Tagged: 放題

0

【人氣雞翼專賣店$98起任食 灣仔新店開業「一齊叫雞」】Wingman

香港有幾間炸雞專門店,其中港島區嘅Wingman就喺灣仔開咗新店,而且全線推出全食雞翼放題呀!想試齊佢哋所有雞翼一定係揀頂級任食套餐啦,不過想食平啲都可以試到3款指定雞翼嘅,依家睇吓有咩選擇啦。 灣仔店有兩層,上層有請畫師嚟畫上代表性牆畫,仲有羽毛吊飾做裝飾添。 任食套餐(HKD98起)有5個選擇,或者lunch想小試牛刀亦得。 13款雞翼口味基本有乾濕兩類,有辣到爆炸嘅,有經典口味嘅,亦有吉列豬扒呢啲好像真又有趣嘅味道。不過店主之一嘅Jack,佢現時其中最鍾意嘅雞煲口味就冇包喺任食套餐之中,要另外order。 如果食2小時All You Can Eat任食放題(HKD350/位),咁就可以試勻13款雞翼、所有nibbles同配菜。小編都試咗其中三款配菜,都好有驚喜㗎。 平時小編好怕食牛油果,覺得質感太蓉蓉爛爛,但呢個火燒牛油果(單點HKD75)竟然俾到小編帶爽口嘅感覺!Jack話因為佢哋特別挑澳洲品種,又唔太熟嘅牛油果,都幾用心喎。燒嘅時候只喺落少少鹽同黑椒調味,食嘅時候唧啲青檸汁,再點秘製辣醬特別開胃喎。 牛油燒粟米(單點HKD65)雖然冇落肉,但燒到咁上下加埋醬汁同香草,咬落juicy之餘竟然有陣好似煙肉嘅鹹香味! 燒嘅菜式之中點少得茄子呢?!西日fusion嘅烤麵豉茄子(單點HKD85)加咗麵豉醬同紫菜絲嘅日式元素,但味道唔會好鹹,都算清清哋嘅配菜。   Wingman 地址:灣仔船街33號地下 電話:2669 9309 營業時間:星期一至五:10:00-16:00[有時會收17:00] (星期六、日休息)

0

【粵菜放題$278起任食片皮鴨 送奄仔蟹+花膠響螺雞湯】利寶閣

一講放題就好似得日本菜,但粵菜都一樣吸引㗎。有廿一年烹調傳統粵菜嘅利寶閣,佢哋全線五間分店都有「任食2小時高級京菜」(HKD278起),有超過五十款即叫即做嘅中菜俾你任食。每位成人仲額外送三道滋味菜式添,分別係清蒸、雞油花雕蒸或油鹽焗嘅野生時令奄仔蟹、花膠響螺雞湯同原隻鮑魚花菇。唔賣關子喇,即刻睇吓有咩正斗菜式啦! 地方都算闊落,唔使迫住坐埋一齊。 花膠響螺雞湯雖然係送嘅,但一樣落足料!用砂窩長時間燉煮雞隻,味道鮮甜潤喉又養生。 奄仔蟹有清蒸、雞油花雕蒸或油鹽焗三個煮法,想味道特別啲就梗係揀用雞油花雕蒸,以酒香突出蟹嘅鮮味吖嘛。 原隻鮑魚花菇就似平時飲宴嘅口味,食埋就即刻進擊任食款式喇。 五十幾款食物唔知點揀好?當然有啲必食嘅回本菜式呢! 京式片皮鴨(上環分店除外)皮脆肉嫩,配搭青瓜、京蔥、京醬用餅皮包起嚟食,有油香又唔會過肥。 上環分店期間限定嘅西班牙伊比利亞黑毛豬叉燒都係必食之選!呢種黑毛豬食橡木果實為主要食糧,肥瘦適中而且肉味香甜濃郁啲㗎。 香脆又多肉汁嘅脆皮燒腩仔簡直係香港人最愛,肉同脂肪肥瘦相間,表面又燒到甘香脆口,令人想一食再食! 如果鍾意食涼菜,一定要試花雕醉蝦同流心醉蛋。兩款都用花雕酒浸泡冷藏最少一晚,每啖都係香濃嘅酒香。 中菜都有甜品㗎,傳統嘅拔絲香芋同冰糖葫蘆唔係成日食到,當然要過吓口癮啦!   「任食2小時高級京菜」 供應時間: 星期一至日及公眾假期:18:00-22:00(自選2小時) 價格: 星期一至四: 成人HKD278/位(兩位起) 小童HKD139/位* 星期五至日及公眾假期: 成人HKD298/位(2位起) 小童HKD149/位* 其他收費: 按原價HKD488收取加一服務費: 成人HKD48.8/位,小童HKD24.4/位 *1米以下小童免費   利寶閣  地址:尖沙咀彌敦道100號The ONE 17樓 電話:2870 1488 營業時間:星期一至日:11:00-15:00,18:00-23:00

