Tagged: 文青

0

【台灣文青果汁店登陸 天然味濃飲得健康】花甜果室

咁多間過江龍嘅珍珠奶茶長開長有咁款,開始厭未呢?如果真係驚咗成街都黑糖乜乜乜,依家有個新鮮選擇俾大家喇!同樣都係台灣過江龍,不過就主打純天然果汁,就係最近都有唔少好評嘅花甜果室喇!創辦人一直想大推健康果汁飲品,仲決定向香港市場進軍,等香港人都可以飲返多啲果汁,健康啲嘛!店內嘅每款果汁名仲改到好有詩意又有創意,百份百文青feel呀! 芭比情歸何處(HKD36),店內銷量冠軍,好受港人歡迎㗎!材料用咗士多啤梨、燕麥、藍莓同鮮奶,利用水果本身嘅色素做到一個天然嘅漸變效果,好靚好夢幻!飲之前記得要攪勻佢,唔係就會好淡㗎喇。 鈕扣(HKD36),有香蕉、菠蘿、橙汁同覆盆子碎,飲落酸酸甜甜,十分清爽,消暑一流!顏色方面非常夏天,飲一杯已經爽晒!細心啲睇,原來每個杯面都有唔同嘅手寫字款勵志句子,小編即刻收到晒滿滿嘅正能量,非常有心思! 他,與她的香水味(HKD45),呢個味道小編最鍾意。用火龍果、蘋果汁同自家製嘅蜂蜜乳酪,面層仲加咗椰子絲,飲落味道最突出!火龍果味好濃郁,一啖落肚就飲到沙冰嘅清涼,同時又有乳酪嘅口感,飲完都幾飽肚! 日安燕麥蕉莓泥(HKD36),有甜蕉、燕麥、鮮奶同藍莓,呢杯俾我嘅感覺雖然清淡咗少少,不過每一啖都有水果嘅存在,加上滿滿嘅燕麥,飲完覺得成個人都健康咗囉!   花甜果室 地址:尖沙咀加連威老道52號嘉蘭大廈地下C號舖 電話:6276 4280 營業時間:星期一至星期日:12:00-22:00

0

【100蚊包場連嘢食 新推趣爆雞蛋仔】Cafe Golden

石硤尾賽馬會創意藝術中心匯集咗好多有心嘅藝術家,咁餐廳都自然要俾個heart出嚟啦。Cafe Golden就設計咗唔少特別食品,最抵係HKD100就可以包場,喺度慶祝生日或求婚都唔錯㗎。 餐廳環境開揚,裡面仲有個懷舊區俾大家參觀。 首先介紹新推嘅抹茶味招牌雞蛋仔(HKD68),熱辣辣嘅雞蛋仔外脆內軟,配滑滑嘅cream、士多啤梨同抹茶雪糕都幾大份。唔同嘅質感加埋一齊,真係味蕾反轉再反轉。 好多食客都推介龍蝦汁蟹肉帶子意大利麵(HKD108),滿滿嘅龍蝦汁包住啲意粉好夠味,煎過嘅蟹肉同帶子都香噴噴。呢個Dinner Set配埋帕瑪火腿黑醋沙律,飲品可以揀果汁、手搖冰茶或紅茶,選擇都幾多。 輕食推介雞翼拼盤(HKD68),呢三款雞翼最特別係釀糯米飯,口感煙韌又啖啖肉。 趣致嘅富士山(HKD48)外形小巧幾得意,呢個蝶豆花同豆乳嘅組合好清甜。 時節飲品就有洛神花玫瑰茶(HKD44),可以開胃消滯。   Cafe Golden 地址:石硤尾白田街30號賽馬會創意藝術中心1樓05室 電話:2408 8255 營業時間:星期一至日:11:00-22:00

