Tagged: 斧頭扒

0

【西班牙米芝蓮食府進駐尖沙咀 歎鮮香惹味新派歐洲菜】Amelia

成日都係日本同台灣嘅米芝蓮餐廳過江嚟香港,今次终於有歐洲餐廳喇!呢間位於尖沙咀海港城海邊嘅Amelia,總店喺西班牙聖塞巴斯提安好出名,因為行政總廚 Paulo Airaudo喺歐洲多間米芝蓮餐廳任職過,而Amelia就係佢自己創辦嘅其中一間餐廳,仲唔使一年就攞到米芝蓮一星。呢度嘅菜式分量足,結合唔同煮方炮製出啱港人口味嘅新派歐洲菜,令你食到唔同嘅鮮香味。 呢度環境開揚,空間感十足;向海仲有少量露天座位,俾你喺寫意嘅感覺下用餐。 特色招牌菜之一嘅自家製麵包配牛骨髓(HKD148),將Rubia Gallega嘅牛骨烤到焦香,配埋海鹽牛油一齊搽喺自製嘅煙韌大麵包;肉味濃郁惹味,有別於平時清爽型嘅前菜喎。 生蠔配伊比利亞風乾後腿火腿、蕃茄及柚子(HKD288/6pcs)雖然都係即開生蠔,但配料就創新好多喇!呢款荷蘭生蠔有海水味亦都算creamy,但配上用風乾火腿製成嘅「果凍」、蕃茄汁製成嘅白色泡沫,最後加埋柚子粒,唔止味道層次豐富,鮮味中又幾醒胃㗎。 想試再特別啲嘅「生蠔」?呢款牛肉生蠔他他伴醃芥末籽配酵母麵包(HKD188)就喺紐西蘭進口生牛肉加入切細咗嘅荷蘭生蠔,入口有濃郁嘅肉味之餘真亦食到生蠔嘅鹹鮮味。加上有芥末籽同橄欖油調味,口感幼滑唔油膩。 歐洲菜好多時都用海鮮入饌,大蜆及海膽西班牙圓米燉飯(HKD228)就將蜆嘅甜味完全滲入湯汁同西班牙圓米,加埋香港人鍾意食嘅海膽,入口就更加香濃幼滑喇。 肉類都有唔少選擇,紐西蘭天然放養雞配菊芋及蘋果(HKD238)就將紐西蘭天然放養雞烤到皮脆肉嫩,配上蘋果蓉同菊芋脆片,蘸埋一齊食就鹹香中帶啲甜味。 鍾意食牛嘅朋友有兩個推介俾你哋,獨食嘅可以揀澳洲和牛牛肋肉伴黑蒜茴香醬及胡蘿蔔泥(HKD368)。以80度慢煮和牛牛肋肉4個鐘後,油脂豐富,但入口出奇地爽口喎!分別淋埋黑蒜茴香醬,或者蘸胡蘿蔔泥,就可以試到濃味同清香兩種味道喇。 炭燒澳洲和牛斧頭肉眼扒伴冬季黑松露(HKD1,488/重約1.5 公斤)啱晒一班人開心share!用上本地同日本炭燒嘅斧頭肉眼帶有陣陣炭香,加上海鹽、冬季黑松露就令味道更加鹹香。仲有幼滑濃稠嘅薯蓉、特濃紅酒醬同香烤蘿蔔俾你配搭出唔同嘅滋味添。 甜品之中一定要試招牌嘅魚籽醬伴香蕉及冧酒雪糕(HKD298),雪糕質感有少少偏向雪葩,酒味好濃,因為佢哋將Zacapa 23加入雪糕呀!配上烤香蕉製成嘅香蕉蓉同魚籽醬,令每啖都有唔同層次。   Amelia 地址:尖沙咀廣東道3-27號海港城海運大廈地下OTG63號舖 電話:3705 1983 營業時間:星期一至四:12:00-23:00,星期五至日及公眾假期:12:00-00:00