0

【公審牛涮鍋禁素葷同枱 無理素食者被網友圍攻】食焦

素食者有時都好有堅持,網上仲不時出現素食者同肉食者嘅矛盾大對決添,掀起過好多爭論㗎!最新一單係點呢?就係素食者要去牛肉火鍋放題店食素,究竟係咩玩法呢?最近有素食者喺自家素食專頁開帖,「不會再來這餐廳~牛涮鍋 因為他 “禁止”素食和肉食朋友同枱食 我被迫要”一個人坐開”食團年飯」。 話說事主同屋企人去咗黃埔間牛涮鍋食團年飯,而事主係素食者,佢話店家唔俾佢同屋企人坐埋一枱喎,「是他們質素差,反而我們食素的, 會有種豁達」,仲話以後唔會再幫襯添!此po一出,引來唔少網友分享去其他飲食群組,結果,好多人都覺得事主口口聲聲話自己豁達,但又公然將事件放上網想公審店家,根本係假豁達! 而網友異口同聲都話店主將佢哋分枱坐嘅做法係正常不過,你食素係冇問題嘅,只要你肯俾返食肉者選餐嘅同樣價錢就得,唔肯嘅話,店家要求你分枱坐亦好合理,「如果全枱1個俾肉錢,其餘6個俾素錢然後狂食肉咁點?真係豁達嘅茹素者應該深明此理,無人歧視你!」 網友仲話事主食素要去牛涮鍋都已經夠搞笑,仲好意思想公審店家!咁點先可以同枱呢?原來只要加返10蚊相等於肉食者嘅同價就得,即係事主唔肯自己加嗰十蚊雞,先要分開枱坐啫!自己開po得唔到共鳴,反而仲要俾其他網友圍攻,做人更豁達都受唔住啦!所以呢,眼見群情洶湧,事主拿拿臨刪po,仲連自己個素食專頁都del埋!算唔算攞嚟衰?

0

【2粒鐘任食燒肉放題 澳洲靚和牛停唔到口】熊本燒肉

香港放題一大堆,最搶手梗係燒肉放題啦!依家熊本燒肉推出120分鐘燒肉放題,加多28蚊仲有埋任食和牛,食肉獸今次點忍呀?餐廳負責人Chris成日都會去日本,眼見日本周圍都有燒肉放題,佢都好想可以喺香港開返間,取名叫熊本,想有少少日本feel咁啦。三百幾蚊咁抵食?Chris就話希望用一個價錢,提供多樣化嘅食物,滿足到大眾,唔怪得日日都咁好生意啦! 牛肉拼盤種類都好多,每樣有2-3嚿,咁就每人都可以試到啦。除咗牛肉拼盤,仲有雞肉同豬肉類,夠晒多選擇呀! 和牛拼盤(牛小排)見到啲雪花紋路係好靚好清楚,放落去燒5-10秒就已經ok㗎喇,廚師會將牛肉切薄啲,方便客人燒嚟食,入口即溶咁滯! 和牛拼盤(肉眼)邊款最正?Chris自己最鍾意食肉眼,因為脂肪比較豐富,燒完再加返啲鹽做少量調味已經好好食!Chris教路咁樣食先會最凸顯牛肉本身嘅味道,牛味超濃呀! 啲牛肉燒起上嚟仲有埋啲肉汁喺度,見到都好想食呀! 依家餐廳加多60蚊就可以任飲生啤,食肉梗係唔少得配啤酒啦,咁先係perfect match 呀!正! 飲完啤酒諗住完?未得住,餐廳仲會每人送返杯Haagen Dazs俾你,真係唔肥就假喇,不過食咗先減啦! 晚市任食120分鐘 星期一至四: 大人 (HKD268)、小童(HKD128) 星期五至日及公眾假期前夕: 大人 (HKD298)、小童(HKD148) 熊本燒肉 地址:銅鑼灣謝斐道477-481號3樓 電話:2617 3328 營業時間:星期一至四及星期日:12:00-15:30;17:00-00:00;星期五至六:12:00-15:30;17:00-01:00