0

【還原咖啡真性格 90後演繹精品咖啡真粹】Cafe Royal Garden

想生活輕輕洋溢寫意感覺,插花係一個唔錯嘅主意。呢間位於花園街嘅Cafe Royal Garden同樣想配合花墟嘅氛圍,為大家獻上充滿花香嘅咖啡。但係唔好睇小呢間小小嘅精品咖啡店呀,因為佢地全部咖啡都係拎到90分以上嘅精品咖啡!多年前店主因為飲過一杯精品咖啡就再返唔到轉頭,愛上咗精彩嘅咖啡世界,對咖啡嘅熱愛一發不可收拾。更苦心研究精品咖啡,甚至去咗朋友間cafe學師,由零開始不斷嘗試同苦練,最後考到歐洲精品咖啡協會嘅證書,開咗呢間咖啡店同大家分享。一齊去細心品嚐啦! Cafe以白色同木裝潢作配搭,有種日和嘅感覺,坐低份外寫意。Cafe以精品咖啡為主,輕食為副,喺花墟附近行完過嚟抖一抖就最適合不過。原來佢地嘅咖啡嘅拼配都係精心挑選過,希望配搭出花香豐富嘅咖啡,現配合返花墟嘅感覺。 店主堅持所沖每杯咖啡都唔會破壞咖啡豆原有性格。小編當日飲嘅呢杯咖啡咖啡豆產地為哥倫比亞,以虹吸式(HKD60)沖煮,帶輕輕果酸同蔗糖味。另外更有手沖倒入式及冰滴式可以選擇。唔知道下次嚟到試嘅咖啡豆又係咩性格咩味道呢? 飲咖啡同朱古力有時就係為咗個靚拉花,睇到個拉花靚,心情都即刻好啲!Cappuccino(HKD36)一嚟到已經好香,加上精緻拉花,令人心情更愉悅,好治癒呀!對品質非常堅持嘅店主,店入面只供應Whole milk作沖調以確保品質,其他未能達到理想嘅奶完全唔用,大家嚟到不妨仔細品嚐,感受下當中嘅誠意。 飲精品咖啡,當然唔想食物嘅味道蓋過咗佢啦,最好就係食個Bagel做配搭啦。Bagel食落有少少似法包外皮脆脆又煙韌,同我地平時食開嘅Burger係完全唔同㗎。呢個Smoked Salmon Supreme(HKD78),以挪威煙三文魚、忌廉芝士、西班牙酸豆、紅洋蔥做餡,入面仲有少少檸檬汁同火箭菜,食落微酸好有清新感覺。個包再配埋薯片,啱晒為食小編對零食嘅慾望! 店裡面嘅蛋糕全部都係自家製,不定期更新口味同款式,並以低糖製作。紫薯牛乳慕斯蛋糕(HKD42)海綿蛋糕以紫薯同牛奶製作,輕軟柔滑,散發淡淡香氣,啱晒配搭咖啡!買完花想輕輕食少少野嘅你就要試下啦! Cafe Royal Garden 電話:2762 7608 地址:太子花園街232-242號禮賢大廈地下F舖 營業時間:星期一至日: 10:00-22:00

0

【遠離鬧市煩囂 樓梯上的咖啡小店】Common Ground

如果有一日假期,可能好多人都會選擇行街睇戲,但對小編嚟講,行街睇戲已經太疲累……其實一個假期,只需要一間咖啡店,一杯咖啡,就可以消磨一個下午。生活繁忙,一間好嘅咖啡店除左可以品嚐到高品質嘅飲品同食物之外,仲可以令自已身心放鬆,碰上咖啡店Common Ground,就帶比小編依種感覺。 富有歐洲風情嘅擺設,都係經由店主精心挑選出嚟。店內售賣各種手作同精品,每類寄賣作品各有特色,總有樣野你會鍾意。 望住山邊,慢慢令自己生活節奏放慢,調整自己心情重新上路,依間咖啡店的確有種魔力。 Scrambled Egg with Toast (HKD75) 炒蛋嫩滑而充滿蛋香,加上炒雜菇,令人垂涎三尺。多士經過烤焗,香草味散發晒出嚟,質感好鬆脆。沙律菜配上黑醋,酸甜嘅味道為整個組合帶嚟清新感覺。 Latte(HKD42) 咖啡奶泡打得好綿密,入口好滑而且味道香濃。咖啡飲到落底拉花圖案都無乜點變形,滿足晒視覺及味覺。 Common Ground 地址:中環城皇街19 號地下 電話:2818 8318 營業時間:星期一至五:10:00-19:00 星期六至日:09:30-19:00