0

【平食高質扒啱晒食肉獸 重量級斧頭扒大過塊面】Mini Friday

成日聽到人哋話去高級扒房食斧頭扒好正咁,不過礙於價錢關係(通常都要成千蚊一位),小編到依家都未朝聖過。今次就想為大家介紹一個可以平食高質斧頭扒嘅地方,Mini Friday係一間多國菜餐廳,餐牌上嘅選擇相當多元化,大廚想做到精緻而又合理嘅收費,令大家唔使一定要捱貴價先食到正嘢!現場仲有音樂表演添,聽住歌食扒,幾Chill喎。 今次為大家介紹精選四人套餐(HKD1438/斧頭扒餐),依家有88折,即係大概HKD1222再加一,每人俾350蚊就食到呢個超豐富嘅Set。包頭盤(10選4)、餐湯、主菜(5選一)、副菜(8選2)、甜品(2選1)同餐飲4杯。 頭盤可以10選4,真係幾多選擇,每個人都可以揀到自己心水菜式再Share!小編覺得頭盤分量剛剛好,每人都一定食到唔使爭!味道方面水準平均都幾高,黑松露炒野菌真係超香黑松露味呀!而且水牛城雞翼亦相當入味,誠意滿分。 餐湯有意大利雜菜湯或者是日餐湯可以揀,通常一紅一白咁啦,一個雜菜湯另一個就會係忌廉類嘅湯。今日小編試呢個南瓜忌廉湯,幼滑得嚟超有南瓜味,非常濃稠。感覺應該係用咗新鮮南瓜磨蓉再隔渣,南瓜味香濃得嚟又幼滑,小編Like爆呀! 呢塊斧頭扒來自美國,有成公斤重㗎,唔怪得拎起大過塊面啦,超重量級呀!小編覺得呢個分量如果係女仔Gathering嘅話可能要6個人先食得晒,4個人可能太飽喇!因為接住落嚟仲有副菜同甜品,要留少少肚呀! 通常出街食扒遇到最普遍嘅情況係「廚師心中嘅五成同你嘅五成唔一樣」。不過呢度食就冇呢個煩惱喇,因為佢哋將斧頭扒表面烤熟後,會提供一個迷你烤爐俾你自己燒,咁就可以解決一個朋友想食生啲、一個朋友想食熟啲嘅煩惱啦,乜都自己話事,食幾多成熟都得呀! 食完主菜已經要捧住個肚腩喇,不過見到副菜都好吸引,繼續努力啦!羊架分量比想像中大,一客有三大塊。羊架上枱時呈半熟狀態,切開可以看到顏色粉嫩,而且味道不羶,感覺好新鮮!卡邦尼意粉嘅溫泉蛋好出色,配埋醬汁口感超Creamy! 甜品有兩款可選,分別係原隻低脂水蜜桃或者菠蘿雪葩。頭先食完咁多肉,其實有一定嘅油膩感,而呢個雪葩就正正可以幫助解膩同消滯。用咁Fresh嘅甜品嚟做呢餐飯嘅完結真係好貼心! 至於餐飲同樣有非常解膩嘅選擇,除咗一般咖啡、茶之外,可以用半價選購任何飲品四杯。小編就揀咗水果茶,都係貪佢解膩!水果鮮甜唔澀,睇嚟係用新鮮嘢喎!另外如果大家3日前預約嘅話就可以免費升級為Moctail或者Cocktail,大家記住早啲預約喇! 除咗斧頭扒之外,4人餐其他選擇都有88折㗎!Happy Friday帶埋朋友一齊嚟試吓,一定有驚喜!   Mini Friday 地址:觀塘興業街4號 The Wave 3樓 電話:3705 9174 營業時間:星期一至五:12:00-16:00;18:00-00:00;星期六至日:12:30-16:00;18:00-00:00 (優惠期由即日起至2018年12月10日)