0

【埋單唔同價收貴咗 韓燒$198變$228出蠱惑】食焦

明碼實價寫明咗係呢個價錢,埋單嗰陣都可以變咗另一個價錢?變少咗就話啫,要加錢就擺明呃人喎!係咁嘅,有絲打公開咗「騙徒」嘅手法喇,話說去食韓燒,樓下派宣傳單張寫明$198,點知埋單變咗$228!即使要加一服務費,都唔係呢個價錢啦! 結果係無奈地埋咗張單!絲打問收銀,佢就話12月係收呢個價。咁單張明明係寫$198喎?店員就話係舊嘅,依家嘅價錢要$228,仲話惟有送返張9折咭俾絲打下次食喎!仲有下次咩?絲打po埋張單上群組,有唔少網友留言叫絲打去消委會投訴同報海關,告佢違反《商品說明條例》啦! 邊間韓燒店咁樣出蠱惑先?就係旺角嘅「韓牛韓式燒烤」喇!小編打過去問價,佢哋話依家係收$198加一,咁點解之前收過客人$228呢?店員就話係聖誕新年先收呢個價錢喎,話喺1月2日已經變返$198!再問佢點解喺單張度唔寫明呢?店員就開始唔耐煩喇,佢話:「總之依家收$198啦!」。 其實唔係話唔肯俾多少少錢嘅問題,最緊要明碼實價吖嘛,依家又難怪絲打咁嬲!其實最近都有唔少食店「瀨嘢」,真係違反咗《商品說明條例》!又係食燒肉嘅,位於尖沙咀赫德道嘅伊賀日本燒肉料理,廣告就話$114食海鮮燒肉放題,聲稱有龍蝦、燒蠔同一口和牛供應;但食客到餐廳後發現龍蝦賣晒冇得食,燒蠔就要另加$68先有得食,於是就向海關投訴。餐廳上星期承認違反《商品說明條例》,被判罰款1萬元。睇嚟絲打真係要去海關先得喎!

0

【CP值爆標$268冇限時狂食 塊塊至少2cm極厚刺身】 浪人日本料理

斜陽落下,揸住把武士刀吊吊揈嘅「浪人」比人感覺零舍瀟灑不羈。雖然浪人係班流離失所嘅武士,但憑一身武藝浪跡天涯,努力為自己人生奮鬥,不斷挑戰自己堅持唔放棄,就唔係人人都做到。灣仔嘅浪人日本料理以「浪人」為名,都係提醒自己要一直堅持正宗日本料理,保持放題質素。嚟到呢度食,大家都要好似佢哋咁,堅持再堅持呀!因為佢哋無限時任食,希望大家個肚仔黑洞夠大,可以裝滿回本啦。 餐廳地方都算闊落,整潔企理。仲設有卡位,坐落好舒服,而且放題唔限時,可以放心同朋友慢慢食慢慢傾。 有人話「魚生究竟有啲乜咁好食?」雖然魚生唔似得火腩咁要落火煮,但係每件魚生都好考刀功同食材新鮮度。三文魚、油甘魚、劍魚腩、帆立貝、北寄貝同馬刀貝各有特色,件件厚切超肥厚,口感都算爽身。魚生唔會好似一般放題咁,淨係得陣雪藏味,反而略帶少少海水味,未必人人都食得慣。 各式各樣嘅魚生,唔同配搭就會有唔同化學作用。鍾意唔同花款嘅你,就要試下各種手握壽司,(左起)黑魚子虎蝦、炙燒鵝肝、花之戀、鰻魚、炙燒牛油帆立貝,件件都經過悉心配搭。其中小編比較推薦花之戀,三文魚捲住脆卜卜蟹籽,一粒粒喺口入面爆出鮮味。 食放題除咗魚生,都會想食下熱辣辣香口炸物。呢度串燒、炸物、鍋物全部即叫即製,小編都點咗唔少炸物,好似吉列廣島蠔、吉列海蝦、唐揚魷魚圈,炸得啱啱好炸漿夠薄身,脆口又唔嚡。怕熱氣仲有不同小食,好似芝麻雞翼同章魚小丸子,夠晒日系好點題。 呢度放題嘅選擇都幾多,無論冷熱食物都有齊,係咁咦睇返張相就覺得肚餓喇!小編提提你,佢哋個放題包埋無限熱茶、一杯特飲品同一份甜品,記得要點埋呀! 放題價錢: 晚市放題 星期日至四18:30-22:30 星期五、六、公眾假期及前夕 成人HKD268 成人HKD298 小童.長者HKD168 小童.長者HKD188 午市放題 星期六、日及公眾假期 成人HKD168 小童.長者HKD118 (另設加一服務費) 浪人日本料理 電話:3568 5355 地址:灣仔駱克道181號京城大廈商場2樓 營業時間:星期一至日:11:30-15:00;18:30-22:30

