客人一想食豬扒就會諗起炊豕店喎! 柚子蜜豬扒飯(HKD60),呢個係期間限定,師傅有再調味過柚子蜜,食落口感係偏酸,相對嚟講冇咁油膩。豬扒即叫即整,口感fresh得嚟又滿足到啖啖肉嘅慾望,唔少客人食過都讚好呀! 秘製豬扒飯肉燥汁(HKD54),小編嗰日加10蚊就加多咗個滑蛋(邪惡食法)。呢個飯最受客仔歡迎,贏其他飯差唔多一倍㗎!肉燥汁係自家秘製,超好送飯,加埋豬扒同滑蛋簡直perfect match! 話梅花雕豬手撈粗(HKD50)撈粗口感食落好爽,豬手啖啖都係骨膠原,話梅汁入晒落豬手同個麵度,正呀! 炸芝麻雞翼(HKD26/2隻),去到見到唔少食客都點咗呢味,真係炸到好香口,骨肉分離,加埋少少辣,超級惹味! 酥炸鳳尾蝦(HKD24/3隻),同平時食開個炸蝦好唔同,呢款入口特別酥脆同鬆化,加埋啲醬食,啖啖蝦肉係好食喎! 炊豕店 地址:銅鑼灣加路連山道11號地下 電話:2805 6665 營業時間:星期一至六:12:00 – 21:00(星期日休息)

0

【25蚊食到飽一飽 5蚊13粒魚蛋邊度搵?】平霸

放完個聖誕假,係咪食咗唔少好嘢?呢次平霸帶大家去一間小編由細食到大嘅舖頭,咁多年都冇乜加到價,真係平到講你都唔信呀!一講起將軍澳慧安園,街坊諗到嘅可能會係良記餃子,不過其實呢間楚塋小食都好好喎!有啲咩食?等小編教路啦! 楚塋小食價格全部都好平,專做學生哥生意,次次一到放學時段都排晒長龍,好受學生哥歡迎㗎!今次平霸用咗25蚊已經食到太飽喇!   5蚊      咖喱魚蛋(HKD5/13粒)你冇眼花,賣5蚊嘅魚蛋已經好少見,仲要有成13粒,好癲呀!雖然一定冇長洲大魚蛋咁好食,不過味道正正常常又彈牙,5蚊嚟講直頭超值喇! 4蚊 印尼撈麵(HKD4)留意返,佢嘅細撈都係賣4蚊咋,咁平應該得佢一間,另外大撈7蚊兩個,加大撈10蚊三個,又係平到黐線,一啲都唔誇張!有時糧尾10蚊就食到飽,窮人恩物仲唔係佢? 8蚊 朱古力味雞蛋仔(HKD8)最多人食呢個味,8蚊有雞蛋仔仲要唔係原味,小編好知足喇!啱啱整起入面熱辣辣,外脆內軟,同出面賣18蚊嗰啲有得揮㗎。好食好食! 8蚊 珍珠奶茶(HKD8)呢個雖然好平,不過味道就唔得喇,奶茶冇茶味,偏奶多,而且飲落有陣花香味,好奇怪,都幾難飲吓 ;而且啲珍珠勁軟淋淋,一啲都唔Q彈,呢個失水準喇! 平霸小評:今次帶大家食到小編細細個食開嘅舖頭,希望你哋都會鍾意呢啲平民小店啦!呢間價格係好平,但平得嚟又好食,絕對可以一試! 楚塋小食 地址:將軍澳毓雅里9號慧安商場地下A35號舖 《平霸》星期四食咩平嘢?歡迎各界報料。