0

【鬧市中避世 寄情第三街咖啡屋】The Hideout Coffee House

西營盤除咗多歷史痕跡外,特色食店都唔少。位於第三街嘅The Hideout Coffee House,就係小編Hea嘆新地標。裝修行簡約風,就連店内裝飾都好文藝風。Cafe有兩層,一樓有Bar枱位,可以清楚睇到第三街,邊嘆咖啡邊欣賞街景最適合不過,二樓空間就較大,想同朋友輕鬆享受一杯咖啡嘅時間,就可以上二樓。 Signature Croissant(HKD78) Croissant係每日新鮮運送到店,客人點單後先現場加工製作,夠曬貼心。兩個Croissant分別搭配兩種醬料,咸嘅係蛋黃醬,甜嘅有啲似乳酪味,味道感覺好清新。原隻蘑菇經焗完後,蘑菇汁無流失反而係鎖住喺裏面,再搭配特選煙肉,食起嚟十分滿足,清爽蔬菜更提升清新感覺。提提大家,熱賣嘅Signature Croissant每日供應數量有限,想試就要把握機會啦。 外酥内軟嘅Special Croissant(HKD34)裡面有意想不到嘅驚喜!裡面竟然係煙鴨胸同沙律菜,仲配上蛋黃醬,除咗充滿黄油馥郁嘅香氣,咀嚼時集清新豐腴口感於一身。除咗Croissant,專業嘅咖啡都係亮點。Dark Mocha(HKD46)特別在於帶啲黑朱古力味,但又不會蓋過咖啡香味。咖啡師選用黑朱古力粒做Ganache做成醬,味道回甘轉甜,非常柔滑。 Panna Cotta(HKD48)奶凍加入了伯爵茶調製,香味十分濃郁。頂部再放以紅酒煮過嘅啤梨同埋新鮮士多啤梨玫瑰,酸甜口味嘅配搭特別匹配,瑰麗外形令人一見傾心! 一於約埋三五知己去嘆下啦,夜晚仲會不定時有Party架! The Hideout Coffee House 地址:西環西營盤第三街63號地下B舖 電話:2858 1012 營業時間:星期一至五: 08:00-18:00 星期六、日及公眾假期: 10:30-19:00

0

【三眼仔現身觀塘!製成抹茶鮮奶超像真】Lava Java

聽聞觀塘Lava Java除咗環境舒服,仲有三眼仔抹茶鮮奶同龍貓朱古力等多種外形可愛趣致嘅飲品!想開開心心享受悠閒舒適嘅下午,不妨去一去,盡情享受得意飲品、美食同埋舒適優遊自在嘅時光。 餐廳裝潢簡單別緻,玻璃窗透出柔柔日光,加上木製傢俱,感覺清新舒服。 芝士漢堡配韓式烤肉汁(HKD148)漢堡質感比較軟熟,牛肉唔會過熟過硬,口感類似牛肉半生熟嘅粉嫩感,配上新鮮生菜蕃茄再輕輕烤過嘅芝士,份外開胃。餐廳特別為重口味嘅朋友配搭韓式烤肉汁,大家可以自己調味,相當貼心。薯條好新鮮,配搭漢堡一齊食好滿足,套餐會包埋前菜同咖啡或茶,份量剛剛好。 豬肋骨併大蝦(HKD228)由於烹調時間十分足夠,所以豬肋骨非常易切開,表層醬汁十分濃厚但唔會蓋過豬肉原有嘅味道。香烤大蝦非常鮮味,帶有蝦膏,入口爽甜帶點香烤味道。搭配嘅蔬菜鮮甜爽口,食完整碟感覺唔膩。 香辣蝦乾扁意粉配大蝦(HKD158)香烤大蝦爽甜彈牙,意粉混有特選蝦乾鹹香味十足,香辣蕃茄醬汁非常醒胃,配上車厘茄、粟米同洋蔥,帶出絲絲甜味。扁意粉口感偏軟,盡吸海鮮同香辣蕃茄味,較適合重口味嘅朋友享用,套餐會包埋前菜同咖啡或茶! 軟殼蟹南瓜汁意大利飯(HKD168)南瓜味道較為甜,但混入芝士,兩者融合之下味道剛好平衡,唔會搶味,更添幾分柔滑,食起嚟感覺creamy!米飯較腍身但配以蟹籽粒粒爽口新鮮,露筍令口感更豐富。主角軟殼蟹脆口鮮味,加上意大利飯,食落感覺唔熱氣亦唔膩,剛剛好非常融和。套餐仲會包埋前菜同咖啡或茶添! 三眼仔抹茶鮮奶(HKD36)三眼仔:「你救咗我地,我地會永遠感激你㗎!」對唔住呀,你咁可愛,小編最後都飲咗你落肚……呢杯除咗有三眼仔嘅得意外形之外,味道亦都好出色㗎!整杯抹茶鮮奶飲落茶味大於奶味,入口微甜,茶味醇香但係唔澀,味道控制得啱啱好。鍾意三眼仔或者抹茶鮮奶嘅你要試試啦! 除咗有三眼仔抹茶鮮奶之外,龍貓朱古力(HKD38)都好可愛㗎!大家嚟到可以揀焦糖朱古力或者薄荷朱古力兩種口味。小編今次試咗薄荷味,薄荷味道清香,而朱古力味好濃郁,味道都幾夾,味道屬於微甜。如果鍾意較甜口味嘅朋友可以試試焦糖味,都一樣有可愛龍貓㗎! Lava Java 地址:觀塘開源道71號王子大廈5樓B室 電話:2111 1466 營業時間:星期一至六:11:00-22:00