0

【最接近神嘅餐廳 日式祭典狂食大放題】神輿日本料理

喺香港食放題,好多時都講不上有咩主題。今次小編嚟到位於旺角嘅神輿日本料理,「神輿」呢個名嚟自日本祭典期間為神明乘坐而打造嘅嘅屋形轎,可以帶住神明喺當地四處遊行,祈福求願、消災解厄,為整個地區多添福氣。神輿成間放題都帶有濃厚嘅日本色彩,等小編同你一齊去朝聖! 一嚟到入口就見到一排「鳥居」,喺日本參拜神明必經之路一定會有鳥居,傳說係連接神明居住嘅神域同人類俗世嘅通道。 話明主題同神有關,除咗鳥居之外,電梯口附近仲有兩個位置比大家寫繪馬,可以寫低自己嘅願望再綁喺上面祈福! 就連餐廳入面嘅座位都一樣滲透住餐廳名「神輿」呢個元素!可能真係神之領域,呢度全部位都大大個,地方又整潔乾淨,就連碗碟都用陶瓷,細節上面都好有心思!唔知嚟到呢個神之領域,食嘅嘢係咪神一般咁好味呢? 刺身種類非常之多,總共有12種!除咗有必check嘅三文魚、油甘魚、八爪魚、希靈魚、松葉蟹棒、馬刀貝、帶子、甜蝦、中吞拿魚腩同北寄貝之外,仲有令人驚喜嘅三文魚腩同象拔蚌添!款款刺身都極之新鮮又夠晒厚切,淨係食刺身分分鐘都已經回晒本啦! 壽司同樣都有多達18款選擇,舊飯仲唔會好似赤柱啲衫咁「加加加加大碼」頂住個肚,件件壽司都真材實料!特別係香港人至鍾意嘅海膽,食落好鮮甜呀! 鋪滿芝士大大隻嘅芝士焗虎蝦,一嚟到已經香噴噴!成隻蝦一夾啲肉就一次過起晒,可以一啖食晒成抽蝦肉。蝦肉爽甜加上濃郁芝味真係無得彈,嚟到記得嗌返一兩隻試下呀! 天婦羅一啲都唔弱,大蝦、冬菇全部大大件!仲有秋葵炸到啱啱好,食落感覺一啲都唔潺,外皮超爽脆。素食者嚟到仲有素食刺身、壽司同鍋物之類可以點,唔駛焗住一定食天婦羅,照顧得都算周到!另外,佢地仲有章魚小丸子等等放題少見食物同日本祭典相關食物提供,一齊嚟感受下祭典氣氛啦! 價錢: 入座時間 星期一至四 星期五至日  18:00前入座  HKD168  HKD178  18:00-19:00入座  HKD198 HKD208  19:00-21:00入座  HKD228 HKD238  21:00-22:30入座  HKD198 HKD208 22:30後入座  HKD168 HKD178 神輿日本料理 電話:3160 8456 地址:旺角彌敦道593-601號創興廣場5樓 營業時間:星期一至四:16:00-01:00 星期五至日:16:00-02:00 公眾假期前夕:16:00-02:00

0

【激抵任食塞爆你個胃!激鮮鱈場蟹腳無限放送】組長日式放題

Gathering永遠都離唔開市區同放題,位於銅鑼灣嘅組長日式放題食物質素唔錯,選擇夠晒多,熟食熱辣辣送到,一個人去食都係2百零蚊。Gathering想食放題,就要去試試啦! 店內裝修富有日本特色,座位舒服乾淨。室內掛滿紅白燈籠,燈光柔和,相機食先影靚相無難度。 放題必食嘅梗係刺身啦!組長呢度一共有8款刺身,三文魚、油甘魚、立魚、帶子、馬刀貝、劍魚、甘蝦同八爪魚。款款都好厚切又爽口,鍾意食刺身嘅你一定要試下呀! 除咗刺身呢啲生冷野之外,熟食都有唔少選擇㗎。天婦羅炸得酥脆,串燒燒到啱啱好,樣樣野食都總有一樣合你心意! 而家只需要加(HKD38)就可以無限享用埋鱈場蟹腳、安格斯牛柳、黃金焗蠔、特大赤蝦、珍寶帶子同鵝肝多士。安格斯牛柳夠晒厚身,食落好多肉汁又鬆化,可以無限係咁食真係好抵呀! 無論去到都想食海膽嘅你,呢個隱藏Menu,馬糞海膽(HKD78/1板)就啱晒你啦!海膽味道夠晒鮮甜,無論係就咁食抑或擺少少上去刺身度自己配搭都無得彈! 價錢: 午市星期一至日只供應定食,午市套餐及HKD88壽司放題 星期六日及公眾假期:12:00-15:00 成人HKD168,小童/長者HKD128 晚市放題 星期一至四 星期五 星期六 星期日  17:30-19:30 (19:30前離座)  成人HKD178  成人HKD178 成人HKD188 成人HKD188  18:30-20:30 (20:30前離座)  成人HKD188 成人HKD198 成人HKD198 成人HKD198  19:30-21:30 (21:30前離座)  成人HKD198 成人HKD208  成人HKD208 成人HKD208  20:30-22:30...

0

【火鍋之匠人!必試旺角中日合璧火鍋餐】鍋匠

如果大家鍾意中式火鍋一大鍋慢慢打,但係又想食到日本火鍋嘅靚料,新開業無耐嘅鍋匠,就啱晒你啦!鍋匠揉合中日特色,無論中式定日式湯底、受港人歡迎地道食材抑或日本靚湯料樣樣都有,仲要位於旺角咁方便,啱晒同朋友慢慢歎! 除咗位於旺角夠晒方便之外,去到佢地樓下扶手電梯直上就可以直達門口,夠晒就腳! 店舖裝修帶有少少日本風情,簡約又雅致,氣氛甚佳,無論人多抑或人少都好適合慢慢坐低打邊爐。 鍋匠120分鐘火鍋放題套餐,包括沙律、前菜、精品之鍋、鍋物之湯、主食、鍋物、甜品同飲品。沙律係日式胡麻沙律,前菜係日式枝豆、梅子花生、芥末木耳三選一。沙律大大份,又爽脆新鮮,配上芝麻醬帶微微酸甜味道,清新又開胃! 精品之鍋有鍋匠雞煲同蕃茄薯仔粟米筒骨湯鍋二選一。雞煲可選大、中、小辣、不辣同麻辣,餐廳以秘製醬汁炮製,除咗香味夠晒香濃之外,食落每件雞塊都非常入味,又夠足料!食落啖啖都係濃香嫩滑雞肉。 鍋物之湯有6個選擇,包括有三款人氣日式湯底:藤原豆乳湯鍋、北海道昆布湯鍋同秘傳月見壽喜湯鍋;另外仲有三款傳統中式湯底,包括香濃沙嗲湯鍋、香茜皮蛋湯鍋同四川麻辣鍋。如果要加鴛鴦湯鍋,每鍋都係(HKD20)。如果鍾意食辣,不妨試試四川麻辣鍋!紅噹噹嘅湯底入面浸住唔少辣椒,將新鮮食材放落去,辣得嚟食得出食材新鮮,又麻又辣嘅感覺夠晒過癮。 套餐嘅價錢根據主食嘅肉類而定,分別有上級牛肉之火鍋套餐、手切頂級雪花牛肉之火鍋套餐、手切本地黃牛之火鍋套餐同鹿兒島A5黑毛和牛之火鍋套餐。手切本地黃牛(HKD298/成人,HKD268/小童或長者)。手切本地黃牛,脂肪分佈平均而且佈滿雪花,食落牛肉味道濃郁唔韌得嚟帶少少爽口。牛肉熟得好快,淥一淥就食得,食得咁爽,好快就食晒啦。鍋物嘅食材一共有15款選擇比大家任食任點,野菜同野菌類,都有成16款選擇,菜同菇都超級新鮮,就算本身唔鍾意食菜都會因為蔬菜嘅鮮甜而唔小心食多咗! 而家嚟到鍋匠仲有唔少優惠!好似呢個大大份嘅海鮮拼盤只要惠顧手切頂級雪花牛肉之火鍋或以上嘅套餐就可以跟餐送出,裡面唔止有脆肉鯇魚,仲有埋帶子添。樣樣都肥厚鮮嫩,真係好值得! 除咗海鮮拼盤嘅優惠之外,仲有唔少著數㗎!而家Book定檯先去,每2位仲有海膽送添呀,仲唔約人去大食特食? 鍋匠 電話:2481 1388 地址:旺角彌敦道613號飛達商業中心1樓 營業時間:星期一至日:16:30-02:30

0

【食物多款又有酒飲!長沙灣日式放題極速回本】東京一番

想食放題唔洗下下都去旺角銅鑼灣鬧市,長沙灣都有一定水準放題存在。呢間位於長沙灣永基商業大廈嘅東京一番,食物種類選擇多,最緊要夠新鮮,且價錢相當吸引,行親民街坊路線。無論平日或者假日都係一個 gathering 好地方。 餐廳係樓上食堂,由一樓行上嚟一眼見曬,環境十分寬敞,座位頗多,另設有包廂可以十幾個人一齊食放題,都幾開心。 食放題點少得壽司,雖説係食放題,但件件壽司都唔求其,魚生同飯比例正常。三文魚、油甘魚、黑松露鯛魚、鰻魚、花之戀都有得揀,呢度花之戀深得小編喜愛,三片厚切三文魚包住小飯糰,面層滿滿蟹籽,入口飽滿又有口感。 刺身有十幾款選擇:三文魚、油甘魚、甜蝦、赤貝、鮑魚片點多幾轉都食唔厭,時令油甘魚味道清甜,仲有甘香油脂味,鮑魚片口感爽口唔韌。 除咗刺身、壽司之外,天婦羅亦係食放題必點類別:虎蝦、茄子、鮮冬菇、秋葵都有。粉漿唔會太厚,剛炸起入口香脆鬆化,虎蝦更加係大大隻! 食完生冷野可以食返啲熟食,鐵板燒即叫即炒就最合適啦,大家可以試試一口牛,肉質鮮嫩富口感,油脂分佈平均,牛味濃郁。食到咁上下可以飲返杯清酒、梅酒,呢度嘅清酒、梅酒係任飲嫁,真係好少有。 如果你都仲係覺得唔夠喉,可以加HKD68就可以任食磯煮鮑魚同生蠔,當然仲有得飲白酒。 依家仲有優惠活動,只要19:30前離座或者21:30後入座並Like Facebook Page & Share,第二位就有得半價!另外,正價時段兩男一女組合去食放題,仲可以一人免費。 午市只供應定食 晚市放題 星期一至四 19:30前離座  成人(HKD188)/ 長者(HKD158) / 小童(HKD88),正價時段  成人(HKD198),21:30後入座  成人(HKD188) 星期五至日19:30前離座  成人(HKD198)/ 長者(HKD158) / 小童(HKD88),正價時段  成人(HKD218),21:30後入座  成人(HKD198) 東京一番 地址:長沙灣青山道156-162號永基商業大廈1樓 電話:2811 8248 營業時間:星期一至日:12:00-15:00 /  17:30-23:00